ირაკლი კლიმიაშვილი: ელ მანდარინო ძალიან დაძაბული იქნება

ეროვნული ლიგა ფინიშს უახლოვდება და თითოეული ქულას ოქროს ფასი ადევს. 29 ოქტომბერს, ორი აჭარული გუნდის, ქობულეთის "შუქურასა" და ბათუმის "დინამოს" შეხვედრა არა ბათუმის სარაგბო არენაზე, არამედ, სამტრედიის "ეროსი მანჯგალაძეზე" გაიმართება.

"შუქურას" კაპიტანი ირაკლი კლიმიაშვილი ბათუმის "დინამოსთან" აჭარული დერბისთვის მზადებაზე გველაპარაკა.

"ჩემპიონატის დასრულებამდე 5 ტურია დარჩენილი და იქნებ, გადათამაშებაში მაინც მოვხვდეთ. ამიტომ, აჭარული დერბი, ანუ "ელ მანდარინო" ძალიან დაძაბული იქნება. დამიჯერეთ, აქ ანგარიშს არავინ არავის გაუწევს - ორივე გუნდს საკუთარი პრობლემები აქვს და მისი მოგვარება გვსურს.

გიორგი შაშიაშვილის მოსვლამ "შუქურას" თამაში აშკარად შეცვალა. ის გამოუცდელი მწვრთნელია, მაგრამ ნიჭიერი კაცი აღმოჩნდა. "კოლხეთთან" სხვაობა 4 ქულამდე შევამცირეთ, რამაც ძალიან დიდი სტიმული მოგვცა.

ახლა ჩვენი მიზანია, თითოეულ შეხვედრაში ქულების მაქსიმუმი მოვიპოვოთ და გუნდი ეროვნულ ლიგაში დავტოვოთ - ეს ამოცანა მე რეალური მგონია. ისიც გვესმის, რომ ბათუმის "დინამოც" მძიმე მდგომარეობაშია და ჩვენთან შეხვედრისთვის განსაკუთრებული მონდომებით ემზადება. იქ ჩვენი მეგობრები თამაშობენ, მაგრამ ახლა ჩვენი მიზნები ერთმანეთში იკვეთება და მათ ჩვენთან უმძიმესი მატჩი ელით", - ამბობს კლიმიაშვილი.

ქობულეთელთა კაპიტნის თქმით, "ჩელე არენიდან" წასვლის შემდეგ გუნდმა შვება იგრძნო:

"სამწუხაროდ, ჩვენს სტადიონზე საფარი არ ვარგოდა, რაც ბევრი მოთამაშის ტრავმის მიზეზი გახდა. "ჩელე არენის" შემდეგ ბათუმის სარაგბო არენაზე თამაში ბევრად სასიამოვნოა. საფარიც საუკეთესო არ არის, მაგრამ შეუდარებლად უკეთესი ხარისხისაა, თამაშის შემდეგ ფეხები არ გვისივდება და ცარიელ ადგილზეც ტრავმას არ ვიღებთ.

შუადღისას რომ გადიხარ მოედანზე და ხალხი არ გიყურებს, ეს აღარ არის საფეხბურთო გარემო, ემოციებით და დიდი ჟინით ვერ ითამაშებ. განათებაზე თამაში კი დიდი სიამოვნებაა. ბათუმში ფეხბურთი ძალიან უყვართ, ხალხი სულ დადის და ძალიან კარგ ატმოსფეროს გვიქმნიან. ეს კი მოთამაშეებში პასუხისმგებლობას ზრდის. ფეხბურთში ეს ყველაზე მნიშვნელოვანი ფაქტორია".

(იბეჭდება მცირე ცვლილებით)
ყოველდღიური სპორტული გაზეთი "ლელო"
1390
მკითხველის კომენტარები / 0 /
მსგავსი ამბები
რუბრიკის სხვა სიახლეები
;