ინტრიგა ლა ლიგის დაწყებამდე ერთი დღით ადრე: ზიდანი რეალიდან მიდის?!

ხვალ, ესპანეთის ჩემპიონატი „ბილბაო“-„ბარსელონას“ მატჩით იხსნება, შაბათს კი ვიგოში „სელტასთნ“ სათამაშოდ მადრიდის „რეალი“ ჩადის. გამოცემა „ელ პაისის“ ჟურნალისტი დიეგო ტორესი სენსაციურ ამბავს აქვეყნებს: „რეალში“ პოლ პოგბას არშემდგარმა ტრანსფერმა (ფრანგი ნახევარმცველის ტრანსფერი პირადად ზიდანის პროექტი იყო), ზინედინ ზიდანის მთავარი მწვრთნელის პოსტიდან წასვლა მოაახლოვა. ურთიერთობა ზიდანსა და ფლორენტინო პერესს შორის დაიძაბა".

ზიზუმ, თავის დროზე „რეალიდან“ წასვლისას განაცხადა, რომ გაუჭირდება იმ ფეხბურთელების მოტივირება, რომლებმაც ზედიზედ სამჯერ მოიგეს ჩემპიონთა ლიგა. ამ განცხადებით მწვრთნელი გუნდის გადახალისების აუცილებლობაზე მიანიშნებდა.

მცირეხნიანი განშორების შემდეგ, ზიდანი კვლავ დაბრუნდა „რეალში“ მთავარი მწვრთნელად. მან მიიღო გარანტიები პერესისგან, რომ სრულად გააკონტროლებდა სატრანსფერო პოლიტიკას, მადრიდში ჩაიყვანდა კილიან მბაპეს ან პოლ პოგბას, ამასთან, უმტკივნეულოდ მოხდებოდა „რალიდან“ ხამესისა და ბეილის გაშვება.

სატრანსფერო ციებ-ცხელება „სამეფო კლუბმა“ აქტიურად დაიწყო. „რეალში“ მივიდნენ ედენ აზარი, ლუკა იოვიჩი, მენდი, მილიტაო. მიუხედავად იმისა, რომ აზარის გარდა, სუპერვარსკვლავი არცერთი ახალწვეული არ იყო, გაჩნდა იმედი, რომ სულ მალე გუნდს „მანჩესტერ იუნაიტედიდან“ პოლ პოგბაც შეუერთდებოდა. თუმცა პოგბას ტრანსფერი ჯერჯერობით ვერ განხორციელდა.

ფაქტი ერთია - პერესმა ზიდანს არც ერთი დანაპირები არ შეუსრულა, არ მიუყვანა ის ფეხბურთელები, ვისი გუნდში მიყვანაც მწვრთნელს სურდა, ბეილი და ხამესი ჯერაც „რეალში“ რჩებიან.

პოლ პოგბას არშემდგარმა ტრანსფერმა, ზიდანის თანამდებობიდან წასვლა, შესაძლოა, დააჩქაროს. ფრანგი ნახევარმცველი უნდა ყოფილიყო ის ქვაკუთხედი, ვის გარშემოც ზიდანი ახალი გუნდის აშენებას აპირებდა, ამიტომაც პირადად დაჰპირდა მას მადრიდში ჩაყვანას. ახლა კი რა გამოდის, ფლორენტინომ არ შეუსრულა მწვრთნელს არცერთი სურვილი და აქედან გამომდინარე, კიდევ უფრო გაიზარდა უთანხმოება მწვრთნელსა და პრეზიდენტს შორის, საეჭვოა ზიდანს ასეთ სიტუაციაში მუშაობის გაგრძელება სურდეს -  აღნიშნულია სტატიაში.

მოკლედ ახალი სეზონი „სამეფო კლუბში“ ბევრ ინტრიგას გვპირდება...

4413
მკითხველის კომენტარები / 0 /
მსგავსი ამბები
რუბრიკის სხვა სიახლეები
;