ინფრასტრუქტურა: ადრე თუ გვიან შეცდომა თავს იჩენს...

ბათუმის "დინამოს" ცნობით, აჭარის მთავარ ქალაქში სტადიონის სამშენებლო სამუშაოებზე ტენდერი გამოცხადდა. ეს არენა ყოფილი მანქანათმშენებელი ქარხნის ტერიტორიაზე უნდა აშენდეს, 20 ათას მაყურებელზე იქნება გათვლილი და ჩანაფიქრის თანახმად, უეფას მე-4 კატეგორიის მოთხოვნას დააკმაყოფილებს. ამავე დროს, ის წმინდა საფეხბურთო სტადიონი უნდა იყოს...

ბევრჯერ იყო მცდელობა, რომ ეს საქმე წამოეწყოთ, მაგრამ, სამწუხაროდ, 11 წელია, ამ საქმეს თავი ვერ მოება. ამჯერად, ტენდერი 19 ოქტომბერს გამოცხადდა, წინადადებების მიღება დაიწყება 16 ნოემბრიდან და დასრულდება 21 ნოემბერს.

საქართველოში იყო პრეცედენტი, როცა საფეხბურთო სტადიონების მშენებლობის სპეციფიკის უცოდინარობის გამო, არენას პრობლემები შეექმნა. მაგალითად, ზუგდიდში უეფას სტანდარტები ვერ გაითვალისწინეს.

ამიტომ, დავინტერესდით, როგორ ხდება მსგავსი მშენებლობები უცხოეთში. მაგალითად, თურქეთში სახელმწიფო კომპანია არსებობს, რომელიც სწორედ ამ სფეროზეა ორიენტირებული და უეფას სტანდარტებს კონსტიტუციასავით იცავს, რადგან მისი ზედამხედველი ამ საკითხში სწორედ ევროფეხბურთის მმართველი ორგანოს კონსულტანტია.

კომპანია "გეოოფისის" ხელმძღვანელი გიორგი გოგოლაძე თბილისის "დინამოს" ბაზის განახლებაზე მუშაობდა, ამ საქმეში კარგადაა გარკვეული და საინტერესო დეტალებსაც გვიმხელს.

"საერთოდ, სტადიონების მშენებლობა სპეციფიკური საქმეა. აქედან გამომდინარე, მე რაც ვიცი, ბევრ ქვეყანაში საამისოდ საგანგებო სტანდარტებია შემუშავებული.

უპირველესად, ევროპის უმრავლეს ქვეყანაში საფეხბურთო სტადიონებს სახელმწიფო აშენებს, რადგან კლუბების უმრავლესობას მისი შენახვის საშუალება არ აქვს. "მილანი" და "ინტერი" უდიდესი კლუბებია, მაგრამ "სან სიროზე" იჯარით თამაშობენ. ასეა ბევრგან. სახელმწიფო კი სამშენებლო სამუშაოებს პროფესიონალებს ანდობს", - ამბობს გოგოლაძე.

"გეოოფისის" ხელმძღვანელის თქმით, მშენებლობის წესი ასეთია:

"ჯერ პროექტის ტენდერი უნდა გამოცხადდეს - ეს ერთი. შესაძლოა, რომელიმე კომპანიამ ტრიბუნა ააშენოს და საამისოდ, წმინდა პროფესიული გამოცდილება და ცოდნა საკმარისი იყოს. მაგრამ სტადიონის პროექტისა და მშენებლობის ტენდერებში მონაწილეობის წინა პირობად კომპანიას შესაბამის გამოცდილებას უყენებენ - ეს მეორე.

სხვაგვარად, ის ტენდერის მონაწილე ვერ გახდება, იმიტომ, რომ სპეციფიკის არმცოდნემ, შესაძლოა, პროექტის შედგენისას უპატიებელი, დანაშაულებრივი შეცდომა დაუშვას.

მესამე პუნქტი: ტენდერი აუცილებელია სტადიონების მშენებლობის ზედამხედველობაზეც. აქაც, პროფესიული ცოდნის მქონე საზედამხედველო ორგანიზაციაა საჭირო, რადგან მან პროექტს უნდა გადახედოს, ხარვეზები აღმოაჩინოს და ჩაასწოროს. თუ ზედამხედველმა საქმე არ იცის, ის ვერაფერს ჩაასწორებს და ადრე თუ გვიან შეცდომა თავს იჩენს, მერე კი მისი გამოსწორება შეუძლებელი იქნება".

გოგოლაძემ მაგალითიც მოიყვანა:

"ზუგდიდის სტადიონის მშენებლობაზე დიდი შრომა და ფულია დახარჯული, კარგი საქმის გაკეთება სურდათ, მაგრამ უფრო დიდი შრომა დასჭირდებათ, ხარვეზები რომ გამოასწორონ და ფეხბურთის ფედერაციამ სტადიონი ჩაიბაროს. მე რაც ვიცი, გამოუცდელობის გამო ხარვეზები სხვა სპორტულ ობიექტებზეც შეიქმნა. ამიტომ, ბათუმის სტადიონის მშენებლობა თუ დაიწყება, იქ პროფესიული ზედამხედველობის სამსახური აუცილებლად უნდა ჩაერიოს".

დავინტერესდით და გვითხრეს, რომ გამოცდილება ბათუმის სტადიონის მშენებლობის ტენდერში მონაწილეებსაც მოსთხოვეს. მაგალითად, პროექტის მენეჯერს არანაკლებ 15 წლის სტაჟი უნდა ჰქონდეს, ხოლო რომელიმე მათგანის სხვა პირით ჩანაცვლება ზედამხედველს არა უგვიანეს 10 დღით ადრე უნდა ეცნობოს და ის უნდა იყოს არანაკლები კვალიფიკაციისა და გამოცდილების მქონე სპეციალისტი.

კიდევ ერთი საინტერესო დეტალი ის არის, რომ მთავარი არენის გვერდით სათადარიგო, ხელოვნურსაფარიანი მოედნის მოწყობა იგეგმება, რომელიც უეფას მე-4 კატეგორიას უნდა შეესაბამებოდეს, ხოლო მიმწოდებელი ვალდებულია, ბუნებრივი საფარის მინიმუმ ერთწლიანი მოვლა უზრუნველყოს.

მთავარია, მშენებლობა ახლა მაინც დაიწყოს და ეს სერიალი დასრულდეს. ბათუმის და ფეხბურთის კი არა, ქვეყნის სირცხვილია, როცა 11 წელია, სტადიონი ვერ შენდება. ამას ვერანაირი ახსნა ვერ უშველის.

ყოველდღიური სპორტული გაზეთი "ლელო"

9622
მკითხველის კომენტარები / 0 /
მსგავსი ამბები
რუბრიკის სხვა სიახლეები