ინტერვიუ ძიუდოს ფედერაციის პრეზიდენტთან: როცა ყველაფერი ჩაწყნარდება, სრულიად ახალ ეტაპზე უნდა გადავიდეთ

ტოკიოს ოლიმპიადა ერთი წლით გადაიდო, რამაც საკმაოდ დიდი სირთულეები შეუქმნა მთელ სპორტს. თუმცა ისეთ სახეობებს კიდევ რა უჭირთ, სადაც კონკრეტული სალიცენზიო ტურნირი ტარდება - თუ მოხვდები წინასწარ განსაზღვრულ კვოტაში, საგზურსაც მიიღებ, განსაკუთრებით რთულ ვითარებაში კი ის სახეობები აღმოჩნდნენ, სადაც ლიცენზიების გასაცემად ქულათა დარიცხვის ანუ სარეიტინგო სისტემა მოქმედებს.

ოღონდ განსხვავება მათ შორისაცაა. მაგალითად, ძალოსნობაში შედარებით ცოტა სალიცენზიო შეჯიბრება იყო დარჩენილი და რეიტინგში რადიკალური ცვლილებები ნაკლებადაა მოსალოდნელი, ძიუდოში კი ბევრი ასეთი ტურნირია გადადებული და ყოველმა მათგანმა, შეიძლება, დიდი ცვლილება გამოიწვიოს. თანაც, აქ ორი წლის წინ მოპოვებული ქულები საერთოდ ნულდება, ერთი წლის წინანდელი კი - ნახევრდება. ამასთან, მსოფლიოს რეიტინგთან ერთად არსებობს ოლიმპიური რეიტინგიც. მართალია, სალიცენზიო ციკლის ბოლოს ისინი თანხვედრაში არიან ერთმანეთთან, მაგრამ საქმე იქამდე მისვლაა.

მაგალითად, სალიცენზიო რეიტინგში გათვალისწინებულია ეგრეთ წოდებული ექსტრა ქულა - კონტინენტურ პირველობასა და მასტერსზე მოპოვებულთაგან უკეთესი. დილემაც აქაა - დარჩება თუ არა რეიტინგში შარშანდელი ექსტრა-ქულა (გაისად მას ხანდაზმულობის ორწლიანი ვადა გაუდის), ან წლევანდელსა და გაისად მოპოვებულთაგან რომელს შეიტანენ?

ერთი სიტყვით, კორონამ თუ თავად მსოფლიოს შეუქმნა პრობლემები, ოლიმპიადის გადავადებამ მსოფლიოს ძიუდოს გაუჩინა ბევრი თავსატეხი. ამ თემებზე ძიუდოს ფედერაციის პრეზიდენტი გიორგი ათაბეგაშვილი გვესაუბრება, თუმცა მასთან ინტერვიუ თავად ოლიმპიადის გადავადების თემით დავიწყეთ.


- თქვენთვის რამდენად მისაღებია ოლიმპიადის გაისისთვის გადატანა?

- ამ გადაწყვეტილებას მივესალმები იქიდან გამომდინარე, რომ არ ვიცოდით, როდის განახლდებოდა საერთაშორისო ტურნირები. მოგეხსენებათ, ძიუდოს საერთაშორისო ფედერაციის გადაწყვეტილებით 1 მაისამდე შეჩერებულია ყველა მნიშვნელოვანი შეჯიბრება. მაისიდან ოლიმპიადის ძველ თარიღამდე ორი თვე რჩებოდა, ასეთ მცირე დროში კი შეუძლებელია, თამაშებს სასურველ ფორმაში შეხვდე. აქედან გამომდინარე, გონივრული გადაწყვეტილება მიიღეს, როცა ერთი წლით გადადეს. ოლიმპიადა ხომ ის თამაშებია, რომლისთვისაც სპორტსმენი მთელი ოთხი წელიწადი ემზადება და ეს მის ცხოვრებაში ერთ-ერთი უმნიშვნელოვანესი მოვლენაა.

ერთი სიტყვით, ორ თვეში თამაშებისთვის სრულყოფილად მომზადება საკმაოდ რთული იყო.

- თუმცა ამან მთელი გეგმები აგირიათ და ყველაფერი ისევ თავიდანაა დასაწყები. რამდენად მომზადებული ხვდებით ამ სირთულეებს?

- გეგმების გადახედვა კი არა, როცა ყველაფერი ჩაწყნარდება, მზადების სრულიად ახალ ეტაპზე უნდა გადავიდეთ. თუმცა ეს იმიტომ მოხდა, რომ სპორტსმენთა უსაფრთხოება უმთავრესია და ამასთან, უნდა დავიცვათ თანაბრობის ის პრინციპი, რათა ყველა ათლეტს ჰქონდეს უფლება, ოლიმპიადამდე მივიდეს ჯანსაღი კონკურენციის პირობებში; იმავე საკვალიფიკაციო ეტაპზე მიეცეს საშუალება, დააგროვოს სალიცენზიო ქულები.

