[ინტერვიუ] ლევან კორღალიძე: საბურთალო? ასეთ რამეს არ ვიკადრებ!.. ლოკომოტივის ყოფილ მწვრთნელს ორი ქვეყნის ეროვნულ ნაკრებში იწვევდნენ...

"ლოკომოტივის" აწ უკვე ყოფილი მთავარი მწვრთნელი ლევან კორღალიძე უარყოფს ინფორმაციას, რომლის თანახმადაც მოლაპარაკებებს "საბურთალოსთან" აწარმოებს. 40 წლის სპეციალისტმა სამწვრთნელო კარიერა სწორედ "საბურთალოში" დაიწყო, სადაც ბავშვთა აკადემიაში საქმიანობ, ბოლოს კი იმავე კლუბში ახალგაზრდული გუნდის მწვრთნელი იყო. სწორედ ამის შემდეგ გადავიდა "ლოკომოტივში".

"ლელომ" ლევან კორღალიძესთან ინტერვიუ ჩაწერა, რომელშიც რესპონდენტი შეთავაზებებზე, კლუბების ინტერესსა და უცხოეთში შესაძლო მუშაობაზე ლაპარაკობს...

- გავრცელდა ინფორმაცია, თითქოს, "საბურთალოში" გიწვევენ...

- არა, მსგავსი ლაპარაკი "საბურთალოსთან" არ გვქონია. ყველაფერს რომ თავი დავანებოთ, ახლა ამ გუნდში თემურ შალამბერიძე მუშაობს და მისი ადგილის დასაკავებლად ფარულად მოლაპარაკებებს არ და ვერ დავიწყებდი. ელემენტარულად, თემურთან ძალიან მეგობრული ურთიერთობა მაკავშირებს და ასეთ რამეს არ ვიკადრებ.

- შემოთავაზებები თუ მიიღეთ?

- მსურს, სამი-ოთხი თვე დავისვენო, მერე კი, შესაძლოა, სხვაგან მიხილოთ.

- სხვა ქართულ გუნდში თუ სხვა ქვეყანაში?

- ამაზე ჯერ ვერაფერს გეტყვით.

- არ ვიცი, რამდენად მართალია, თითქოს, ორ ეროვნულ ნაკრებში შემოგთავაზეს მუშაობა...

-  კი, იყო ასეთი შემოთავაზება...

- "ლოკომოტივიდან" წამოსვლის შემდეგ?

- მანამდე, დაახლოებით 3-4 თვის წინ იყო მოლაპარაკება - გარკვეულ ვითარებაში დავთანხმდებოდი თუ არა მათ ნაკრებში მუშაობას. ახლა კორონავირუსით გამოწვეული პაუზაა და საფეხბურთო ცხოვრება შეჩერდა. ამიტომ, ამ თემებზე ლაპარაკიც დროებით გადაიდო. მეტის დაკონკრეტებას მოვერიდები. მაგრამ სასიამოვნოა, როდესაც შენით უცხოეთში ინტერესდებიან, თანაც ეროვნული ნაკრებების დონეზე.

- მართალია, რომ ორივე - პოსტსაბჭოური ქვეყნის ნაკრებია?

- (იცინის) პოლიტიკოსების ბევრი არაფერი მომწონს, ამ ფრაზის გარდა - ამას ჯერ არც დავადასტურებ და არც უარვყოფ!..

- რეალურად, "ლოკომოტივი" რატომ დატოვე?

- მსურს, ამ თემაზე სპეკულაციები დავასრულო - თბილისის "ლოკომოტივისა" და მისი ხელმძღვანელობის მადლიერი ვარ, თავის გამოჩენის შანსი რომ მომცეს. არ მინდა გულშემატკივრებმა ისე გაიგონ, რომ ამ კორონავირუსის დროს მე ჩემს თავზე ვფიქრობდი და ამიტომ წამოვედი, ან ვიჩხუბეთ და ერთმანეთის ნახვა არ გვსურს. ეს ფეხბურთი და ჩვეულებრივი ცხოვრებისეული ამბავია.

- მაგრამ ფაქტია, რომ ხელფასის შემცირების გამო წამოხვედით...

