ინტერვიუ დრის მერტენსთან: მე პირობა დავდე არა თანაგუნდელებთან, არამედ ქალაქთან, რომელიც უკვე 30 წელიწადია ელის ჩემპიონობას

"ნაპოლის" შესანიშნავი სეზონი უდგას. მაურიციო სარის გუნდი სკუდეტოს რეალური კანდიდატია. მართალია, კამპანიელებს ჩემპიონთა ლიგაში ხელი მოეცარათ, მაგრამ ახლა დაღვინების პროცესი მიდის და ვინ იცის, იქნებ მომდევნო სეზონში ევროპაშიც დაიქუხონ...

ბელგიელ ფორვარდ დრის მერტენსს ამ პროცესში ერთ-ერთი მთავარი როლი აკისრია. ის "ნაპოლიში" 2013 წლის ივნისიდანაა. ამ ხნის განმავლობაში მან 209 მატჩი ჩაატარა და 81 გოლი გაიტანა.

სადებიუტო წელსვე, მერტენსმა გუნდთან ერთად იტალიის თასი და სუპერთასი მოიგო, რაც შეეხება ბელგიის ნაკრებს, აქ მან 60 მატჩში 13-ჯერ აიღო მეტოქეთა კარი.

30 წლის შემტევმა "კორიერე დელო სპორტის" კითხვებს უპასუხა...

სარის ფილოსოფია

- "იუვენტუსი", "ნაპოლი", "ინტერი", "რომა" - რომელი მათგანი დაასრულებს სერია A-ს პირველ ადგილზე?

- ასეთი რიგითობა, როგორ თქვენ ჩამოთვალეთ, ნამდვილად არ მაწყობს. მოდით, მე პატარა კორექტივს შევიტან - "ნაპოლის" და "იუვენტუსს" ადგილებს შევუცვლი. დანარჩენი არ მაინტერესებს.

- მაგრამ ცხრილში ისეთი სიტუაციაა, ერთი-ორი ფრე, წაგება და ყველაფერი შეიცვლება...

- ჩვენ ახლა კარგ ფორმაში ვართ და ბოლომდე ვიბრძოლებთ. ფრეებს თუ წაგებებს ვერც კონკურენტები ასცდებიან.

- ესე იგი, ჯერჯერობით იცავთ პირობას, რომელიც თანაგუნდელებთან სეზონის დასაწყისში დადეთ, როცა მათ სკუდეტოს შეჰპირდით...

- მე პირობა დავდე არა თანაგუნდელებთან, არამედ ქალაქთან, რომელიც უკვე 30 წელიწადია ელის ჩემპიონობას. სწორედ ამიტომ დავრჩი ნეაპოლში, რომ გუნდს სკუდეტოს მოგებაში დავეხმარო. შემეძლო, ჩინეთში წავსულიყავი ძალიან მაღალ ხელფასზე... მაგრამ აქ ვარ!

- თუმცა ჩემპიონობა ვერ იქნება ერთი ფეხბურთელის კისერზე...

- მართალი ხართ. "ნაპოლი" ძლიერი გუნდია და მე მჯერა ამ გუნდის. ჩვენ გვყავს მწვრთნელი, რომელმაც მეც და თითოეული ჩემი თანაგუნდელიც თავიდან ბოლომდე შეცვალა, თან არა მხოლოდ მოედანზე, არამედ ცხოვრებაშიც.

მაურიციო სარიმ ერთი მიზნისთვის შემართულ, ერთ მუშტად შეკრულ და მებრძოლ გუნდად გვაქცია. მოდით, ვთქვათ - "ნაპოლის" ჰყავს რიგითი ფეხბურთელები, აქ არ არიან პირველხარისხოვანი ვარსკვლავები, სამაგიეროდ, არის ერთი მთავარი ვარსკვლავი და ეს არის თავად "ნაპოლი"!

- და როგორ მოახერხა ეს სარიმ?

- სარის თავისი საფეხბურთო ფილოსოფია აქვს, რომელიც სხვებისგან აბსოლუტურად განსხვავდება. თუ ბურთი "ნაპოლის" აქვს, ის კარნახობს პირობებს ნებისმიერ მეტოქეს. ანუ ჩვენ მოედანზე გავდივართ მოსაგებად და ფეხბურთის სათამაშოდ, ამ სიტყვის პირდაპირი მნიშვნელობით, და არა იმისთვის, რომ არ წავაგოთ. ეს ძალიან დიდი პლუსია.

ჩვენ კარგად შეგვისწავლეს...

- პირადად თქვენ ბოლო პერიოდში ჩავარდნა გქონდათ, გოლებს მოუკელით, ამან ხომ არ დაგთრგუნათ?

- მე არ ვარ ცენტრფორვარდი, რომლის უპირველესი მოვალეობა გოლების გატანაა და ამით ცხოვრობს. არ ვდგავარ საჯარიმოში და არ ველოდები, როდის მომაწვდიან კანფეტივით პასს.

ამ ყველაფერზე პარტნიორებთან ერთად ვზრუნავ - მეტოქის საჯარიმოშიც, მოედნის ცენტრშიც, ხშირად საკუთარ კართანაც... ჩემთვის საგოლე პასსა და გოლს ერთი და იგივე ფასი აქვს.

