ირაკლი ცირეკიძემ ევროპის ჩემპიონატისთვის შემადგენლობა დაასახელა

საქართველოს ძიუდოისტ ვაჟთა ნაკრების მთავარმა მწვრთნელმა ირაკლი ცირეკიძემ დაასახელა ის შემადგენლობა, რომელიც 26-28 აპრილს თელ ავივში ევროპის ჩემპიონატზე იასპარეზებს.

მწვრთნელმა ორი წონა გააორა - 60 და 90, თან ყველა ლიდერს აჭიდავებს. ევროპის ჩემპიონი ამირან პაპინაშვილი, ლუხუმ ჩხვიმიანი (ორივე - 60), ევროპის ჩემპიონი, მსოფლიოს პრიზიორი ვაჟა მარგველაშვილი (66), ოლიმპიური და ევროპის ჩემპიონი ლაშა შავდათუაშვილი (73), ევროპის ორგზის ფინალისტი ნუგზარ ტატალაშვილი (81),

მსოფლიოს ბრინჯაოს მედალოსანი უშანგი მარგიანი, ევროპის მესამე პრიზიორი ბექა ღვინიაშვილი (ორივე - 90), ევროპის სამგზის გამარჯვებული, მსოფლიოს ორგზის და ოლიმპიადის ვიცე-ჩემპიონი ვალერი ლიპარტელიანი (100) და ევროპის ჩემპიონი გურამ თუშიშვილი (+100) - ასეთია ირაკლი ცირეკიძის რჩეული კრებული.

თუმცა არა მხოლოდ ცირეკიძისა, რადგან გუნდის შერჩევა სამწვრთნელო შტაბშიც აზრთა სხვადასხვაობას იწვევდა. ძირითადად საკამათო იყო არჩევანის გაკეთება პაპინაშვილსა და საქართველოს ჩემპიონ თამაზ კირაკოზაშვილს (81) შორის.

საბოლოოდ არჩევანი პაპინაშვილის სასარგებლოდ იმან გადაწყვიტა, რომ კირაკოზაშვილს ბოლო 7 საერთაშორისო ტურნირში მედალი არ მოუპოვებია, პაპინაშვილი კი ამ მხრივ გაცილებით უკეთეს მდგომარეობაშია.

ალბათ, შიდა სამზარეულოში ისიც საკამათო იქნებოდა და, ვეჭვობთ, ქომაგებშიც იქნება აზრთა სხვადასხვაობა, რომ კირაკოზაშვილმა საქართველოს ჩემპიონატზეც მოუგო ტატალაშვილს და - თბილისის გრან პრიზეც, თან ორივეგან ჩემპიონი გახდა, თუმცა აქაც გადამწყვეტი საერთაშორისო შედეგები აღმოჩნდებოდა:

კირაკოზაშვილის საპირწონედ, ტატალაშვილი უმედლოდ იშვიათად რჩება, წლეულს პარიზშიც მესამეზე გავიდა და თბილისშიც, თან საკმაოდ მაღალი დონის ჭიდაობას აჩვენებს და წონის ლიდერებთანაც წარმატებით ასპარეზობს.

მაგალითად, წლეულს თბილისში რუსთა ევროპის ჩემპიონი ალან ხუბეცოვი დაამარცხა, მანამდდე პარიზში მოუგო კანადელ მსოფლიოს ვიცე-ჩემპიონსა და ოლიმპიადის პრიზიორ ანტუან ვალუა-ფორტიეს...

ერთი სიტყვით, კირაკოზაშვილთან უარყოფითი ბალანსის და ცოტა არამყარი ხასიათის მიუხედავადაც - ასეთ ძლიერებთან მოგების შემდეგ, შეიძლება, ჩეხ იარომირ მუსილთანაც წააგოს, მწვრთნელებმა მედლის მოპოვების უფრო რეალურ კანდიდატად მაინც ის მიიჩნიეს.

დასახელებული შემადგენლობა 8 აპრილს ანთალიაში გაემგზავრება ერთობლივ შეკრებაზე.

ყოველდღიური სპორტული გაზეთი "ლელო"
1587
მკითხველის კომენტარები / 0 /
მსგავსი ამბები
რუბრიკის სხვა სიახლეები