გოჩა სვანიძე: მომავლის არ გვეშინია! - ნაკრები თავს არ შეირცხვენს

საქართველოს ნაკრებმა  "რაგბი ევროპის ჩემპიონატის" წლევანდელი გათამაშება წარმატებით დაიწყო.

ბელგიისა და გერმანიის ნაკრებებთან მატჩების შუალედში კი, აქამდე უპრეცედენტო ფაქტი მოხდა - "ბორჯღალოსნებმა" მსოფლიოს ერთ-ერთ საუკეთესო ნაკრებთან, ინგლისის ეროვნულ გუნდთან, მათივე თხოვნით, ერთობლივი წვრთნა გამართეს.

თამამად შეიძლება ითქვას, რომ როგორც ნაკრების, ისე ქართული რაგბის ისტორიაში გარდამტეხი ეტაპი დადგა. ყოველივე ამის შესახებ საქართველოს რაგბის კავშირის პრეზიდენტს, გოჩა სვანიძეს, ვესაუბრეთ.

ინგლისთან მომავალითა ნამშრომლობა შესაძლებელია

- ახლახან საქართველოს ნაკრებმა ინგლისის ეროვნულ გუნდთან ერთობლივი წვრთნა გამართა, რამდენად მნიშვნელოვანია ეს ჩვენი გუნდისთვის და ჩატარდება თუ არა მსგავსი ვარჯიშები მომავალშიც?

- ცხადია, ჩვენთვის დიდი პატივია, როცა მსოფლიოს ერთ-ერთი საუკეთესო გუნდის ხელმძღვანელობა საქართველოს ნაკრების შერკინებას საუკეთესოდ აღიარებს.

ამ დონის გუნდთან ჩვენი ერთობლივი ვარჯიში უაღრესად სასარგებლოა და იმედი მაქვს, სარგებელს არა მარტო მორკინალები, არამედ სხვა სათამაშო რგოლების მოთამაშეებიც ნახავენ.

მსგავსი ერთობლივი წვრთნების მომავალში გამართვაზე ჯერ ვერაფერს გეტყვით. ამაზე მოლაპარაკება არ ყოფილა. ვნახოთ, ყველაფერი შესაძლებელია. ეს უპრეცედენტო ფაქტი იყო. ინგლისელებმა თავისი სახსრებითა და მოლოდინით, რომ ეს მათთვისაც სასარგებლო იქნებოდა, მიგვიწვიეს ერთობლივ წვრთნაზე.

- ეროვნულმა ნაკრებმა სეზონი ორი შთამბეჭდავი გამარჯვებით დაიწყო. რა გეგმები აქვთ წლეულს "ბორჯღალოსნებს"?

- შარშან "ევროპა რაგბის ჩემპიონატზე" პირველობა რუმინეთს დავუთმეთ. წლეულს ეს არ უნდა განმეორდეს. შეიძლება ითქვას, რომ საქართველოს ნაკრებს მაშინ პატარა ჩავარდნა მოუვიდა.

ეს ყველა გუნდს მოსდის და ამაში გასაკვირი არაფერია. წლეულს ეს ჩავარდნა აღარ უნდა მოხდეს. ივნისის ტესტებზე ძალიან სერიოზული მატჩების გამართვა მოგვიწევს.

ფიჯიში ჯერ ადგილობრივ, შემდეგ კი ტონგას ნაკრებს დავუპირისპირდებით. მერე უკანა გზაზე იაპონიაში "შევივლით" და ამ ქვეყნის საკმაოდ ძლიერ ეროვნულ ნაკრებს ვეთამაშებით. სანამ კუნძულებზე გავემგზავრებით, მაისის ბოლოს თბილისში ერთ მატჩს ფრანგ "ბარბაროსებთან" გავმართავთ.

საინტერესო მატჩები გველის ნოემბრის ტესტებზეც. უკვე გადაწყვეტილია, რომ ერთ მატჩს იტალიის ნაკრებთან გავმართავთ სტუმრად. თბილისში კი, სავარაუდოდ, ისევ კუნძულელები ან, შესაძლოა, იაპონიაც ჩამოვიდეს.

