ირაკლი ძარია ალბანეთის ჩემპიონ "კუკეშის" ფეხბურთელი გახდა

ირაკლი ძარია ალბანეთის ჩემპიონ "კუკეშის" ფეხბურთელი გახდა. 29 წლის ნახევარმცველმა კონტრაქტი უკვე გააფორმა.
2012-14 წლებში ძარიას სისტემატურად იწვევდნენ საქართველოს ნაკრებში, სადაც 9 მატჩი ჩაატარა და 1 გოლი (2013 წელს, ოლბორგში, დანიის ნაკრების კარში) გაიტანა.

ის წარმოშობით აფხაზეთიდანაა. მისი პირველი პროფესიული კლუბი ფოთის "კოლხეთი" (2004-05) იყო, სადაც სადებიუტო შეხვედრა 16 წლის ასაკში ჩაატარა. უთამაშია "ზესტაფონში" (2005-11), "ცხინვალში" (2008), თბილისის "დინამოში" (2012-15), გორის "დილასა" (2015, 2017) და ბოლნისის "სიონში" (2016).

დასრულებულ სეზონში ის გორის "დილაში" თამაშობდა და დიდი როლი ითამაშა იმაში, რომ ამ გუნდმა ეროვნულ ლიგაში ადგილი შეინარჩუნა. თუმცა კლუბთან კონტრაქტი დეკემბერში ამოეწურა და გუნდი დატოვა.

გუშინ ძარიას თურქეთში დავუკავშირდით და ინტერვიუ ჩავწერეთ...

"სანამ საშუალება გვაქვს, უკეთეს პირობებს ვამჯობინებთ და რა არის ამაში გასაკვირი ან დასაძრახი? რატომ წავიდა უცხოეთში სამუშაოდ მილიონობით ქართველი? სწორედ ამ ზედმეტი თეთრების გამო. რა, ფეხბურთელებს ამის უფლება არ გვაქვს"?!

საინტერესო  გუნდში მოვხვდი

- მიხარია, რომ საკმაოდ საინტერესო და ამბიციურ კლუბში მოვხვდი. "კუკეში" ალბანეთის ჩემპიონია და ლიგის საკვალიფიკაციო ეტაპზე ტირასპოლის "შერიფთან" საკმაოდ კარგადაც ითამაშა. ახლა მეოთხე ადგილზეა, მაგრამ ლიდერს ბევრით არ ჩამორჩება.

- კონტრაქტი ალბანეთში გააფორმეთ?

- თურქეთში. გუნდი ანთალიაში შეკრებაზეა და პირდაპირ აქ ჩამოვაკითხე.

- თურქეთში როდის გაემგზავრეთ?

- ორი დღეა, რაც გუნდთან ერთად ვარ. სამედიცინო შემოწმება გავიარე და კონტრაქტიც გავაფორმე.

- რა ვადით გააფორმეთ ხელშეკრულება?

- წელიწადნახევრიანი კონტრაქტი შემომთავაზეს, მაგრამ მე ნახევარ-წლიანი ვამჯობინე და დამთანხმდნენ.

- ხანგრძლივი კონტრაქტი სტაბილურობის გარანტი არ იქნებოდა?

- მესმის, მაგრამ მჯერა, რომ ვითამაშებ და თავის დამკვიდრებას მოვახერხებ. აქ კარგად თუ ვითამაშებ, უკეთეს ლიგაში გადავალ ან "კუკეში" ახალ კონტრაქტს უკეთესი პირობებით გამიფორმებს. ამიტომაც არ ვისურვე უფრო ხანგრძლივი ხელშეკრულება.

არანაირი სინჯები!

- სინჯებზე იყავით?

- არა, სინჯებზე არ ვყოფილვარ. წინასწარ ვთქვი კიდეც, რომ ამას არასოდეს დავთანხმდებოდი.

- რატომ ასე კატეგორიულად?

- მესმის, ეროვნული ლიგიდან უცხოეთში ფეხბურთელს გასინჯვის გარეშე იშვიათად გვიწვევენ, მაგრამ პერმის "ამკარში" სინჯებიდან ისეთი ცუდი მოგონებები და მწარე გამოცდილება დამრჩა, მერჩივნა საქართველოში მეთამაშა, ვიდრე სინჯებზე წავსულიყავი. "კუკეშმა" ჩემი აყვანის სურვილი თავად გამოთქვა.

- "ამკარში" ასეთი რა შეგემთხვათ?

- იქ ამერია კარიერა. ვარჯიშისას დავშავდი, მერე უგუნდოდ დავრჩი და სამწუხაროდ, მას შემდეგ კარიერაში სერიოზული ჩავარდნა მქონდა. მხოლოდ შარშან მოვახერხე ფორმის აღდგენა. საერთოდ, იქ წასვლა ჩემი ყველაზე დიდი შეცდომა იყო.

