ინტერვიუ. ირაკლი ცირეკიძე: საფრანგეთი, ავსტრია, გერმანია, რუსეთი, საქართველო...

სანქტ პეტერბურგში, მსოფლიოს მასტერსზე წასვლის წინ, რომელიც უახლოეს უქმეებზე გაიმართება, სამომავლო გეგმებზე კომენტარი ვთხოვეთ საქართველოს ძიუდოისტთა ნაკრების მთავარ მწვრთნელ ირაკლი ცირეკიძეს.

- რა დატვირთვას აძლევთ ამ ტურნირს, რას ისახავთ მასტერსზე მიზნად?

- მასტერსი სეზონის ბოლო შეჯიბრებაა, თუმცა ზოგიერთს მსოფლიოს რეიტინგში პირველ ადგილზე გადასვლის შანსიც აქვს. ამდენად, მასტერსი სეზონის შემაჯამებელი ტურნირიც იქნება.

- რით იყო გამოწვეული ის ცვლილებები, როცა სამი სპორტსმენი დაასვენეთ?

- ამირან პაპინაშვილს ვასვენებთ, რადგან ორ კვირაში საქართველოს ჩემპიონატში უნდა იასპარეზოს და ასე მალე ორჯერ წონის დაკლება არ იქნებოდა გამართლებული. უშანგი მარგიანს ფეხის ტრავმის გამო ვასვენებთ, ხოლო ადამ ოქრუაშვილი ფიზიკური კონდიციებისა და არაშესაბამისი მდგომარეობის გამო გამოტოვებს ამ ტურნირს. ის არაა ფორმაში, წონაც ზედმეტი აქვს და აჯობებს, მოემზადოს საქართველოს ჩემპიონატისთვის.

- თუ დასვენებაა, სხვებს რატომ არ ასვენებთ? მაგალითად, ვაჟა მარგველაშვილს, ვალერი ლიპარტელიანს? თუ მათ არ უწევთ წონის დაკლება და იმიტომ?

- ისინი წონას მართლაც არ იკლებენ ბევრს და თან შანსი აქვთ, რეიტინგში პირველ ადგილზე გადავიდნენ. მარგველაშვილს წლეულს ბევრი არ უჭიდავია, ლიპარტელიანი კი ბევრს არ იკლებს. ამდენად, იქ გამოსვლით მათ ბევრიც არაფერი დააკლდებათ.

- საქართველოს ჩემპიონატში ყველა ლიდერი იჭიდავებს თუ ვინმეს ასვენებთ?

- არა, არავინ არ დაისვენებს, ყველა ლიდერი იჭიდავებს: პაპინაშვილიც, მარგველაშვილიც, ლაშა შავდათუაშვილიც, ბექა ღვინიაშვილიც, ლიპარტელიანი, ოქრუაშვილი, გურამ თუშიშვილიც და სხვებიც. იმ დროისთვის მარგიანიც ფორმაში იქნება და ისიც გამოვა. ქვეყნის ჩემპიონატს მხოლოდ ავთანდილ ჭრიკიშვილი გამოტოვებს. მოგეხსენებათ, ახლახანს მას ხელზე ოპერაცია გავუკეთეთ და უკვე კი შეუდგა ვარჯიშს, მაგრამ იქამდე გამოჯანმრთელებას ვერ მოასწრებს.

- როგორ მიდის მისი რეაბილიტაცია?

- ახლა რასაც ვუყურებ, სიმართლე გითხრათ, ცოტა მეშინია კიდეც, დაჩქარებული ხომ არაა მეთქი. მოგეხსენებათ, მას ძვალი ჰქონდა შეტეხილი, რომელიც შეერია სახსარს და ხელს უშლიდა ჭიდაობაში. ოპერაციიდან ორი თვეა გასული, ძველი ტრავმა შეხორცდა და მისი განმეორების შანსი აღარაა. ხელსაც ნორმალურად ამოძრავებს და გამოჯანმრთელების პროცესი გეგმაზომიერად მიდის.

- საქართველოს ჩემპიონატში ახალგაზრდებიც გამოვლენ?

- რაღაც ნაწილი არ იჭიდავებს, რომლებიც გაერთიანებული გუნდის შეკრებაზე არიან ლაშა გუჯეჯიანისა და გიორგი ყიზილაშვილის ხელმძღვანელობით. დანარჩენები ყველანი გამოვლენ.

- დაბოლოს, ეროვნული ნაკრების მოსამზადებელი გეგმა როგორი იქნება გაისად, სეზონის პირველ ნახევარში, რომელ შეჯიბრებებში გამოხვალთ?

- გაისად აუცილებლად ვიჭიდავებთ პარიზში, ავსტრიაში ევროპის ღია თასზე, გერმანიაში, რუსეთში, ევროპის წინ კი თბილისის "დიდ პრიზზე" ვიჭიდავებთ. შემადგენლობებს გადავანაწილებთ ყველა ამ ტურნირზე.

2461
მკითხველის კომენტარები / 1 /
სოსო
0
ავთოს ძველებური ჭიდაობა მომენატრა.სწრაფ გამოჯანმრთელებას ვუსურვებ.
მსგავსი ამბები
რუბრიკის სხვა სიახლეები
;