ინტერვიუ. შალვა გოგოლაძე პოსტპანდემიური კრიზისიდან გამოსვლის ავსტრალიურ ვარიანტზე

როდესაც ოლიმპიურ წელიწადს, ივნისის თვეში საქართველოს განათლების, მეცნიერების, კულტურისა და სპორტის სამინისტროს ეწვევი, წესითა და რიგით, მთავარი თემა ტოკიო 2020-ის ოლიმპიადა უნდა იყოს, მაგრამ...

კოვიდ 19-ის პანდემიამ ინტერვიუს მთავარი თემაც შეცვალა - მინისტრის მოადგილე შალვა გოგოლაძესთან ერთად ქართული სპორტის პოსტკრიზისულ პერიოდსა და მთავრობის მიერ შემუშავებულ პროტოკოლზე ვისაუბრეთ.

- მოგეხსენებათ, 2020 წელი ისევე წარმატებულად დავიწყეთ, როგორც დავასრულეთ 2019. ეს იყო ოლიმპიური წელიწადი, შესაბამისად, სახელმწიფომ ყველაფერი გააკეთა საიმისოდ, რომ სპორტსმენებს არაფერი მოკლებოდათ და ყველა შესაძლებლობა ჰქონოდათ სრულყოფილად მოსამზადებლად. ისინი ინტენსიურად შეუდგნენ მზადებას და ზოგიერთ სახეობაში მსოფლიოსა თუ ევროპის ჩემპიონატებიც მოესწრო. მაგალითად მოჭიდავეებმა, რომლებზეც ოლიმპიადებზე ყოველთვის დიდ იმედებს ვამყარებთ, ევროპირველობა ძალიან წარმატებულად დაასრულეს.

თუმცა მსოფლიოს მასშტაბით განვითარებულმა მოვლენებმა და ტრაგედიამ, რომელსაც კოვიდ 19 ჰქვია, მთლიანად შეაჩერა როგორც ქართული, ასევე მსოფლიოს სპორტული აქტივობა. გაუქმდა ყველა შეჯიბრება, გადაიდო ყველაზე დიდი ღონისძიება ტოკიოს ოლიმპიადა.

როდესაც მსოფლიოში პანდემია გამოცხადდა, უცხოეთში მყოფი ყველა ნაკრები და სპორტსმენი საქართველოში დავაბრუნეთ. განსაკუთრებული რისკის ქვეყნებიდან ჩამოსულები გადავიყვანეთ კარანტინში, ზოგმა თვითიზოლაცია გაიარა. მიუხედავად იმისა, რომ საზღვარგარეთ ძალიან ბევრი სპორტსმენი იყო, სასიხარულოა, რომ არც ერთ მათგანს კორონავირუსი არ აღმოაჩნდა.

შემდეგი ეტაპი იყო ლაივ-რეჟიმში გადასვლა, რომლის დროსაც სახლის პირობებში თუ ღია სივრცეებში შეძლებისდაგვარად ინარჩუნებდნენ ფორმას, რისთვისაც მინდა მათ და ფედერაციებს დიდი მადლობა გადავუხადო.

- 29 მაისს მთავრობამ მიიღო პროტოკოლი, რომელიც სპორტული ცხოვრების აღდგენისკენ გადადგმული პირველი ნაბიჯია.

- სპორტული აქტივობების აღდგენა მთავრობის გეგმაში მეექვსე ეტაპზე იყო გაწერილი, რომელიც 15 ივლისს უწევდა. მყისიერად დავიწყეთ სხვადასხვა ქვეყნის მაგალითების შესწავლა, რომ რაც შეიძლება ოპტიმალურ ვადებში და სრულფასოვნად განგვეახლებინა სპორტული ცხოვრება. ჩვენმა დეპარტამენტმა ევროპის ქვეყნებისა და ავსტრალიის მაგალითები გააანალიზა და სწორედ ავსტრალიელების ვარიანტი იყო ჩვენთვის საინტერესო, სადაც გამიჯნეს კონტაქტური და არაკონტქატური სახეობები.

მივმართეთ საქართველოს შრომის, ჯანმრთელობისა და სოციალური დაცვის სამინისტროს, რომ ის სპორტსმენები, რომლებმაც აქამდე ასახელეს საქართველო და კიდევ ველით დიდ წარმატებებს, არ გაჩერებულიყვნენ და დარბაზებში დაბრუნების შესაძლებლობა მისცემოდათ.

