ინტერვიუ კაცთან, ვინც საფეხბურთო სკანდალებს ქმნის

მათ პირველებმა გვამცნეს კრიშტიანო რონალდოს სექსსკანდალის ამბავი და პირველები წავიდნენ უეფას წინააღმდეგ

2015 წელს ფეხბურთს საკუთარი ჭიკიLეაკს გაუჩნდა. Football Leakrs - ეს არის ბლოგი, სადაც ქვეყნდება სხვადასხვა კონტრაქტის ასლები, იქ ასაჯაროებენ აგენტების საკომისიოების მონაცემებს, კლუბებსა და ფეხბურთელებს შორის საიდუმლო მოლაპარაკებებს...

სწორედ იქ გაჩნდა პირველად ინფორმაცია, რომ კრიშტიანო რონალდო მალავს შემოსავლების ნაწილს ვირჯინიის კუნძულების ოფშორში. კეტრინ მაიორგას გაუპატიურების ისტორიაც ამ დოკუმენტებშია, რომლებიც Football Leakrs-მა მოიპოვა და გამოაქვეყნა.

დროთა განმავლობაში, პროექტს გაუჩნდა პარტნიორები ევროპულ გაზეთებსა და ვებგვერდებს შორის, ცოტა ხნის წინ კი გერმანიაში გამოვიდა წიგნი - "Football Leakrs: ბინძური საფეხბურთო ბიზნესი", რომელიც გერმანული გამოცემა Dერ შპიეგელ-ის ჟურნალისტებმა მიხაელ ვულცინგერმა და რაფაელ ბუშმანმა დაწერეს.

მაგალითად, იქ წერია, რომ აგენტ მინო რაიოლას 49 მილიონი ევრო გადაუხადეს პოლ პოგბას "იუვენტუსიდან" "მანჩესტერ იუნაიტედში" გადასვლისას... და იქ არის ბევრი სხვა საინტერესო ამბავი.

Sport Cpnnect -ისთვის მიცემულ ინტერვიუში ვულცინგერი ჰყვება, თუ რაში სჭირდებათ ეს ყველაფერი.

- როგორ გაიცანით Football Leakrs? -ის დამფუძნებელი?

- ჩემი თანაავტორი რაფაელ ბუშმანი პირველად მას ელექტრონული ფოსტით დაუკავშირდა. ეს მოხდა 2015 წლის შემოდგომაზე, პრაქტიკულად მაშინვე, როცა Football Leakrs-ის ბლოგზე პირველი დოკუმენტები გამოქვეყნდა. მას ჯონი ჰქვია.

რაფამ გააგრძელა წერა, არ კარგავდა კავშირს და საბოლოოდ დაარწმუნა პროექტის ავტორი იმაში, რომ ჩვენ მართლაც დაინტერესებული ვიყავით შეხვედრით. ჯონი დათანხმდა რაფაელის უფრო ახლოს გაცნობას.

2016 წლის თებერვალში ისინი პირველად შეხვდნენ ერთმანეთს აღმოსავლეთ ევროპაში. რაფაელმა დაარწმუნა ჯონი იმაში, რომ Football Leakrs-ისთვის სასარგებლო იქნება ჟურნალისტებთან თანამშრომლობა, რომლებიც სპეციალიზდებიან გამოძიებებზე, აგრეთვე, ისეთ გავლენიან გამოცემებთან კავშირი, როგორიც არის Der Spiegel . ეს დაეხმარება პროექტს თავისი მიზნების მიღწევაში. ისინი კიდევ რამდენჯერმე შეხვდნენ ერთმანეთს აღმოსავლეთ და სამხრეთ ევროპის სხვადასხვა ქალაქში. ასე დაიწყო ყველაფერი.

- თქვენ არ გეხამუშებოდათ მისი ანონიმურობა?

- ჩვენთვის ჯონი არ არის ანონიმი. ჩვენ ვიცით მისი სახელი, ბიოგრაფიის მნიშვნელოვანი დეტალები. მნიშვნელოვანია იმის აღნიშვნა, რომ მხოლოდ რაფაელი ხვდებოდა და აგრძელებს მასთან შეხვედრას. მე ის არ მინახავს. ჯონი - ახალგაზრდა პორტუგალიელია, ძალიან ჭკვიანი ბიჭი. ის თავისუფლად ლაპარაკობს ხუთ ენაზე და სწავლობს კიდევ ორს. მაგრამ ჩვენ ჯიუტად შევინახავთ საიდუმლოდ ყველა პერსონალურ მონაცემს და არასოდეს გავთქვამთ მის პიროვნებას.

- რატომ გაგიზიარათ თქვენ ეს დოკუმენტები?

- ჯონს ჩვენთვის არაფერი გადმოუცია პირველივე გაცნობისთანავე, ანუ ის არ ურიგებდა დოკუმენტებს პირველ შემხვედრებს. მას უნდოდა გაეგო - ვინ არის რაფაელი, როგორ მუშაობს, როგორ ატარებს გამოძიებას.

