ინტერვიუ ვლადიმერ გუცაევთან: ყაზახებზეც წინ ვართ და ყველა დანარჩენზეც

ერთა ლიგის პირველ შეხვედრამდე ერთი კვირაა დარჩენილი. რა შანსები გვაქვს D დივიზიონში, რას ფიქრობს მეტოქეებსა და საქართველოს ნაკრებზე?

ამ და სხვა საინტერესო თემებზე "ლელო" თბილისის "დინამოს" ლეგენდარულ თავდამსხმელს, ეროვნული ნაკრების ყოფილ მწვრთნელ ვლადიმერ გუცაევს ელაპარაკა...

- ეროვნული ნაკრები მალე შეკრებას დაიწყებს და ასტანაში ყაზახეთს შეხვდება. ამ ტურნირზე საქართველოს ნაკრების შანსებს შეაფასებთ?

- ჩემი პოზიციაა: თუ ამ ჯგუფშიც ვერაფერი გავაკეთეთ, ეს ძალიან სერიოზული კრიზისის მაჩვენებელი იქნება და მოგვიწევს იმაზე დაფიქრება, რა სჭირს ქართულ ფეხბურთს. რა თქმა უნდა, პრობლემები არის და თანაც, არაერთი. მაგრამ ყაზახეთთან, ლატვიასა და ანდორასთან ერთად რომ ხარ ჯგუფში, იქიდან აუცილებლად უნდა გახვიდე შემდეგ ეტაპზე.

- ყველაზე მეტად გულშემატკივარი ყაზახებს უფრთხის...

- მესმის, მაგრამ ჩვენ ყაზახებზეც წინ ვართ და ყველა დანარჩენზეც ბევრად უკეთესი მოთამაშეებიც გვყავს. ეს ხომ შემთხვევით არ ხდება. მგონია, რომ ამ ჯგუფში ჩვენმა ნაკრებმა რაღაც უნდა გააკეთოს, თუკი რაიმე პრეტენზია აქვს. თანაც, ვაისმა ერთ ციკლში უკვე იმუშავა და ვერავინ იტყვის, რომ გუნდს, გარემოს და ფეხბურთელებს არ იცნობს. პლუს, საინტერესო თაობა წამოვიდა. ზოგი რამდენიმე წელია, რაც ნაკრებში თამაშობს, ზოგიც ახალია, მაგრამ პოტენციალი ეტყობა - კვირკველია, კაკაბაძე, კაშია... ახლა ჩაკვეტაძე იზრდება... მოკლედ, საინტერესო თაობა გვყავს.

- თავდამსხმელებზე რას იტყვით?

- სამწუხაროდ, ბოლო წლებში შეტევაში პრობლემები სულ გვქონდა და ახლაც გვაქვს. მიმაჩნია, რომ ნაკრებს სწრაფი ფლანგის მოთამაშეები სჭირდება, გუნდის თამაში უფრო დინამიკური რომ გახდეს. მაგალითად, მიმაჩნია, რომ თბილისის "დინამოს" თავდამსხმელი აკაკი შულაია ნაკრებში აუცილებლად უნდა ნახონ და შანსი მისცენ.

- მასში ასეთი კარგი თვისებები დაინახეთ?

- რა თქმა უნდა! შულაია კარიერას მარტვილის "მერანიდან" იწყებდა და იქიდან ეტყობოდა, რომ საინტერესო ბიჭი იზრდებოდა. სწრაფია, კაცს იოლად სცდება და მოტყუება შეუძლია. ამავე დროს, შრომისმოყვარეა და თამაშს დინამიკურობას მატებს. დიდი ხანია, რაც მას ვაკვირდები და მიკვირს, ყურადღებას რომ არ აქცევენ. ყაზახეთისა და ლატვიის დონეზე ის აუცილებლად სასარგებლო იქნება და ნაკრებს დადებით მხარეს შესძენს.

ახლა კი საქართველოს ნაკრების თავდასხმას სწორედ ეს აკლია, ტემპი და სისწრაფე, რასაც გუნდს შულაიას მსგავსი თავდამსხმელები აძლევენ. გუნდი ბევრ მომენტს იმიტომაც ვერ ქმნის, რომ თავდამსხმელებს სისწრაფე აკლიათ. ასეთ დროს, ჩემი აზრით, შულაიას სისწრაფე უნდა გამოვიყენოთ.

