ინტერვიუ საბა კვირკველიასთან: დღემდე არ ვიცი,  რა უნდოდა მას ჩემგან... სასურველი იქნებოდა ევროპის ხუთ ტოპჩემპიონატში მოასპარეზე კლუბი

                                                    კვირკველია გრასიაზე ნაწყენი აღარ არის? კვარაცხელიას მე ვერ ვეტყვი, რომ დარჩეს...  

მოსკოვის “ლოკომოტივში” გატარებული 2,5 წლის განმავლობაში საბა კვირკველია გახდა რუსეთის ჩემპიონი, მოიგო თასი, “ლოკომოტივი” დაბრუნდა ჩემპიონთა ლიგაში, ერთი თვის შემდეგ ის ითამაშებს სუპერთასისთვის “ზენიტის” წინააღმდეგ... 

“რკინიგზელებთან” მას 2021 წლის ზაფხულამდე აქვს კონტრაქტი. ნობელ არუსტამიანის თქმით, 1 ივლისიდან კვირკველიას გამოსასყიდი თანხა 3,6 მილიონი ევრო იქნება.

SPORT24-ის კორესპონდენტი ლეონიდ ვოლოტკო ფეხბურთელს არაერთ საინტერესო საკითხზე ელაპარაკა. ინტერვიუ, რომელიც გიბრალტართან მატჩამდეა ჩაწერილი, ჩვენს მკითხველსაც დააინტერესებს...

- რუსეთის ჩემპიონატის დასრულების შემდეგ ნაკრებში გამოძახებამდე დასვენებისთვის რამდენიმე დღე იყო. როგორ გაატარეთ ეს დღეები?

- საქართველოში წავედი. ეგაა, ნაკრებში ტრავმის გამო ვერ ვითამაშებ. გახსოვთ, ალბათ, “უფასთან” შეხვედრაში კუნთი დავიზიანე. სერიოზული არაფერია, გაწყვეტილი არ მაქვს, მაგრამ დასვენება მჭირდება. მინდოდა თამაში, სამი-ოთხი დღის განმავლობაში ვვარჯიშობდი, მაგრამ თამაშამდე ერთი დღით ადრე დავტოვე შეკრება. შესაძლოა, ოჯახთან ერთად რამდენიმე დღით სადმე წავიდე.

- წონისთვის საქართველოში გატარებული შვებულება ძალიან სახიფათო არ არის?

- არის, მაგრამ ჩვენ მოგვცეს პროგრამა და იმის მიხედვით მოვემზადები. ყველაფერს გავაკეთებ იმისთვის, რომ ორ ზედმეტ კილოგრამზე მეტი არ ჩამოვიტანო. შეკრების დროს 2 კილოგრამს 3 დღეში დააგდებ.

- რეკორდი რამდენია?

- ორზე მეტი (იცინის), მაგრამ მაშინ მე მითხრეს: “სოლომონ, ასე არ შეიძლება”. ასე აღარ გავაკეთებ არასოდეს!

- ეს როდის იყო?

- ერთი წლის წინ, საჩემპიონო სეზონის შემდეგ... 

- სამი კერძი, რომელიც საქართველოში ყველამ უნდა გასინჯოს...

- აჭარული ხაჭაპური, ეს 100 პროცენტით! მეორე... ხინკალიც აუცილებლად. მესამე... იყოს ღორის მწვადი.

- “ლოკომოტივმა” სეზონის სტარტი ჩააგდო, მაგრამ აიღეთ თასი და ჩემპიონატი მეორე ადგილზე დაასრულეთ. სეზონის შედეგების მიხედვით უფრო კმაყოფილი ხართ თუ იმედგაცრუებული?

- როგორც კი გუნდში მოვედი, თასი ავიღეთ, ერთი წლის შემდეგ ჩემპიონები გავხდით, ხოლო ახლა - მეორე ადგილი და თასი. ვფიქრობ, ეს კარგი შედეგია. გუნდში ამბიციური ბიჭები გვყავს. მათ სულ გამარჯვება უნდათ და ასე იქნება მომავალშიც. მთლიანობაში, არ იყო ცუდი სეზონი.

- თასის ფინალი დისკვალიფიკაციის გამო გამოტოვეთ...

- კი, მაგრამ გუნდთან ერთად ჩავფრინდი სამარაში და ბიჭებს ტრიბუნიდან ვამხნევებდი. ეს კოშმარი იყო. ჯობია, ითამაშო, ვიდრე ტრიბუნიდან უყურო. ალბათ, ორჯერ მეტად ვინერვიულე, ვიდრე მინდორზე ვნერვიულობ ხოლმე.

