[ინტერვიუ] ელგუჯა ლობჯანიძე: რატომ ქაისარი? ფეხბურთელი იქ უნდა წავიდეს, სადაც მისით ყველაზე მეტად ინტერესდებიან...

ელგუჯა ლობჯანიძე კარიერას ყაზახეთის ჩემპიონატის მონაწილე ყიზილორდას "ქაისარში" გააგრძელებს -  საქართველოს საზოგადოებრივი მაუწყებლის "პირველ არხს" ინფორმაცია თავად ფეხბურთელმა დაუდასტურა.

საქართველოს ნაკრების 27 წლის თავდამსხმელი ყაზახეთის პრემიერლიგის ერთ-ერთ აუტსაიდერ "თარაზში" თამაშობდა, მაგრამ კარგი სეზონის შემდეგ მისით ევროპალიგაზე გასული "ქაისარი" დაინტერესდა, რომლისთვისაც ეს პირველი ტრანსფერია მომავალი სეზონის წინ.

ლობჯანიძე ახალ კლუბს 1 იანვარს შეუერთდება. "ქაისარში" ის თავისუფალი აგენტის სტატუსით გადავიდა. ახლახან დასრულებულ სეზონში ლობჟანიძემ "თარაზში" 24 მატჩი ჩაატარა, 8 გოლი გაიტანა და 1 საგოლე პასი გააკეთა. გუნდმა ლიგაში ადგილი შეინარჩუნა, მაგრამ ქართველს უფრო ამბიციურ კლუბში თამაში სურდა...

რაც შეეხება "ქაისარს", 2019 წლის სეზონის შედეგების მიხედვით ამ გუნდმა ჩემპიონატში მე-6 ადგილი დაიკავა, სამაგიეროდ, მოიგო ყაზახეთის თასი და მოიპოვა ევროპალიგის საკვალიფიკაციო ეტაპზე თამაშის უფლება.

ლობჯანიძის ტრანსფერის ამჟამინდელი ღირებულება 350 ათასი ევროა. მანამდე ის თამაშობდა "ვიტ ჯორჯიაში", ქობულეთის "შუქურაში", ბათუმის "დინამოში", რუსთავის "მეტალურგსა" და რუსეთის პრემიერლიგის კლუბ "ორენბურგში".

"ლელო" თბილისში მყოფ ლობჯანიძეს დაუკავშირდა და ინტერვიუ ჩაწერა:

გადამწყვეტი გამოდგა მწვრთნელის ფაქტორი...

- "ტრანსფერმარკტმა" ოფიციალურად "ქაისარის" მოთამაშედ გამოგაცხადათ...

- დიახ, მართალია. კლუბთან კონტარქტი უკვე გავაფორმე.

- რამდენწლიანი ხელშეკრულებაა?

- ერთწლიანი.

- რატომ მაინც და მაინც "ქაისარი" და არა სხვა გუნდი?

- საერთოდ, ეს გუნდი მომწონდა. მთელი სეზონი საკმაოდ კარგ ფეხბურთს თამაშობდა... რა თქმა უნდა, "ასტანასა" და "ქაირათში", ან რომელიმე ევროპულ გუნდში გადასვლა მერჩივნა. მაგრამ, მიმაჩნია, რომ ფეხბურთელი იქ უნდა წავიდეს, სადაც მისით ყველაზე მეტად ინტერესდებიან. ამ ეტაპზე "ქაისარი" საკმაოდ კარგი ვარიანტია, ყაზახეთის თასის მფლობელი გახდა და ევროპალიგაზე ითამაშებს. აქედან გამომდინარე, თავის გამოჩენის მეტი შანსია. პირდაპირ რომ ვთქვა, გადამწყვეტი გამოდგა მწვრთნელის ფაქტორი...

- ანუ?