მეგობრის ზარი

- საინტერესოა, ალბანეთში როგორ მოხვდით?

- ჩემი ტრანსფერი სერბი მენეჯერის წამოწყებული და გიორგი ფოფხაძის მეგობრული თანადგომის შედეგია.

- ფოფხაძე რა შუაშია?

- გიორგი ალბანეთში თამაშობდა, იქ კარგი კავშირები აქვს და ალბანეთში დარეკა. როგორც აღმოჩნდა, მისი რეკომენდაცია გადამწყვეტი იყო.

- ოთხშაბათს "კუკეშმა" "ბურსასფორთან" ამხანაგური თამაში მოიგო. შემადგენლობაში რატომ არ იყავით?

- მწვრთნელმა არ მათამაშა და მართალიც იყო - ორი თვე გუნდთან ერთად არ გივარჯიშია, მოუმზადებელი ხარ და არ მინდა, ტრავმა მიიღოო. სხვათა შორის, კარგ გუნდში რომ მოვხვდი, ამ შეხვედრამ კიდევ ერთხელ დამარწმუნა - "ბურსასფორს" 2:1 მოვუგეთ.

- საინტერესო მწვრთნელი გყავთ - ავსტრიის ნაკრების ყოფილი თავდამსხმელი პიტერ პაკულტი...

- წასვლამდე დავინტერესდი მწვრთნელით და აღმოვაჩინე, რომ ავსტრიის ნაკრების ცნობილი ფეხბურთელი იყო, "მიუნხენ 1860-ში" თამაშობდა და "ტიროლში" ავსტრიის ჩემპიონატის ბომბარდირი გახდა, ხოლო 1991 წელს - ჩემპიონთა თასის.

მიხარია, რომ ასეთი ცნობილი პიროვნება ჩემით დაინტერესდა და მოვეწონე. ეს დიდი სტიმულია... არ მინდოდა ამის თქმა, მაგრამ არიან ადამიანები, რომლებმაც ჩავარდნის გამო ჩამომწერეს. პაკულტმა კი საკუთარი თავის რწმენა დამიბრუნა.

ამათმაც  გაგვასწრეს

- ნუთუ, ალბანელებმაც ისე გაგვასწრეს, რომ საქართველოში თამაშს იქაურ ლიგაში გადასვლა არჩიეთ?

- სამწუხაროდ, ასეა და ამის გამო მიხარია, საქართველოდან რომ წამოვედი. ისე გამოდიოდა, ერთ ადგილს ვტკეპნიდი.

- პირობებით ბევრად გვისწრებენ?

- მე გეტყვით, აქ ფეხბურთელებს რა ხელფასები აქვთ და მერე თავად შეაფასეთ, რა განსხვავებაა. ზოგიერთი 8-9 ათას ევროს იღებს. საქართველოში ბევრი გეგულებათ ისეთი კლუბი, რომელიც ასეთ ანაზღაურებას იძლევა? ადრე კიდევ იყო გამონაკლისები, მაგრამ წელს ხომ ხედავთ, პირობებს არათუ აუმჯობესებენ, აუარესებენ. აქ ოთხ-ხუთჯერ უკეთესი პირობები და მეტი პერსპექტივაა.

- პერსპექტივა?

- დიახ, პერსპექტივა. ალბანეთი ესაზღვრება იტალიას, ხორვატიასა და სერბეთს, ბევრი ევროპელი სელექციონერი ჩამოდის და ნახევარი სეზონიც რომ კარგად ჩაატარო, შესაძლოა, უკეთეს ლიგაში აღმოჩნდე.

სამწუხაროდ, საქართველოში ასე არ არის. კი, ეროვნული ლიგის თამაშების "იუთუბზე" გაშუქების შემდეგ მაყურებელი და დაინტერესებული ხალხი თვალს ევროპიდანაც გვადევნებს, მაგრამ ალბანელებს მათთან ბევრად ახლო ურთიერთობები და კავშირები აქვთ.

ტერიტორიული სიახლოვე მაინც ბევრს ნიშნავს. სხვათა შორის, ჩემპიონთა ლიგაში თამაშის შემდეგ "კუკეშიდან" ორი წამყვანი ფეხბურთელი უკეთეს ლიგაში წაიყვანეს. შესაძლოა, დონით დიდად არ გვისწრებენ, მაგრამ ევროპასთან სიახლოვის გამო მეტი პერსპექტივა აქვთ.

- მოსამზადებელ პირობებშიც არის განსხვავება?

- ჯერ ალბანეთში არ ვყოფილვარ. მაგრამ მითხრეს, რომ ნორმალური სტადიონი და ბაზა აქვთ. ერთი ისაა ცუდი, რომ "კუკეში" ხელოვნურ საფარზე ითამაშებს. მაგრამ ქართული ხალიჩებივით "ბეტონი" რომ არ იქნება, ამაში დარწმუნებული ვარ.

