ინტერვიუ დავით ქუბრიაშვილთან: ფარ-ხმალი არასდროს დამიყრია

"მონპელიეს" ბორჯღალოსანი ბურჯი დავით (დუდუ) ქუბრიაშვილი ხანგრძლივი ტრავმის შემდეგ მოედანს ორი თვის წინათ დაუბრუნდა.

იგი ბოლო ტურებში სასტარტო შემადგენლობაში იდგა და ფრანგული ტოპ 14-ის ლიდერ გუნდს ჩემპიონობის მოპოვებაში დაეხმარება.

რეგულარული გათამაშება ქუბრიაშვილის "მონპელიემ" მოიგო და ის საჩემპიონო პლეი ოფში ნახევარფინალიდან ჩაერთვება და სანუკვარ ჯილდომდე მხოლოდ ორი ნაბიჯი დარჩება.

მაგრამ ქუბრიაშვილი მიიჩნევს, რომ ამ ორი ნაბიჯის გადადგმა რთული იქნება:

"ბოლო წლებში "მონპელიე" გაიზარდა და საპლეიოფო ექვსეულში რეგულარულად ხვდება. რა თქმა უნდა, ჩვენი მიზანი ჩემპიონობაა, თუმცა ისიც კარგად გვესმის, რომ მიზნის მიღწევა ურთულესი იქნება. პლეი ოფში ჩვენ გარდა კიდევ ხუთი გუნდია, რომელთაც იგივე სურვილი და მოტივაცია ამოძრავებთ".

"პლეი ოფები ფაქტობრივად ცალკე ჩემპიონატია. ძნელი და რთულია მთელი წლის განმავლობაში საუკეთესოებს შორის იყო და რეგულარული გათამაშება სასურველ პოზიციაზე დაასრულო, მაგრამ ბოლო 2-3 თამაშს სპეციალური მომზადება სჭირდება.

აქ შეცდომის დაშვების უფლება აღარ გაქვს, რადგან გამოსასწორებლად დრო აღარ გრჩება. მიმაჩნია, რომ ნახევარფინალის მოგება შეგვიძლია და ახლა სწორედ ამ კონკრეტულ შეხვედრაზე ვფიქრობთ და არა ფინალზე".

3-წლიანი ტრავმების სერია

ქუბრიაშვილის პირველი ფრანგული გუნდი "მონპელიე" იყო, სადაც 2007/08 წლების სეზონში, პირველი გუნდის შემადგენლობაში ორი თამაში ჩაატარა. მომდევნო ხუთი სეზონი დუდუმ "ტულონში" გაატარა, გუნდის ლიდერად პირველივე სეზონში იქცა და სეზონის განმავლობაში 25-30-მდე თამაშს ატარებდა.

წარმატებული იყო მომდევნო ორი სეზონი "სტად ფრანსეში", 2015 წლიდან კი, ქართველი ბურჯი "მონპელიეს" დაუბრუნდა და პრობლემებიც დაიწყო.
ეს პრობლემები ტრავმებით იყო გამოწვეული, რის გამოც ქუბრიაშვილს ამ სამი წლის განმავლობაში დიდი დრო გაუცდა და 2015 წლის მსოფლიოს თასიც გამოტოვა:

"ორი წლის განმავლობაში მენისკი მაწუხებდა და 2015 წლის მსოფლიოს თასის წინ ოპერაცია გავიკეთე, დაზიანებული მენისკი ამოვიჭერი, რათა ტურნირის მსვლელობისას პრობლემა არ შემქმნოდა. კარგად ვიყავი და თამაშებისთვის ვემზადებოდი, მაგრამ ბოლო მოსამზადებელ მატჩზე, დარჩენილი მენისკიც გაწყდა. სამწუხაროდ, აღარც ნემსმა მიშველა და მალევე მენისკის სრულად ამოჭრა მომიწია.

მერე ფეხზე წვივის უკანა კუნთი გამეხა და დაბრუნებიდან ძალიან მალე, იგივე კუნთი გავიხიე, ხოლო შემდეგ ჯერზე მეორე ფეხის წვივის უკანა კუნთზეც იგივე დამემართა. საერთო ჯამში, პატარ-პატარა დაბრუნებებს თუ არ ჩავთვლით, წვივის კუნთების გამო წელიწადზე მეტი გამიცდა".

