ექსკლუზივი. ლადო ხინჩეგაშვილი: ყველა მსოფლიოს ჩემპიონი ვერ გახდება, მაგრამ...

ოლიმპიური თამაშების და მსოფლიოს ჩემპიონმა ლადო ხინჩეგაშვილმა განვლილი სპორტული სეზონიც წარმატებით დაასრულა.

მისი შედეგები უკვე დიდი ხანია, არავის უკვირს და ქომაგებიც მისგან მუდამ მაქსიმუმს ელოდებიან. ხინჩეგაშვილს არა მხოლოდ ჩვენთან, მსოფლიოს მრავალ ქვეყანაში აღიარებენ, როგორც მაღალი დონის პროფესიონალს და ამიტომ იყო, რომ წლეულს იგი სხვა კუთხიდანაც დაინახა სპორტის გულშემატკივარმა.

ერთობლივ წვრთნებსა და სემინარებს ვგულისხმობთ, რომელზედაც გასულ წელს არაერთხელ იწვევდნენ ლადო ხინჩეგაშვილს. ჩვენც სწორედ ამის თაობაზე სასაუბროდ ვეწვიეთ ქართველ მოჭიდავეს. ცალკეული ჩემპიონატების პერიპეტიებსა და ორთაბრძოლებზე, ამჯერად, ნაკლებად ვისაუბრეთ.

- ლადო მოდი, მოკლედ შეაფასეთ 2017 წელი.

- გასული წელი, რასაკვირველია, წარმატებული იყო, რადგან ევროპის ჩემპიონი, მსოფლიოს ბრინჯაოს პრიზიორი და მსოფლიოს საკლუბო ჩემპიონატის გამარჯვებული გავხდი.

სულ ერთ ნაბიჯში ვიყავი მაქსიმალურად დამაკმაყოფილებელ შედეგთან, მაგრამ მსოფლიოს ჩემპიონატზე სასურველი ოქროს ნაცვლად მოპოვებული ბრინჯაოს მედალიც, რა თქმა უნდა, არ ჩაითვლება ურიგო მიღწევად.

ოღონდ, დასანანი იმ ერთი უმაღლესი შედეგის დაკარგვა იმიტომაა, რომ მისი მოგებაც აშკარად შესაძლებელი გახლდათ.

- წლეულს სხვადასხვა ქვეყანაში სემინარებსა და წვრთნებზე ხშირად გიწვევდნენ. იყო მეგობრული ვიზიტები, მსოფლიოს საჭიდაო სამყარომ განსხვავებული კუთხიდანაც გაგიცნოთ. თავდაპირველად ამერიკაში იყავით...

- წლეულს პირველად, ევროპის ჩემპიონატის შემდეგ ჩავედი ამერიკაში. მაშინ ამერიკის და იაპონიის გუნდები უნდა შეხვეროდნენ ერთმანეთს "თაიმს სკვერზე" და მე ამერიკელებმა მიმიწვიეს, რათა გუნდს დავხმარებოდი კარგად მომზადებაში.

ზაფხულში უკვე ჩვენი კლუბის, "ტიტან მერკურის" წევრები და ხელმძღვანელები გვსტუმრობდნენ საქართველოში, ხოლო შემოდგომით კიდევ ერთხელ ვიყავი მიწვეული შტატებში, ამჯერად სემინარებისთვის, რომელიც ჩავატარე უნივერსიტეტებსა და სკოლებში - ნიუ იორკში, სან ფრანცისკოში, ლოს ანჟელსში და ჩრდილოეთ კაროლინაში.

- იქაური საკლუბო სპორტის განვითარების დონეზე გვითხარით.

- საყოველთაოდ ცნობილ კოლუმბიის და სტენფორდის უნივერსიტეტებში ვიყავი, ამერიკაში მართლაც შესანიშნავადაა განვითარებული საკლუბო სპორტი. მხოლოდ სტენფორდის უნივერსიტეტის თაობაზე რიცხვებით რომ გითხრათ, რიო დე ჟანეიროს ოლიმპიადაზე 16 ოქროს და 23 კიდევ სხვა სინჯის მედლები აქვთ მოპოვებული ამ უნივერსიტეტის კურსდამთავრებულებს.

მათ სპონსორები ჰყავთ და ყველა კლუბი სწორედ სპონსორების საშუალებით ვითარდება. განვითარების დონე კი, როგორც აღვნიშნე, ძალიან მაღალია.

- საკლუბო სისტემის განვითარებამდე ჩვენ, ალბათ, არცთუ მცირე ხანს ლოდინი მოგვიწევს...

- არადა, სპონსორები თუ იქნებიან საქართველოში სულაც არაა ძნელი ძლიერი კლუბის შექმნა. მთავარია, სპონსორები დაინტერესდნენ სპორტით. მათ უნდა ჰქონდეთ სურვილი და არსებობდეს წამახალისებელი ფაქტორები, რომ სპორტის მიმართულებით სათანადო ნაბიჯები გადადგან.

- ლადო, 2016 წლის მსოფლიოს ჩემპიონატზე ამერიკული კლუბის შემადგენლობაში ჭიდაობდით, მაგრამ 2017 წლის მსოფლიოს ჩემპიონატზე, რომელიც დეკემბერში ჩატარდა, უკვე ირანული კლუბის ღირსებას იცავდით. რატომ?

- პირობები იგივე იყო, რაც იქამდე "ტიტან მერკურსში" მქონდა, უბრალოდ, "მერკურსი" გვიან დამიკავშირდა, იქამდე ირანულმა კლუბმა გააფორმა ჩემთან კონტრაქტი და ცხადია, უკვე ვეღარაფერს შევცვლიდი.