- ყაზახეთის ნაკრებზე რა აზრის ხართ?

- ფაქტია, სტანიმირ სტოილოვის ხელში გუნდი უკეთ ათამაშდა და ბოლო საკონტროლო შეხვედრებში კარგად გამოიყურებოდა, აზერბაიჯანსაც დამაჯერებლად მოუგო. თუმცა, დარწმუნებული ვარ, რომ მაინც არაა იმ დონის, ჩვენს ნაკრებს მოგება რომ გაუჭირდეს. ყაზახებს ძლიერი გუნდები და ლიგა ჰყავთ და ბოლო წლებში ჩემპიონთა და ევროპის ლიგების ჯგუფებში ხშირად ხვდებიან. მაგრამ საკლუბო და სანაკრებო ფეხბურთი სხვადასხვაა. კლუბს ლეგიონერის დამატება შეუძლია, ნაკრებში კი ასეთებს ნაკლებად იყენებენ. საერთოდაც, ყაზახეთი ჩვენი კლასის გუნდი არაა. მათ ჩვენი დონის ფეხბურთი არ ჰქონიათ და მხოლოდ საკუთარი რესურსებით ახლაც ვერ გვაჯობებენ.

- საქართველოს ნაკრებზე რას იტყვით?

- იმავეს, რაც თავდასხმაზე ვთქვი - მეტი ტემპი და სისწრაფე სჭირდება, რაც თანამედროვე ფეხბურთში ძალიან ფასობს. თუ შეტევა სწრაფად არ განავითარე, ზონები იკეტება და მომენტების შექმნის ძალიან მცირე შანსი რჩება.

ფლანგებზე ამიტომ გვჭირდება შულაია და იგივე გიორგი ჩაკვეტაძე, რომელიც "გენტში" მშვენივრად ათამაშდა. აიღეთ "ლივერპული", გუნდს უსწრაფესი თავდამსხმელები, სანე, სალაჰი და ფერნმინო ჰყავს, სწრაფად თამაშობენ, ბევრ მომენტს ქმნიან და ბევრსაც იტანენ. ევროპაშიც ბოლო დროს ეს გუნდი ამიტომაც შეუყვარდათ.

- ვლადიმირ ვაისმა ამ კუთხით ერთი მნიშვნელოვანი მოთამაშე აღმოაჩინა, რომელიც ნახევარდაცვას და შეტევებს დინამიკურობას მატებს - ვაკო გვილია.

- ეს კარგი ნაბიჯი იყო. კიდევ ერთხელ ვამბობ - თანამედროვე ფეხბურთის მოთხოვნა მაქსიმალური სისწრაფით თამაშია. ჩვენ გვყავს ასეთი მოთამაშეები და ჩემი აზრით, ისინი აუცილებლად უნდა გამოვიყენოთ.

ყოველდღიური სპორტული გაზეთი "ლელო"
3869
მკითხველის კომენტარები / 4 /
გიზოგ
0
ვოვა ფეხბურთელიც დიდი იყო და არც საფეხბურთო ნიუანსების ცოდნა დაეწუნება. ეს მისი მეთაურობით მოუგო საქართველოს ახალგაზრდულმა ნაკრებმა იტალიის ახალგაზრდულ ნაკრებს, რომელთა უმეტესობა შემდეგში მსოფლიო ჩემპიონები გახდნენ. მაგრამ მე უნდა აღვნიშნო ქართულ ფეხბურთში გავრცელებული სენი „ფავორიტობა“, თორემ როცა სისწრაფეზე და სწრაფ ფლანგელ ფეხბურთელზე ვლაპარაკობთ, როგორ შეიძლება არ აღვნიშნოთ საბა ლობჟანიძეს. უკვე გამოცდილიცაა, პასიც დროული იცის და გოლის გამტანიცაა.
gaga
0
ნამდვილი ლეგენდაა, მაგრამ ამ ინტერვიუში დაუფასებლობა და თავმაღლობა იგრძნობა. ყაზახებს თუ არ დავაფასეთ წავაგებთ
მსგავსი ამბები
რუბრიკის სხვა სიახლეები
;