ხშირი ტრავმები დუდუ ქუბრიაშვილის სპორტულ კარიერაზე ცუდად აისახა, "მონპელიე" მასთან კონტრაქტს აღარ აგრძელებს და ბორჯღალოსანი ახალი გუნდის ძიებაშია:

"მომავალი სეზონისთვის განახლებული გუნდის შენება 6 თვით ადრე იწყება. დიახ, მნიშვნელოვან პერიოდში დავბრუნდი, თანაც ისეთი პოზიციის მოთამაშე ვარ, სადაც დიდი რესურსის ქონა მნიშვნელოვანია და იმედია "მონპელიეს" ჩემპიონობის მოპოვებაში დავეხმარები, თუმცა მომავალი სეზონიდან აქ აღარ დავრჩები და ახლა გუნდის ძიებაში ვარ.

ასეთი ხანგრძლივი პერიოდით პირველად ვიყავი ტრავმირებული და ვინც მსგავს სიტუაციაში ყოფილა, მიხვდება, რასაც განვიცდიდი, მაგრამ ფარ-ხმალი არასდროს დამიყრია და არც ახლა ვაპირებ.

მე მესმის კლუბის ხელმძღვანელობის, მათ მომავალი სეზონისთვის გუნდის შენება მაშინ დაიწყეს, როდესაც ტრავმირებული ვიყავი და ახლა რაც უნდა გავაკეთო, აღარაფერი შეიცვლება.

აქ ბევრი ნიუანსია გასათვალისწინებელი, მათ შორის შეზღუდვა ლეგიონერებზე. ამიტომ, ახლა ჩემი მთავარი საფიქრალი დარჩენილ მატჩებში "მონპელიეს" მაქსიმალური დახმარებაა".

ბორჯღალოსნებშიც ბრუნდება

ტრავმების გამო ქუბრიაშვილს "ბორჯღალოსნების" მაისურით წელიწად-ნახევარია აღარ უთამაშია. მან ნაკრების კვართი ბოლოს 2016 წლის ნოემბერში, შოტლანდიასთან მოირგო და გუნდს ივნისის ტესტებზე დაუბრუნდება:

"ნაკრებში შარშან ნოემბერში უნდა მეთამაშა, მაგრამ გამომგზავრების წინადღეს, "მონპელიეში" თამაშისას წვივის უკანა კუნთი გამეხა და დაბრუნება გადაიდო. ივნისის ტესტებისთვის გაფართოებულ სიაში ვარ. ახლა მთავარია ჯანმრთელად ვიყო და ნაკრებში აუცილებლად ვითამაშებ, რადგან ამაზე დიდი ბედნიერება არაფერია".

ფიჯიზე გამგზავრებამდე, ბორჯღალოსნები 31 მაისს თბილისში "ფრანგ ბარბაროსებს" მასპინძლობენ:

"ძალიან კარგი თამაში იქნება. დამიჯერეთ, პრო დე 2-ის კლუბებს საკმაოდ კარგი მოთამაშეები ჰყავთ და არც ჩემპიონატია დაბალი დონის, როგორც შეიძლება ვინმეს ეგონოს. ჩვენთვის ეს თამაში ძალიან ბევრის მომცემი იქნება. ნაკრებისთვის ყოველთვის რთულია სერიის პირველი მატჩი, რადგან შეუთამაშებლები ვართ და ივნისის ტესტების წინ, ეს თამაში ადაპტირებაში დაგვეხმარება".

ივნისში სუვაში ტონგასა და ფიჯის ნაკრებებს შევხვდებით. მსოფლიო რაგბის გადაწყვეტილებით, ეს თამაშები "წყნარი ოკეანის თასის" ეგიდით ჩატარდება.
დუდუ ფიქრობს, რომ "ბორჯღალოსნებს" თასის დაუფლების კარგი შანსი აქვთ:

"რატომაც არა?! შარშანწინ გუნდმა ეს მოახერხა და იმედია, თამაშებს წელსაც მოვიგებთ. თუმცა 2 წლის წინანდელთან შედარებით, განსხვავებული თამაშები იქნება.

