[სპეციალისტის აზრით] ვახტანგ ქორიძე: წაგება მესმის, მაგრამ ასე უთავმოყვარეოდ?!

ევროშესარჩევ ციკლში დანიისა და საქართველოს ნაკრებთა მატჩის შეფასება ვახტანგ ქორიძეს ვთხოვეთ.

თბილისის “დინამოს” ვეტერანი ნახევარმცველი 10 ივნისის მატჩით გაოგნებულია და ტკივილს ვერ მალავს, რომ ქვეყნის მთავარი გუნდი ასე უსუსურად გამოიყურებოდა...

1:5-ს არ უნდა ვაგებდეთ

- როგორ შეაფასებდით დანიასთან საქართველოს ნაკრების თამაშს?

- ეს თამაში არ იყო და რა შეფასება უნდა მივცე?! ყველა სუსტი გუნდი გრანდებთანაც კი იბრძვის, გიბრალტარი ხომ ძალიან სუსტია, მაგრამ მასაც კი ირლანდიასთან 0:2-ზე მეტი არ წაუგია და ჩვენ რა გვემართება?! წაგება მესმის, მაგრამ ასე უთავმოყვარეოდ? დღეს ვეტერანი ფეხბურთელები ვლაპარაკობდით და ყველა გულმოკლული იყო - 10 ივნისს საქართველოს თავი მოჭრეს. მესმის, რომ მეტოქე ბევრად ძლიერია, ძალიან მაღალი კლასის ფეხბურთელები ჰყავს, რომლებიც ევროპულ გრანდებში თამაშობენ და ყველა კომპონენტში გვჯობნის, მაგრამ 1:5 მეტისმეტი იყო.

- ნაკრებში სუსტი თაობაა?

- ვიმეორებ, დანიელები ჩვენ მოთამაშეებზე ძლიერ კლუბებში თამაშობენ, ერთი “ტოტენჰემის” ლიდერია, დუბლი “აიაქსის” მოთამაშემ შეგვისრულა, სხვა ცნობილი კლუბების მოთამაშეებიც ჰყავდათ. მაგრამ თაობა საქართველოში იყო და კიდევაც წამოვა - ამაში დარწმუნებული ვარ. და არც ისეთი სუსტი მოთამაშეები გვყავს, 1:5-ს რომ ვაგებდეთ. იცით, გული რაზე მწყდება? ერთა ლიგის D დივიზიონში გავიმარჯვეთ და ხალხი სტადიონისკენ შემოტრიალდა, მაგრამ ასეთი წაგებების შემდეგ სტადიონზე ვინღა ივლის? ფეხბურთის ფედერაციაში წესიერი ბიჭები არიან და მათ დიდ პატივს ვცემ, მაგრამ თავადაც მიხვდებიან, რომ ეს ბოლო ზღვარი იყო. მეშინია, რომ ხალხმა ფეხბურთი ისე არ შეიძულოს, რომ ამ რისხვის ქვეშ ყველა მოვხვდეთ - ძველებიც და ახლებიც. 

საუკეთესო შედეგი ქართველის 
ხელმძღვანელობით გვქონდა

- თქვენი აზრით, მომხდარი ვისი ბრალია, მწვრთნელის თუ ფეხბურთელების?

- საქართველოს ნაკრებს საუკეთესო შედეგი ქართველი მწვრთნელის ხელმძღვანელობით ჰქონდა. ჩივაძის მწვრთნელობისას შესარჩევ ციკლში მესამე ადგილი დავიკავეთ. მერე იყო ყიფიანი, რომლის დროსაც ნაკრები ასევე კარგად თამაშობდა... მე მაინც მგონია, რომ ქართველ ფეხბურთელს ისევ ჩვენიანი თუ გაუგებს. 

- ვაისს არც შემადგენლობა ჰყავდა საბრძოლო და მსაჯიც აშკარად არ გვწყალობდა. ასეთ დროს რა შედეგის იმედი უნდა გვქონოდა?

- მესმის ეს ყველაფერი, მე ჩასაფრებული არ ვარ და წაგება კი არ მახარებს, გულს მიკლავს და მშხამავს, მაგრამ სიმართლე ასეა - შემადგენლობა რომ არ გყავს, შემცვლელები უნდა მოძებნო. ახლა მოთამაშეებს სოფელ-სოფელ არავინ ეძებს, რადგან ინტერნეტია და ყველა ინფორმაცია ხელმისაწვდომია. ან რა ინტერნეტი და მოძიებაა საჭირო, ეროვნული ლიგის რამდენიმე გამორჩეული მოთამაშე ნაკრებში რომ აიყვანო და ელემენტარულად, შანსი მისცე?

- ვის გულისხმობთ?

- მაგალითად, თბილისის “დინამოსა” და ქუთაისის “ტორპედოს” თავდამსხმელებს - ლევან შენგელიას და ბუდუ ზივზივაძეს. ორივე შესანიშნავ ფორმაში არიან და მგონია, რომ მათი შეკრებაზე გამოძახებით არაფერი დაშავდებოდა. ბევრი გვყავს მათზე უკეთესი ფორვარდი? მე ვაისს არაფერს ვერჩი, მწვრთნელია და თავისი გემოვნება გააჩნია, რომელიც შესაძლოა, ჩვენი გემოვნებისგან აბსოლუტურად განსხვავდება. ან რა უფლება მაქვს, მის საქმეში ჩავერიო.

