ინტერვიუ. ლევან მჭედლიძე: ხშირი ტრავმები ბავშვობაში ზედმეტ დატვირთვების შედეგი იყო

ლევან მჭედლიძე თბილისის "დინამომ" წარადგინა - ბოლო წლების ყველაზე ხმაურიანი ტრანსფერის შემდეგ საქართველოს ნაკრების თავდამსხმელმა, რომელმაც თბილისური კლუბის 10–ნომრიანი მაისურა მოირგო.

აქ მოყვანილი ფრაზები ლევანის ეკუთვნის, ზოგი პრესკონფერენციაზე თქვა, ზოგიც მას შემდეგ ვკითხეთ.

- მადლობა მათ, ვინც ამ ტრანსფერზე იმუშავა. დიდხანს არ მიფიქრია, ყველაფერს ვიზამ, რათა ჩემპიონები გავხდეთ. როცა გადაწყვეტილებას ვიღებდი ოჯახმა დიდი როლი ითამაშა. აქ ჩამოსვლა არის სტიმული. ყველაფერს ვაკეთებ წინსვლისთვის და არა უბრალოდ საქართველოში ყოფნისთვის, მიზანი კი საქართველოს ეროვნული ჩემპიონატის მოგებაა. გადაწყვეტილება ერთ დღეში მივიღე.

- ევროპიდან, იტალიიდან ჩამოსვლა რთული არ იყო?

- მოგატყუებთ თუ ვიტყვი რომ საქართველოს ჩემპიონატში დიდი დოზით ვიყავი ჩართული. რამდენიმე თამაშს ვუყურე და გარკვეული წინსვა დავინახე და ჩემპიონატმა ჩემი ინტერესი გამოიწვია. უპირველესი მიზანი საქართველოს ჩემპიონობა, ევროსარბიელზე კარგი გამოსვლა და რა თქმა უნდა, ნაკრებში დაბრუნებაა. მინდა, რომ კლუბთან ერთად წარმატებებს მივაღწიო.

- ამ გადაწყვეტილების მიღებაში მამამ, "დინამოს" ყოფილმა მეკარემ, კარლო მჭედლიძემ რა როლი ითამაშა?

- მისი აზრი ჩემთვის ყოველთვის მნიშვნელოვანია და ბავშვობიდან გუნდებზე ბევრი საინტერესო ისტორია მახსენდებოდა. მამაჩემმა "დინამოში" ჩემს გადმოსვლაში დიდი როლი ითამაშა. როდესაც დაინტერესების ამბავი გაიგო, მაშინვე მითხრა, სხვაზე არც იფიქრო, "დინამოში" ითამაშეო.

- საჩხერეს "ჩიხურასთან" თუ ითამაშებ?

- არ ვითამაშებ, რადგან სატრანფერო ამბების გამო ორი კვირა არ მივარჯიშია. რაც მთავარია, 5 თვეა ვვარჯიშობ და მადლობა ღმერთს, არანაირ ტრავმას არ შევუწუხებივარ, ფიზიკურად კარგად ვარ და ჩემთვის ვვარჯიშობ, ერთ კვირაში კი გუნდს შევუერთდები და სრული დატვირთვით დავიწყებ.

- თამაშს როდის შეძლებ?

- სავარაუდოდ, ერთ კვირაში.

- მართალია, რომ ბათუმის "დინამო" გიწვევდა და სერიოზულ პირობებს გთავაზობდა?

- ინტერესი არა მხოლოდ ბათუმის "დინამოდან", უცხოეთის გუნდებიდანაც იყო, მაგრამ "დინამოში" გადმოსვლაზე ბევრი არ მიფიქრია. გადაწყვეტილება ერთ დღეში მივიღე. იტალიაში ყოფნის დროს საქართველოს ჩემპიონატს ხშირად არ ვუყურებდი. თუმცა, ბოლო პერიოდში ჩემპიონატში წინსვლაა და ინტერესიც გაიზარდა.

- მართალია, რომ იტალიის სერია "ა"-ს გუნდი, "კალიარი" გიწვევდა?

- იქ დღემდე არ სჯერათ, შეთავაზებაზე რომ უარი ვთქვი. მაგრამ ასეთი იყო ჩემი გადაწყვეტილება. არ დავმალავ, ბათუმის "დინამოც" და კიდევ სხვა გუნდები მიწვევდა. მაგრამ მე მინდა, რომ თბილისის "დინამოში" ვიყო და გუნდის ევროსარბიელზე წარმატებაში მონაწილეობა მივიღო. ეს გადაწყვეტილება მე მივიღე და ბევრი არც მიფიქრია.

- საინტერესოა, რა გახდა შენი ამდენი ტრავმიანობის მიზეზი?

- ზედმეტი დატვირთვები, პატარა ბიჭი ვიყავი, როდესაც რამდენიმე ნაკრებში ერთდროულად ვითამაშე, პლუს გუნდში, რაც არ შეიძლებოდა.

- ეს ზუსტი დიაგნოზია?

- სხვათა შორის, ორი წლის წინ გავიცანი "ბარსელონას" ექიმი უგარტი. ძალიან მაღალი დონის სპეციალისტია. მისი დახმარებით თავს ბევრად კარგად ვგრძნობ. გამოკვლევების შემდეგ სწორედ მან მითხრა, რომ მიზეზი ეს იყო. როცა ჩამოდიხარ და მოკლე მონაკვეთში ერტდროულად თამაშობ 17 და 19–წლამდელთა ნაკრებებში და ხან - ეროვნულ ნაკრებში, ცხადია, ეს ცუდად მოქმედებს.

- ისე, როგორი დამთხვევაა - "ემპოლის" შემდეგ ისევ ლურჯი ფორმა მოირგე.

- სხვათა შორის, მეგობრები დამიკავშირდნენ და ზუსტად ეს მითხრეს. "დინამოც" თეთრი და ლურჯი ფორმით თამაშობს. ჩემი იტალიელი მეგობრები და "ემპოლის" ფეხბურთელები დინამოში ჩემს გადმოსვლას კარგად შეხვდნენ. ამბავი გუშინ გაიგეს და ტელეფონი არ ჩერდება. სხვათა შორის, დღეს წავიკითხე, რომ იტალიაში, "ემპოლიში" გორის "დილადან" გადავედი და მიკვირს, ეს ინფორმაცია საიდან გავრცელდა.

- ეს ინფორმაცია არის გერმანულ სამენეჯერო სააგენტო "ტრანსფერმარკზე" და "ვიკიპედიაში". თუმცა, პირველ წყაროში მითითებულია, რომ "დილა 2"-ში თამაშობდი.

- გორში ნამყოფი ვარ, მაგრამ არა - ნათამაშები. ძალიან მიკვირს, ასეთ ცნობილ საერთაშორისო ცნობარებში ეს ინფორმაცია საიდან გაჩნდა. ფაქტია, რომ სიმართლეს არ შეეფერება.

2329
მკითხველის კომენტარები / 0 /
მსგავსი ამბები
რუბრიკის სხვა სიახლეები
;