- ეს არ ნიშნავს, რომ მხოლოდ ჩემს პირობებზე ვერ შევთანხმდით. საუბარი იყო, ფეხბურთელებისთვის ხელფასი რამდენი პროცენტით უნდა შეემცირებინათ. პირადად მზად ვიყავი, ჩემი ხელფასის დიდი ნაწილი კონტრაქტის ბოლომდე დამეთმო, მაგრამ გუნდს ვერ შევუთანხმდი და წამოვედი, ერთმანეთს მადლობა გადავუხადეთ და ჩემი სამწვრთნელო კარიერის ეს ეტაპი დავასრულე. კარგად მესმის, რომ პანდემიის გამო კლუბს პრობლემები შეექმნება - სამწუხაროდ, ეს გარდაუვალია არა მხოლოდ საქართველოში, არამედ, ევროპის ქვეყნებშიც, სადაც ჩვენზე ბევრად ძლიერი ეკონომიკა აქვთ. ხომ ხედავთ, 100 წელს მეტი ტრადიციის მქონე სლოვაკურმა კლუბმა "ჟილინამ" თვითლიკვიდაცია გამოაცხადა... მაგრამ არის ზღვარი, რომელსაც არ გადავაბიჯებ. მაგრამ ამ ყველაფრის გაბუქვა და კონფლიქტური სურათის შექმნა არასწორი იქნება - მე ლექსო თოფურიას და "ლოკომოტივის" მადლიერი ვარ იმ პერიოდისთვის, ერთად რომ ვიმუშავეთ და შანსი რომ მომცეს.

- თქვენი აზრით, ეროვნული ლიგის განახლება რეალურად როდის იქნება შესაძლებელი?

- შესაძლოა, ვცდები, მაგრამ მსოფლიოში და ჩვენთან არსებული ვითარებიდან გამომდინარე, სწრაფად ჩემპიონატის დაწყება შეუძლებელია. ფაქტობრივად, მოსამზადებელი ეტაპი დაკარგულია, ერთი თვე ვისვენებდით და ახლა ეს ვადა, მინიმუმ, 21 აპრილამდე გაგრძელდა, რადგან მთელ ქვეყანაში კარანტინი გამოცხადდა. ამის შემდეგ ფეხბურთელები ხელახლა არიან მოსამზადებლები, საამისოდ კი ხუთი-ექვსი კვირა მაინც დაგვჭირდება, გუნდებმა სეზონი ნორმალურ კონდიციაში რომ დაიწყონ. 

- ანუ, თქვენი აზრით, სეზონის ზაფხულამდე განახლება წარმოუდგენელია?

- სამწუხაროდ, ასე მგონია. პლუს, ზაფხულში ევროთასებია გასამართი და ეროვნულ ლიგაში ევროთამაშების პარალელურ რეჟიმში ვითამაშებთ თუ ამის შემდეგ, ესეც გაუგებარია. ფაქტია, რომ ფეხბურთის ფედერაციასაც და კლუბებსაც ძალიან დიდი საფიქრალი გაუჩნდათ.

- კერძო კლუბებს ბიზნესი ინახავს, მათ კი შემოსავალი მოაკლდათ და ასეთ პირობებში ბევრ ქართულ კლუბს ბიუჯეტის შემცირება მოუწევს. თქვენი აზრით, მათ წამყვანი მოთამაშეების შენარჩუნება არ გაუჭირდებათ?

- მგონია, რომ ძირითადი ნაწილის შენარჩუნება არ გაუჭირდებათ.

- რატომ?

- სამწუხაროდ, ინგლისის პრემიერლიგასა და სხვა ტოპლიგებში საქართველოს ჩემპიონატის მოთამაშეებით არ ინტერესდებიან. სადაც ჩვენს ფეხბურთელებს იწვევდნენ - აზერბაიჯანში, ყაზახეთში და მსგავს ლიგებში - ახლა პრობლემები შეექმნათ და იმხელა ხელფასებს ჩვენს მოთამაშეებს ვეღარ შესთავაზებენ, წასვლა რომ უღირდეთ. კორონავირუსის პანდემია მთელს მსოფლიოზე იმოქმედებს, ეკონომიკა ყველგან დიდი დარტყმის ქვეშაა და ცხადია, ეს  ყველა საფეხბურთო ლიგაზე ძალიან ცუდად აისახება. ამიტომ, ერთადერთი იმედი ის არის, რომ ეს პანდემია რაც შეიძლება მალე შეჩერდეს და ადამიანები ცხოვრების ჩვეულ წესს დავუბრუნდეთ.

5571
მკითხველის კომენტარები / 0 /
მსგავსი ამბები
რუბრიკის სხვა სიახლეები
;