ინტერვიუ ლიონელ მესისთან: არ მომწონს, როცა ღმერთს მადარებენ... ესპანეთის დატოვება მინდოდა, ცუდად ვგრძნობდი თავს აქ...

„ბარსელონამ“ მაინცდამაინც კარგად ვერ დაიწყო ესპანეთის ჩემპიონატი, ხუთი ტურის შემდეგ გუნდი სატურნირო ცხრილის მერვე პოზიციაზე იყო. ამ ჩავარდნას ბევრი ლიონელ მესის ტრავმას უკავშირებდა.

ბოლო სამ ტურში კატალონიელებმა ამდენივე შეხვედრა მოიგეს და მეორე ადგილზე დამკვიდრდნენ. გასულ უქმეებზე ორი გაგდების მიუხედავად ერნესტო ვალვერდეს გუნდმა „სევილიას“ 4:0 მოუგო, ერთი გოლი კი მესიმ შეაგდო.

შემდეგ კი არგენტინელმა 43-წუთიანი ინტერვიუ მისცა ესპანურ რადიო RAC1-ს. გთავაზობთ ამ ინტერვიუს 17 მთავარ თეზისს. 

მე არ ვარ ღმერთი

არ მაწუხებს, როცა ასე მიწოდებენ, თუმცა არც მომწონს. მესმის, რომ ხალხი ბოროტულად კი არ ამბობს ამას, არამედ გადაჭარბებით. საქმე ისაა, რომ ჩემი შვილები ისმენენ ამას და იმეორებენ. მე არ ვარ ღმერთი.

ბარსელონადან  შესაძლო 
წასვლის  თაობაზე

იყო მომენტი, როცა არაერთმა გარემოებამ დამღალა. განსაკუთრებით 2013 წელს, როცა გადასახადებთან დაკავშირებული პრობლემები მქონდა. მეც მძიმე დრო მქონდა და ჩემს ოჯახსაც. ხალხმა არ იცოდა, რა ხდებოდა რეალობაში. პრესამაც თავისი წვლილი შეიტანა. სამართალდამცავებს უნდოდათ დაემტკიცებინათ, რომ ისინი არავის ანსხვავებენ. ამიტომ იყვნენ ასეთი შეუვალები.

კარგია, რომ მაშინ ბავშვები პატარები იყვნენ და ვერ ერკვეოდნენ ამ ყველაფერში. მაშინ მართლა ვფიქრობდი წასვლაზე. „ბარსელონა“ არაფერ შუაში იყო. უბრალოდ, ესპანეთის დატოვება მინდოდა. ცუდად ვგრძნობდი თავს და აქ დარჩენა აღარ მინდოდა.

გრიზმანის თაობაზე

„ბარსელონაში“ ყველას უჭირს, ვისაც კლუბის ფილოსოფია თავიდანვე არ აქვს შესისხლხორცებული. ის სხვანაირად თამაშსაა შეჩვეული, მაგრამ ეჭვი არ გვეპარება, რომ გაივლის ადაპტაციას. ის ჭკვიანი ფეხბურთელია. არაა მართალი, რომ მე გუნდში მისი მოსვლის წინააღმდეგი ვიყავი. ადრევე ვთქვი, რომ ის ერთ-ერთი საუკეთესო ფეხბურთელია მსოფლიოში.

ნეიმარის თაობაზე

ამავე მიზეზის გამო მინდოდა ნეიმარის ხილვა „ბარსელონაში“. ის ერთ-ერთი საუკეთესოა მსოფლიოში და მასთან ერთად ტიტულის მოგების შანსი მეტია.

რა თქმა უნდა, მესმის, რომ ყველა უყურებს სხვა გარემოებებს. მაგალითად იმას, თუ როგორ წავიდა ის „ბარსელონადან“, რას ფიქრობს სოციუმი, მაგრამ მე მხედველობაში მაქვს სპორტული პრინციპები. არ ვიცი, გააკეთა თუ არა კლუბმა ყველაფერი, რომ ნეიმარი გადაებირებინა.

ჩემი აზრით, ის „ბარსელონადან“ წასვლის შემდეგ მიხვდა, რომ არ იყო მართალი. ვფიქრობდი, რომ ამ ზაფხულს ნეიმარი „რეალში“ აღმოჩნდებოდა. მას უნდოდა ცვლილებები. მას სჯეროდა, რომ ფლორენტინო პერესი ყველაფერს გააკეთებდა მის გადასაბირებლად. არ გამოვრიცხავ შემდეგ წელს მის გადასვლას „ბარსელონაში“, ან „რეალში“.

ნიუელს ოლდ ბოისის შესახებ

მე სულ ვოცნებობდი იქ თამაშზე. არგენტინულ ფეხბურთში ცხოვრებაზე, რომელიც ყველასგან განსხვავდება, მაგრამ მთავარია, რა უნდა შენს ოჯახს და შვილებს და არა ის, რაზე ოცნებობ შენ.