ჩვენთვის აუცილებელია, მთელი სეზონის განმავლობაში მოხდეს გუნდის შემადგენლობის ოპტიმიზაცია, შეთამაშება, ბირთვის შეკვრა. ყოველივე ამასთან ერთად, ცხადია, გამარჯვებები გვჭირდება.

უკეთ შეიძლებოდა...

- ახლახან "ბათუმმა" პირველად იასპარეზა ევროპის საკლუბო ტურნირში. როგორ შეაფასებდით ბათუმელების გამოსვლას ევროსარბიელზე?

- სამწუხაროა, რომ აღნიშნულ ტურნირში მონაწილეობა ვერ მიიღო ქვეყნის ჩემპიონმა გორის "ჯიქმა". ამ შემთხვევაში, სახელმწიფო ვერ დაგვიდგა გვერდში. გორის საკრებულომ ჯერ დაამტკიცა "ჯიქისთვის" ბიუჯეტიდან თანხის გამოყოფა, შემდეგ კი, გაუგებარი მიზეზის გამო გააუქმა.

როგორც ჩანს, ბათუმის მერიას მეტი სიყვარული აქვს რაგბის მიმართ. თანაც, ის სარაგბო კლუბ "ბათუმის" თანადამფუძნებელია.

"ბათუმს" ევროსარბიელზე დებიუტი ჰქონდა და ამის კვალობაზე ურიგო შედეგი არ უჩვენებია. თუმცა, ამ გუნდს პოტენციალი მეტი აქვს და უკეთესადაც შეეძლო ეთამაშა.

სამწუხაროდ, რუმინული "ტიმიშოარა" დაუძლეველი ბარიერი აღმოჩნდა. იმედი მაქვს, რომ მომავალში "ბათუმიც" და სხვა ქართული კლუბებიც ევროპულ ტურნირებში უფრო წარმატებით იასპარეზებენ.

სახელმწიფო პასიურობს

- რა სიახლეებია საქართველოს რაგბის კავშირის მარკეტინგულ საქმიანობაში?

- ვცდილობთ, რაგბის ქომაგებს ახალ-ახალი სანახაობა შევთავაზოთ. გვინდა, შევქმნათ ბევრად უფრო კომფორტული გარემო. გვაქვს რამდენიმე პროექტი და როცა მათ ხორცი შეესხმება, ცხადია, საჯაროდ განვაცხადებთ.

უკვე გადაწყვეტილია, საქართველოს ჩემპიონატის დასრულების შემდეგ, აღმოსავლეთ და დასავლეთ საქართველოს ნაკრებების დაპირისპირება. გამარჯვებული გუნდის ბაზაზე შეიქმნება ეგრეთ წოდებული "საქართველო XV", რომელიც ივნისში რამდენიმე მატჩს გამართავს.

ამ ეტაპზე მიმდინარეობს მოლაპარაკება და იმედი გვაქვს, რაგბის ქომაგი მინიმუმ ორ მატჩს იხილავს ამ გუნდის მონაწილეობით.

შესაბამისად, ვეძებთ სპონსორს ან სპონსორების ჯგუფს ამ გუნდისთვის. ასევე გვინდა მოვიძიოთ საქართველოს ჩემპიონატის გენერალური სპონსორიც. სამწუხაროდ, კერძო სექტორს ძალიან უჭირს თავისი პირდაპირი საქმიანობის გარდა სხვა ინვესტიციების გაღება. ეს ქვეყანაში საერთო ფონია.

- საქართველოს ნაკრების წარმატებების პარალელურად სულ უფრო მეტს ლაპარაკობენ ჩვენი გუნდის ექვსი ერის გათამაშებაში ჩართვაზე, რაც ახლო პერსპექტივა ნამდვილად არ არის. მუშაობს თუ არა რაგბის კავშირი ალტერნატიულ გზებზე. მაგალითად, ფრანჩაიზის შექმნასა და რომელიმე ძლიერ ტურნირში ასპარეზობაზე?