- "ქაისარის" მთავარი მწვრთნელი ბულგარელი სტოიჩე მლადენოვია. ჩემი გადაყვანით ის სერიოზულად იყო დაინტერესებული. როგორც მერე მენეჯერმა მითხრა, თურმე, სეზონის დაწყების შემდეგ მაკვირდებოდა და ბოლოს დაუკავშირდა და უთხრა - მე რა პირობების შექმნაც მომთხოვეთ, შევასრულე და ახლა თქვენი ჯერიაო.

- ყაზახეთში საკმაოდ კარგი, საშუალოევროპული ლიგის პირობები და დონეა?

- ფაქტია, რომ ყაზახური გუნდები ჩემპიონთა ლიგაზეც გასულან და ევროპის ლიგაზეც სისტემატურად თამაშობენ. ახლახან, ევროპის ლიგის ჯგუფში "ასტანამ" "მანჩესტერ იუნაიტედი" დაამარცხა და ყაზახეთი უეფას რეიტინგში 24-ე ადგილზე დაწინაურდა და ბულგარეთს, პოლონეთს, რუმინეთსა და უნგრეთს გადაუსწრო. ბოლო წლებში დონე ისე გაიზარდა, ევროპელი სელექციონერები მეტ ინტერესს იჩენენ და მიმაჩნია, რომ კარგი თამაშით აქედან საკმაოდ ძლიერ ევროპულ ლიგაში მოხვედრაცაა შესაძლებელი. ანუ ყაზახეთის ჩემპიონატის კარიერული ტრამპლინისთვის გამოყენება რეალური მგონია. თუმცა, შენი რეალური შესაძლებლობებიც უნდა აწონ-დაწონო და ცაში არ უნდა იფრინო...

ისინი გვიან დამიკავშირდნენ...

- სხვა ვარიანტებიც ხომ გქონდათ?

- მქონდა, მათ შორის, ამერიკულ MLS-შიც, მაგრამ საბოლოოდ ყველაზე რეალური, კონკრეტული და სასურველი "ქაისარის" მიწვევა აღმოჩნდა და ერთწლიანი კონტრაქტიც გავაფორმე. თუმცა, ცოტა რომ მომეცადა, შესაძლო იყო, სხვაგან წავსულიყავი...

- რომელ ქვეყანაში?

- "ქაისართან" კონტრაქტის გაფორმების შემდეგ კონკრეტული და უფრო უკეთესი წინადადებით ამერიკის კლუბებიდან მომმართეს, მაგრამ ძალიან დაგვიანებული იყო...

- მერედა, გული არ დაგწყდათ? ბოლოს და ბოლოს, ამერიკაში იბრაჰიმოვიჩი, შვაინშტაიგერი და  რუნი თამაშობდნენ...

- ეს მეც კარგად მესმის, რომ ამერიკაში საკმაოდ ძლიერი და პრესტიჟული ლიგაა, რომელსაც დიდი რეკლამაც აქვს და კარგადაც აშუქებენ. მაგრამ, სადაც დავრჩი, ჯობია იმაზე ვიფიქრო. ახლა იმაზე ნერვიულობა, რომ მერე კარგი ვარიანტი გამოჩნდა, არაფერს მარგებს.

- მცირე ხნის წინ გვითხარით, რომ აგენტმა ამერიკულ კლუბთან მოლაპარაკებისთვის ავტორიზაცია გთხოვათ...

- ...ახლა კი უკვე კონკრეტული პირობებიც შემომთავაზა. ლაპარაკი ისევ იმ ოთხ კლუბზე იყო - "ჩიკაგოზე", "პორტლენდზე", "ორლანდოსა" და "ფილადელფიაზე". მაგრამ ადრეც ვთქვი - ეს ამერიკული წინადადები კონკრეტული არ მეგონა, არადა, თურმე, კონკრეტული მიწვევები ყოფილა...

- ...კონკრეტულიც და უკეთესიც?

