ირლანდიელები ბორჯღალოსნებზე წერენ: მათთვის ეს არის შანსი, რომ დაამტკიცონ...

საქართველო-აშშ, ბურთით გუნდის კაპიტანი მერაბ შარიქაძე

საქართველოს ნაკრები თურქეთიდან დაბრუნდა და 19 აგვისტოდან მსოფლიოს თასისთვის მზადებას "შევარდენის" საწვრთნელ ბაზაზე განაახლებს. იაპონიაში გამგზავრებამდე "ბორჯღალოსნები" სამ მატჩს გამართავენ აქედან ორი, 31 აგვისტოს და 6 ოქტომბერს ტესტია შოტლანდიის ნაკრებთან. იქამდე კი, 27 აგვისტოს ჩვენი ნაკრები საწვრთნელ მატჩში სამხრეთაფრიკულ "საუზერნ კინგზს" დაუპირისპირდება...

ირლანდიურმა გამოცემამ Irishtimes.com-მა საქართველოს ნაკრებს წერილი მიუძღვნა, სადაც მსოფლიოს თასზე მის შანსებზე და გუნდის პერსპექტივაზე საუბრობს. პუბლიკაციის ავტორს, პატრიკ მეიდენს მიაჩნია, რომ "ბორჯღალოსნებს" განზრახული აქვთ მსოფლიოს თასზე მათი 6 ერში ჩართვის ამბიციები გაამყარონ. გთავაზობთ ამონარიდს ამ წერილიდან:

"2019 წლის მსოფლიოს თასის გათამაშება შესანიშნავი შანსია საქართველოს ნაკრებისთვის დაამტკიცოს, რომ 6 ერის გათამაშებაში ჩართვას იმსახურებს. ამ ნაკრებმა მსოფლიოს თასის ბოლო ოთხ გათამაშებაში იასპარეზა და სტაბილური წინსვლით გამოირჩა. 2015 წელს სულაც ორი მატჩი მოიგო ტანგასთან და ნამიბიასთან, ჯგუფში მესამე ადგილი დაიკავა და იაპონიის მსოფლიოს თასის საგზური ავტომატურად მიიღო...

აშკარად იგრძნობა, რომ პირველი დონის ქვეყნების შემდეგ, ყოველ შემთხვევაში ევროპაში, საქართველოს ნაკრები საუკეთესო გუნდია. მან ბოლო რაგბი ევროპის ბოლო 12 გათამაშებიდან 10 მოიგო და წინააღმდეგობას მხოლოდ რუმინეთი თუ უწევს...

დღესდღეობით, საქართველო მსოფლიოს რეიტინგში მე-12 ადგილზეა. ჩამორჩება ფიჯის და იაპონიას, მაგრამ უსწრებს ტონგას და, რაც მთავარია, იტალიას, რომელიც ექვსი ერის მაჩანჩალის სტატუსს ვერაფრით "ელევა". მიუხედავად ყველაფრისა, ძნელია შეაფასო საქართველოს ნაკრების რეალური ძალა და წინსვლის ხარისხი, რადგან ბოლო 16 ტესტში მან მხოლოდ ერთხელ ითამაშა პირველი დონის ქვეყანსთან. ისიც იტალიის ნაკრებთან, რომელშიც გასვლით მატჩში დამარცხდა. მსოფლიოს თასზე ავსტრალიის, უელსისა და ფიჯის ნაკრებებთან მატჩი ქართველებისთვის დიდი გამოცდა იქნება...

ახალზელანდიელი მილტონ ჰეიგი საქართველოს ნაკრების მწვრთნელად 2012 წლის იანვარში დაინიშნა. მისი სადებიუტო მატჩი სტუმრად ესპანეთის ნაკრებთან წარუმატებელი გამოდგა. შეხვედრა ქართველებმა 18:25 წააგეს. მას შემდეგ შვიდ წელიწადზე მეტი გავიდა და 55 წლის ახალზელანდიელი ისევ ქართველთა უმთავრესი გუნდის მესაჭეა.

მის ხელში საქართველოს ნაკრები აშკარად პროგრესირებს, დომინირებს რა ევროპაში მეორე დონის გუნდებს შორის. ამასთან ერთად, ისტორიაში საუკეთესო შედეგი მსოფლიოს თასებზე სწორედ ჰეიგის ხელმძღვანელობით აჩვენა გუნდმა 2015 წელს. ის ბუნებრივია, ქართული რაგბის დიდი გულშემატკივარია და მიაჩნია, რომ აუცილებელია ქართულმა ფრანჩაიზმა მაღალი დონის ტურნირებში, როგორიცაა კელტთა ლიგა, ქარის თასი სამხრეთ აფრიკაში ან ზე რაგბი, აუცილებლად უნდა ითამაშოს, რათა ქართველმა მორაგბეებმა სათამაშო დონე აიმაღლონ... 