- ამ თემაზე აქტიურად ვმუშაობთ, როგორც სამხრეთ ნახევარსფეროსთან ისე, კელტთა ლიგასთან. სულ გვპირდებიან, მაგრამ დაპირებები ჯერჯერობით დაპირებებად რჩება. რაც ძალიან საწყენია.

ეს ერთადერთი გზაა ნაკრების დონის სწრაფად ასაწევად და, თუ უახლოეს მომავალში შეუძლებელი იქნება რომელიმე ელიტარულ ტურნირში ჩვენი სანაკრებო გუნდის ჩართვა, მოგვიწევს სხვა, ალტერნატიული გზების გამონახვა.

ქართულ რაგბის დიდი პოტენციალი გააჩნია და მარტოოდენ სახელმწიფოს მხრიდან სათანადო ხელშეწყობის პირობებშიც დამოუკიდებლად მივაღწევთ მიზანს.

- ბოლო პერიოდში ქართული რაგბის პროგრესის ერთ-ერთი მიზეზი სარაგბო ინფრასტრუქტურის გაუმჯობესებაა. რა სიახლეებია ამ მხრივ ამჟამად?

- ასოციაცია "ატუ" ("ქართუს" შემადგენელი ერთეული) ასრულებს სტადიონების მშენებლობას თელავში და ნუცუბიძის პლატოზე. ამ ბაზებზე იქნება ულტრათანამედროვე ხელოვნურსაფრიანი ისეთი მოედანი, რასაც "მსოფლიო რაგბის" სტანდარტები ითხოვს. ამით "ქართუს" დახმარების პროგრამა ინფრასტრუქტურის შექმნის მიმართულებით იწურება.

ცხადია, მადლობის მეტი რა გვეთქმის. თანაც, იმედი გვაქვს, რომ ჩვენი თანამშრომლობა, თუნდაც იმავე ინფრასტრუქტურის გაუმჯობესების მიმართულებით ისევ გაგრძელდება.

რაც შეეხება სახელმწიფოს მონაწილეობას. დაგეგმილი ათი მოედნის გაკეთება მსოფლიოს ახალგაზრდულ ჩემპიონატამდე არ მოესწრო. აღმოჩნდა, რომ რომელიღაც სლოვაკურმა კომპანიამ "გადაგვაგდო".

მერე შეგვპირდნენ, რომ ათ მოედანს მაინც გააკეთებდნენ და აქედან ხუთი გასული წლის ბოლოს მზად უნდა ყოფილიყო - სამი თბილისში და ორი ქუთაისში.

მოედნები კი კეთდება, მაგრამ ჯერ დასრულებული არ არის. ხელოვნურსაფრიანი მოედნები სტანდარტს არ შეესაბამება. ბუნებრივსაფრიან მოედნებს კი კომისია სწავლობს.

ამას უნდა მოჰყოლოდა მოედნების მშენებლობის მეორე ეტაპი, მაგრამ ფაქტია, რომ ის გაჩერებულია. ოფიციალური მიზეზი ჩვენთვის უცნობია.

2015 წელს სახელმწიფომ ქალაქის მასშტაბით გამოგვიყო ტერიტორიები, სადაც მსოფლიოს ახალგაზრდული ჩემპიონატისთვის უნდა აშენებულიყო მოედნები. ჩვენ ამ ეტაპზე ვცდილობთ, მოვიძიოთ სპონსორები, უფრო ზუსტად კი, კერძო ინვესტორები, რომლებიც ორმხრივი ინტერესის შემთხვევაში, ამ მოედნებს აგვიშენებენ.

- მიუხედავად სიძნელეებისა, საქართველოში რაგბი ერთ-ერთ ყველაზე წარმატებულ სპორტის სახეობად ითვლება. რა გვჭირდება კიდევ საიმისოდ, რომ ქართულმა რაგბიმ წარმატების უმაღლეს ნიშნულს მიაღწიოს?

