ირაკლი ცირეკიძე: ქართველებს პრეტენზია გვაქვს, რომ ტექნიკურად ვჭიდაობთ

საქართველოს ნაკრებმა სეზონი პარიზის გრანდ სლემით (ძირითადი გუნდი) და ავსტრიული ევროპის ღია თასით (სათადარიგო) დაიწყო.

ჩვენებმა ორივეგან 4-4 მედალი მოიპოვეს, თუმცა პარიზში ჩემპიონი არ გვყოლია. ამ ტურნირებისა და სამომავლო გეგმების შესახებ ნაკრების მთავარი მწვრთნელი ირაკლი ცირეკიძე გვესაუბრება.

- ალბათ, ძალიან ძნელია ორი ფინალის წაგება. მით უფრო, როცა პარიზში მოგების დიდი შანსი გვქონდა...

- მით უმეტეს, ლაშა შავდათუაშვილის შემთხვევაში სხვა შედეგს ველოდით, რადგან უტიტულო მეტოქე ჰყავდა, კოსოვოელი აკილ გიაკოვა. ამაზე ჩვენ უკვე ვისაუბრეთ და ის შეცდომა გამოსწორდება.

წაგების მიზეზი კი ძირითადად ზედმეტი თავდაჯერება იყო. ბექა ღვინიაშვილის ფინალში წაგების მიზეზიც ზედმეტი თავდაჯერებაა. როგორც შეხვედრაზე გასვლის წინ თვითონ მეუბნებოდა, იაპონელ მუკაისთან სპარინგებზე ნაჭიდავები იყო და მოგებულიც ჰქონდა და კარგად იცოდა, როგორ ეჭიდავა.

კიდევ ერთხელ გამოვლინდა ის მარტივი ჭეშმარიტება, რომ ჩავლება არ უნდა დაუთმო არავის და ყოველ წამს ყურადღებით უნდა იყო. ფინალის წინ ბექა იმედიანად იყო, რომ ადვილად მოგება შეეძლო, მაგრამ წამიერმა მოდუნებამ სხვა შედეგი მოიტანა.

- რა მოგცათ პარიზის ტურნირმა, დასახული მიზნები რამდენად შეასრულეთ?

- სიმართლე გითხრათ, 60 კილოგრამში უფრო მეტს ველოდი. ამირან პაპინაშვილმა ისეთი შეხვედრა წააგო იაპონელ შიშიმესთან, რომელიც არანაირად არ იყო წასაგები.

ალბათ, მეტი რწმენა, მეტი თავდაჯერება და მცდელობაა საჭირო, თორემ აღარ ვიცი, რა ვთქვა. საკმაოდ კარგად იბრძოლა ლუხუმ ჩხვიმიანმა და დასანანად წააგო ბრაზილიელ ფელიპე პელიმთან. თუმცა, ვფიქრობ, მეტი ვარჯიში და კიდევ მომატებაა საჭირო, თუ უნდა ნაკრებში მოხვედრა, სადაც ძალიან დიდი კონკურენციაა.

ვაჟა მარგველაშვილს თითქმის მთელი თვე გაუცდა ტრავმის გამო, რომელიც ისევ აწუხებდა და ამიტომ პარიზშიც მოშვებული იყო. 81 კილოგრამში ძალიან კარგად იბრძოლა ნუგზარ ტატალაშვილმა, ვინც ბევრი მძიმე შეხვედრა ჩაატარა და გამოჩნდა, რომ ფიზიკურად აქაც შეუძლია მოწინააღმდეგეებთან ტოლ-სწორად ჭიდაობა.

რა თქმა უნდა, ზებედა რეხვიაშვილისგან უფრო მეტს ველოდით და ასეთი მარცხის შემდეგ გაუჭირდება ნაკრებში ადგილის დამკვიდრება. საამისოდ უფრო მეტი მუშაობა იქნება საჭირო, თორემ ამ წონაში დიდი კონკურენცია შეიქმნა.

ახლა გერმანიაში თამაზ კირაკოზაშვილს და კობა მჭედლიშვილს გამოვცდით, ავსტრიაში კი გიგა გიგაურმაც კარგად იჭიდავა. ეს ბიჭი შემეცოდა იმ შეხვედრაში წასაგებად.

ვაპირებთ, ეს შეხვედრა გავაპროტესტოთ, როგორც ვალერი ლიპარტელიანისა და გურამ თუშიშვილის პარიზში წაგებული პაექრობები, თუმცა ჯერ არბიტრ ვლადიმერ ნუცუბიძესთან გავივლით საფუძვლიან კონსულტაციებს.

