[ექსკლუზივი] გოგიტა გოგუა: აქ ყველაფერი საუცხოოდაა... ასეთ კლუბში თამაში ნამდვილად სასიამოვნოა

გორის "დილამ" ორი ტრანსფერი "გაჩარხა". გუნდს ყაზახური "ყიზილ ჟარიდან" შეუერთდა საქართველოს ნაკრების ნახევარმცველი გოგიტა გოგუა, პოლონური "იაგელონიიდან" კი ქვეყნის ასაკობრივი ნაკრებების მეკარე ლუკა გუგეშაშვილი...

"ლელომ" გორული კლუბის ორივე ახალწვეულთან ჩაწერა ინტერვიუ. დავიწყოთ გოგუათი, ვინც ვრცლად და საინტერესოდ ილაპარაკა.

რა თქმა უნდა, წლების განმავლობაში ყაზახეთში მოთამაშე ფეხბურთელს ამ ქვეყნის ნაკრებზეც დავეკკითხეთ, რომელიც ერთა ლიგაში ჩვენი ქვეყნის უპირველესი გუნდის მთავარი მოწინააღმდეგე იქნება...

- მესამედ დაბრუნდით "დილაში", მაგრამ შეიძლება ითქვას, რომ გუნდი მთლიანად გადახალისებული დაგხვდათ. როგორ მიდის ადაპტაციის პროცესი?

- გულწრფელად ვიტყვი, რომ "დილაში" ყველაფერი გადასარევადაა. უკვე ვივარჯიშე გუნდთან ერთად და ვითამაშე კიდეც ამხანაგურ შეხვედრაში. არიან როგორც გამოცდილი, ისე ახალგაზრდა ბიჭები. გუნდი არის ამბიციური და იბრძვის მაღალი მიზნებისათვის. ასეთ კლუბში თამაში ნამდვილად სასიამოვნოა.

- თუ იყო სხვა ვარიანტები და რატომ შეაჩერეთ არჩევანი "დილაზე"?

- იყო რამდენიმე შემოთავაზება, მაგრამ გადავწყვიტე, უცხოეთზე გარკვეული ხნით პაუზა ამეღო. ოჯახთან ერთად მინდოდა ყოფნა. ყველამ იცის, კარგა ხანია, უცხოეთში ვთამაშობ. როცა "დილადან" მივიღე შეთავაზება, ბევრი აღარ მიფიქრია. ამბიციური გუნდია, ევროთასებზე ასპარეზობა სურს... ეს ჩემთვის დიდი მოტივაციაა.

- რას იტყვით ყაზახეთში გატარებულ პერიოდზე, სადაც ჯერ "ირტიშის" ღირსებას იცავდით, მერე "ორდაბასის", "ოკჟეტპესისა" და ბოლოს "ყიზილ ჟარის"?

- ორნახევარი წლის განმავლობაში ვითამაშე ყაზახეთში და ამ ქვეყანაზე კარგის მეტს ვერაფერს ვიტყვი. ყაზახეთი იზრდება, როგორც ქვეყანა და, რაც უფრო საინტერესოა, როგორც საფეხბურთო ქვეყანა.

მხოლოდ ის კმარა ჩემი სიტყვების დასტურად, თუ როგორ თამაშობენ ყაზახური კლუბები ევროთასებზე. რომელ გუნდშიც ვიყავი, გულშემატკივრების მხრიდან ყველგან ძალიან დიდ დაფასებას ვგრძნობდი.

- ყაზახეთზე მოგვიანებით ისევ ვილაპარაკებთ. ახლა კი იმას გკითხავთ, საქართველოს ჩემპიონატს თუ ადევნებდით თვალს ამ ბოლო დროს?

- საქართველოს ჩემპიონატს ვუყურებდი მაშინაც, როცა ვთამაშობდი რუსეთში და ვუყურებდი ყაზახეთში ასპარეზობის დროსაც. მიმაჩნია, რომ არის გარკვეული პროგრესი თუნდაც იმ კუთხით, რომ გამოჩნდა რამდენიმე ძლიერი ლეგიონერი. უბრალოდ, ვისურვებდი, რომ თამაშებში ყოფილიყო უფრო მაღალი ტემპი.

მიმაჩნია, რომ თუ საქართველოს ჩემპიონატის დონე არ ამაღლდა, ისე ძალიან რთული იქნება მნიშვნელოვანი სანაკრებო პროგრესის მიღწევა.