- თუმცა, ტრადიციულად, საკლუბო წარმატება მსოფლიოს ჩემპიონატზე ისევ თქვენ დაგყვებათ ფეხდაფეხ. თქვენ რომელ კლუბშიც იასპარეზეთ 2017 წელსაც ის გახდა მსოფლიოს ჩემპიონი - ეს იყო "იზი პაიპი"...

- დიახ, სასიხარულოა, რომ ისევ მსოფლიოს ჩემპიონი გავხდი და ამჯერადაც ახალ კლუბში და თან ჩემს მეგობართან გენო პეტრიაშვილთან ერთად, რომელიც პირველად გამოდიოდა მსოფლიოს საკლუბო ჩემპიონატზე და დებიუტი ჩემპიონობით აღნიშნა.

საერთოდ, მსოფლიოს ჩემპიონატი მეოთხედ ჩატარდა, მე სამჯერ მაქვს მასში მონაწილეობა მიღებული, სამჯერვე სხვადასხვა კლუბის რიგებში (2015 წ. ირანის "ბიმეხ რაზი", 2016 წ. ამერიკის "ტიტან მერკური" და 2017 წ. ირანის "იზი პაიპ კაშანი") და სამჯერვე ეს გუნდები ჩემპიონები გახდნენ. აქედან ორჯერ გადამწყვეტ შეხვედრაში ჩემმა გუნდებმა სწორედ იმჟამად მოქმედი ჩემპიონები დაამარცხეს.

- ზაფხულში ამერიკელები გყავდათ რამდენიმე დღით მოწვეული საქართველოში. მათ შთაბეჭდილებებზეც მოგვიყევით.

- საქართველოში მსტუმრობდნენ 1996 წლის ატლანტის ოლიმპიადის ჩემპიონი კენდელ კროსი, რიოს ოლიმპიადის ჩემპიონი ჰელენ მარულისი, მისი მწვრთნელი ვალენტინ კალიკა და ამერიკის ნაკრების სპონსორი დევიდი.

მათ ერთი კვირის განმავლობაში დავათვალიერებინე ჩვენი ქვყენის სხვადასხვა ღირსშესანიშნავი ადგილი. სხვა ქვეყნებისგან ჩვენ პირველ ყოვლისა, ისტორიით, კულტურით და სტუმართმოყვარეობით გამოვირჩევით. ისინიც სწორედ ამის გაცნობით დაინტერესდნენ.

მოეწონათ ქართული ღვინო, ურთიერთობები, რომელიც ჩვენთვის დამახასიათებელია უცხოელებთან დამოკიდებულებაში.

სპორტის თვალსაზრისით კი გაკვირვებულები დარჩნენ, რომ მათთან შედარებით გაცილებით ნაკლები პირობებით ვახერხებთ დიდი შედეგების მიღწევას. სტუმრები ძალიან კმაყოფილები წავიდნენ და სურვილი აქვთ, რომ კიდევ ჩამოვიდნენ საქართველოში.

- შემოდგომით სემინარებზე იაკუტსკშიც მიგიწვიეს, თქვენ და ტიტულოვანი თურქი ტაჰა აკგიული.

- ეს უკვე მსოფლიოს ჩემპიონატის შემდეგ მოხდა. სემინარებმა იქაც საინტერესოდ და მაყურებლებით სავსე დარბაზებში ჩაიარა. დიდი გახლდათ ინტერესი, როგორც სპორტის ქომაგთა, ისე მედიის მხრიდან.

მოგეხსენებათ, იქაურია ტიტულოვანი მსოფლიოს ჩემპიონი ვიქტორ ლებედევი. სხვათა შორის, მას სპორტიდან გაცილების ღონისძიება მოუწყვეს 9 დეკემბერს, სადაც მიგვიპატიჟეს ცნობილი მოჭიდავეები მთელი მსოფლიოდან. რომ არა მსოფლიოს საკლუბო ჩემპიონატი, რომელსაც ეს დღე დაემთხვა, ლებედევის გაცილებაზეც ჩავიდოდი.

- ლადო, თქვენ და გენო პეტრიაშვილმა პირად მწვრთნელ ნუგზარ სხირელთან ერთად საფუძველი ჩაუყარეთ ერთგვარ ტრადიციას, რომლის მიხედვითაც წლის მიწურულს თქვენს პატარა თანადარბაზელებს (გორის ნუგზარ სხირელის სახელობის სკოლა) სპორტულ ტანსაცმელს ჩუქნით.

- გზა, რომელიც ამ ბავშვებმა უნდა გაიარონ, ჩვენ უკვე გავლილი გვაქვს და ვიცით, რომ პატარა თანადარბაზელებთან ურთიერთობა მათთვის სასიხარულო და მოტივაციის მიმცემია.

როცა პატარა ვიყავი, ტიტულოვანი სპორტსმენები რომ მესალმებოდნენ, ისიც კი მიხაროდა. ჩვენთვის მათ მიმართ კეთილგანწყობა და თუნდაც გარკვეული საჩუქრის გაკეთება შეუძლებელი არ გახლავთ და რატომ უნდა დავინანოთ ის, რაც შეგვიძლია, რომ მათთვის გავაკეთოთ?

რაც უფრო მეტი ბავშვი დაინახავს, რომ სპორტი ფასდება და დარბაზებში ივლიან სავარჯიშოდ, მით უკეთესია ქვეყნისთვის. ბუნებრივია, რომ ყველა ვერ გახდება მსოფლიოს და ოლიმპიური ჩემპიონი, მაგრამ სპორტში ბევრს ისწავლიან ისეთს, რაც ცხოვრებაში გამოადგებათ.

ყოველდღიური სპორტული გაზეთი "ლელო"
2004
მკითხველის კომენტარები / 0 /
მსგავსი ამბები
რუბრიკის სხვა სიახლეები
;