ძიუდო, ჭიდაობა... ფედერაცია VS კაპიტნები... საიდან დაიწყო და როდის დასრულდება?!

სამწუხაროდ, ბოლო დროს ჩვენი ჭიდაობის სამყარო გლადიატორების არენად იქცა. სიტუაცია უფრო და უფრო აბსურდული და ტრაგიკომედიური ხდება. თუკი ძიუდოში ეროვნული ნაკრების კაპიტანი საკუთარი ფედერაციის პრეზიდენტს ეომება და თანაგუნდელებს ურტყამს, ბერძნულ-რომაულ ჭიდაობაში ფედერაციის პრეზიდენტი -ნაკრების კაპიტანს...

ყველაზე ცუდი კი ისაა, რომ არავინ ისჯება და ამასობაში, ყალიბდება ერთგვარი დაუსჯელობის სინდრომი - რაც გინდა და როცა გინდა გააკეთე, ვინც გინდა გალახე, ვისაც გინდა აუბუნტდი - არავინ არაფერს მოგკითხავს. ისე, კაცმა რომ თქვას, ვინაა მომკითხავი - ხელისუფლებას იმდენი პრობლემა დაუგროვდა, მგონი საერთოდ დაავიწყდა სპორტის არსებობა. ოლიმპიური კომიტეტი და სპორტის სამინისტროც ვერ ახერხებენ დაპირისპირებული მხარეების შერიგებას ან ვინმეს დასჯას და ვიღა დარჩა?

არადა, მაგალითად, რაც ძიუდოისტების ნაწილმა გააკეთა (ამბოხი ფედერაციის პრეზიდენტის მიმართ, ეროვნული ნაკრების მიმართ დროებითი ბოიკოტი, თანაგუნდელების ცემა), კატეგორიულად მიუღებელია და ლოგიკურად, დამნაშავეები მკაცრად უნდა დაისაჯონ. ძიუდოს ფედერაციის ხელმძღვანელობა კი სულ სხვანაირად მოიქცა - ჯერ კომისია შექმნა, რომელსაც თანაგუნდელებს შორის იაპონიაში მომხდარი ჩხუბი უნდა გამოეძია, მერე კი დაასკვნა, რომ არაფერი საგანგაშო არ მომხდარა და რაღაც შემრიგებლური ყრილობის მაგვარი ჩაატარა. შერიგება კარგია და აუცილებელიცაა, მაგრამ თუ ერთხელ და სამუდამოდ არ დაანახე სპორტსმენებს მკაცრი ხელი, არანაირი გარანტია არ გაქვს, რომ ხვალ იგივე აღარ განმეორდება. ჰოდა, მაქვს გონივრული ეჭვი, რომ ეს შერიგება ილუზიაა და კიდევ ბევრი კიმონო დაიხევა...

რატომ წააგო 10-დან 5-მა მოჭიდავემ მაინცდამაინც რუსთან?!

საინტერესოა, რომ ჩვენი ძიუდოს ოჯახში შიდა ფრონტი 2009 წელს დაიწყო და დღემდე ვერ დასრულდა გავლენის სფეროების განაწილება. ასე, რომ წლეულს ქაოსის "საიუბილეო" მეათე წელი სრულდება. არადა, მეორე მსოფლიო ომი სულ რაღაც ექვს წელიწადში დასრულდა...

რთულადაა საქმე ჭიდაობაშიც. ჯერ იყო და ჭიდაობის ფედერაციის აწ უკვე ყოფილმა პრეზიდენტმა ლუკა კურტანიძემ გალახა თანამშრომელი, რასაც მოჭიდავეების ამბოხი და კურტანიძის გადადგომა მოჰყვა. მერე მოვიდა მანუჩარ კვირკველია, რომელმაც მშვენივრად დაალაგა არეული სიტუაცია, მაგრამ მეორე ვადით აღარ აირჩიეს და პრეზიდენტის პოსტი ხელისუფლების ფავორიტმა თამაზ გეგეშიძემ დაიკავა.

