ინტერვიუ სერია A-ში გადასულ გიგა ჯანელიძესთან: ტრიესტეში გემრიელი ხინკალი მზადდება

სერია A-ში განვლილ სეზონში ორი კალათბურთელი გვყავდა - მანუჩარ მარკოიშვილი და დუდა სანაძე. დუდამ ჩემპიონატი ვერ დაასრულა - ტრავმის შემდეგ ოპერაცია დასჭირდა.

არ ვიცით, მომავალ სეზონში დაბრუნდებიან თუ არა ისინი იტალიის ჩემპიონატის უმაღლეს ლიგაში, მაგრამ სერია A ქართველის გარეშე არ ჩატარდება - გიგა ჯანელიძემ "ტრიესტესთან" ერთად მეორე ლიგა მოიგო და 2017-18 წლების სეზონში იქ ითამაშებს, სადაც სხვადასხვა დროს გამოდიოდნენ მანუჩარ მარკოიშვილი, ვიქტორ სანიკიძე, დუდა სანაძე, ვლადიმერ ბოისა და ნიკა მეტრეველი.

როგორ მოიგო გიგა ჯანელიძის გუნდმა რიგით მეორე ლიგა, ჩვენს მკითხველს კარგად მოეხსენება. ქართველ ფორვარდს ტრიესტეში დავუკავშირდით და საინტერესო ინტერვიუ ჩავწერეთ.

პლეი ოფის პირველ ეტაპზე "ტრიესტემ" 3:0 მოიგო, 1/4-ფინალში - 3:1, 1/2 ფინალში - 3:0, ფინალშიც - 3:0. შთამბეჭდავი მაჩვენებლებია...

- სეზონის დასაწყისში ნამდვილად არ გვეგონა, რომ დასკვნით ნაწილს ასე ეფექტურად ჩავატარებდით. ნახევარფინალში, "ტრევიზოსთან" გასვლითი მატჩის წინ ერთმანეთს ვეუბნებოდით, მთავარია, დიდი სხვაობით არ წავაგოთ და ტრავმებს თავი ავარიდოთ, რომ თუ გადამწყვეტი მატჩი დაგვჭირდა, შინ კარგად ვითამაშოთო. ამას იმიტომ ვამბობდით, რომ ტრიესტეში 2:0 გვქონდა მოგებული და "ტრევიზო" იმდენად ძლიერი იყო, ნამდვილად ვერ ვიფიქრებდით 3:0-ს რომ ვაჯობებდით. რეგულარულ ეტაპზე ამ გუნდთან 20 ქულის სხვაობით დავმარცხდით. თუმცა ნახევარფინალში მესამეც მოვუგეთ.

- ფინალში 3:0 "კასალესთან". რა იყო ასეთი დამაჯერებელი გამარჯვებების მიზეზი?

- სეზონის განმავლობაში არაერთი ტრავმირებული გვყავდა. სრული შემადგენლობით არ გვითამაშია. შუა სეზონში გამოგვაკლდა არგენტინელი გამთამაშებელი ხუან ფერნანდეცი, რომლის ნაცვლად დავიმატეთ მანუჩარ მარკოიშვილის თანაგუნდელი ფედერიკო მუსინი. საბოლოოდ არგენტინელიც გამოჯანმრთელდა. მუსინიმაც ითამაშა და პლეი ოფში მწვრთნელს ძალიან დიდი არჩევანი ჰქონდა.
ჩვენს ლიგაში აუცილებელი იყო გუნდში ორი ახალგაზრდა ყოფილიყო, დანარჩენი ადგილები კი, ვისით შეევსო, არ იცოდა. ზოგჯერ განაცხადს მიღმა ლიდერებს ტოვებდა. ორი ერთმანეთზე უკეთესი ხუთეული გვყავდა და ამანაც განაპირობა ჩვენი წარმატება. ერთხელ ჩვენი მთავარი სნაიპერი ლორენცო ბალდასო არ შეიყვანა შემადგენლობაში და მოუბოდიშა კიდეც...