მათ ჩამომწერეს...

- ერთი რამ გაუგებარი დარჩა: "დილადან" საკუთარი ნებით წამოხვედით თუ გამოგიშვეს?

- არავის გამოვუშვივარ, მაგრამ ახალი კონტრაქტი რომ შემომთავაზეს, ბევრად უარესი პირობები იყო და აზრს ვერ მივხვდი. ვერავინ იტყვის, რომ გუნდს ვერ დავეხმარე, რომ ცუდი სეზონი მქონდა...

ტრაბახის გარეშე ვამბობ - ჩემზე სულ მცირე საყვედურსაც კი ვერ იტყვიან. ამიტომ, სულ მცირე, მადლობასა და შარშანდელი პირობების შემოთავაზებას ველოდი. რადგან ასე არ მოხდა, ამიტომაც გადავწყვიტე წამოსვლა.

- სამწუხაროდ, ყველა მეტ-ნაკლებად მოთხოვნადი ქართველი ფეხბურთელი უცხოეთში გარბის. ჩვენთან ასეთი კატასტროფული პირობებია?

- კარგია, რომ ეს მკითხეთ, რადგან ბევრჯერ წამიკითხავს ამა თუ იმ სიახლეზე ისეთი კომენტარი, გულს რომ ხვდებოდა. ბევრი ისე ზერელედ ლაპარაკობს სხვების ბედსა და გადაწყვეტილებებზე, თითქოს, არჩევანს კარგსა და უკეთესს შორის ვაკეთებდეთ.

სინამდვილეში ასე არ არის - არჩევანის გაკეთება ცუდსა და უარესს შორის გვიხდება. უბრალოდ, ჩვენ გაჭირვებული ცხოვრებიდან ოდნავ ამოსუნთქვის საშუალებას ვეძებთ და არავინ თქვას, რომ საქართველოში ფეხბურთელი რაიმეთი განებივრებულია.

- საერთო ფონზე ფეხბურთელებს ხომ მაინც ნორმალური ხელფასები გაქვთ?

- პირადად მე, ალბანეთში წამოსვლით პირველად ამოვისუნთქავ და ოჯახს დავეხმარები. იმდენი პრობლემა მქონდა, ყველაფერზე გაზეთში ხომ არ ვილაპარაკებ?!

ისე დაუფიქრებლად ამბობენ, ორიოდე თეთრის გამო გარბიან უცხოეთშიო, თითქოს, თავად ამ ორიოდე თეთრის გამო არ ცხოვრობდნენ იქ. ჩვენი კარიერა ხანმოკლეა და სანამ საშუალება გვაქვს, უკეთეს პირობებს ვამჯობინებთ და რა არის ამაში გასაკვირი ან დასაძრახი?

რატომ წავიდა უცხოეთში სამუშაოდ მილიონობით ქართველი? სწორედ ამ ზედმეტი თეთრების გამო. რა, ფეხბურთელებს ამის უფლება არ გვაქვს?! დარწმუნებული ვარ, ვინც განგვიკითხავს, ასეთივე არჩევანის წინაშე რომ დადგეს, ჩვენსავით მოიქცევა.

თანაც, ვიმეორებ, მე ალბანეთში ნამდვილად ვხედავ იმის პერსპექტივას და შანსს, რომ უკეთეს ლიგაში მოვხვდე. ჩვენ ზემოდან ყურება გვახასიათებს, მაგრამ ფაქტია, რომ ალბანეთი ევროპის ჩემპიონატზე გავიდა და მათი კლუბები საგრძნობლად განვითარდნენ, რადგან იტალიიდან და სხვა ევროპული ქვეყნებიდან იწვევენ სპეციალისტებს.

მე კი ისეთი "ბებერი" არ ვარ, როგორც ზოგიერთმა ჩამომწერა და მინდა დავამტკიცო, რომ თამაში შემიძლია.

- მეორედ ახსენეთ ხალხი, ვინც ჩამოგწერათ. ვის გულისხმობთ? ნაკრების ხელმძღვანელობას?

- არა, მათ ნამდვილად არა, რადგან კარგად მხოლოდ 2017 წელს ვითამაშე და ასე ნაკრებში არავინ მიმიწვევდა. არიან ისეთები, რომლებმაც დამივიწყეს და ფეხბურთელებში აღარ მთვლიდნენ. არაფერია, ფორმას აღვიდგენ და მჯერა, დავამტკიცებ, რომ თამაში კიდევ შემიძლია.

ყოველდღიური სპორტული გაზეთი "ლელო"
2917
მკითხველის კომენტარები / 1 /
T
0
100% xar ase xdeba hventan vitom profesorebi, ramdeni axalgazrda dayupes am vitom profesorebma, aferistebi jogebma
მსგავსი ამბები
რუბრიკის სხვა სიახლეები
;