- რაგბის წარმატებას რამდენიმე პარამეტრი განაპირობებს: გამართული ინფრასტრუქტურა, თანამედროვე სტანდარტებით აწყობილი სამედიცინო მომსახურება, რაგბის კავშირის მენეჯმენტის დაუღალავი შრომა, კარგი მწვრთნელები, სწორი კვება, თანამედროვე ტექნოლოგიები, მორაგბეთა ფიზიკური და პროფესიული მომზადება და ერთიანი გუნდური სულისკვეთება მოგებისათვის, რაც საბოლოო ჯამში იმ ფინანსურ რესურსს უკავშირდება, რომელიც ამ ჩამონათვალს მაქსიმალურად ქმედუნარიანს გახდის.

უნდა გითხრათ, რომ იმ შედარებით მწირი ფინანსური რესურსის პირობებშიც კი, რომელიც ჩვენ გვაქვს, მაქსიმალურზე მაღალ შედეგს მივაღწიეთ. შეიძლება ითქვას, რომ მარგი ქმედების კოეფიციენტი ერთიანს უტოლდება.

ქართული რაგბი დღეს წარმატებული სპორტია და ბევრწილად ქმნის საქართველოს იმიჯს ქვეყნის გარეთ. ჩვენი მიზანია, მსოფლიოს უძლიერეს გუნდთა ჩამონათვალში შევიდეთ.

ამის ადამიანური რესურსი გვაქვს. ფინანსური რესურსის დეფიციტის შევსებაში, ვფიქრობ, მოგვეშველება, როგორც კერძო სექტორი, ასევე სახელმწიფო. ეს ჩვენს საერთო ინტერესებშია.

ვართ თუ არა მზად ექვსი ერისთვის

- წლეულს, როგორც თქვენ ბრძანეთ, გველის დიდი ხნის ნანატრი მატჩი იტალიასთან, რა მოლოდინები გვაქვს ამ მატჩისგან და რა პერსპექტივებთან არის დაკავშირებული მატჩის შედეგი საქართველოს ნაკრებისთვის?

- იტალიის ნაკრებთან მომავალი მატჩი საქართველოს ნაკრებისთვის არის იმ პროგრამის შემადგენელი ნაწილი, რომელიც მსოფლიო რაგბიმ განუსაზღვრა საქართველოს - საშემოდგომო ტესტებზე მინიმუმ ერთი მეტოქე გვეყოლება ელიტური სარაგბო ქვეყნის ნაკრები.

წლეულს ეს გახლავთ იტალია. ჩვენს დაპირისპირებას არა მხოლოდ ქართველი გულშემატკივარი, არამედ მთელი მსოფლიო ინტერესით ელის, ვინაიდან მან უნდა გასცეს პასუხი დიდი ხნის მომწიფებულ კითხვას - არის საქართველო მზად თუ არა, ითამაშოს ექვსი ერის ჩემპიონატი?

იტალია, დღიდან მისი მონაწილეობისა, ამ ტურნირში არის აუტსაიდერი, რაც გარკვეულ იმედგაცრუებას იწვევს. რამდენად კონკურენტუნარიანია საქართველო, ამას ჩვენი დაპირისპირება გვაჩვენებს.

ერთადერთი, რაც შემიძლია ხმამაღლა განვაცხადო: საქართველოს ნაკრები თავს არ შეირცხვენს. დრო ჩვენს სასარგებლოდ მუშაობს, საქართველოს ეზრდება ღირსეული ცვლა, ჩვენ მომავლის არ გვეშინია. ის, რასაც ვერ მივაღწევთ დღეს, მომავალში ჩვენი გახდება. გამარჯვებები წინაა!..

ყოველდღიური სპორტული გაზეთი "ლელო"
3009
მკითხველის კომენტარები / 1 /
gizog
0
ბატონო გოჩა, გისმინოთ უფალმა და ყველა სურვილი და პროგნოზი აგხდენოდეთ ქართველთა გასახარად.
მსგავსი ამბები
რუბრიკის სხვა სიახლეები
;