[ინტერვიუ] მანუჩარ მარკოიშვილი: სხვა გზა არ იყო, ოპერაცია უნდა გამეკეთებინა

საქართველოს ნაკრების გამოცდილმა კალათბურთელმა მანუჩარ მარკოიშვილმა მსოფლიოს თასის საკვალიფიკაციო ეტაპზე ორი მატჩი ჩაატარა - ითამაშა სერბეთისა და გერმანიის წინააღმდეგ. ეს იყო ნოემბრის ფანჯარაში. მას მერე მანუ ნაკრებს ვერ ეხმარებოდა. მიზეზი ტრავმაა.
მას მუხლი აწუხებდა და ერთი კვირის წინ ოპერაცია გაიკეთა. მას მერე იტალიაში გადის რეაბილიტაციას. მანუს სწორედ აპენინებზე დავუკავშირდით და ინტერვიუც ჩავწერეთ.

- "რეჯო ემილიასთან" სეზონი რომ დავასრულე, მინდოდა საქართველოს ნაკრებს დავხმარებოდი. ეროვნული გუნდის თამაშები, სერბეთთან და ავსტრიასთან ივნისის ბოლოს და ივლისის დასაწყისში იყო. რეჯოელმა ექიმებმა მითხრეს - ოპერაცია გჭირდებაო, თუმცა გამოჩნდა ალტერნატივა - გერმანელი ექიმი, რომელიც ნემსებით მკურნალობდა. იგი კობი ბრაიანტის ექიმიცაა.

  #სუპერ-მარკოიშვილი: 7-დან 7 სამქულიანი(!) და სარეკორდო 24 ქულა [VIDEO]

გადავფრინდი დიუსელდორფში და მითხრა, თუ ყველაფერს ისე გავაკეთებდი, როგორც დავგეგმავდით, სანაკრებო მატჩებამდე გამოვკეთდებოდი. გადავწყვიტე, მასთან მემკურნალა, რეაბილიტაციისთვის გერმანიიდან ბელგიაში გადავედი. თუმცა, როცა ვარჯიშის დრო მოვიდა, მუხლი კვლავ ამტკივდა, ისევე მაწუხებდა, როგორც მანამდე...

- კონკრეტულად რა სახის ტრავმაა?

- მუხლის ხრტილია დაზიანებული, რომლის ოპერაცია 2016 წელს გავიკეთე და აღვადგინე. თუმცა სადღეისოდ ისეთ მდგომარეობაშია, რომ იტალიელი და საქართველოს ნაკრების ექიმების რჩევით, ოპერაციის ხელახლა გაკეთება გადავწყვიტე, რისთვისაც იტალიაში ჩავედი. სწორედ რეჯო ემილიაში დიდი ხნის დანერგილი არ არის ახალი მეთოდი, რომელიც ქირურგებს საშუალებას მისცემდა ჩემი ტრავმა ერთგვარად დაეკონსერვებინათ და 4-6 თვის შემდეგ თამაში შემეძლება. შემდეგ, როდესაც კარიერას დავასრულებ ხელახალი ოპერაცია დამჭირდება, რომლის შემდეგ სერიოზულად თუ არ დავიტვირთები, ყველაფერი ნორმაში იქნება.

ოპერაცია რეჯოში ერთი კვირის წინ გავიკეთე და ახლა რეაბილიტაციას გავდივარ. რადგან "რეჯო ემილია" ჯერ არ შეკრებილა, კლუბის ხელმძღვანელობამ ის ბინა დამითმო, რომელშიც გასულ სეზონში ვცხოვრობდი. რაც შეეხება კონტრაქტს, ამ გუნდთან ხელშეკრულება გასული სეზონის ბოლოს ამომეწურა და ცხადია, ასეთ მდგომარეობაში მყოფ კალათბურთელს ახალ ხელშეკრულებას არავინ გაუფორმებს.

- "რეჯო ემილიას" ხელმძღვანელობა გასულ სეზონში გუნდის მიერ ნაჩვენები შედეგით რამდენად კმაყოფილი დარჩა?

