[ინტერვიუ] კახა ცხადაძე: ვიცი, ბევრს სურს ჩემი დამცირება!.. პრეზიდენტი? ის ამას არ აკადრებდა საკუთარ თავს...

"ორდაბასის" მთავარმა მწვრთნელმა კახა ცხადაძემ ინტერვიუ მისცა KazFootball.kz-ს, რომელშიც არაერთ საინტერესო საკითხზე ილაპარაკა. სანამ უშუალოდ ინტერვიუზე გადავიდოდეთ, ვთქვათ, რომ ჩვენი უტყუარი ინფორმაციით, სიმართლე არ არის ყაზახურ მედიაში გავრცელებული ინფორმაცია იმის თაობაზე, თითქოს, იქაური პრემიერლიგის შეჩერებამ "ორდაბასიში" ფინანსური კრიზისი გამოიწვია - ფეხბურთელები და სამწვრთნელო შტაბის წარმომადგენლები ხელფასს ჩვეულებრივად მიიღებენ...

ახლა კი ინტერვიუს მივხედოთ. მას მცირედი შემოკლებით გთავაზობთ და ყურადღებას გავამახვილებთ იმ მონაკვეთებზე, რომელიც ქართველი მკითხველისთვის უფრო საინტერესოდ გვეჩვენა...

- რა შეგიძლიათ თქვათ "ასტანასთან" პირველი ტურის მატჩზე? ჩემპიონთან გასვლით შეხვედრაში ფრით დაწყება წარმატება არ არის?

- "ორდაბასი" ამ მატჩმა კარგი კუთხიდან წარმოაჩინა. შინაარსიანად ვითამაშეთ და, ვფიქრობ, გამარჯვებაც დავიმსახურეთ. არ მიმაჩნია, რომ "ასტანა" უპირატესობას ფლობდა. განსაკუთრებით პირველ ტაიმში, როცა ჩვენ ვფლობდით ბურთს. ერთადერთი, რაც არ გვეყო, საგოლე მომენტების რეალიზება იყო. როცა გუნდი 1:0-ს იგებს და კონტრშეტევის შედეგად უშვებს საპასუხო გოლს, ეს ძალიან საწყენია.

- რა მოუვიდა თქვენს გუნდს "თარაზთან" მატჩში? ორი ავტოგოლი, ორი პენალტი ("ორდაბასის" ფეხბურთელებმა 2 გოლი გაიტანეს საკუთარ კარში, 0:3-ს აგებდნენ და საბოლოოდ 2:3 წააგეს - რედ)...

- რაც მოხდა, ყველაფერი ჩვენი ბრალია. შარშანაც ასეთ თამაშებში ვკარგავდით ქულებს - თამაშებში, რომლებშიც აშკარა ფავორიტები ვიყავით. ბიჭები ვერ განეწყვნენ მატჩისთვის. როცა მოთელვის შემდეგ გასახდელში დაბრუნდნენ, ჩემმა თანაშემწე გიორგი ჩიხრაძემ მითხრა - თამაშისთვის 100 პროცენტით მზად არ არინო... მატჩის დაწყებამდე კიდევ ვცადეთ ფეხბურთელების მობილიზება, მაგრამ მაინც არ გამოვიდა. პირველ 25 წუთში საერთოდ არ ვიყავით მოედანზე!.. ერთი მიზეზი ისიც იყო, რომ "ასტანასთან" მატჩის შემდეგ 3-დღიანი ინტერვალი გვქონდა. ეტყობა, ვერ გამოვედით იმ თამაშიდან, ეიფორიაში ვიყავით... მოკლედ, "თარაზთან" მატჩისთვის ფსიქოლოგიურად მზად არ ვიყავით. 50-ე წუთისთვის 0:3 იყო. მერე ორი გოლი გავიტანეთ, მომენტებიც გავაფუჭეთ... ღმერთმა დაგვსაჯა იმისთვის, რათა გავაცნობიეროთ სამომავლოდ - არ შეიძლება, ასეთი დამოკიდებულება გქონდეს თამაშის მიმართ. წინ უნდა ვიაროთ, შეცდომებში უნდა გავერკვეთ...

- ვიქტორ კლეშჩენკოს ავტოგოლის შემდეგ ტრიბუნიდან ბახტიარ ბაისეიტოვმა ("ორდაბასის" პრეზიდენტი - რედ) დაგიყვირათ, რათა კლეშჩენკო შეგეცვალათ...

- მე არაფერი გამიგია.

- თუმცა კლეშჩენკო მაინც შეცვალეთ. ისე ჩანდა, თითქოს, პრეზიდენტის მითითება შეასრულეთ...