- შენ არ დაუტოვებიხარ?

- პლეი ოფში ყველა მატჩი ვითამაშე. მას ჩემი ტიპის კალათბურთელი სჭირდებოდა. მეუბნებოდა კიდეც - შენგან ქულებს არ ველი, თუ ჩააგდებ, ხომ კარგი, მთავარია, დაცვაში შენს კაცს ბურთი არ ჩააგდებინოო. მეტოქე გუნდების ყველაზე ძლიერ წინახაზელებთან მიწევდა თამაში. მაგალითად, ფინალში, "კასალეს" 213 სმ სიმაღლის ცენტრი ჰყავდა, ჩემზე 15 კილოგრამით მძიმე იქნებოდა და სწორედ მას ვმეურვეობდი. ბევრი არაფერი გაუკეთებია. მასთან შედარებით სწრაფი ვარ და ამის ხარჯზე ვახერხებდი შეჩერებას. ამასთან, არც ხისტად თამაში მიჭირს, მაგრამ ამ სეზონში არასპორტული ჯარიმა მხოლოდ ერთხელ მივიღე.

იყო ასეთი შემთხვევაც: ერთ მატჩში ბურთი არ მისვრია, მოედანი 0 ქულით დავტოვე. გამოსვლისას მწვრთნელმა სულ "ბრავო", "ბრავო" მეძახა.

- სხვათა შორის, საქართველოს ნაკრების მთავარი მწვრთნელი ილიას ზუროსიც მთავარ აქცენტს დაცვაზე აკეთებს. წლეულს მისგან დაინტერესება ხომ არ ყოფილა?

- არ ყოფილა და არც მწყინს. საიდან უნდა ცოდნოდა ჩემ შესახებ... საქართველოს ნაკრებში მოხვედრა ყველას უნდა, მაგრამ 12 კაცში ყველა ვერ მოხვდება. ისე კი ეროვნულ გუნდს ყოველთვის ვგულშემატკივრობ. სხვათა შორის, ტრიესტეს დარბაზშიც მქონდა მიტანილი საქართველოს დროშა და ყველა მატჩზე გამოსაჩენ ადგილას იყო გამოფენილი.

- როგორ აღნიშნეთ სერია A-ში გადასვლა?

- ფინალური სერიის მესამე მატჩი სტუმრად გვქონდა, გულშემატკივრები კი ტრიესტეს დარბაზში შეიკრიბნენ და ტელეეკრანზე ნახეს, როგორ გავხდით ლიგის ჩემპიონები. ხუთი ავტობუსი გასვლით მატჩზე გამოგვყვა, ჩვენს ქალაქში დილის 7 საათზე დავბრუნდით და სავსე არენა დაგვხვდა, გულშემატკივრებთან ერთად გავიხარეთ, ლუდი და ღვინო ბევრი დაილია.

სხვათა შორის, "ტრიესტე" წლების წინ სერია A-ში თამაშობდა, წარმატებული გუნდიც იყო. მასში უთამაშია დეიან ბოდიროგას. თუმცა ათწლეულის წინ დაიშალა და მოგვიანებით აღდგა. მწვრთნელი ეუჯენიო დალმასონი "ტრიესტეში" 2011 წელს დაინიშნა, სერია ჩ-დან დაიწყო და წლევანდელის ჩათვლით ოთხი ლიგა მოიგო. საბოლოოდ იმდენი მოახერხა, რომ გუნდი უმაღლეს ლიგაში გადაიყვანა. სხვათა შორის, იგი იტალიის 20-წლამდელთა ნაკრების მთავარი მწვრთნელიცაა. ფინალის მოგების შემდეგ პირდაპირ ნაკრებს შეუერთდა.

- ფინალის შემდგომ გადაღებულ ფოტოზე ორი თასით ხარ. რა თასებია?

