[ინტერვიუ] ვლადიმირ ვაისი: კვირკველიას შეუძლია ინგლისში თამაში... ჯანოს იმედი მაქვს... ოქრიაშვილს ესპანეთიც მოუხდებოდა...

საქართველოს ეროვნული ნაკრების მთავარმა მწვრთნელმა ვლადიმირ ვაისმა საინტერესო ინტერვიუ მისცა რუსულ "იზვესტიას" (iz.ru), რასაც სიამოვნებით გაეცნობა ჩვენი მკითხველიც...

- ზამთარში თქვენ იყავით ყატარში და დაესწარით რუსული გუნდების მატჩებს. რატომ მიიღეთ ასეთი გადაწყვეტილება?

- ყატარში ხშირად ვარ, რადგან იქ ჩემი შვილი თამაშობს. რუსული გუნდების მატჩებს კი იმიტომ დავესწარი, რომ "ლოკომოტივშია" საქართველოს ნაკრების წევრი საბა კვირკველია. ზოგადად, რუსეთის ჩემპიონატი საინტერესო საყურებელია.

- ხშირად უყურებთ რუსეთის ჩემპიონატს?

- 2007 წელს წავედი "სატურნიდან". მას შემდეგ სისტემატურად ვადევნებ თვალს. დამატებითი მოტივაცია ის არის, რომ რუსეთის ჩემპიონატში 7 ქართველი თამაშობს. შინ სპეციალური არხებიც კი მაქვს...

- ზაფხულში წერდნენ, თითქოს, სოლომონ კვირკველია "ლესტერს" უნდოდა. თქვენი აზრით, სწორად მოიცქა, როცა დარჩა?

- ვიცოდი, რომ კლუბი მას კონტრაქტს სთავაზობდა. ამ თემაზე ვილაპარაკეთ კიდეც. არიან ფეხბურთელები, რომლებიც ოცნებობენ ესპანეთში და ინგლისში თამაშზე, მაგრამ არიან ისეთი მოთამაშეებიც, რომელთაც უნდათ რუსეთში თამაში. კვირკველიას გზა რთული იყო. მას არ ჰქონდა ნდობა "რუბინში", ახლა კი ბოლო სეზონის საუკეთესო მცველია. ის დიდი ფეხბურთელი და დიდი ადამიანია. მან მე მითხრა, რომ "ლოკომოტივი" სთავაზობს ახალ კონტრაქტს. გამოდის, რომ ის "ლოკომოტივში" თამაშის ღირსია, რომ "ლოკომოტივში" ენდობიან. ასევე სასიხარულოა, რომ მისით ისეთი გუნდი ინტერესდება, როგორიცაა "ლესტერი".

- მიგაჩნიათ, რომ კვირკველია მზადაა ინგლისის პრემიერლიგაში სათამაშოდ?

- დიახ, ეს ასეა და მას საამისოდ ყველანაირი მონაცემი აქვს. კარგად თამაშობს თავით და აქვს სისწრაფე. სულ მახსოვს, როგორ დაეწია სიჩქარეაკრეფილ გარეთ ბეილს...

- კმაყოფილი ხართ, რომ ჯანო ანანიძე გადავიდა "კრილიაში" და აქვს მეტი სათამაშო დრო?

- ყატარში იმიტომაც ჩავედი, რომ ჯანოს დავკვირვებოდი, მაგრამ ის წავიდა "სპარტაკიდან". ბევრი ვილაპარაკეთ ამაზე. ჯანოსთვის მნიშვნელოვანია სათამაშო პრაქტიკა. "კრილიას" წვრთნის ჩემი მეგობარი მიოდრაგ ბოჟოვიჩი. ის "როსტოვშიც" წვრთნიდა ჯანოს და იცის მისი შესაძლებლობები. იმედი მაქვს, ექნება მუდმივი სათამაშო პრაქტიკა და ეს საქართველოს ნაკრებსაც გამოადგება.

- რას იტყვით იმაზე, რომ გიორგი ჯიქიამ რუსეთის სახელით არჩია თამაში?

- ყველა ადამიანს აქვს არჩევანის საშუალება. ის ქართველია, მაგრამ რუსეთის სასარგებლოდ გააკეთა არჩევანი. უკვე ითამაშა ოფიციალურ შეხვედრაში. იმედი მაქვს, საკუთარი არჩევანით კმაყოფილია.

- სცადეთ ჯიქიას დარწმუნება?

- მე მას შევხვდი, ვილაპარაკეთ... სცადა საქართველოს ფეხბურთის ფედერაციამაც... მაგრამ ის ისე მოიქცა, როგორც საჭიროდ ჩათვალა.

- რას ფიქრობთ იმაზე, რომ ზამთარში თორნიკე ოქრიაშვილმა "კრასნოდარი" დატოვა და ახლა უკლუბოდაა?

- ის შესანიშნავი ფეხბურთელია. მას შეუძლია ძლიერი რუსული კლუბის ლიდერობა. ასევე, სტილით მოუხდებოდა ესპანეთს. ბოლო ორ წელიწადში ორი მძიმე ტრავმა ჰქონდა. მან წასვლა გადაწყვიტა "კრასნოდარიდან" და ეძებდა ახალ კლუბს. ეს არ არის იოლი საქმე ასეთი ტრავმების შემდეგ...

ყოველდღიური სპორტული გაზეთი "ლელო"
1551
მკითხველის კომენტარები / 0 /
მსგავსი ამბები
რუბრიკის სხვა სიახლეები
;