სიმართლე გითხრათ, 2 წლის წინ ბოლომდე არ მჯეროდა, რომ კუნძულებიდან დაუმარცხებლად დავბრუნდებოდით, მაგრამ ნაკრებმა თავისი შესაძლებლობები დაამტკიცა! ახლა იმავეს გამეორება უფრო რთული იქნება, რადგან მეტოქეები უფრო დიდი მონდომებით დაგვხვდებიან. ჩვენ მოვიპოვეთ სახელი და არა მხოლოდ კუნძულელები, არამედ მსოფლიოს ნებისმიერი ქვეყანა ახლა საქართველოს სულ სხვა თვალით უყურებს. ჩვენთან თამაშს ყველა სერიოზულად უდგება. ეს ყველასთვის პატივი გახდა".

32 წლის ბორჯღალოსნის აზრით, მნიშვნელოვანია, რომ ფიჯი, რომელიც 2019 წლის მსოფლიოს თასზე ჩვენი მეტოქეა, ამჯერადაც დავამარცხოთ და ამით ფსიქოლოგიური უპირატესობა მოვიპოვოთ:

" ნებისმიერ მეტოქესთან მოგება მნიშვნელოვანია, რადგან მისი შედეგი რეიტინგზე აისახება. ფიჯისთან თამაშით ნებისმიერ შემთხვევაში ბევრს ვისწავლით, თუმცა გამარჯვების შემთხვევაში თავდაჯერებულობა მოგვემატება და მეტოქე ფსიქოლოგიური წნეხის ქვეშ გვეყოლება, რაც მსოფლიო თასზე გამოგვადგება".

რაც შეეხება იაპონიას: "ის ბევრისათვისაა უხერხული მეტოქე, რადგან თამაშობს სწრაფ, ხარისხიან რაგბის. მოთამაშეებს მაღალ დონეზე აქვთ ხელის ტექნიკა და ძალიან სწრაფები არიან. ამ მხრივ მათ ბევრი ვერ უწევს წინააღმდეგობას, ამიტომ ზუსტად ვიცით როგორ შეიძლება მოვუგოთ - მოლი, შერკინება და ერთი-ერთზე ორთაბრძოლები".

მიზანი ორი თამაშის მოგებაა!

ქუბრიაშვილი მიიჩნევს, რომ 2019 წლის მსოფლიოს თასისთვის ზედმეტი მოლოდინები არ უნდა შევქმნათ და წინა მსოფლიოს თასის შედეგის გამეორებას, ანუ ორი თამაშის მოგებას ვეცადოთ:

"ჩვენც გვინდა ჯგუფიდან გასვლა და ფინალში თამაში, მაგრამ სიტუაცია რეალურად უნდა შევაფასოთ. ურთულეს ჯგუფში ვართ და მიზანი 2019 წელსაც ორი თამაშის მოგებაა, რაც, დამიჯერეთ, ძალიან რთული იქნება.

ფიჯი მსოფლიოს თასზე სულ სხვა გუნდი იქნება, ვიდრე წინა და თუნდაც მომავალ ტესტ-მატჩში. ეს ყოველთვის ასე ხდებოდა. ინდივიდუალურად, ვფიქრობ, ფიჯელები მსოფლიოში საუკეთესოები არიან.

მათი პრობლემა მხოლოდ ისაა, რომ ერთიან გუნდად შეკვრას ვერ ახერხებენ, თუმცა მსოფლიო თასების წინ ეს გამოსდიოდათ და ახლაც გამოუვათ. მათი გაჩერება ყველა გუნდს უჭირს, მაგრამ უნდა მოვახერხოთ და წინა მსოფლიოს თასის შედეგი გავიმეოროთ".

Rugby.ge

ყოველდღიური სპორტული გაზეთი "ლელო"
660
მკითხველის კომენტარები / 0 /
მსგავსი ამბები
რუბრიკის სხვა სიახლეები
;