[ირლანდიურ მედიაში] ჰურიჰანის ტკბილი მოგონება და სიფრთხილე. საქართველო 'ირლანდიური წყევლის' მოხსნას ეცდება!..

12 ოქტომბერს, "დინამო არენაზე" საქართველოს ნაკრები ევრო 2020-ის შესარჩევ ციკლში ირლანდიას უმასპინძლებს. მასთან დაკავშირებით, იქაურ მედიაში ბევრი რამ იწერება და ჩვენც ყოველდღიურად ვცდილობთ, მკითხველისთვის საინტერესო არაფერი გამოგვრჩეს...

რთული მატჩის მოლოდინში

საქართველოსთან მატჩზე ირლანდიის ნაკრების ნახევარმცველმა კონორ ჰრიჰნმა ილაპარაკა. "ასტონ ვილას" ფეხბურთელი თბილისში კარგი განწყობით მოდის. მან ინგლისის პრემიერლიგაში "ნორვიჩთან" გაუტანა და წლევანდელ სეზონის საგოლე ანგარიში გახსნა.

ამავე დროს, მას ტკბილად ახსენდება უშუალოდ საქართველოს ნაკრებთან დაპირისპირების ისტორია. ის ქვეყნის მთავარ გუნდში 2017 წლიდან თამაშობს, მაგრამ პირველად 2019 წლის 26 მარტს გაიტანა გოლი და ეს მოხდა სწორედ ჩვენს გუნდსთან შეხვედრაში. მისი გოლით ირლანდიამ მიმდინარე შესარჩევ ციკლში საქართველოს "ავივაზე" 1:0 მოუგო .

"ასტონ ვილას" ფეხბურთელის თქმით, ეს გოლი მის კარიერაში გამორჩეული იყო: "შეიძლება, ჩემი კარიერის ბოლოს საქართველოსთან გატანილი გოლი ამაყად გავიხსენო. ეს შესანიშნავი და მნიშვნელოვანი იყო - ჩემი პირველი გოლი ნაკრებში! მაგრამ ახლა ამის დრო არ არის, რადგან მეტის გატანა მინდა. მომდევნო ხუთ ან ექვს მატჩში ნაკრებს ერთი ან ორი გოლით რომ დავეხმარო, ძალიან კარგი იქნება", - ამბობს კონორ ჰურიჰანი.

"ასტონ ვილას" ფეხბურთელი საქართველოს ნაკრებსა და მის შესაძლებლობებს აფასებს და მიიჩნევს, რომ ირლანდიელები შაბათს თბილისში გასამართ თამაშს ფრთხილად უნდა მოეკიდონ:

"ამ გუნდმა ევრო 2020-ის საკვალიფიკაციო ეტაპზე დანიას წაართვა ქულები. ეს დასაფიქრებელია. ბოლოს თბილისში რომ ჩავედით, მე სათადარიგოთა სკამზე ვიჯექი, გოლი კი შეინ დაფმა გაიტანა. ეს ძალიან მძიმე საღამო იყო. საერთოდ, იქ თამაში ადვილი არასოდეს ყოფილა. მაგრამ ჩვენ ამისთვის ვემზადებით", - ამბობს "ასტონ ვილას" მოთამაშე.

ჰურიჰანი ჩვენს ნაკრებთან მიმართებაში მისი თანაგუნდელების დამოკიდებულებაზეც ლაპარაკობს: "ჩვენ უნდა ვიცოდეთ, რომ საქართველომ თბილისში 0:0 დაასრულა მატჩი დანიასთან, რომელიც ძლიერი ნაკრებია. ეს მეტყველებს იმაზე, თუ რამდენად კარგი მეტოქე გვყავს. საქართველოს ძალიან ტექნიკური ფეხბურთელები ჰყავს, ყოველწლიურად ხვეწს თამაშს და სულ უფრო უკეთესი გუნდი ხდება. ვიცოდით, რომ მათ წინააღმდეგ ორი რთული თამაში გვექნებოდა. საბედნიეროდ, დუბლინში მათი წინააღმდეგობა გადავლახეთ, ახლაც  ჩვენ უნდა წავიდეთ იქ და იგივე შევძლოთ. ჩვენ უნდა ვიმუშაოთ და საუკეთესო შედეგს მივაღწიოთ. ისინი სახლში რევანშის აღებას შეეცდებიან, მაგრამ ჩვენ ამისთვის მზად უნდა ვიყოთ და იმედი მაქვს, შაბათ საღამოს კარგ შედეგს მივაღწევთ".

ირლანდიური წყევლის მოსახსნელად

საქართველოსა და ირლანდიას ნაკრებთა მომავალ დაპირისპირებას წერილი მიუძღვნა ირლანდიურმა გამოცემა "ჰერალდმა".

"სექტემბერში ვლადიმირ ვაისს ევროთასებზე "მანჩესტერ იუნაიტედის" მოწინააღმდეგე "ასტან" იწვევდა, მაგრამ ის საქართველოში დარჩა. სლოვაკი სპეციალისტი მოთამაშეებს ბევრი ქვეყნიდან იწვევს, რათა ისეთი გუნდი შეკრას, რომელ პირველად შეძლებს ირლანდიის დამარცხებას და დაასრულებს იმას, რასაც ქართველი გულშემატკივრები "ირლანდიულ წყევლას" უწოდებენ. ვაისის 24-კაციან შემადგენლობაში შედიან 17 სხვადასხვა ქვეყანაში მოთამაშე ფეხბურთელები - დაწყებული აშშ-თი და დამთავრებული ყაზახეთით...

საქართველოს ნაკრების მთავარი მწვრთნელი იმედოვნებს, რომ მისი გუნდი ირლანდი წინააღმდეგ მიზანს ერთი თავდამსხმელით მიაღწევს. ბელგიური "გენტის" წევრი გიორგი ქვილითალია მის მიერ მიწვეული ერთადერთი ფორვარდია. მაგრამ აშშ-ში გადასულ ვალერი ყაზაიშვილსაც ბევრი გააქვს - ამ ნახევარმცველის ანგარიშზე 42 სანაკრებო თამაშში 10 გოლია. სხვათა შორის, 2017 წელს საქართველომ თბილისში ირლანდიასთან შეხვედრა 1:1 მისი გოლით დაასრულა", - წერს "ჰერალდი".

ჩვენმა ირლანდიელმა კოლეგებმა ერთი უზუსტობა დაუშვეს: ვლადიმ ვაისმა ორი თავდამსხმელი (გიორგი ქვილითაია და ელგუჯა ლობჯანიძე) გამოიძახა და არა - ერთი.

ყოველდღიური სპორტული გაზეთი "ლელო"
1130
მკითხველის კომენტარები / 0 /
მსგავსი ამბები
რუბრიკის სხვა სიახლეები
;