- არ არის ასე. იცით, ბევრი ცდილობს ჩემს დამცირებას. ყველა არაკეთილმოსურნეს შევახსენებ, რამდენი მოიგო გუნდმა ჩემი ხელმძღვანელობით. სწორედ ამ ყველაფრის დამცირებას ცდილობენ. ამის მერე ნაკლებად ვკითხულობ პრესას, ბევრი არაობიექტურობაა... ძალიან სასაცილოა, თუ ფიქრობენ, რომ კლუბის პრეზიდენტი ჩვენს მუშაობაში ერევა. ის საკუთარ თავს ამას არ აკადრებს!.. რადგან ეს საკუთარი თავის დამცირებაცაა და გუნდისაც.

- კმაყოფილი ხართ თუ არა ამჟამინდელი შემადგენლობით და რომელ პოზიციაზე სჭირდება გუნდს გაძლიერება?

- მე ვამბობდი, რომ მთავარი იყო შემადგენლობის შენარჩუნება. თუ გუნდი აჩვენებს კარგ შედეგებს, მაშინ უნდა შეეცადო და შეინარჩუნო მისი ხერხემალი. რამდენიმე ფეხბურთელი წავიდა, მაგრამ ჩვენ გვყავს ახალწვეულებიც...

კახა ცხადაძე და მისი თანაშემწე გიორგი ჩიხრაძე


- "ორდაბასი" მესამე ან მეოთხე ადგილზე ამთავრებს სეზონს, ევროთასებზე კი ერთ-ორ საკვალიფიკაციო რაუნდს გადის. ეს კლუბის მაქსიმუმია?

- რა თქმა უნდა, არ არის მაქსიმუმი. ამ წელს ჩვენი მიზანი შედეგების გაუმჯობესებაა. საამისოდ, ყველა რესურსი გვაქვს. გასულ წელს კარგი თამაში ვაჩვენეთ და გამოცდილება დავაგროვეთ, ახლა კი დროა, შედეგიც ვაჩვენოთ. არავის გავუკრიტიკებივართ "მლადასთან" საშინაო მატჩის შემდეგ, რომელშიც 2:3 დავმარცხდით, მაგრამ კარგად ვითამაშეთ. გულშემატკივარი კმაყოფილი იყო, მაგრამ წლეულს მათ, კარგ თამაშთან ერთად, შედეგიც უნდათ. ეს გვინდა ჩვენც.

- რეალურია ჩემპიონობისთვის ბრძოლა "ასტანასთან", "ქაირათთან" და "ტობოლთან" კონკურენციაში?

- თუ ამ სამეულთან ჩვენი მატჩების ბოლო შედეგებს გავიხსენებთ და "ასტანასთან" ბოლო გასვლით ფრესაც დავამატებთ, ვნახავთ, რომ თანაბრად ბრძოლა ყველასთან შეგვიძლია. ეგაა, აღარ უნდა წავაგოთ ისეთი მატჩები, როგორიც წავაგეთ "თარაზთან".

- როგორი რეაქცია ჰქონდა გუნდს, როცა კორონავირუსის გამო ჩემპიონატი შეწყდა?

- ჩვენ, ყველა, როგორც მთელი მსოფლიო, ამ პრობლემის მოგვარების მოლოდინში ვართ და იმედი მაქვს, ახლო მომავალში სიტუაცია დამშვიდდება. კიდევ კარგი, არის ინტერნეტი, არის იმის საშუალება, რომ შეინარჩუნო კავშირი... ყველას კარგად გვესმის, რომ ახლა მთავარი ჯანმრთელობაა. საჭიროა, ყველა იყოს ცოცხალი და ჯანმრთელი. მერე ფეხბურთიც იქნება და სხვა რამეც. ჩვენ მივდევთ ქვეყნის კანონებს. საწვრთნელი პროცესი ახლა შეჩერებულია. როცა უფლებას მოგვცემენ, გავაგრძელებთ ვარჯიშს.

- როგორ ინარჩუნებენ ფეხბურთელები ფორმას?

- ყველას აქვს ინდივიდუალური მომზადების გეგმა. სამომავლოდ ვიმოქმედებთ ქვეყნის ხელმძღვანელობის რეკომენდაციებით, ოპტიმისტურად ვართ განწყობილები, რადგან მთელი მსოფლიო გაერთიანებულია.

- საქართველოში როგორაა საქმე?

- უფრო რთულად, ვიდრე ყაზახეთში. თავადაც იცით, ევროკავშირთან საზღვრები ღიაა. ბევრი ქართველი მუშაობს ევროპაში, განსაკუთრებით იტალიაში, საბერძნეთსა და ესპანეთში. როცა ყველაფერი დაიწყო, ხალხი შინ დაბრუნდა. თვითონაც არ იცოდნენ, რომ ვირუსი ჰქონდათ. ახლა საქართველოს მთავრობა მაქსიმუმს აკეთებს, რათა ვირუსის გავრცელება აღკვეთონ. იმედი მაქვს, ამას შეძლებენ.

2813
მკითხველის კომენტარები / 0 /
მსგავსი ამბები
რუბრიკის სხვა სიახლეები
;