- დაგვეთანხმებით, მაისში საერთაშორისო ტურნირების განახლების ალბათობა თითქმის გამორიცხულია... თუ იცით, რას ფიქრობენ საერთაშორისო ფედერაციაში, სეზონის განახლების ახალ თარიღად რა ვადას განიხილავენ?

- მათთან ჯერ კიდევ ოლიმპიადის გადადებამდე გვქონდა მიმოწერა, რომ ჩვენი ტურნირი - თბილისის "დიდი პრიზი" ივლისში ჩაგვეტარებინა, თუმცა მერე თავად ოლიმპიადაც გადაიდო და ჯერჯერობით სეზონის განახლებაზე ლაპარაკიც ზედმეტია. სამაგიეროდ, ევროპის ძიუდოს კავშირი გეგმავს, რომ ივნისში გადატანილი ევროპის ჩემპიონატი კიდევ ერთხელ, ამჯერად გვიან შემოდგომაზე გადაიტანონ - როგორც უფროსებში, ისე - ახალგაზრდებსა და ჭაბუკებში ანუ სამივე ერთდროულად ჩაატარონ.

- ჩვენი ტურნირი როდის შეიძლება ჩაატარონ, ამაზე თუ გისაუბრიათ მათთან?

- როგორც უკვე გითხარით, ივლისში გამართვაზე იყო საუბარი, მაგრამ ახლა სრულიად შეიცვალა ვითარება. ალბათ, უფრო შემოდგომისკენ ჩატარდება, ამ ეტაპზე კი რაიმე კონკრეტული თარიღის განხილვა არ მიმდინარეობს.

- ევროპის ჩემპიონატის გამართვის თარიღი როცა დაზუსტდება, მერე უფრო შეიძლება კონკრეტულ რიცხვებზე ორიენტირება - შეიძლება, სულაც კონტინენტის პირველობის წინ ჩავსვათ, როგორც ერთ-ერთი მოსამზადებელი ეტაპი.

- ესეც შეიძლება. იცით, რომ ჩვენს ტურნირთან ერთად გაუქმდა მაროკოს, ანტალიის, ეკატერინბურგის და ჩინეთის ტურნირები. ალბათ, ბაქოს "დიდი მუზარადიც" გაუქმდება მაისში - უკვე მოგვწერეს, დიდი ალბათობით, აღარ ჩატარდებაო. მასტერსის ტურნირიც ასევე არ გაიმართება და ვფიქრობ, შემოდგომამდე არაფერიც არ ჩატარდება - ყველაფერი ამ ვირუსის გავრცელებაზე იქნება დამოკიდებული. არადა, ეს შეჯიბრებები ყველა გასამართავია.

- სალიცენზიო ტურნირებზე თუ გქონდათ საერთაშორისო ფედერაციასთან საუბარი - რამე შეიცვლება ამ მხრივ, ქულათა დარიცხვის იგივე სისტემა ანუ ორწლიანი ციკლი გაგრძელდება?

- უკვე დაწერეს, რომ სადღეისოდ მოპოვებული ქულები ოლიმპიადამდე შეუნარჩუნდებათ, სხვა დეტალები კი გადასახედია. მაგალითად - როგორ ჩატარდება დანარჩენი ტურნირები და როგორ ასახავენ მათ რეიტინგში, საერთოდ იქნება თუ არა ისინი სალიცენზიო სტატუსისა.

- საინტერესოა, ოლიმპიურ რეიტინგს რას უპირებენ? მაგალითად, რომელი შევა ექსტრა ქულაში - წლევანდელი თუ საგაისო? ან შარშან მოპოვებული დარჩება თუ რეიტინგში?

- სიმართლე გითხრათ, მასე დაწვრილებითი კონტაქტი არ გვქონია და მაგაზე ვერაფერს გეტყვით. არც მათგან რაიმე დაზუსტებით და კონკრეტულად. ალბათ, ახალი კალენდარის შედგენისას საერთაშორისო ფედერაციის აღმასკომი ამაზეც იმსჯელებს, თორემ ჯერჯერობით ეგ საკითხები ბუნდოვანია, ზუსტი განმარტება არ არსებობს. მე როგორც ვიცი, ჯერ არც კი განუხილავთ მსგავსი საკითხები. შესაბამისად, არც ჩვენ - ეროვნულ ფედერაციებს არ მოგვსვლია არანაირი მითითება. ერთადერთი, მხოლოდ საერთაშორისო ფედერაციის პრეზიდენტ მარიუს ვიზერის ინტერვიუ გამოქვეყნდა, სადაც აღნიშნა, რომ ახალი კალენდარია გასაკეთებელი, ოლიმპიადამდე როგორ მივდივართ, და მთლიანად უნდა გადავაფასოთ ყველაფერიო.

2610
მკითხველის კომენტარები / 1 /
გუკო
0
ყოჩაღ!
მსგავსი ამბები
რუბრიკის სხვა სიახლეები
;