მაგრამ ლოგიკა ერთია - შემთხვევების იმედად ვერ მოიგებ. დანიაში თავდამსხმელი ჩვენს გუნდში მეორე ტაიმში გამოჩნდა, ოთხი საყრდენით წარმატების მიღწევა კი წამოუდგენელი მგონია. 

უფრო მეტად უნდა შეგვეტია 

- დანიის მსგავს გუნდს შემტევ ფეხბურთს ვერ ვეთამაშებოდით. ეს ფეხბურთელებსაც ძალიან სურდათ, მაგრამ მასპინძლები ამის უფლებას არ გვაძლევდნენ და მაღალი პრესინგით ჩვენს საჯარიმოს მიგვაჯაჭვეს...

- დაცვითი თამაშის ლოგიკა გასაგებია, დანია მართლა ძლიერი გუნდია. მაგრამ ლობჟანიძის გოლის დროს გამოჩნდა, რომ მასპინძლების დაცვა არც ისეთი ძლიერი იყო, თავიდან რომ გვეგონა. ანუ იმას ვამბობ, რომ უფრო მეტად უნდა შეგვეტია. მაგრამ მათ უპირველესად, ბრძოლისუნარიანობით და სულისკვეთებით დაგვჩაგრეს. 

- ფეხბურთელებზე რას იტყვით, მათ თავიანთი შესაძლებლობები სრულად გამოავლინეს?

- ფეხბურთელების დამოკიდებულება ცალკე თემაა. როდესაც საქართველოს სახელს იცავ, მარტო თბილისში კი არ უნდა იბრძოლო, გასვლაზეც უნდა ითამაშო და მოედანზე თავი დადო. ჩვენს დროს, თამაშის წაგების შემდეგ, ქუჩაში გამოსვლა არ გვინდოდა, ბევრჯერ მახსოვს, გასახდელიდან ბიჭები ცრემლებით გავდიოდით. შესაძლოა, ვცდები, მაგრამ მე ასეთი ჟინიც ვერ დავინახე. 

- ვაისი ამბობს, რომ ფეხბურთელებს არა მონდომება, არამედ ფიზმომზადება აკლიათ...

- მესმის, რომ ეს და კიდევ სხვა არაერთი პრობლემაა. მაგრამ ქვეყნის სახელით რომ გადიხარ, თავი უნდა მოიკლა. ისიც არა მგონია, რომ უცხოეთში წასულები ფიზიკურად ვერ ემზადებიან. რაც 10 ივნისს მოხდა, ყველა ჩვენგანის სირცხვილია. 

მსაჯის შეცდომების მიუხედავად, გამარჯვება დაიმსახურეს 

- მსაჯობაზე რას იტყვით?

- შესაძლოა, მეორე და მესამე გოლზე არასწორად მოგვექცა და დანიელების კარში პენალტი არ დანიშნა, მაგრამ გულახდილად ვთქვათ, თითოეულ ამ ეპიზოდში სწორი გადაწყვეტილება რომ მიეღო, საქართველოს ნაკრები მოიგებდა?!

- მაგრამ, ვთქვათ, 3:2 ბევრად უფრო ღირსეული შედეგი იქნებოდა...

- ამაზე არ ვდავობ, მაგრამ დანიელებმა ბევრი მომენტიც შექმნეს და მათი დიდი ნაწილი ვერ გაიტანეს. ანუ მთავარი ისაა, რომ დანიელებმა გვაჯობეს, დაგვჩაგრეს და მსაჯის შეცდომების მიუხედავადაც, მათ გამარჯვება დაიმსახურეს. ისიც გამოჩნა, რომ ჩვენი ნაკრები ამ დონეზე სათამაშოდ მზად არაა და არათუ წარმატების შანსი არც გვქონდა, კიდევ კარგად გადავრჩით. არადა, მიკვირს, გუნდს რა დაემართა. ერთა ლიგაზე სუსტ მეტოქეებს კი მოვუგეთ, მაგრამ გუნდი იზრდებოდა. ახლა ვერ გავიგე, რა ხდება.

- შესარჩევი ციკლის დაწყებამდეც ცნობილი იყო, რომ ევრო 2020-ზე შესარჩევი ციკლიდან “ჯვაროსნები” ვერ გავიდოდნენ. ანუ ორიენტირი ბელარუსთან ერთა ლიგის ნახევარფინალისთვის კარგად მომზადებაა. მთავარი კითხვაა, ამ გუნდმა ვაისთან ერთად უნდა გააგრძელოს თუ მის გარეშე?

- ეს ფეხბურთის ფედერაციამ და თავად ვაისმა უნდა გადაწყვიტონ. მწვრთნელის ხშირი ცვლა ჩემთვის მიუღებელია, ეს გუნდს აზარალებს, მაგრამ დანიასთან შეხვედრამ ბევრი უარყოფითი კითხვა დაბადა და ეს ძალიან მაფიქრებს. ვაისი რომ დარჩეს, იქნება კი უკეთესობა? მთავარი ისაა, რომ ფედერაციამ ხალხის განწყობა უნდა გაითვალისწინოს. ეს ძალიან მნიშვნელოვანი ფაქტორია.

ყოველდღიური სპორტული გაზეთი "ლელო"
3135
მკითხველის კომენტარები / 1 /
სტატუს ქუო
0
ყრუ დაცვა ათამაშა, არასწორად, როცა შეტევაც შეეძლო.
მსგავსი ამბები
რუბრიკის სხვა სიახლეები
;