- ფინალამდე რამდენიმე დღით ადრე ჩემპიონატში “ურალის” წინააღმდეგ ითამაშეთ. მაშინ ამბობდნენ, რომ “ლოკომოტივს” მსაჯი დაეხმარა. ევგენი გინერმა კი ყოველივე ეს სტანისლავ სუხინის მუშაობას დაუკავშირა. როგორი რეაქცია ჰქონდა ამაზე გუნდს?

- არანაირი! პირადად მე, მაგალითად, ეს ინტერვიუ საერთოდ არ წამიკითხავს. როგორც ფეხბურთელს, ასეთი რამეები საერთოდ არ მაინტერესებს. ჩვენ ვემზადებით თამაშისთვის, გავდივართ მოედანზე და ვთამაშობთ. არ მიგრძვნია ვინმეს დახმარება. თუ რამეს ამბობენ და წერენ, ეს მათი საქმეა და არა ჩვენი.

- ჩემპიონთა ლიგის დაწყების წინ “ლოკომოტივი” საგრძნობლად გაძლიერდა, მაგრამ ჯგუფში ბოლო ადგილი დაიკავა. რატომ?

- თავიდანვე ისე არ იყო ყველაფერი, როგორც გვინდოდა. “გალათასარაისთან” პირველ შეხვედრაში, სულ მცირე, ფრედ უნდა გვეთამაშა. “პორტუსთან” 11-მეტრიანი ვერ გავიტანეთ. “შალკესთან” ბოლო წამზე გავუშვით გოლი. იყო შეცდომები, სადღაც არ გაგვიმართლა. იქ ერთ შეცდომას დაუშვებ და ეგრევე ისჯები. ეგ არაფერი, მომავალ სეზონში უკეთ ვითამაშებთ.

- სტამბოლში ისეთი ხმაური იყო, ჟურნალისტებს ერთმანეთის პრესლოჟაშიც კი არ გვესმოდა. ეს ყველაზე ხმაურიანი სტადიონია თქვენს კარიერაში?

- კი, იქ ძალიან მაგრად ქომაგობენ, მაგრამ უფრო დიდი შთაბეჭდილება მოახდინა ჩემზე “ენფილდმა”, სადაც “რუბინმა” ფრედ ითამაშა “ლივერპულთან”. როგორ მღერიან ისინი... ეს რაღაც არარეალურია... შენ გამოდიხარ, უსმენ და იღებ სიამოვნებას. 

- სეზონის საუკეთესო ფეხბურთელების დასახელებისას თქვენ პირველ ადგილზე საკუთარი თავი დააყენეთ... 

- ეს ხუმრობა იყო! მე კიდევ ძმები მირანჩუკები დავასახელე. აი, მათ კი ეს ნამდვილად დაიმსახურეს. მათ ბოლო დროს ძალიან მოუმატეს. ძმები რუსეთში თავიანთ პოზიციებზე ერთ-ერთი საუკეთესონი არიან.

- სხვათა შორის, “ლოკომოტივში” ბარინოვმაც საკუთარ თავს მისცა ხმა...

- მასთან ვმეგობრობ. ის ყოველ წელს უმატებს, მეტიც, დღითიდღე უმატებს. თუ ასე გააგრძელებს, მას კონკურენტი, უბრალოდ, არ ეყოლება. მას შეუძლია, ითამაშოს ტრავმით, ტკივილით... უბრალოდ, მანქანაა... 

- ეს სეზონი ბოლო იყო იგორ დენისოვისთვის. მისმა ასე ნაადრევმა წასვლამ გაგაკვირვათ?

- ჩვენ 2,5 წელი ვითამაშეთ ერთად. ძალიან კარგი ფეხბურთელია და არანაკლებ კარგი - პიროვნება... მე ვერ განვსჯი მის გადაწყვეტილებას...

- ზამთარში “ლოკომოტივში” კიდევ ერთი ქართველი მოვიდა - ხვიჩა კვარაცხელია. ის მართლა ყველაზე ნიჭიერია თავის თაობაში?

- ერთ-ერთი ყველაზე ნიჭიერია. მას ძალიან დიდი მომავალი აქვს. ხვიჩას ყველა მონაცემი და თვისება ამას მოწმობს. ყველაფერი მასზეა დამოკიდებული, როგორ განვითარდება... მინდა, რომ ის “ლოკომოტივში” დარჩეს, მაგრამ ხომ გესმით, მე ვერ ვთხოვ ამას. ყველამ ნახა, როგორ თამაშობს ის. მას ჰყავს მენეჯერი. ასე რომ, შესაძლებელია მსჯელობა და მოლაპარაკება.

