ინტერვიუ ირაკლი ცირეკიძესთან: გუნდი შესავსებია, ლიდერები გამოსაკვეთი

ქართველი ძიუდოისტები თბილისის გრან პრისთვის ემზადებიან. პრაღის შეკრებისა თუ ამ ტურნირისთვის მზადების შესახებ გვესაუბრება ვაჟთა ნაკრების მთავარი მწვრთნელი ირაკლი ცირეკიძე.

- როგორ ჩაიარა ერთობლივმა შეკრებამ, ტრავმა ან რამე ხელის შემშლელი მიზეზი ხომ არ ჰქონიათ ჩვენებს?

- ძალიან კარგი შეკრება გამოვიდა, ბიჭებმა ნაყოფიერად ივარჯიშეს. ტრავმა მხოლოდ ბექა ღვინიაშვილს ჰქონდა, რომელიც ჯერ კიდევ სარეაბილიტაციო პერიოდშია და ექიმის რჩევისგან გამომდინარე, ტატამზე ზედმეტ დატვირთვას მაინც ვერიდებოდით, რათა ბოლომდე მოუშუშდეს პარიზში ნატკენი ფეხი.

მასაც შიშის გრძნობა აქვს ჯერ - შებოჭილია, ბოლომდე ვერ ეყრდნობა, თუმცა თბილისის ტურნირისთვის სრულად იქნება გამოჯანმრთელებული.

გუნდის სხვა წევრებმა კარგად და ნაყოფიერად ივარჯიშეს. შეკრებაც ძლიერი გამოდგა - ევროპის თითქმის ყველა ქვეყანა მონაწილეობდა, დაახლოებით 600 სპორტსმენი იყო, მათ შორის - ძლიერებიც. თან, ზუსტად იმ დატვირთვების მქონე შეკრება იყო, რაც ამ ეტაპზე გვჭირდებოდა. ევროპის ჩემპიონატისთვის ცოტა სხვა კუთხით ვამზადებთ, მსოფლიოსთვის კი უფრო ძლიერი დატვირთვებით მოვემზადებით.

- ახალგაზრდებმა როგორი შთაბეჭდილება დატოვეს და რამდენად ელოდებით წლეულსვე სანაკრებო კონკურენციაში მათ ჩართვას?

- მოგეხსენებათ, ისინი განსხვავებული პროგრამით ემზადებიან და ამიტომ არ ვამზადებთ უფროსებთან წლეულსვე კონკურენციისთვის. ამ შეჯიბრებებშიც აქცენტს შედეგზე არ ვაკეთებდით, მთავარი იყო, გამოცდილება მიეღოთ. ამიტომ ამ ეტაპს მთლიანად მოსამზადებლად ვიყენებთ, რათა შეეჩვიონ უფროსებს და გაისად მზად იყვნენ მათთან საჭიდაოდ.

წლის ბოლოს უკვე მონაწილეობას მიიღებენ ქვეყნის ეროვნულ ჩემპიონატში და ვფიქრობ, ბევრ წონაში დაძაბავენ კონკურენციას.

- თბილისის გრან პრის შემადგენლობა რა კრიტერიუმით განისაზღვრა?

- ეს ტურნირი ევროპის ჩემპიონატისთვის მზადების ერთ-ერთი ეტაპია. თან მისი ჩატარების დროც ხელსაყრელია - ისეთ ვადებში ტარდება, არც წონის დამკლებებს უშლის ხელს და არც - სხვებს.

ეროვნული ჩემპიონატის ყველა მედალოსანი მიიღებს მონაწილეობას. პლუს, დავამატეთ შარშანდელ სეზონში ევროპისა და მსოფლიოს ჩემპიონატების მედალოსნები. მათ გამო, ვინც ახლა თბილისის შემადგენლობიდან ამოვარდა, ისინი აპრილში ანთალიაში იჭიდავებენ.

თბილისის ტურნირისთვის მზადების მიზნით 20 მარტს თბილისში შეკრებას დავიწყებთ. წინასწარი მონაცემებით, კარგი შეჯიბრება გამოდის.

- რა იქნება აქ თქვენი ძირითადი ამოცანა - შედეგი?

- ამას ჩვენ სასტარტო შეჯიბრებად განვიხილავთ. თავიდანვე განზრახული გვქონდა, რომ ევროპის ჩემპიონატზე წასაყვან ლიდერებს 2-3 შეჯიბრებაში მიეღოთ მონაწილეობა, ვის როგორ დასჭირდებოდა წონის კლება. ერთ-ერთი მათგანი ჩვენი ტურნირიც იყო. მით უფრო, რამდენიმე წონაში გუნდი შესავსებია, ლიდერები გამოსაკვეთი, რაშიც ეს სტარტი ხელს გვიწყობს ყველანაირად.

- ღვინიაშვილისა და ჭრიკიშვილის გარდა, გუნდში სხვაც ხომ არაა ტრავმირებული?

- სავარაუდოდ, ჭრიკიშვილი არ მიიღებს მონაწილეობას - ნატკენ ხელში ჯერ კიდევ სითხე აქვს, სხვები კი ჯანმრთელად არიან, სერიოზული პრობლემა არავის აწუხებს.

- ამ შეჯიბრების შემდეგ როგორ მოემზადებით ევროპის ჩემპიონატისთვის?

- ევროპამდე მეტი სტარტი აღარ გვექნება. ტურნირის შემდეგ რამდენიმე გუნდი აქაც დარჩება ერთობლივ შეკრებაზე, 8 აპრილს კი ანთალიაში მივდივართ, სადაც ტურნირში ჩვენგან მხოლოდ სათადარიგოები გამოვლენ, ძირითადი ნაკრები კი ერთობლივ კემპში მიიღებს მონაწილეობას.

- ალბათ, უკვე იქნება გამოკვეთილი გარკვეული წონები და ფალავნები, რომლებსაც განაღდებული ექნებათ ევროპის ჩემპიონატზე გამოსვლა?

- თავიდანვე ყველამ იცოდა, რომ ევროპის ჩემპიონატზე მონაწილეობას ნამდვილად მიიღებდა ოთხი კაცი: მსოფლიოს შარშანდელი ჩემპიონატის სამი მედალოსანი - ვაჟა მარგველაშვილი (66), უშანგი მარგიანი (90) და ვალერი ლიპარტელიანი (100), რომლებსაც დაემატებოდა ლაშა შავდათუაშვილი (73).

დანარჩენები ხუთი ადგილისთვის იბრძოლებდნენ და ტურნირებიდან გამომდინარე, ზოგი ცოტათი მართლაც დაწინაურდა კონკურენციაში, ზოგი ახლა იბრძვის, თბილისის ტურნირი კი საბოლოო სურათს მოგვცემს.

ყოველდღიური სპორტული გაზეთი "ლელო"
2654
მკითხველის კომენტარები / 0 /
მსგავსი ამბები
რუბრიკის სხვა სიახლეები
;