ინტერვიუ ლადო ბურდულთან ერთა ლიგის გარშემო: როგორ გგონიათ, მწვრთნელი თვითონ მოჭრის იმ ტოტს, რომელზეც ზის?

ახალი ციკლი იწყება და, რა თქმა უნდა, ძალიან იმედიანად ვარ, - გვითხრა ლადო ბურდულმა საუბრის დასაწყისში, - მიმაჩნია, რომ სავსებით შესაძლებელია, არ გადავდოთ საქმე ერთა ლიგის ბოლომდე და ამ ჯგუფიდანაც გავიდეთ.

შეიძლება, ვინმემ გამაკრიტიკოს ამ სიტყვების გამო, მაგრამ როცა საქართველოს ნაკრებს ეხება საქმე, უკურნებელი ოპტიმისტი ვხდები. საქართველოს ნაკრების სასარგებლოდ ერთი მეტად მნიშვნელოვანი გარემოება მეტყველებს - ჩვენ თუ ვერ შევძელით ამ ჯგუფიდან გასვლა, კიდევ ერთი და ძალიან რეალური შანსი გვაქვს ევროპის ჩემპიონატზე მოხვედრის, ამიტომ, მიმაჩნია, რომ ჩვენი გუნდი ყოველგვარი წნეხის გარეშე ითამაშებს. სხვანაირად რომ ვთქვათ, ერთის ნაცვლად ორი სიცოცხლე გვაქვს.

- რეალურად გჯერათ, რომ ამ ჯგუფიდან გასვლა შესაძლებელია?

- რა თქმა უნდა, ძალიან რთული ჯგუფია. ამ ჯგუფში თამაშობენ ჩვენთვის უხერხული მეტოქეები, მაგრამ რეალურად მჯერა, რომ გასვლა შესაძლებელია. საქართველოს ნაკრები ახლა დალაგებული, კარგი გუნდია. ყველამ იცის თავისი საქმე, გავიხსენეთ გამარჯვების გემო...

- რას იტყვით მეტოქეთა შესახებ?

- სხვადასხვა დროს ორივეს წინააღმდეგ მაქვს ნათამაშები სანაკრებო დონეზე. იმ ფეხბურთს, რასაც შვეიცარიის ნაკრები თამაშობს, მე უფრო გერმანულ ფეხბურთს შევადარებდი. ზონებს მაქსიმალურად ავსებენ და იცავენ სათამაშო დისციპლინას. ირლანდია რა ფეხბურთსაც თამაშობს, ყველამ კარგად ვიცით. ამ ორ ნაკრებს არ ჰყავს ფენომენალური ფეხბურთელები, უპირატესობას გუნდურობას ანიჭებენ და გარკვეულწილად, ამაშიცაა მათი სიძლიერე.

- ერთა ლიგის ნახევარფინალის წინ ხომ არ იქნება უპრიანი, საქართველოს ნაკრებმა ევროპის შესარჩევ ციკლშიც “პირველ ნომრად” ითამაშოს?

- იცით, ცოტა რთულია ასე თქმა. საქართველოს ჩემპიონატის უმაღლესი ლიგის დონეზე მეც მაქვს მწვრთნელობის გამოცდილება. არ არის ასე ადვილი, ადგე და ძლიერ გუნდთან ეგრევე “პირველ ნომრად” ითამაშო. უნდა ვითამაშოთ ის ფეხბურთი, რომელიც მოგვიტანს შედეგს და წარმატებას. ჩემი აზრით, ჯობია, ცუდი ფეხბურთი ვითამაშოთ და გავიდეთ, ვიდრე - კარგად ვითამაშოთ და ვერ გავიდეთ. ფეხბურთში მთავარი მაინც ტაბლოა. ყველა ტაბლოს უყურებს, რადგან ტაბლო რჩება ისტორიას. მეორეც არის - მე მახსოვს მატჩები, როცა გამოკვეთილად “პირველ ნომრად” ვითამაშეთ და დავისაჯეთ ამის გამო ჩვენზე სუსტ მეტოქეებთან - მოლდოვასთან, ყაზახეთთან და ასე შემდეგ... მოკლედ, სათამაშო სიტუაციების მიხედვით უნდა ვიმოქმედოთ. ეს ისეთი ჯგუფია, რომ აქ ყველა ქულას ექნება ოქროს ფასი. ძალიან ბევრი ქულა დაიკარგება.

- როგორც რიგით გულშემატკივარს, ისე გკითხავთ - ნაკრების შემადგენლობასთან დაკავშირებით ხომ არ გაქვთ კითხვები?

- არა, არანაირი კითხვა არ მაქვს და გეტყვით, რატომაც. ვაისი ამდენი ხანია იმაზე ფიქრობს, თუ როგორ უნდა ეთამაშოს შვეიცარიას და ირლანდიას. წარმოგიდგენიათ, მათი რამდენი თამაში ექნება ნანახი? ის საზღვრავს, როგორი ფეხბურთელები სჭირდება ამ ორ შეხვედრაში, ვინ საიდან უნდა შეუტიოს, დაიცვას თავი და ასე შემდეგ. მეორე მომენტიცაა - როცა გეძლევა შანსი და, ვთქვათ, სამჯერ გეტყვის მწვრთნელი და ვერ გააკეთებ, აღარ უნდა გაგიკვირდეს, ნაკრებში რომ აღარ გამოგიძახოს. ზოგადად, არ არსებობს მწვრთნელი, ძლიერ ფეხბურთელზე წინ სუსტი დააყენოს. ძლიერი მოთამაშე უკეთესად ასრულებს მის მითითებებს თუ შედარებით სუსტი? როგორ გგონიათ, მწვრთნელი იმ ტოტს მოიჭრის, რომელზეც ზის?

- როგორ ფიქრობთ, შესაძლებელია გიორგი ჩაკვეტაძის არყოფნის კომპენსირება?

- რა თქმა უნდა, გიორგი შესანიშნავი ფეხბურთელია და მან ეს ერთა ლიგაზე დაამტკიცა კიდეც, მაგრამ, მეორე მხრივ, თუ სწორად ასრულებ მწვრთნელის მითითებას, ყველა ფეხბურთელის შემცვლელი მოიძებნება. მთავარია, იყოს სწორი მონახაზი. ამ დროს კარგია “იუვენტუსის” მაგალითი “ატლეტიკოსთან” მატჩში - რამდენი ფეხბურთელი აკლდა და მაინც მოიგო.

ყოველდღიური სპორტული გაზეთი "ლელო"
1486
მკითხველის კომენტარები / 1 /
რაჭველი
0
ბურდულს – რატომ ჭრიდა იმ ტოტს ქეცბაია როდეცაც
ხორვატიასთან მომგები გუნდიდან 8 ფეხბურთელი არ
მიიწვია გუნდში ასე რომ ტყუილად ამართლებ წიტაიშვილის,ხარაიშვილის გრიგალავას და ზარანდის
არ მოწვევას ეს უსამართლობაა
მსგავსი ამბები
რუბრიკის სხვა სიახლეები
;