- რა ხდება თქვენს მომავალთან დაკავშირებით? კონტრაქტი 2021 წლის ზაფხულამდე გაქვთ. ისაუბრეთ თუ არა კლუბთან მის გაგრძელებაზე?

- არავისთან მილაპარაკია... ორი წელი საკმარისი დროა განსჯისთვის...

- გაზაფხულზე ნობელ არუსტამიანმა თქვა, რომ 1 ივლისიდან თქვენი ტრანსფერის გამოსასყიდი თანხა 3,6 მილიონი ევრო იქნება. ეს სიმართლეა?

- ნუ, რადგან ნობელი ამბობს... ცოტა პლუს-მინუსით...

- გასულ წელს წერდნენ, რომ თქვენით ინგლისური პრემიერლიგის კლუბები იყვნენ დაინტერესებულები. ევროპიდან რომ დაგირეკონ, წახვალთ?

- 2,5 წლის განმავლობაში “ლოკომოტივთან” ერთად ყველაფერი მოვიგე. თუ კარგი წინადადება მექნება ევროპიდან, რატომაც არა?! შეიძლება, ტიტულის მოგება სხვა ქვეყანაშიც ვცადო. გავხდე ჩემპიონი, მოვიგო თასი... რაც მეტ ტიტულს მოვიგებ, მით უკეთესი.

- თუ წახვალთ, მხოლოდ ტოპკლუბში?

- არ აქვს აზრი გადარჩენისთვის ბრძოლას. იდეაში, სასურველი იქნებოდა ევროპის ხუთ ტოპჩემპიონატში მოასპარეზე კლუბი, რომელიც, სულ მცირე, ევროპალიგის საგზურისთვის იბრძვის. რა თქმა უნდა, არ არის იქ მოხვედრა იოლი, მაგრამ თუ გამოჩნდება საინტერესო ვარიანტი ჩემთვისაც და კლუბისთვისაც, ეს კარგი ნაბიჯი იქნება ჩემს კარიერაში.

- ვთქვათ, ხვალ დაგიკავშირდათ კლუბი ინგლისური პრემიერლიგიდან, რომელიც იბრძვის უმაღლესი მიზნებისთვის. შეთავაზებას არც განიხილავთ?

- რატომ? ყველა წინადადებას განვიხილავ! ან “ჩელსიში” წავალ, ან არსად - ასე ნამდვილად არ ვფიქრობ. თუ გუნდი და პირობები ნორმალური იქნება, რატომაც არა?!

- მართალია, რომ წასვლა წინა სეზონის შემდეგაც შეგეძლოთ?

- იყო ორი-სამი ვარიანტი ინგლისიდან და გერმანიიდან. ერთ-ერთი იყო “ლესტერი”. რატომ არ წავედი? ჩვენ უნდა გვეთამაშა ჩემპიონთა ლიგაში, გუნდი გაძლიერდა... დავფიქრდი და დარჩენა გადავწყვიტე.

- ინგლისში არის ერთი გუნდი, სადაც თქვენ ნამდვილად არ წახვალთ - “უოტფორდი”...

- იმიტომ რომ იქ ხავი გრასია მუშაობს? მოიცადეთ, ეს ფეხბურთია, ეს ცხოვრებაა, ბევრი რამ იცვლება...

- არ გიკვირთ, რომ მას ინგლისში უფრო გამოსდის საქმე, ვიდრე რუსეთში? მისით “ჩელსიც” კი ინტერესდება...

- ქება მას! კარგ გუნდში მოხვდა. დღემდე არ ვიცი, რა უნდოდა ჩემგან “რუბინში”? კარგია, ასე რომ მოხდა. ასე რომ არ მომხდარიყო, “ლოკომოტივში” არ ვიქნებოდი და არ მოვიგებდი ამდენ ტიტულს.

- პრემიერლიგის 16-დან 18 გუნდამდე გაფართოებაზე რა აზრის ხართ?

- პირველად მესმის. და რას ამბობენ?

- წინააღმდეგი მხოლოდ “სპარტაკია”...

- თუ “ლოკომოტივი” მომხრეა, მაშინ მეც ვემხრობი.

ყოველდღიური სპორტული გაზეთი "ლელო"
2247
მკითხველის კომენტარები / 0 /
მსგავსი ამბები
რუბრიკის სხვა სიახლეები
;