უნდა გასცნობოდა ჩვენი სამუშაოს თავისებურებებს. ცხადია, რომ სწორედ რაფაელის საქმისადმი მიდგომა, კერძოდ, ანონიმურობის შენახვა ნებისმიერ პირობებში - დაგვეხმარა ინფორმატორის გადაბირებაში. დაგვეხმარა ისიც, რომ მზად ვიყავით, გაგვეზიარებინა დოკუმენტები კოლეგებისთვის, რომლებიც ასევე ატარებენ გამოძიებას: Dერ შპიეგელ-ის მიერ შექმნილ ჯგუფში შევიდნენ გამოცემები საფრანგეთიდან, ბელგიიდან, ესპანეთიდან და რამდენიმე სხვა ქვეყნიდან. ჯამში, პროექტის სხვადასხვა ნაწილზე მუშაობდა 60 ჟურნალისტზე მეტი.

- პირადად როგორი დამოკიდებულება გაქვთ ჯონის მიმართ? რა მიზნები აქვს მას?

- ჯონი კლასიკური ინფორმატორია. თუმცა, ჩვენ ჯერ ისევ არ ვიცით - მარტო მოქმედებს თუ რაიმე ჯგუფს წარმოადგენს. ჩვენ ჯონის მიმართ ისეთივე დამოკიდებულება გვაქვს, როგორიც სხვა ნებისმიერი ინფორმატორის მიმართ: ვცდილობთ გავიცნოთ იმდენად კარგად, რამდენადაც შესაძლებელია. ვცდილობთ გავარკვიოთ - რა ამოძრავებს მას და ორჯერ ვამოწმებთ მის მასალებს.

თავად ჯონი ამბობს, რომ მისი მთავარი მიზანია - გაწმინდოს დაბინძურებული საფეხბურთო სამყარო. მას ძალიან უყყვარს ფეხბურთი, გააჩნია დაუჯერებელი ცოდნა ისტორიაში - გუნდებზე, მოთამაშეებზე... როცა რაფაელი მას გერმანულ ფეხბურთზე ელაპარაკებოდა, ჯონმა აჩვენა, რომ მეორე დივიზიონის ფეხბურთელებსაც კი იცნობს, რომლებმაც უკვე დაასრულეს კარიერა. ის ამტკიცებს, რომ მისი მიზანია - საიდუმლო მასალებისა და ბინძური გარიგებების გამოაშკარავებით, დაუბრუნოს თამაში გულშემატკივრებს.

- არ გეჩვენებათ, რომ მას შეიძლება ფარული ზრახვები ჰქონდეს? მაგალითად, გააძევოს რომელიმე მენეჯერი ან აგენტი საფეხბურთო სამყაროდან...

- რა თქმა უნდა, ჩვენ გვიფიქრია ამაზე. რაფაელს ბევრი კითხვა დაუსვამს მისთვის ამ თემაზე. და ჯონი ყოველ ჯერზე ერთსა და იმავეს პასუხობდა: არა, მსგავსი არაფერი არ ხდება. ჯონმა 18 მილიონზე მეტი დოკუმენტი გამოგვიგზავნა. თუ თქვენ ამოწმებთ მთელს ფაქტურას და ხედავთ, რომ დოკუმენტები ეხება მთელი მსოფლიოს ქვეყნებს, მაშინ უბრალოდ არ გაქვთ საბაბი, ეჭვი შეიტანოთ ინფორმატორზე იმაში, რომ ის ცდილობს ზიანი მიაყენოს გარკვეულ კლუბებს, მოთამაშეებს, აგენტებს, მენეჯერებს ან მთელ ასოციაციებს.

- რატომ გადაწყვიტეთ, ეს ყველაფერი ერთ წიგნში გაგეერთიანებინათ?

- Der Spiegel -მა და მისმა პარტნიორებმა 2016 წლის დეკემბერში გამოაქვეყნეს გამოძიების პირველი მონაცემები, მაგალითად, იმ სისტემის შესახებ, რომელიც კრიშტიანო რონალდოს მრჩევლებმა, კონსულტანტებმა და იურისტებმა შექმნეს იმისთვის, რომ პორტუგალიელს ნაკლები გადასახადი ჰქონოდა თავისი ბრენდის გაყიდვისგან.

საერთო ჯამში, ჩვენ და ჩვენმა პარტნიორებმა გამოვაქვეყნეთ ასობით სხვადასხვა სიუჟეტი. როცა გავიდა ახალი ამბების პირველი ტალღა, ჩვენ გადავწყვიტეთ, შეგვექმნა წიგნი ყველა საიდუმლო მონაცემით. მასში შევიდა ახალი მონაცემებიც - მაგალითად იმაზე, რომ პოლ პოგბას აგენტმა მინო რაიოლამ 49 მილიონი ევრო მიიღო საკომისიოს სახით.

- ვინმე ხელს გიშლიდათ, გემუქრებოდათ?

- ყოველდღე გვაქვს ურთიერთობა იმათ იურისტებთან და ადვოკატებთან, ვინც უკმაყოფილონი არიან ჩვენი პუბლიკაციებით, მაგრამ, ჯერჯერობით, არავის უცდია ჩვენთვის ხელის შეშლა. ჩვენ ჟურნალისტისთვის იდეალურ სიტუაციაში ვართ: ხელთ გვაქვს დოკუმენტები და თუ ვინმე სასამართლოში ჩივილს გადაწყვეტს, ჩვენ, უბრალოდ, ამ დოკუმენტებს წარმოვადგენთ. დღემდე ყველა დოკუმენტი, რომელსაც ჩვენ ვამოწმებდით, უტყუარი იყო.

ყოველდღიური სპორტული გაზეთი "ლელო"
746
მკითხველის კომენტარები / 0 /
მსგავსი ამბები
რუბრიკის სხვა სიახლეები
;