/ინტერვიუ/ რას ეუბნებოდა ანტეტოკუნმპო შერმადინსა და შენგელიას მატჩისას? [VIDEO]

საქართველოს ნაკრებმა 16 სექტემბერს ისტორიაში ერთ-ერთი საუკეთესო მატჩი გამართა. თუმცაღა, ბოლო წამზე პაპანიკოლაუს მიერ ჩაგდებული ორქულიანის შემდეგ გამარჯვება ბერძნებს დარჩათ - 86:85.

საბერძნეთის ნაკრებში ითამაშა თანასის ანტეტოკუნმპომ. იგი NBA-ს ვარსკვლავის, იანისის ძმაა, ქართველებისთვის უცხო სულაც არ არის.

თანასისი ორი წლის წინათ ესპანეთის უმაღლესი ლიგის წარმომადგენლის, "ანდორას" ღირსებას იცავდა. სწორედ იქ, მაშინ ბექა ბურჯანაძე და გიორგი შერმადინი თამაშობდნენ. საინტერესო სეზონი გამოუვიდათ - დიდი ხნის შესვენების შემდეგ "ანდორა" პლეი ოფში გავიდა. იქ კი "რეალთან" 1/4 ფინალში დამარცხდა.

16 სექტემბერს თანასის ანტეოკუნმპო მეგობრის გიორგი შერმადინის წინააღმდეგ იბრძოდა. მწვრთნელმა შეატყო რა, თორნიკე შენგელიას შეჩერებას სასტარტოები ვერ ახერხებდნენ, სათადარიგოთა სკამიდან მოძრავ ანტეტოკუნმპოს უხმო და თოკოს მიუჩინა.

იგი იმდენად ხისტად ეთამაშებოდა ჩვენიანს, სხვა რომ ყოფილიყო, შეიძლება ყველაფერი მშვიდობიანად არ დასრულებულიყო, თუმცა თანასისი პიროვნულად ძალიან გულღია ადამიანია, თამაშისასაც ხშირად ღიმილით მიდიოდა შენგელიასთან, შერმადინთან და ვიდრე საშუალება ჰქონდა ესაუბრებოდა.

   ⇒წამი... რომელმაც გამარჯვების შეძახილი 9 ათას კაცს ყელში გაუჩერა [VIDEO]

ნამატჩევს გიორგი შერმადინს ვკითხე - რას ლაპარაკობდა ამდენს-მეთქი. გიორგიმ მოკლედ მომიგო: კარგი, ხალისიანი ადამიანია, ძმაა.
თანასისი საინტერესო მოსაუბრეც აღმოჩნდა. ინტერვიუზეც სიამოვნებით დამთანხმდა.



- საქართველოს შესახებ გიორგისა და ბექას გაცნობამდე რა ინფორმაცია გქონდა?

- პირველ რიგში, საქართველოს ნაკრები უნდა დავასახელო, რომელშიც მაღალი დონის კალათბურთელები თამაშობენ. მათგან ზოგი (შერმადინი და ბურჯანაძე) ჩემი თანაგუნდელები იყვნენ, ზოგი ჩემი ძმის, იანისის პარტნიორი იყო (ზაზა ფაჩულია, "მილუოკიში"), ზოგი საბერძნეთში თამაშობდა (ვიქტორ სანიკიძე)... წარმოუდგენელია, ამ კალათბურთელებს იცნობდე და საქართველოს შესახებ დადებითი წარმოდგენა არ გაგიჩნდეს. დღეს უკვე კარგად ვიცნობ "ჯორჯიას".

- იანისი შინ რას ჰყვება ზაზას შესახებ?

- როდესაც ჩემი ძმა NBA-ში მოხვდა, "მილუოკიში" ერთ-ერთი ყველაზე გამოცდილი ზაზა ფაჩულია იყო. იგი იანისს ყოველმხრივ გვერდში ედგა, ეხმარებოდა ახალ გარემოსთან, ახალ გუნდთან, NBA-სთან ადაპტაციაში. ჩემი ძმა ზაზას შესახებ ყოველთვის დიდი პატივისცემით ლაპარაკობს.
ფაჩულია ჩემთვისაც სამაგალითო კალათბურთელია, ბევრს შრომობს და სწორედ ამიტომ გახდა ნაციონალური საკალათბურთო ასოციაციის ჩემპიონი.

- იანისი უკვე ვარსკვლავია. ამერიკაში გადასვლის შემდეგ ხომ არ შეცვლილა?