- მიუხედავად იმისა, რომ ევროთასზე ფინალსაც მივუახლოვდით, კმაყოფილების საბაბი ნამდვილად არ იყო. "რეჯო ემილია" ხომ იტალიის ჩემპიონატის პლეი ოფში ვერ გავიდა. ამის მიზეზი ის გახლდათ, რომ სეზონი ძალიან ცუდად დავიწყეთ. შემდეგ თამაში კი გამოვასწორეთ, საპლეიოფო ზონასაც მივუახლოვდით, მაგრამ იტალიის ჩემპიონატის მეოთხედფინალამდე ცოტა დაგვაკლდა.

- იყო მატჩები, რომლებშიც პერიმეტრიდან უხვად აგროვებდი ქულებს. საერთო ჯამში ურიგო სეზონი არ გამოგივიდა...

- ჩემი აზრი თუ გაინტერესებთ, მე უკმაყოფილო ვარ. შუა სეზონში ტრავმამაც შემაფერხა, მაგრამ გარკვეული გავლენა მოახდინა წინა წელს დასვენებამ - მოგეხსენებათ 2016-17 წლების სეზონი ტრავმის გამო სრულად გამიცდა და მას მერე სათამაშო რიტმში დაბრუნება იოლი არ აღმოჩნდა. განსაკუთრებით შეტევაში...

"რეჯო ემილიაში" ვეტერანის სტატუსით მივედი და ჩემზე ძალიან ბევრი რამ იყო დამოკიდებული. ვცდილობდი, თავი არ დამეზოგა და ყველაფერი ზედმიწევნით კარგად შემესრულებინა, მაგრამ... მაინც უკმაყოფილო ვარ.

- საქართველოს ნაკრებში ნოემბრის შემდეგ არ გითამაშია. გუნდი მსოფლიოს თასის მეორე ეტაპზე საბერძნეთს, ისრაელსა და ესტონეთს დაუპირისპირდება. მწვრთნელმა, ილიას ზუროსმა აღნიშნა - ამ შესარჩევს გუნდთან ახალგაზრდების ხელშეწყობისთვის გამოიყენებს.

- ეს ბუნებრივი პროცესია. ვიქტორ სანიკიძემ ტრავმის გამო ვეღარ თამაშობს; სანაკრებო კარიერა დაასრულა ზაზა ფაჩულიამ; თორნიკე შენგელიასა და გიორგი შერმადინს ევროლიგა აფერხებს და სეზონის მსვლელობისას ნაკრებს ვერ ეხმარებიან; ვეტერანებიდან მე, გიორგი ცინცაძე და ანატოლი ბოისაღა დავრჩით. აქედან გამომდინარე, სხვა გზა არ არის, უნდა გამოიკვეთოს სანაკრებო ბირთვი, რომელიც ვეტერანებისგან ლიდერის ფუნქციებს გადაიბარებს. მთავარი ამოცანა გუნდის ევროპის 2021 წლის ჩემპიონატისთვის მომზადება უნდა იყოს.

- როგორ ფიქრობ, შეიძლება ჩამოყალიბდეს ისეთივე ძლიერი ბირთვი, როგორიც 2004 წლიდან ყალიბდებოდა და ოთხი ევრობასკეტი ითამაშა?

- ძალიან კარგი ახალგაზრდები გვყავს. მათ სწორედ ახლა უნდა იგრძნონ ნდობა, რომ ბოლომდე გაიხსნან, განაგრძონ პროგრესი და ნაკრებს სათანადოდ გამოადგნენ. იოლი საქმე არ არის, ძალიან ახალგაზრდა კალათბურთელების წინ წამოწევა, მათზე თამაშის აგება, თუმცა ამას თავისი პლუსიც აქვს - როდესაც დიდ პასუხისმგებლობას იგრძნობენ, მით უფრო სერიოზულად მიუდგებიან საქმეს. ასეთ დროს სხვა თვალით უყურებ ყველაფერს, ცდილობ სწრაფად გაიზარდო, იმდენი ივარჯიშო, რომ ახვიდე ნაკრების ლიდერების დონეზე. დარწმუნებული ვარ, ძალიან საინტერესო ნაკრები გვეყოლება.

1183
მკითხველის კომენტარები / 0 /
მსგავსი ამბები
რუბრიკის სხვა სიახლეები
;