უკვე 29 მაისს მთავრობამ დაამტკიცა ეს პროტოკოლი, რომელმაც საშუალება მისცა ყველა პროფესიონლ სპორტსმენს ევარჯიშა იქ, სადაც პანდემიანდე ემზადებოდა. ცხადია, ეს ყველაფერი იმ რეკომენდაციების დაცვით უნდა მომხდარიყო, რომელიც ჩვენმა ჯანდაცვის სამინისტრომ შეიმუშავა. ცალკე თავად გაიწერა შეკრების ორგანიზება. იყო საფრთხე იმისა, რომ რომელიმე სპორტსმენს ჰქონოდა ვირუსი და პირდაპირი კონტაქტით მთელი გუნდი დაესნებოვნებინა. ეს რომ გამოირიცხოს, გადაწყდა, რომ შეკრების საწყის ეტაპზე ვარჯიშები ჩატარდება სოციალური დისტანცირებით, ხოლო მეცამეტე დღეს უშუალოდ ჩვენი სამინისტრო იღებს პასუხისმგებლობას ტესტირება ჩაუტაროს ყველა სპორტსმენს და თუ ყველაფერი რიგზე იქნება, შეკრებაც სრული ინტენსიურობით წარიმართება.

- პროტოკოლში არ იყო მისი ამოქმედების მითითებული თარიღი, რამაც არაერთი შეკითხვა დაბადა...

- ეს დოკუმენტი გამოქვეყნდა საკანონმდებლო მაცნეში და თუ მასში არ არის მითითებული თარიღი, იგულისხმება, რომ უნდა ამოქმედდეს გამოქვეყნებისთანავე. პროტოკოლი, რომელზეც ვლაპარაკობთ გამოქვეყნდა პარასკევს, 29 მაისს და ამ დღიდან, ჩვენს პროფესიონალ სპორტსმენებს აქვთ საშუალება, ისევდაისევ ჯანდაცვის სამინისტროს რეკომენდაციების დაცვით, შევიდნენ დარბაზებში და დაუბრუნდნენ ჩვეულ რეჟიმს.

- კიდევ ერთის დაკონკრეტებას გთხოვთ - პროფესიონალ სპორტსმენებში ახალგაზრდა სპორტსმენებიც ითვლებიან?

- დიახ, ახალგაზრდებიც. მაგალითისთვის ტანვარჯიშს მოვიყვან: ამ სახეობაში ძალიან ადრეულ ასაკში გადადიან პროფესიონალურ სპორტში, ამიტომ ასაკობრივ ზღვარს ნამდვილად ვერ დავადგენდით.

- პროტოკოლში ბევრი რამ ზოგადადაა მოცემული. მაგალითად, საწყლოსნო სახეობები არაკონტაქტურში წერია, თუმცა წყალბურთი საკმარისზე მეტად კონტაქტურია. პროტოკოლს გარკვეულწილად ჩაშლაც ხომ არ იგეგმება?

- საქმე მარტივადაა. ცურვა, ცხადია, არაკონტაქტური სახეობაა და მოცურავეები ჩვეულებრივად ივარჯიშებენ. წყალბურთელები, თუ პირველ ეტაპზე ერთმანეთთან შეხებაში არ იქნებიან, ფიზმომზადებასა და ტაქტიკაზე იმუშავებენ, გამოდის რომ პროტოკოლსაც იცავენ. პრობლემა სხვაგანაა - საერთო გასახდელი ამ ეტაპზე რისკის ადგილადაა მიჩნეული. ამიტომ, აუზებთან დაკავშირებით მოლაპარაკებები ინტენსიურად მიმდინარეობს.

- არის კიდევ ერთი დასაფიქრებელი საკითხი - მხოლოდ სპორტსმენებისთვის აუზის გახსნა რამდენად მოხერხვდება?

- ერთი გუნდისთვის აუზის გახსნა ძალიან რთული იქნება, რადგან სრულფასოვანი ფუნქციონირებისთვის აუცილებელია ხარჯი დაიფაროს. ეს ნაწილი შესაძლოა, გაგვეჭიმოს, თუმცა ბევრი რამ დამოკიდებული იქნება იმაზე, რა მდგომარეობა გვექნება ქვეყანაში 15 ივლისისთვის.