ინგლისის ნაკრების ავსტრალიელი მწვრთნელის ედი ჯონსის თქმით, საქართველოს ნაკრების წარმატება მეტწილად განპირობებულია უკომპრომისო, კარგად შეკრული და ძალიან ძლიერი შერკინების თამაშით. ედი ამბობს რომ ქართველებს ყავთ ყველაზე დიდი და მახინჯი შერკინება მსოფლიოში. თუმცა, გუნდის კაპიტანი შუამარბი მერაბ შარიქაძეა, რომელსაც "საქართველოს სიამაყეს" ეძახიან. 26 წლის ასაკში მან 63 კეპს მოუყარა თავი. მას ეროვნულ ნაკრებში დებიუტი 18 წლის ასაკში ჰქონდა ზუსტად იმ წაგებულ მატჩში ესპანეთის ნაკრებთან, რომელშიც მილტონ ჰეიგი პირველად წარუძღვა ქართველთა გუნდს...

საინტერესო იქნება ქართველთა რიგებში 20 წლის მგეზავის თედო აბჟანდაძის თამაშის ნახვა. ის 2017, 2018 და 2019 წლების მსოფლიოს ახალგაზრდულ ჩემპიონატებზე საქართველოს 20-წლამდელთა ნაკრების წამყვანი მორაგბე იყო. ეროვნულ გუნდში აბჟანდაძე შარშან, ნოემბრის ტესტებისას გამოჩნდა და მას შემდეგ შვიდი კეპი მოიხვეჭა...

მინიატურული ქართველი მგეზავი საინტერესოდ გამოიყურება ბურთით ხელში. აქვს შემოქმედებითი უნარი და შთამბეჭდავი ტემპერამენტი. მილტონ ჰეიგს მიაჩნია, რომ მას ყველაფერი აქვს, რათამსოფლიოს დონის მორაგბედ ჩამოყალიბდეს... 

ეჭვს გარეშეა, საქართველოს ნაკრები პროგრესირებს. თუმცა, მსოფლიოს თასზე წარმოუდგენლად ძნელ ჯგუფში მოხვდა. ისინი დარწმუნებულნი არიან, რომ ურუგვაის მოუგებენ, მაგრამ ძნელი სავარაუდოა, რამდენად წარმატებული იქნება მათი თამაში სხვა მეტოქეებთან, განსაკუთრებით ფიჯსთან მატჩში".

* * *

19 აგვისტოს მორიგ საწვრთნელ შეკრებაზე 36 მორაგბე შევა. ამათგან, იმ 31 მოთამაშეს, რომელიც იაპონიაში მსოფლიოს თასზე გაემგზავრება, მილტონ ჰეიგი საკონტროლო მატჩების შემდეგ დაასახელებს.

საქართველოს ნაკრები

პირველი ხაზი: მიხეილ ნარიაშვილი, კარლენ ასიეშვილი, გურამ გოგიჩაშვილი, ჯაბა ბრეგვაძე, შალვა მამუკაშვილი, ვანო კარკაძე, გიორგი ჭყოიძე, ლევან ჩილაჩავა, ბექა გიგაშვილი, გიორგი მელიქიძე
მეორე ხაზი: კონსტანტინე მიქაუტაძე, გიორგი ნემსაძე, შალვა სუთიაშვილი, ნოდარ ჭეიშვილი
მესამე ხაზი: ბექა საღინაძე, ლაშა ლომიძე, ოთარ გიორგაძე, გიორგი თხილაიშვილი, გიორგი ცუცქირიძე, ბექა გორგაძე.
N 9: ვასილ ლობჟანიძე, გელა აფრასიძე, გიორგი ბეგაძე
N 10: ლაშა ხმალაძე, თედო აბჟანდაძე
N 12-13: ლაშა მალაღურაძე, მერაბ შარიქაძე, თამაზ მჭედლიძე, დავით კაჭარავა, გიორგი კვესელაძე
N 11-14: მირიან მოდებაძე, გიორგი აფციაური, ალექსანდრე თოდუა, ზურაბ ძნელაძე
N 15. მერაბ კვირიკაშვილი, იოსებ მათიაშვილი.

საწვრთნელი მატჩი
27 აგვისტო
საქართველო-საუზერნ კინგსი


ტესტები
31 აგვისტო

საქართველო-შოტლანდია

6 სექტემბერი
შოტლანდია-საქართველო

მსოფლიოს თასი
23 სექტემბერი
საქართველო-ულსი
29 სექტემბერი
საქართველო-ურუგვაი
3 ოქტომბერი
საქართველო-ფიჯი
11 ოქტომბერი
საქართველო-ავსტრალია

2440
მკითხველის კომენტარები / 0 /
მსგავსი ამბები
რუბრიკის სხვა სიახლეები
;