ვიდეორეფერის თაობაზე

მე მომწონს ვიდეორეფერი, მაგრამ რჩება არაერთი ეჭვი. მას ბოლომდე კარგად ვერ იყენებენ. არის ჩვენების ბევრი ვარიანტი, რომელიც იწვევს ეჭვს. ვიდეორეფერი იმისთვისაა საჭირო, რომ ეჭვები გაიფანტოს, მაგრამ ის ჯერ კიდევ არსებობს.
კარიერის დასრულებაზე

სულ უფრო და უფრო ვრწმუნდები იმაში, რომ სწორედ აქ მინდა კარიერის დასრულება. კარიერის დასრულების შემდეგაც აქ მინდა დარჩენა. არ მინდა, ჩემი შვილები მეგობრებს დაშორდნენ. არ მინდა, იგივე გამოსცადონ, რაც მე.

სერიალების თაობაზე

ქუჩაში არც ისე ხშირად გავდივარ. მეტ დროს სახლში ვატარებ და ეს ხდება ბავშვების გამო. ჩემს მეუღლეს უყვარს სერიალები და მათ ვუყურებ. როცა ბავშვები იძინებენ, ტელევიზორი ირთვება. ახლა არგენტინულ სერიალს ვუყურებთ, რომელსაც «El marginal» ჰქვია.

ფიზიკური ფორმის შესახებ

ასი პროცენტით ისევ არ ვარ მზად. „სევილიასთან“ მხოლოდ მეორე სრულფასოვანი შეხვედრა ჩავატარე. თავიდან დავიღალე, მაგრამ მერე „გამეხსნა“. ფორმას თანდათან ვკრებ.

ოქროს ბურთის შესახებ

წინასწარ არ ვიცი, მოვიგებ თუ არა „ოქროს ბურთს“. ამ ნომინაციაში წაგება ჩემთვის იმედგაცრუება არ იყო. ჩემი შვილებისთვის კარგი იქნებოდა, მაგრამ ჩემთვის მთავარი არაა პირადი ტიტულები. იმედი ჩემპიონთა ლიგიდან გამოთიშვამ გამიცრუა.

ვალვერდეს თაობაზე

„ლივერპულთან“ წაგება ჩვენი შეცდომა იყო. ასეთი რამ არ უნდა მოგვსვლოდა, რადგან ერთხელ უკვე დაგვემართა „რომასთან“. ვალვერდეს შენარჩუნება ჩემი გადაწყვეტილება არ ყოფილა. ეს ხელმძღვანელობის გადაწყვეტილება იყო. ვალვერდე არის მწვრთნელი, რომელიც გვიყვარს.

პიკეს თაობაზე

ის ძალიან პირდაპირი და ინტელიგენტი ბიჭია. ის ყოველთვის იმას ამბობს, რასაც ფიქრობს. არასოდეს ფიქრობს შედეგებზე. თანაც, ის ძალიან მხიარულია.

ბარტომეუსთან  ბოლო საუბრის თაობაზე

„ლივერპულთან“ წაგების შემდეგ ბოლოჯერ ვისაუბრე კლუბის პრეზიდენტთან. ბარტომეუსთან არანაირი სირთულე არ მაქვს. როცა საჭიროა, უპრობლემოდ ვსაუბრობთ.

კლუბში გავლენის თაობაზე

ამბობენ, რომ მე ვწყვეტ, რომელი მოთამაშეები და მწვრთნელები მოვლენ და წავლენ. ბევრი რამ ამტკიცებს, რომ ეს ასე არაა. ნეიმარისა და გრიზმანის თაობაზე კლუბის ხელმძღვანელობა გვესაუბრა, მაგრამ ეს იყო კონსულტაცია და მეტი არაფერი.

ჩავისა და ინიესტას წასვლაზე

ცხადი გახლდათ, რომ მათ გარეშე გაგვიჭირდებოდა. ისინი შეუცვლელები არიან. 90-პროცენტიანი ბურთის ფლობა გვქონდა და ბურთს ხუთ წამში ვიბრუნებდით. ჩვენ ვიცოდით, რომ ადრე თუ გვიან ისინი წავიდოდნენ. გვყავს არაერთი კარგი ნახევარმცველი, მაგრამ ისინი უნიკალურები იყვნენ. მათ კლუბის ფილოსოფია შეცვალეს. ჩავიმ მწვრთნელობა დაიწყო. ვფიქრობ, გვარდიოლას დაემსგავსება.

ვიქტორ ვალდესის შესახებ

ვნახე ახალი ამბები. უზომოდ გაკვირვებული ვარ, ასე რომ გამოვიდა. ვერაფერს ვიტყვი, რადგან ბოლომდე საქმის კურსში არ ვარ.

კარიერის საუკეთესო მომენტზე

არაერთ ეტაპს მოვესწარი. ჩემი აზრით, გვარდიოლას ეპოქა საუკეთესო იყო ჩემთვის, როგორც ფეხბურთელისათვის და სხვა ასპექტებშიც. გვარდიოლა საუკეთესო მწვრთნელია ჩემს კარიერაში. იქვე ძალიან ახლოსაა ლუის ენრიკე.

ყოველდღიური სპორტული გაზეთი "ლელო"
465
მკითხველის კომენტარები / 0 /
მსგავსი ამბები
რუბრიკის სხვა სიახლეები
;