მთლიანობაში, სეზონი ახალი დაწყებულია, ბაკურიანში ფიზიკური შეკრება გავიარეთ და ტატამზე ჯერ საკმარისად არ გვივარჯიშია, ამას ახლა ვიწყებთ. ამიტომ პარიზში რა შედეგიც ვაჩვენეთ, ნორმალურია, მაგრამ, რომ არა ორი მომენტი, უკეთესიც იქნებოდა - რაღაც ჩვენც დავაკელით, რასაც არასწორი მსაჯობაც დაემატა.

- ავსტრიულ ტურნირს როგორ შეაფასებთ, რა დაინახეთ იქ დადებითი და დამაიმედებელი?

- როგორც გითხარით, ძალიან მომეწონა გიგაური. მომეწონა ონისე სანებლიძის ჭიდაობაც 100 კილოგრამში, რაც გასახარია, რადგან ახალგაზრდაა და იმათ შორისაა, ვისგანაც ველოდებით, რომ კონკურენციას გაზრდიან. ეს წარმატება მისთვისაც დიდი სტიმული იქნება.

ონისე ბუღაძის შესაძლებლობებისა და იქ შეკრებილი შემადგენლობისგან გამომდინარე, მის გამარჯვებას ველოდით. აი, მასთან ფინალში დამარცხებულ გიორგი ქავთარაძეს დიდი პროგრესი აქვს. ვნახოთ, მომავალში მოვლენები როგორ განვითარდება.

მართალია, ამ წონაში დიდი კონკურენციაა, მაგრამ სწორედ დიდ კონკურენციაში იზრდებიან ჩემპიონები.

მძიმე წონებში, ასეა თუ ისე, არ გვიჭირს, კონკურენცია არის, აი, მჩატე წონებზე კი ბევრია საფიქრალი. 60 კილოგრამში სამომავლოდ უფრო ახალგაზრდების მეიმედება, თუმცა ჯერ პაპინაშვილს და ჩხვიმიანსაც აქვთ ევროპისა და მსოფლიოს ჩემპიონატებზე საპრიზო ადგილებზე გასვლის პერსპექტივა.

- ავსტრიაში ნაჭიდავები ახალგაზრდებიდან თუ გამოიკვეთა ვინმე, ვინც შეიძლება, ძირითად შემადგენლობასთან ერთად ვიხილოთ უძლიერეს ტურნირებზე?

- ყველა მედალოსანი ჩართული იქნება კონკურენციაში. ამიტომაც შევარჩიეთ შედარებით დაბალი რანგის ტურნირი - ევროპის თასი. ვინც იქ მედლებს მოიპოვებდა, მათი ნაწილი ჩაერთვებოდა ეკატერინბურგის ტურნირზე, ნაწილი - თბილისის გრან პრიზე.

- ავსტრიაში ტაქტიკური თუ სხვა ტიპის შეცდომებიც ბლომად გამოჩნდა... ამას ვიტყვით ომარ ნიაზაშვილზე, გიორგი პაპუნაშვილსა და დავით ოზბეთელაშვილზე.

- პაპუნაშვილს ჯერ ფიზიკური ძალა არ ჰყოფნის ამ წონაში, სადაც ახალი გადმოსულია. კითხვის არსს რაც შეეხება, ეს მართლაც დასანანია. მით უფრო გაფრთხილებებით წაგება.

ქართველებს გვაქვს პრეტენზია, რომ ტექნიკურად ვჭიდაობთ. ცხადია, ბრძოლა, ჟინი და მონდომება არ უნდა დააკლო. ეს ერთგვარად სასაყვედუროცაა და გამოსასწორებელიც. არ შეიძლება, ასე ადვილად ვთმობდეთ შეხვედრებს.

- დასასრულს, უახლოეს სამომავლო გეგმებზეც ვთქვათ: თბილისის ტურნირის გარდა, დიუსელდორფის შემდეგ ევროპის ჩემპიონატამდე კიდევ რომელ შეჯიბრებებში გამოვალთ?

- ეკატერინბურგში ვიჭიდავებთ გრან პრიზე, რამდენიმე სპორტსმენი კი ახალგაზრდებთან ერთად პრაღაში გამოვა ევროპის თასზე. ევროპის ჩემპიონატზე მოსახვედრად კონკურენცია საკმაოდ დაიძაბება, რადგან ადგილები შეზღუდულია.

რამდენიმე ლიდერი უკვე თითქმის გამოკვეთილია, იმ დარჩენილ რამდენიმე ადგილზე კი ბრძოლა გამძაფრდება. მეტი ტურნირი კი საჭირო აღარ არის, სპორტსმენები, რომ არ გადაიღალნონ...

ყოველდღიური სპორტული გაზეთი "ლელო"
2403
მკითხველის კომენტარები / 0 /
მსგავსი ამბები
რუბრიკის სხვა სიახლეები