- სხვათა შორის, ზეიმის შემდეგ გასახდელში ორი თასით რომ აღმოვჩნდით, მაშინ გაგვიჩნდა შეკითხვა - ორი თასი რატომ? ორივეზე ამონაკაწრი წავიკითხეთ. აღმოჩნდა, რომ ერთი გვაჩუქა ჩვენმა ლიგამ, მეორე სერია A-მ - კეთილი იყოს თქვენი მობრძანებაო.

- ტრიესტეში ქართველები თუ გქომაგობდნენ?

- სხვათა შორის, ახლახან გაიხსნა ქართული რესტორანი. მისი მფლობელი ჩვენი თანამემამულეა, რომელსაც იტალიელი ცოლი ჰყავს. არის ქართული ნაწარმის მაღაზიაც, სადაც ჩურჩხელებიდან დაწყებული, ღვინოებით დამთავრებული, ბევრ გემრიელ ნაწარმს შეხვდებით. რესტორანში ჩემი გუნდელებიც დავპატიჟე და იმდენად მოეწონათ ხინკალი, ხშირად მეკითხებიან - თეთრი ცომი და ხორცი რომ იყო, რა ერქვაო. უჭირთ სიტყვა ხინკლის დამახსოვრება.
რაც შეეხება გულშემატკივრობას, ფინალებისთვის საქართველოდან დედაჩემი ჩამოვიდა. მოგეხსენებათ, კალათბურთის თამაში მისი ხელმძღვანელობით დავიწყე და მინდა "ტრიესტეს" წარმატება სწორედ მას მივუძღვნა. მე-14 ნომრად ვთამაშობდი. ეს რიცხვი ტრიესტელებისთვის სიმბოლური მნიშვნელობისაა - 14-წლიანი შესვენების შემდეგ მოიპოვეს სერია A-ს საგზური. სხვათა შორის, სწორედ დედაჩემი თამაშობდა კალათბურთს 14-ნომრიანი მაისურით.

- "ტრიესტეში" დარჩენას აპირებ?

- ჩემი მენეჯერი გუნდის ხელმძღვანელობას ახლახან ესაუბრა. უთხრეს, არსად ვუშვებთო. "ტრიესტესთან" კიდევ ორი წელი მაკავშირებს ხელშეკრულების მიხედვით. პარალელურად მეორე ლიგის სხვა წამყვანი კლუბებისგან მივიღე საინტერესო შეთავაზება. სიმართლე რომ ვთქვა, მირჩევნია, მეორე ლიგაში სასტარტო შემადგენლობაში ვიყო, ვიდრე უმაღლესში მეთერთმეტე-მეთორმეტე კაცი. თუმცა რადგან "ტრიესტეს" ხელმძღვანელობამ ჩემს აგენტს უთხრა, რომ ჩემი დატოვება სურს, იმედი მაქვს, იმაზე ნაკლებს არ ვითამაშებ, რამდენსაც ამ სეზონში.

- საქართველოში როდის ბრუნდები?

- ამ უქმეებზე ჩემი თანაგუნდელის, პეჩილეს ქორწილია. შემდეგ წამოვალ.

- პეჩილე "მონტეპასკიში" თამაშობდა, იტალიის ნაკრებშიც ერთ-ერთი გამორჩეული იყო...

- საინტერესო იყო მასთან პირველი შეხვედრა. დარბაზში შევედი და მესმის: როგორ ხარ, ზმაო? მივიხედე და პეჩილე შემრჩა. გამიკვირდა, ქართული საიდან იცი-მეთქი. ვლადიმირ ბოისა ჩემი ზმაა - ისევ ქართულად მითხრა, "მონტეპასკიში" ერთად ვთამაშობდითო.

2141
მკითხველის კომენტარები / 0 /
მსგავსი ამბები
რუბრიკის სხვა სიახლეები
;