- ახლა ამაზე ლაპარაკი აღარ ღირს, მაგრამ უკეთეს პირობებს ნამდვილად მთავაზობდნენ. უფრო ნაღდი ვარიანტი "ქაისარი" მეგონა და სეზონის ბოლოს მის წინადადებას დავთანხმდი და კონტრაქტიც გავაფორმე. ასე რომ...

- ეს როდის მოხდა?

- ჩემპიონატის ბოლო ტურის შემდეგ...

- და რატომ მალავდით ამას?

- ეს უფრო სიტყვიერი შეთანხმება იყო და ზედმეტი ხმაური არ მინდოდა. ახლა კი კონტრაქტი ოფიციალურადაც გავაფორმე და დასამალიც აღარაფერია.

ნაკრებზე ვფიქრობდი...

- ასეთი ვარიანტები რომ გქონდათ, ყაზახებთან კონტრაქტის გაფორმება რატომღა იჩქარეთ?

- საერთოდ, სეზონი რომ მთავრდება და არ იცი, მომავალი წლიდან რომელ გუნდში ითამაშებ, ეს გაურკვევლობა არც ერთ ფეხბურთელს არ მოსწონს. ჯობია, წინასწარ იცოდე, სად იქნები და სად მოემზადები. ამ გადაწყვეტილების მიღებისას მთავარი მაინც საქართველოს ნაკრების მომავალ თამაშებზე ფიქრი იყო. მარტში პლეი ოფია და იმ მომენტისთვის მზად უნდა ვიყო. გუნდის გარკვევას ახალი წლის შემდეგ რომ დაიწყებ, მოსამზადებელი ეტაპის ნაწილიც გიცდება და არის საშიშროება, ფორმაში დროულად ვერ შეხვიდე.

- ბელარუსთან მძიმე თამაშის მოლოდინია, მაგრამ სტიმულია ის, რომ მოგების შემთხვევაში, ფინალსაც ჩვენ ვუმასპინძლებთ...

- ეს ჩვენთვის უდიდესი შანსია, რომ ევროპის ჩემპიონატზე მოვხვდეთ. მე კარგად ვიცი, ნაკრებში როგორი განწყობაა - ბიჭებიც, მწვრთნელებიც... მასაჟისტებიც კი, ძალიან მონდომებულები არიან და სურთ, ამ შეხვედრებს საუკეთესოდ მომზადებულები შეხვდნენ. ვაისის სიტყვები მომეწონა - ეს თამაშები ჩვენთვის სიკვდილ-სიცოცხლის საკითხიაო. ბელარუსი ძლიერი მეტოქეა, მაგრამ საკუთარ კედლებში თამაში დიდი უპირატესობაა და ხალხი თუ ტრიბუნებს შეავსებს, აუცილებლად უნდა მოვიგოთ. წაგების უფლება, უბრალოდ, არ გვაქვს. დიდი იმედი მაქვს, ამ შანსს ხელიდან არ გავუშვებთ.

1040
მკითხველის კომენტარები / 1 /
aburjga
0
ძალიან ჭკვიანი ბიჭი ყოფილა. ეს გამონათქვამი, "ფეხბურთელი იქ უნდა წავიდეს, სადაც მისით ყველაზე მეტად ინტერესდებიან" უნდა გახდეს საეტაპო ყველა ქართველი ფეხბურთელისათვის! მხოლოდ ფული არ უნდა განსაზღვრავდეს კაცის, ფეხბურთელის საქციელს! მთავარი ღირსებაა და ის არავითარ ფულზე არ უნდა გაყიდოს თავმოყვარე ქართველმა კაცმა! წარმოგიდგენიათ რომ მადრიდის რეალმა მესი იყიდოს, მერე დასვას სკამზე და 10-ჯერ მეტი ხელფასი უხადოს და არ ათამაშოს?! დათანხმდება ამას მესი?! რა თქმა უნდა არა! ე.ი. ღირსება ყოველთვის მაღლა იდგება ვიდრე ფული, მიუხედავად მისი რაოდენობისა!
მსგავსი ამბები
რუბრიკის სხვა სიახლეები
;