ინტერს გი: ევროპაში სწორედ ასეთ ფეხბურთს თამაშობენ

ინტერს გი „საბურთალოში“ რამდენიმე კვირის წინ ჩაირიცხა. კოტდივუარელი ფეხბურთელი საქართველო ჩემპიონთან ერთად თურქეთში ემზადება და უკვე სადებიუტო გოლის გატანაც მოასწრო - სერბულ „ნაპრედაკთან“ შეხვედრაში მეტოქის კარში მესამე გოლის ავტორი სწორედ ის გახლდათ და გუნდის გამარჯვებაში თავისი წვლილი შეიტანა.

„საბურთალოს“ ლეგიონერმა, რომელიც ორი სეზონი „სამტრედიაში“ გამოდიოდა, ახალ გუნდში სადებიუტო გოლი გაიხსენა: „მართალია, ამხანაგური მატჩი იყო, მაგრამ გოლის გატანა ყოველთვის სასიამოვნოა. თუმცა, ეს თანაგუნდელების დახმარებით მოხდა - ჩემამდე ბურთი რამდენიმესვლიანი კომბინაციის შემდეგ მოვიდა და ისე გავიტანე. იმედია, „საბურთალოს“ მაისურით კიდევ ბევრჯერ გავიტან“, - ამბობს ინტერს გი.

თურქეთში შეკრებაზე „საბურთალომ“ ორი ამხანაგური მატჩი გამართა. კოტდივუარელმა ფეხბურთელმა ჩატარებულ შეხვედრებზე ილაპარაკა: „რუმინეთის „ვიტორულთან“ მატჩი უფრო რთული იყო, ვიდრე სერბეთის „ნაპრედაკთან“. მეორე შეხვედრაში მეტოქე ყველა კომპონენტში დავჯაბნეთ. ორივე სპარინგმატჩი აგრესიული გამოვიდა. ევროპაში სწორედ ასეთ ფეხბურთს თამაშობენ“.

ინტერს გი ახალ კლუბთან ადაპტაციასაც შეეხო: „ვიცოდი, რომ „საბურთალო“ კარგი კლუბი იყო. საქართველოში გარკვეული პერიოდი ვცხოვრობდი და მეტ-ნაკლებად ქართულ კლუბებზე წარმოდგენა მქონდა. გუნდში იდეალური ატმოსფერო დამხვდა, ნამდვილად ყველა თავისი საქმის პროფესიონალია. დაახლოებით ორი კვირაა, რაც კლუბში ვირიცხები და ისეთი შეგრძნება მაქვს, თითქოს „საბურთალოში“ დიდი ხანია ვთამაშობ. რამდენიმე კლუბში მითამაშია. რას გამოვარჩევ „საბურთალოში“? ეს პროგრესირებადი და ამბიციური კლუბია. გუნდი ყოველწლიურად წინ მიიწევს. ეს შედეგი უბრალოდ არ მოდის. ჩანს, რომ კლუბის ხელმძღვანელები და მწვრთნელები სწორად მუშაობენ“.

„საბურთალო“ საქართველოში ბევრისგან გამორჩეულ ტექნიკურ ფეხბურთს აჩვენებს. ხომ არ გაუჭირდა აფრიკელ შემტევ ნახევარმცველს ვარჯიშებთან შეგუება? გი ამაზე პასუხობს:

„ჩემი ახალი გუნდი გემოვნებიან ფეხბურთს თამაშობს. ეს სწორედ ის სტილია, რომელიც მიყვარს. ფეხბურთს უხდება სანახაობრივი თამაში - ლამაზი კომბინაციები, სწრაფი შეტევა, გატანილი ბურთები. „საბურთალოს“ შესახებ ვიცოდი, რომ კლუბს აქვს აკადემია, საიდანაც საუკეთესო და წარმატებული ფეხბურთელები თამაშობენ დუბლებში და შემდეგ მთავარ გუნდში აწინაურებენ“.

2017 წლის ეროვნული ლიგის საუკეთესო ლეგიონერმა „საბურთალოში“ საკუთარი მიზნები გაამხილა: „მინდა, რაც შეიძლება ბევრი ტიტული მოვიგო - სუპერთასი, ქვეყნის თასი, ჩემპიონობა. იმედი მაქვს, ჩემი თამაშით დავეხმარები გუნდს მიზნების მიღწევაში, როგორც საქართველოს ჩემპიონატში, ასევე ევროტურნირებზე“.

ინტერს გიმ ეროვნულ ლიგაში ორი სეზონი გაატარა და საქართველო კარგად გაიცნო: „თბილისი ლამაზი და კარგი ქალაქია, ძალიან მომწონს აქაური გარემო - პატარა ქუჩები, ისტორიული ადგილები. თბილისი ჩემთვის უცხო არაა. მიხარია, რომ საქართველოში დავბრუნდი. ამ პერიოდში ძალიან შემიყვარდა ლობიო, ხაჭაპური და ხინკალი, მაგრამ იქიდან გამომდინარე, რომ მუდმივად სპორტულ ფორმაში უნდა ვიყო, ხაჭაპურსა და ხინკალს ნაკლებად ვეტანები“.

ყოველდღიური სპორტული გაზეთი "ლელო"
687
მკითხველის კომენტარები / 0 /
მსგავსი ამბები
რუბრიკის სხვა სიახლეები
;