- ჩემი ძმა კარგად აცნობიერებს, რომ ჯერაც ახალგაზრდა ბიჭია საბერძნეთიდან, რომელსაც კიდევ ბევრი შრომა სჭირდება მაღალი დონის სპორტსმენად ჩამოსაყალიბებლად. ცდილობს, კიდევ მეტი იმუშაოს, რომ თავისი პოტენციალი სათანადოდ გამოავლინოს. სასიამოვნოა, რომ შრომას შედეგი მოაქვს - წლიდან წლამდე უმატებს. იმედი მაქვს, 2018-19 წლების სეზონი კიდევ უფრო შედეგიანი იქნება.

- "ანდორაში" ორ ქართველთან თამაშობდი, ვიცი, რომ გიორგი შერმადინმა და ბექა ბურჯანაძემ საქართველოში დაგპატიჟეს. ბოლოსდაბოლოს ჩამოხვედი.

- ძალიან მიხარია. სასიამოვნო გრძნობაა იმ ქვეყანაში ჩასვლა, რომელზეც შერმადინი და ბურჯანაძე აქამდე ბევრს მიყვებოდნენ. სამწუხარო ის არის, რომ აქ მეტოქის რანგში ჩამოვედი და არა მოგზაურის. საინტერესო იქნებოდა ჩემს მეგობრებთან ერთად თბილისში გავლა-გასეირნება. რადგან საქართველოს ნაკრების წინააღმდეგ სათამაშოდ გესტუმრეთ, არც გართობის დრო მაქვს და არც თქვენი დედაქალაქის დათვალიერების.

- სანახაობრივი თამაში გამოვიდა, მაგრამ შედეგი არ იყო საჩვენო...

- მეტისმეტად საინტერესო თამაში გამოვიდა. ასეთ დაძაბულ შეხვედრაში მონაწილეობა ერთი სიამოვნებაა. მიხარია, რომ გამარჯვებაში ჩემი წვლილიც შევიტანე. ბოლო წუთებზე რამდენიმეჯერ შეიცვალა ლიდერი, მოგება საქართველოსაც შეეძლო, საბერძნეთსაც, თუმცა უკანასკნელ წამს იღბალი ჩვენს მხარეს აღმოჩნდა...

- მწვრთნელმა ქართველთა ლიდერის, თორნიკე შენგელიას მეურვეობა დაგავალა...

- მწვრთნელმაც მითხრა, რომ თორნიკეს ბოლომდე შეჩერება შეუძლებელია, თუმცა მაქსიმალურად ვეცადე არ მიმეცა ბოლომდე თავისი თამაშის საშუალება. რადგან მოვიგეთ, კმაყოფილი ვარ, რომ წავეგო, ჩავთვლიდი, რომ მისია ვერ შევასრულე. ძალიან რთული იყო. ევროპაში ასეთი მაღალი დონის, ენერგიული კალათბურთელი ბევრი არ არის.

- საქართველომდე სერბეთის ნაკრებს დაუპირისპირდით. ის მატჩიც მოიგეთ.

- მსოფლიოს ჩემპიონატზე თამაში თუ გინდა, შინაურ კედლებში ნებისმიერი მეტოქე უნდა დაამარცხო. სერბეთთან თავიდანვე გამარჯვება გვქონდა მიზნად დასახული და პირველი წუთიდან ბოლომდე, ნაბიჯ-ნაბიჯ მივნიოდით მიზნამდე და ბოლო მეოთხედში სტაბილური თამაშით მეტად სერიოზული მოწინააღმდეგე დავამარცხეთ.

- საქართველოში მოგებით მსოფლიოს ჩემპიონატის საგზური გაინაღდეთ. გილოცავთ.

- დიდი მადლობა. საქართველოსაც იგივეს ვუსურვებ. თუმცა ვიცი, დარჩენილ მატჩებში სერბეთის გადასწრება რთული იქნება. რაც ჩვენზეა დამოკიდებული, ყველაფერს გავაკეთებთ, რომ სერბეთს სტუმრადაც მოვუგოთ.

- ბოლოს თავდაპირველ სამშობლოზე გკითხავ. წარმოშობით ნიგერიიდან ხარ. ახერხებთ ოჯახთან ერთად ისტორიულ სამშობლოში ხშირად ჩასვლას?

- სამწუხაროდ, დიდი ხანია, არ ვყოფილვარ. არადა, ჩემი უფროსი ძმა სწორედ ნიგერიაშია დაბადებული. მეც და იანისსაც ძალიან გვინდა ნიგერიაში ჩასვლა და თავისუფალი დრო რომ გამოგვიჩნდება, აუცილებლად მოვინახულებთ.

2384
მკითხველის კომენტარები / 0 /
მსგავსი ამბები
რუბრიკის სხვა სიახლეები