- "დილაში" თქვენი დაბრუნება იმითაც ხომ არ იყო გამოწვეული, რომ ვლადიმირ ვაისის თვალწინ იტრიალებთ? ახლოვდება ერთა ლიგა, უნიკალური შანსი ქართული ფეხბურთისთვის, 34 წლის ფეხბურთელსაც თავისუფლად შეიძლება, ეროვნულ გუნდში მოხვედრის ამბიცია ჰქონდეს...

- რა თქმა უნდა, ნაკრები უმთავრესია ფეხბურთელისთვის. მაგალითად, შეიძლება პირადად მე ოდესმე კლუბში რაღაც დამიკლია თამაშის დროს, მაგრამ ნაკრებში სადაც უნდა მეთამაშა, 100 და მეტი პროცენტით ვიხარჯებოდი სულ. ერთა ლიგა ჩვენთვის დიდი შანსია. ჩემ გარეშე თუ ჩემთან ერთად, მინდა ნაკრებს წარმატება ვუსურვო.

- ფაქტია, წარმატების იმედი ყაზახებსაც აქვთ...

- რა თქმა უნდა! აქვთ და მერე როგორი! ბოლო წლებში ყაზახების საწუხარი ის იყო, რომ საკლუბო ფეხბურთის საქმე თუ კარგად მიდიოდა, სანაკრებო ასპარეზზე არ იყო ყველაფერი რიგზე.

მე ვიტყოდი, რომ ვითარება კარდინალურად შეიცვალა მას შემდეგ, რაც გუნდი ბულგარელმა მწვრთნელმა სტანიმირ სტოილოვმა ჩაიბარა.

ეს არის ძალიან მაღალი დონის მწვრთნელი, რაც თუნდაც მისი გაწვრთნილი "ასტანას" შედეგებით დასტურდება ევროთასებზე. მე ვიცნობ ყაზახეთის ნაკრების პრაქტიკულად ყველა ფეხბურთელს და, დამიჯერეთ, ისინიც ზუსტად ისევე იმედიანად არიან განწყობილები ერთა თასის სტარტის წინ, როგორც - ჩვენ.

დიდი ნაბიჯი გადადგა წინ ამ ქვეყნის ნაკრებმა სტოილოვის მისვლის შემდეგ. მათი თვითრწმენაც გაიზარდა. ჩვენ რომ თბილისში 1:1 ვეთამაშეთ ყაზახეთს, ის გუნდი აღარ არის, გაცილებით უკეთესია. ასე რომ, მიდგომა, თითქოს ყაზახეთია და იოლად მოვუგებთ, არ შეიძლება.

ახალი გუნდი სწრაფ და შემტევ ფეხბურთს თამაშობს. ვფიქრობ, შანსები 50/50-ზეა. ბოლომდე კონცენტრაცია და ბრძოლა გვმართებს. აქვე უნდა ვთქვა, რომ ლატვიაც აუცილებლად სათვალავშია ჩასაგდები.

- ისევ "დილაზე" გკითხავთ. როგორ ფიქრობთ, ევროთასებზე გასვლა რეალურია?

- რა თქმა უნდა, რეალურია! გუნდში ისეთი კონტინგენტია, მჯერა, ამის მიღწევას შევძლებთ...

- ქომაგი სიხარულით შეხვდა თქვენს დაბრუნებას. მას იმედი აქვს, რომ გოგიტა გოგუა შემოიტანს საქართველოს ჩემპიონატში იმას, რაც მას ძალიან აკლია - ჟინს, თავდადებას, ტემპს...

- მადლობა მინდა გადავუხადო ჩემს ქომაგებს! ვფიქრობ, 28-35 წელი ფეხბურთელის კარიერაში არის სიმწიფის ხანა. ამ დროს შენ გაქვს ისეთი რამ, რაც ადრე ვერაფრით გექნებოდა და ეს არის ყველა ნიუანსში წვდომის ნიჭი. ეს მოაქვს ასაკს და გამოცდილებას. მინდა, ჩემი თამაშით ქომაგი ისევ გავახარო.

ყოველდღიური სპორტული გაზეთი "ლელო"
2110
მკითხველის კომენტარები / 1 /
გორი2
0
მესამე და სამართალი!
მსგავსი ამბები
რუბრიკის სხვა სიახლეები
;