[ინტერვიუ] ჩიხურას ახალი მწვრთნელი: ვიბრძოლებთ ევროსაგზურისთვის!.. ვინ არის ფრუიძის მემკვიდრე?

სოსო ფრუიძე "ჩიხურას" მთავარი მწვრთნელის პოსტზე ვახტანგ თურმანიძემ შეცვალა. 46 წლის სპეციალისტი საჩხერელია. "ჩიხურაში" სადებიუტო მატჩი 1989 წელს, 16 წლისამ ჩაატარა. უთამაშია ქუთაისის "ტორპედოში",  წყალტუბოს "სამგურალსა" და ბათუმის "დინამოში", კარიერა კი 2006 წელს მშობლიურ "ჩიხურაში" დაასრულა.

მისი სამწვრთნელო კარიერა 2006 წელს "ჩიხურაში", მთავარი მწვრთნელის ასისტენტის რანგში დაიწყო და მას შემდეგ იქ მუშაობს. 2007 წელს, როცა გუნდი ხვიჩა ქასრაშვილმა დატოვა, ბოლო ოთხი მატჩი, მათ შორის, "გაგრასთან" გადათამაშებაც, დროებითი მთავარი მწვრთნელის რანგში სწორედ თურმანიძემ ჩაატარა და გუნდს ლიგაში ადგილი შეუნარჩუნა.

ასისტენტის რანგში თურმანიძეს ვლადიმერ ზაბახიძე დაეხმარება. ორივემ რამდენიმე დღის წინ უმაღლესი სამწვრთნელო PRO-ლიცენზია მიიღო.

"ლელო" "ჩიხურას" ახალ მთავარ მწვრთნელსაც დაუკავშირდა და ინტერვიუ ჩამაორთვა:

- პირველ რიგში, "ჩიხურას" მთავარ  მწვრთნელად დანიშვნას გილოცავთ და წარმატებებს გისურვებთ! ფრუიძის შემდეგ "ჩიხურას" მწვრთნელობა იოლი საქმე არ იქნება...

- რა თქმა უნდა, რთული იქნება. ბატონმა სოსომ გუნდში იმდენი რამ გააკეთა, ძნელი იქნება, უცებ ჩაანაცვლო. გაცნობიერებული მაქვს, თუ რამხელა პასუხისმგებლობაა. მაგრამ იმედია, ფრუიძესთან 12-წლიან მუშაობას უკვალოდ არ ჩაუვლია - ბედნიერი ვარ, ასეთ გამოცდილ მწვრთნელთან რომ ვიმუშავე. ამ პერიოდში მის გვერდით უდიდესი გამოცდილება მივიღე. ამას გარდა, მნიშვნელოვანი იყო, რომ ბოლო ორი წლის განმავლობაში პროლიცენზიის კურსები გავიარე, სადაც ბევრს სწავლობ. ეს გამოცდილება და ცოდნა მაიმედებს, რომ "ჩიხურაში", რომელიც, ფაქტობრივად, ჩემი სახლია, ღირსეულად ვიმუშავებ.

- გუნდი სეზონისთვის მზადებას როდის დაიწყებს?

- შეკრებას შემდეგი კვირიდან ვიწყებთ.

- ქუთაისის "ტორპედოსი" არ იყოს, თქვენგანაც, ფაქტობრივად, ყველა ლიდერი წავიდა და შემადგენლობას როდის შეკრებთ?

- ბევრი წავიდა, მაგრამ მჯერა, კარგ გუნდს ჩამოვაყალიბებთ. სულ ასე იყო - ფრუიძეს ყოველი წლის დასაწყისში ახალი გუნდის შექმნა უწევდა, მაგრამ შედეგს დებდა. იმედია, ჩვენც წარმატებით ვითამაშებთ და მიზანს მივაღწევთ.

- ახალ სეზონში რა მიზნებს ისახავთ?

- იმავეს, რაც აქამდე გვქონდა - "ჩიხურამ" ევროპალიგის საგზურის მოსაპოვებლად უნდა იბრძოლოს.

- საინტერესოა, ვინ წავიდა და ვინ დარჩა?

- წავიდნენ სარდალიშვილი, ჩიტეიშვილი, მაისაშვილი, ჩიხლაძე, მარკოზაშვილი... ურთიერთშეთანხმების საფუძველზე, გუნდი მეგრელიშვილმა და ფანცულაიამაც დატოვეს.

- დინო ჰამზიჩი არ გიხსენებიათ, გავრცელებული ხმებით, მას გორის "დილა" იწვევს...

- არა, დინო ჩვენთან დარჩება! ეს გადაწყვეტილია და  რაც ძალიან მახარებს. ჰამზიჩი გუნდისთვის დიდი ძალაა და მოლაპარაკება წარმატებით დავასრულეთ. ეს ხელმძღვანელობის დამსახურებაა, რადგან მის შესანარჩუნებლად მაქსიმუმი გააკეთეს. ამას გარდა, კიდევ რამდენიმე ლიდერი შევინარჩუნეთ, რაც ძალიან მახარებს - კაშია, ლექვთაძე, დეკანოიძე, ჩიკვილაძე, კამლაძე.

- არდაზიშილიც წავიდა?

- დიახ, მისი ტრანსფერი "ლოკომოტივს" ეკუთვნოდა, იჯარა დაუსრულდა და მართალია, ახალი კონტრაქტი შევთავაზეთ, მაგრამ უარი თქვა, რადგან უცხოეთში წასვლას იმედოვნებს.

- მზადების გეგმებზეც ვილაპარაკოთ...

- სამი კვირის განმავლობაში გუნდი საჩხერეში ივარჯიშებს - მინდვრის საფარი და მოსამზადებელი პირობები ამის საშუალებას გვაძლევს. თებერვალში 2 კვირით ანთალიაში მოვემზადებით, სეზონს კი 1 მარტს "საბურთალოსთან" მატჩით გავხსნით...

2311
მკითხველის კომენტარები / 0 /
მსგავსი ამბები
რუბრიკის სხვა სიახლეები
;