სამწუხაროდ, გეგეშიძეს ბერძნულ-რომაული სტილით მოჭიდავეთა ნაკრების კაპიტან ზურაბ დათუნაშვილთან ვერ აეწყო ურთიერთობა. კაპიტანი შარშან ზაფხულს, შეკრებიდან გაიქცა, რადგან მიაჩნდა, რომ მწვრთნელები ჩაგრავდნენ. კულუარებში იმასაც ამბობდნენ, დათუნაშვილის პირად მწვრთნელს პრემიის მიღების ამბავში გვერდით აჩოჩებდნენ და სპორტსმენი ამანაც გააღიზიანაო. მერე თითქოს მოგვარდა პრობლემა, მაგრამ ახლახან დასრულებულ საქართველოს ჩემპიონატზე "მიძინებულმა ვულკანმა" ამოხეთქა.

განრისხებულმა დათუნაშვილმა ფინალში წაგება მსაჯებს დააბრალა, რასაც სერიოზული აყალმაყალი მოჰყვა და ლამის მთელი დარბაზი ჩაერთო ჩხუბში. სამწუხაროდ, ჭიდაობის ფედერაციის პრეზიდენტს დაავიწყდა, რომ თმენის ვალდებულება აქვს და მანაც იჩხუბა. როგორც თვითმხილველები ამბობენ, გეგეშიძემ დათუნაშვილს ბლაგვი საგნით თავი გაუტეხა. აქ უკვე რა უნდა ვთქვა აღარ ვიცი...

რომელ სპორტს მივაბაროთ ბავშვი?

ჭიდაობის ფედერაციამ დათუნაშვილი ჯერჯერობით, დისკვალიფიკაციით დასაჯა და უახლოეს დღეებში ამ ფაქტზე საგანგებო განცხადების გაკეთებასაც აპირებს. არ ვიცი, რას გვეტყვის გეგეშიძე, მაგრამ მე მის ადგილზე, საჯაროდ ბოდიშს მოვიხდიდი ემოციების ვერმოთოკვისთვის ან თანამდებობას დავტოვებდი. სხვათა შორის, ძიუდოს ფედერაციის პრეზიდენტ დავით ქევხიშვილის გადადგომა დიდწილად, სწორედ იმან განაპირობა, რომ მისი გუნდის წევრმა დაუშვა შეცდომა, დაივიწყა თმენის ვალდებულება და საქმის გარჩევის დროს იარაღი ისროლა...

არადა, გაისად უკვე ტოკიოს ოლიმპიური თამაშებია, სადაც ტრადიციულად, ძიუდოისტებსა და მოჭიდავეებზე ვამყარებთ ძირითად იმედებს. ორივე სახეობის წარმომადგენლები ძალიან დაგვავალებენ , თუ ერთმანეთის ცემა-ტყეპას შეეშვებიან და ძალებს ოლიმპიადისთვის შემოინახავენ. ნუ დაავიწყდებათ, რომ სპონსორები არ ჰყავთ და სახელმწიფო ბიუჯეტიდან ფინანსდებიან - იმ ბიუჯეტიდან, რომელსაც დიდწილად, გულშემატკივრები ვავსებთ. ჰოდა იქნებ ამისთვის მაინც გვცენ პატივი...

2080
მკითხველის კომენტარები / 1 /
ყაზბეგის იაგო
0
სამწუხაროდ, ავტორი აზრზე არ რის იმაზე, რომ სამართალს უნდა დაუჭიროს მხარი. ძიუდოს სფეროში ფედერაცია და მისი პრეზიდენტი ტყუოდნენ, ხოლო ჭიდაობის სფეროში აშკარად ტყუოდა უინტელექტო ზურაბ დათუნაშვილი.
მსგავსი ამბები
რუბრიკის სხვა სიახლეები
;