პოსტკრიზულ პერიოდში ძალიან მნიშვნელოვანი იქნება რეგიონებში სპორტული ინფრასტრუქტურის განვითარება, რათა მეტ ადამიანს მიეცეს სპორტში ჩართვის საშუალება

- მთავრობამ ზოგიერთ დარგში სპეციალური პოსტკრიზისული სარეაბილიტაციო გეგმა სეიმუშავა. მაგალითად ტურიზმში, სოფლის მეურნეობაში... პანდემიამ დაგვანახა, რომ სპორტი ქვეყნისთვის ერთ-ერთი სტრატეგიული მიმართულება უნდა იყოს. სპორტში ჩართული ადამიანი ხომ ბუნებრივად ჯანმრთელიცაა, რომელსაც ნაკლკებად ვნებს ესა თუ ის დაავადება...

- მთავრობის მთავარი მიზანია ცხოვრების ჯანსაღი წესის დამკვიდრება და მასობრივი სპორტის განვითარება. ის შედეგი, რაც დღეს გვაქვს, სწორედ ჩვენს მიერ მთავრობაში მოსვლის შემდეგ შემუშავებული სტრატეგიამ მოგვიტანა. თავადაც ხედავთ, როგორ მატულობს სპორტში ჩართული ახალგაზრდების რაოდენობა, როგორი დატვირთვა აქვს ფიტნეს-დარბაზებს.

კუს ტბასა თუ ლისზე ყოველი ასვლისას ვხედავ და მსიამოვნებს, რომ პანდემიის შემდეგ კიდევ უფრო მეტმა ადამიანმა მიაქცია ყურადღება ცხოვრების ჯანსაღ წესს. საუბარი მქონდა სპორტული ინვენტარის შემომტანი კომპანიის წარმომადგენლებთან, რომლებიც ონლაინ რეჟიმში ვაჭრობდნენ და მითხრეს, რომ ინვენტარი თითქმის სრულად ამოიყიდა. ასევე ძალიან გახარებულები იყვნენ ველოსიპედების იმპორტიორები, რომელთა თქმით პანდემიის პერიოდში, დედაქალაქში რთული იყო ველოსიპედის შოვნა. ეს მიგვანიშნებს, რომ ვირუსთან თუ ნებისმიერ დაავადებასთან ბრძოლაში მნიშვნელოვანია ვარჯიში და ჯანსაღად ცხოვრება. ხალხი ამას სათანადოდ აცნობიერებს.

ჩვენ ორმაგი ძალით ხელს შევუწყობთ, რაც შეიძლება მეტი სპორტული ობიექტი აშენდეს. 2 ივნისს გვქონდა კომიტეტის სხდომა, სადაც ითქვა, რომ პოსტკრიზულ პერიოდში ძალიან მნიშვნელოვანი იქნება რეგიონებში სპორტული ინფრასტრუქტურის განვითარება, რათა მეტ ადამიანს მიეცეს სპორტში ჩართვის საშუალება.

ჩვენი ამოცანაა, ასევე სასკოლო და საუნივერსიტეტო სპორტის განვითარება, რაც ერთ-ერთი მთავარი საფეხურია, რომლის გადალახვის შემდეგაც მოზარდმა მაღალი მიღწევების სპორტში უნდა შეაბიჯოს.

- კორონავირუსის პერიოდში სპორტი მთლიანად შეჩერდა. ამის გამო მთავრობის მიერ სპორტის სხვადასხვა სახეობების დაფინანსება ხომ არ გადაიხედება?

- 2020 წლის დასაწყისში ყველა ფედერაციამ სრული დაფინანსება მიიღო. თუმცა, მოგეხსენებათ, პანდემიის გამო ყველა სპორტული ღონისძიება გაუქმდა. ამ კვირაში მთავრობა პარლამენტში შედის საგანგებო ბიუჯეტის დამტკიცების ინიციატივით. ბიუჯეტში ცვლილება სპორტსაც შეეხება, გარკვეული ფინანსური დანაკლისი ექნება, მაგრამ პრემიერმინისტრმაც აღნიშნა, რომ თუ სპორტი შემოდგომისთვის სრულად გაიხსნება და ჩვენს გუნდებს საერთაშორისო არენაზე გასვლის საშუალება მიეცემათ, მაშინ სახელმწიფო გამოყოფს სახსრებს, რომ ჩვენს სპორტსმენებს არანაირი დაბრკოლება არ შეექმნათ.

1300
მკითხველის კომენტარები / 0 /
მსგავსი ამბები
რუბრიკის სხვა სიახლეები
;