ინტერვიუ. ელგუჯა ლობჯანიძე: "ნაკრებში თამაში ისე მსურდა, ვაისს დავუმალე... თავის შერცხვენა არ მსურდა"

ახალი სეზონისთვის მოსამზადებლად, "შუქურა" თურქეთის ქალაქ ანთალიაში გაემგზავრა და სასტუმრო "არკადიაში" დაბინავდა.

შეგახსენებთ, რომ ქობულეთელებს სამეზობლოში 4 ამხანაგური მატჩი აქვთ დაგეგმილი, პირველს კი უკვე დღეს გამართავს - მეტოქე იქნება ყაზახური "აქტობე", რომელმაც რამდენიმე დღის წინ ქუთაისის "ტორპედო" 2:0 დაამარცხა. მატჩს ბელექის სპორტკომპლექსი Titanic Deluxe  უმასპინძლებს.

გუნდთან ერთად ვარჯიშობს ელგუჯა ლობჯანიძეც. 25 წლის თავდამსხმელის კარიერა მოულოდნელად განვითარდა. ის ერთი უკიდურესობიდან მეორეში აღმოჩნდა.

ფეხბურთელი, რომელმაც 2017 წელს საქართველოს ნაკრებსა და რუსეთის პრემიერლიგაში სადებიუტო მატჩები ჩაატარა, ყველასთვის მოულოდნელად ახალ სეზონს ეროვნულ ლიგა 2-ში შეეგებება.

ლობჟანიძემ კარიერა "ვიტ ჯორჯიაში" დაიწყო. ამის შემდეგ ქობულეთის "შუქურაში" ჩაირიცხა, საიდანაც იჯარით ჯერ ბათუმის "დინამოში" გაუშვეს, ხოლო 2017 წლის დასაწყისში - რუსეთის პრემიერლიგის კლუბ "ორენბურგში".

ამ პერიოდში ვლადიმირ ვაისმა ლობჯანიძე საქართველოს ნაკრებში მიიწვია და ამხანაგურ შეხვედრაშიც ათამაშა.

რუსული პრემიერლიგიდან "ორენბურგის" გავარდნის მიუხედავად, ქართველი თავდამსხმელი გუნდში დარჩა, თუმცა მერე დაშავდა და საქართველოში დაბრუნდა. "ლელო" დაინტერესდა, რამ გამოიწვია მისი "შუქურაში" მისვლა, ჰქონდა თუ არ სხვა ვარიანტები და ასე შემდეგ.

- იმის შემდეგ, რაც ეროვნულ ნაკრებსა და რუსეთის პრემიერლიგაში ითამაშეთ, "შუქურაში" თქვენი გამოჩენა მოულოდნელი იყო...

- ჩემი ტრანსფერი დღემდე "შუქურას" ეკუთვნის და "ორენბურგშიც" იჯარით გამიშვეს. კლუბთან კონტრაქტი 2018 წლის ბოლომდე მაკავშირებს, მაგრამ ქობულეთში ამის გამო არ დავბრუნებულვარ.

- ანუ, სხვა ვარიანტები არ გქონდათ?

- მქონდა და თან კარგი ვარიანტებიც, როგორც საქართველოში, ისე უცხოეთშიც. მაგალითად, ლატვიასა და უნგრეთში ორივე ვარიანტი რეალური იყო. მაგრამ რეზო ჩელებაძე ის კაცი არ არის, წინსვლაში ხელი შეგიშალოს.

რუსეთში ტრავმა მივიღე და ბოლო 5 თვე არ მითამაშია, ვერც ვვარჯიშობდი. შეკრება რომ დაიწყო, მაშინ დავასრულე მკურნალობა. სხვათა შორის, ზაფხულში "ორენბურგთან" ახალი კონტრაქტი უნდა გამეფორმებინა, მაგრამ ტრავმამ ძალიან დამწია უკან და ასეთ მდგომარეობაში სადმე წასვლაზე ფიქრი არასერიოზული იყო.

"შუქურაში" დარჩენა ამიტომაც ვამჯობინე - მოვემზადები, ვითამაშებ და ფორმას აღვიდგენ. სხვათა შორის, ვარჯიში მხოლოდ ახლა განვაახლე. მინდა, კარგად მოვემზადო.

- მოკლედ, "შუქურას" ზაფხულამდე დაეხმარებით...

- ასეც ვერ ვიტყვი. თუ შეკრების დროს აღმოჩნდება, რომ ფორმაში შევდივარ და ძველ კონდიციებს ვიბრუნებ, შესაძლოა, უცხოეთში წავიდე. ვნახოთ, ყველაფერი შეკრების შემდეგ მეცოდინება.

- "ორენბურგში" თემურ ქეცბაია რომ დანიშნეს, მაშინ არ თამაშობდით...

- მაშინაც დაშავებული ვიყავი. კუნთი მქონდა გაწყვეტილი. სხვათა შორის, ეს ძალიან უცნაურად მოხდა. ვლადიმირ ვაისმა ნაკრებში რომ გამომიძახა და მათამაშა, მეგობრები მეკითხებოდნენ - რა მჭირდა, რადგან საერთოდ ვერ გავინძერი.

ახლა პირველად ვიტყვი, რაც დამემართა - მეგონა, კუნთი მქონდა დაჭიმული, მაგრამ ნაკრებში თამაში ისე მსურდა, ვაისს დავუმალე. მან კი სენტ კიტსთან შემიშვა და სწორედ მაშინ ვიგრძენი საშინელი ტკივილები. ვერც ვუთხარი, რომ შევეცვალე, რადგან თავის შერცხვენა არ მსურდა.

ჩემზე კარგად არავინ იცის, რომ ცუდად გამოვიყურებოდი. მერე მოლდოვასთან განაცხადშიც ვიყავი, მაგრამ არ მითამაშია. რუსეთში დაბრუნებულს დამიდგინეს, რომ კუნთი დაჭიმული კი არა, გაწყვეტილი მქონდა.

- შეგიძლიათ თქვათ, რომ რუსეთში წასვლა კარიერაში წინ გადადგმული ნაბიჯი იყო? მოგცათ რამე "ორენბურგში" ყოფნამ?

- რუსეთში სულ რაღაც ოთხი თვე ვითამაშე და უდიდესი გამოცდილება მივიღე. გონებაში დღემდე ჩარჩენილი მაქვს იქაური თამაშები, დონე, მეტოქეები, ცნობილი ფეხბურთელები...

ისევ ამ დონის ჩემპიონატში თამაში იმხელა სტიმულია, მინდა დროულად მოვმჯობინდე და ისევ უცხოეთში წავიდე. მარტო ფულში არ არის საქმე - სიამოვნებაა, როცა უფრო მაღალ დონეზე ცდი თავს და იმედი გიჩნდება, რომ იქ დამკვიდრება შეგიძლია.

- საქართველოს ჩემპიონატიდან უცებ რუსულ პრემიერლიგაში გადასვლა რთული იქნებოდა...

- ასეა, მაგრამ შეუძლებელიც არ არის. სხვათა შორის, იქ ხალხისგან დიდ სითბოსა და ყურადღებას ვგრძნობდი და ეს მახარებდა. სხვათა შორის, დატვირთვებსაც იოლად შევეგუე და გამიხარდა, რომ ნელ-ნელა ადგილის დამკვიდრებას ვახერხებდი...

ყოველდღიური სპორტული გაზეთი "ლელო"
1893
მკითხველის კომენტარები / 0 /
მსგავსი ამბები
რუბრიკის სხვა სიახლეები
;