[ინტერვიუ] ოთარ კიტეიშვილი: ჩემი გოლები ძალიან მიხარია, მაგრამ გუნდს რთული პერიოდი აქვს!.. ამხელა შეფასება დიდი ანგარიშით წაგებულ თამაშში?..

გაორებული განცდაა - ოთარ კიტეიშვილი წარმატებით თამაშობს ავსტრიის ბუნდესლიგაში, მისი "შტურმი" (გრაცი) კი გულშემატკივარს ვერაფრით ახარებს და ერთმანეთის მიყოლებით აგებს თამაშებს.

საქართველოს ნაკრების 24 წლის ნახევარმცველმა ბუნდესლიგაში ზედიზედ მეორე მატჩში გაიტანა - ვენის "რაპიდის" შემდეგ, კიტეიშვილმა მთლად "ზალცბურგის" კარი აიღო. მაგრამ ავსტრიული ფეხბურთის ბოლო წლების გრანდთან გრაცელებს ქართველის გოლმაც ვერ უშველათ - 2:5 წააგეს. 31 ტურის შემდეგ "შტურმი" ზედა ექვსეულში 19 ქულით ისევ ბოლო, მე-6 ადგილზეა.

ასეთ თამაშშიც კი ქართველმა ნახევარმცველმა ფეხბურთის სტატისტიკისა და ანალიტიკის გვერდ "სოფასქორისგან" 7,7 ქულა დაიმსახურა, რაც ასეთი გამანადგურებელი წაგების შემდეგ უჩვეულოდ მაღალი შეფასებაა - ქართველი ფეხბურთელი გუნდში აშკარად გამორჩეული რომ იყო, ამაზე მისი თანაგუნდელების შეფასებები მეტყველებს - იყო 5,5 ქულა, იყო 5,9 და ამათ შორის საუკეთესო - 6,9. კიტეიშვილის შემდეგ ასეთი მაღალი შეფასება დაუწერეს... მეკარე იორგ ენჰარდს, რომელმაც 5 გოლი გაუშვა.

შეგახსენებთ, რომ თურქული გამოცემა "ჰურიეთის" ცნობით, "ფენერბაჰჩეს" კიტეიშვილი მაქს კრუზეს შემცვლელად სურს და მზადაა, ავსტრიულ კლუბს მილიონი ევრო გადაუხადოს.

კიტეიშვილს ავსტრიაში დავუკავშირდით და ინტერვიუ ჩავწერეთ. თუმცა, ერთი წინაპირობით - კითხვები არ იქნებოდა იმ სატრანსფერო აჟიოტაჟზე, რაც ბოლო დროს ატყდა, რადგან ჩემპიონატის მსვლელობისას  არ სურს ამ საკითხებზე ლაპარაკი...

- თუ რამე კონკრეტული იქნება, არ დაიმალება. მაგრამ ახლა სეზონი მიდის, კონკრეტულად სალაპარაკო კი არაფერია და ტრანსფერზე ფიქრი არ მსურს.

- კარგი, შევეშვათ მაშინ ტრანსფერ თემას და ბუნდესლიგის ბოლო ორ მატჩი გავიხსენოთ, რომლებშიც ლიდერებგატანეთ. შეფასებებიდანაც ჩანს, რომ კარგ ფორმაში ხართ...

- რა თქმა უნდა, გოლის გატანა ყოველთვის სასიხარულოა, მაგრამ მეორე მხრივ, გუნდს ძალიან რთული პერიოდი აქვს. ფაქტობრივად, ყველა თამაში წავაგეთ.

- ...მაგრამ მიყოლებით ბევრი მატჩიც გამართეთ...

- კი, ეს მართლაც სერიოზული სირთულეა, რადგან ერთ თვეში 10 მატჩის ჩატარება ძალიან ძნელია. ყოველ მესამე-მეოთხე დღეს გვიწევს თამაში. ფიზიკური თვალსაზრისითაც ბოლო შეხვედრები განსაკუთრებით რთული აღმოჩნდა.

- თან სულ შეუცვლელად თამაშობ და ასეთმა რეჟიმმა არ გამოგფიტა?

- ყოველ მესამე დღეს თამაში რთულია, განსაკუთრებით, დიდი პაუზის შემდეგ - ბოლო თამაშებში უფრო მეტად ვგრძნობდი დაღლილობას და სიმძიმეს, რაც, ალბათ, ასეთი გრაფიკიდან გამომდინარე გასაკვირი არ უნდა იყოს.

- სანაკრებო თამაშზეც გკითხავ. თქვენი აზრით, ბელარუსთან მატჩის ოქტომბერში დანიშვნა ოპტიმალური დროა?

- ალბათ, მისაღები თარიღია, რადგან დიდი ალბათობით, ამ დროისთვის ყველა ჩემპიონატი დაწყებული იქნება.

- ანუ, ფიქრობთ, რომ იმ დროისთვის ჩვენი ნაკრების ფეხბურთელები ფორმაში შესვლას მოასწრებენ?

- ამის დიდი იმედი მაქვს. ყველა ფეხბურთელი ვეცდებით, საუკეთესო ფორმაში შევხდეთ ამ თამაშს. ასევე იმედი მაქვს, რომ გულშემატკივარს ბელარუსთან შეხვედრაზე დასწრების უფლებას მისცემენ, რაც ჩვენთვის ძალიან მნიშვნელოვანია.

3117
მკითხველის კომენტარები / 0 /
მსგავსი ამბები
რუბრიკის სხვა სიახლეები
;