- პრობლემები მხოლოდ ფიზიკური და მორალური გადაღლილობისგან მოდის?

- არა მგონია. ადრე, როცა ნაკლებს ვთამაშობდი, შეიძლებოდა, მეწუწუნა, მაგრამ არა ახლა, როცა მუდმივად მოედანზე ვარ. საქმე ისაა, რომ "ნაპოლი" თავისი ფეხბურთის მსხვერპლი გახდა და თუ რამ პრობლემა გვაქვს, იქიდან არის, რომ მეტოქეებმა კარგად შეგვისწავლეს.

ამიტომაც საჭიროა, დროდადრო რაღაცის შეცვლა, ოპონენტებისთვის სიურპრიზების შეთავაზება... ჩვენი მოქმედებები კიდევ უფრო ნაკლებად პროგნოზირებადი უნდა გახდეს.

- "ნაპოლი" აღარ არის ჩემპიონთა ლიგაში...

- ზოგიერთებისგან გავიგე, თითქოს ჩემპიონთა ლიგაში ძალები დავზოგეთ იმისთვის, რომ სერია A-ში ჩავარდნა არ გვქონოდა. სისულელეა! ჩვენ ყველა თამაშში ბოლომდე დავიხარჯეთ და ასევე ვიზამთ ევროპის ლიგაშიც.

ფეხბურთში ხანდახან ყველაფერი ისე არ ხდება, როგორც გინდა და როგორც გეგმავ. გასათვალისწინებელია ტრავმებიც... რა თქმა უნდა, ეს თავის მართლება არ არის, უბრალოდ, ამისთვის ყოველთვის მზად უნდა ვიყოთ.

- მაგრამ აღიარეთ, რომ კონკურენტებთან შედარებით, "ნაპოლის" მოკლე სათადარიგოთა სკამი აქვს...

- როცა ვთქვი, რომ ჩვენ ვართ "ძლიერი გუნდი", ვიგულისხმე, რომ გვყავს 25 ფეხბურთელი, რომელიც ყოველ წამს მზად არის, შევიდეს ბრძოლაში, შეცვალოს პარტნიორი... "ფიორენტინასთან" მატჩის მეორე ტაიმმა გვაჩვენა, რომ მცირე ჩავარდნის შემდეგ, ისე ჩვენს გზაზე დავდექით და ეს გზა არის სწორედ ის, რამაც ჩემპიონობამდე უნდა მიგვიყვანოს.

იგუაინის იუბილე? დამავიწყდა...

- მიულოცეთ იგუაინს 30-ე დაბადების დღე?

- ოოოო... სამწუხაროდ, არა, დამავიწყდა... ხდება ხოლმე. არა მგონია, სწყენოდა. გონსალო ბრწყინვალე ფორვარდია და ეს ყველამ ვიცით.

- სეზონის ბოლოს "ნაპოლიდან" წახვალთ?

- მანამდე დიდი დროა - ნახევარი ჩემპიონატი, მუნდიალი... თან კონტრაქტში კიდევ ორი წელიწადი მაქვს დარჩენილი.

- თქვენი გამოსასყიდი თანხა 28 მილიონი ევროა. ეს თანხა თქვენ თავად განსაზღვრეთ...

- ჩემთვის არავის მოუმართავს. ამ მომენტისთვის ვფიქრობ მხოლოდ ერთ გუნდზე და ეს არის "ნაპოლი", სრულად ვარ კონცენტრირებული დღევანდელობაზე, მინდა ვისიამოვნო ფეხბურთით და გავიმარჯვო. ფეხბურთში ყველაფერი ხდება, აჩქარება არ არის საჭირო.

ნერვების წყვეტაა მხოლოდ და მეტი არაფერი

- კონტრაქტზე ჩამოვარდა სიტყვა. რას იტყვით დონარუმასთან დაკავშირებულ სიტუაციაზე?

- რა გითხრათ... მე ჯერ ვფიქრობ და მერე ვაწერ კონტრაქტზე ხელს. როცა დიდ ფულზეა ლაპარაკი, დიდია ფსიქოლოგიური წნეხიც, მით უმეტეს დონარუმას ასაკში. თუმცა დაწვრილებით არ ვიცი ამ პრობლემაზე...

- იკარდი, ჯეკო, ბელოტი - ისინი თქვენ არ გგვანან. რომელს მიანიჭებდით უპირატესობას?

- მე მათ პატივს ვცემ, მაგრამ მაინც მერტენსს ავირჩევდი (იცინის).

- უკვე იცით, რას გააკეთებთ კარიერის დასრულების შემდეგ?

- ზუსტად ვიცი, რომ მწვრთნელი არ ვიქნები, ნერვების წყვეტაა მხოლოდ და მეტი არაფერი. ბავშვებთან მუშაობა კი შეიძლება...

- სარიც ბევრს ნერვიულობს?

- ძალიან. აბა, წარმოიდგინეთ, დღეში ხუთ კოლოფ სიგარეტს ეწევა!..

ყოველდღიური სპორტული გაზეთი "ლელო"
1228
მკითხველის კომენტარები / 0 /
მსგავსი ამბები
რუბრიკის სხვა სიახლეები
;