ირაკლი დოლაბერიძე: ოლიმპიადა რომ გაუქმებულიყო, იაპონია 213 მილიარდის ზარალს ნახავდა

კორონავირუსის ეპოქაში მსოფლიოს სპორტული სამყაროს ერთადერთ სიახლედ ტოკიოს ოლიმპიადის ერთი წლით გადადება იქცა. ამ უპრეცედენტო ფაქტზე თავის მოსაზრებას საქართველოს განათლების, მეცნიერების, კულტურისა და სპორტის სამინისტროს სპორტის პოლიტიკისა და მართვის დეპარტამენტის უფროსი ირაკლი დოლაბერიძე. მით უფრო, რომ ეს საქართველოსაც ახალი გამოწვევების წინაშე აყენებს - სრულიად იცვლება მიდგომა, სტრატეგია, დაფინანსება; თავიდან გასავლელი უკვე ლამის ბოლომდე გავლილი გზა, რადგან დასაგეგმია და მოსამზადებელი საგაისო სეზონი. დოლაბერიძეც ზოგად შეფასებებთან ერთად ამ თემებზე საუბრობს:

"სამწუხაროა, რომ მსოფლიოში ასეთი მდგომარეობა შეიქმნა, რადგან ამით სპორტსაც დიდი ზიანი მიადგა - არა მხოლოდ ქართულ, არამედ, ზოგადად, მსოფლიოს სპორტსაც. იმ სპორტსმენებს, რომლებიც ოლიმპიური თამაშებისთვის თუ მანამდე გასამართავი სალიცენზიო ან სხვა ტიპის შეჯიბრებებისთვის ემზადებოდნენ, ძალიან ბევრი გეგმები შეეცვალათ. აქედან გამომდინარე, ოლიმპიური თამაშები გადაიდება, რაც გამოწვეულია ახალი პანდემიით. ეს იძულებითი ნაბიჯი იყო, რადგან ჩაშლასაც ვერ შეძლებენ. საერთაშორისო ოლიმპიური კომიტეტი ბოლო მომენტამდე ამ ნაბიჯზე წასვლასაც ერიდებოდა, თუმცა, როგორც ჩანს, ეს მდგომარეობა გარდაუვალია. თუმცა ძალიან მნიშვნელოვანია ის საკითხი, რასაც საერთაშორისო ოლიმპიური ქარტია ითვალისწინებს - ისტორიის მანძილზე ჩვენ ვიცით არშემდგარი ოლიმპიური თამაშები, მაგრამ მას თავისი წესები აქვს, ნუმერაცია არ იცვლება, მასპინძელ ქალაქს მასპინძლობის უფლებას ჩამოართმევენ ხოლმე, ახლა კი სწორედ ამაზე მოუწევს საერთაშორისო ოლიმპიური კომიტეტის ხელმძღვანელობას მსჯელობა.

რაც შეგვეხება ჩვენ, რა მოცემულობაც შეიქმნება მსოფლიოში ოლიმპიურ თამაშებთან მიმართებაში, იმ კალენდრებზე გადაეწყობიან ფედერაციები, სახელმწიფო კი ყველაფერს გააკეთებს საიმისოდ, რომ მოხდეს შესაბამისი კალენდრების კორექტირება და სპორტსმენთა მონაწილეობა სასწავლო-საწვრთნელ შეკრებებსა თუ შეჯიბრებებში. ვიმედოვნებთ, ვითარება მალე დასტაბილურდება, სპორტში კი ოლიმპიურის გარდა, არსებობს სხვა მიმართულებებიც იგივე მასობრიობის, არაოლიმპიური სახეობების განვითარების თუ სხვა კუთხით, რაც ჩვენთვის არანაკლებ მნიშვნელოვანია. იმედია, ისინი ჩვეულებრივად გაგრძელდება იმ კალენდარული ცვლილებების მიხედვით, რასაც საერთაშორისო და ეროვნული ფედერაციები ერთობლივად დააფიქსირებენ.
აქვე მინდა დავაფიქსირო, რომ დღევანდელი მონაცემებით, ძალიან მყისიერად გამოვითხოვეთ ჩვენი სპორტსმენები უცხოური შეკრებებიდან თუ საერთაშორისო ტურნირებიდან, რამდენიმე ნაკრები კარანტინში და თვითიზოლაციაშიც იმყოფებოდა და იმყოფება დღესაც; მადლობა ღმერთს, ყველანი ჯანმრთელად არიან და გასატარებელი ღონისძიებები დროულად გატარდა. შედეგად, ყველა სახლშია და შეძლებისდაგვარად ვარჯიშობენ საკუთარი ინიციატივით - ზოგი სახლში, ზოგი - ეზოში და ხალხმრავალი ადგილებისგან იზოლირებულად. რას ვიზამთ - მოცემულობა ასეთია, მსოფლიოში რა მდგომარეობაც იქნება, იმის შესაბამისად გადავაწყობთ ჩვენს კალენდარსაც და ყველაფერი კარგად იქნება. კიდევ ერთხელ ვიმეორებ - ჩვენ მაქსიმალურად შევუწყობთ ხელს ჩვენს ეროვნულ ფედერაციებს და სპორტსმენებს, რათა ოლიმპიადის ნებისმიერ დროს ჩატარების შემთხვევაში ისინი ოპტიმალურ ფორმაში შეხვდნენ მომზადებულები ამ თამაშებს თუ მანამდე გასამართავ სალიცენზიო შეჯიბრებებს.

თუმცა ამ გადავადებამ ყველა სერიოზული პრობლემის წინაშე დაგვაყენა. უკვე უამრავი ენერგია, ფინანსური, ადამიანური თუ სხვა სახის რესურსი დაიხარჯა აქამდე დაგეგმილი შეჯიბრებების ჩასატარებლად, ასევე დახარჯულია თანხების ნაწილიც საქართველოში დაგეგმილი საერთაშორისო ტურნირების მასპინძლობისთვის, რომლებიც, ფაქტობრივად, ბოლო დღეებში, მათ გამართვამდე რამდენიმე საათით ადრე გაუქმდა. ასე მოხდა რაგბიში, ფეხბურთში, გაუქმდა მარტის ბოლოს გასამართავი ძიუდოს "დიდი პრიზი", 4-5 აპრილს თბილისში დაგეგმილი კარატისტთა ევროპის ჩემპიონატი, რომელიც გაურკვეველი ვადით გადაიდო. ამ და სხვა შეჯიბრებებისთვის მოსამზადებლად თანხების საკმაოდ დიდი ნაწილი უკვე გახარჯული იყო. ცხადია, მათთვის დანიშნული შეკრებები და მოსამზადებელი ეტაპიც გადადებულია და ის მორგებული იქნება იმ კალენდრებზე, რომელსაც შემოგვთავაზებენ საერთაშორისო ოლიმპიური კომიტეტი და შესაბამისი საერთაშორისო ფედერაციები. თუმცა ფინანსური ზარალი განიცადა თავად იაპონიამაც - ჩემი ინფორმაციით, როგორც ისინი აცხადებდნენ, ოლიმპიადის გაუქმებით ქვეყანა 213 მილიარდის ზარალს ნახავდა."

359
მკითხველის კომენტარები / 0 /
მსგავსი ამბები
რუბრიკის სხვა სიახლეები
;