ისევ დაქსაქსულად - ძიუდოისტების ერთი ჯგუფი მოსკოვშია წასული

ქართველი ძიუდოისტების ერთი ჯგუფი მწვრთნელ მინდია ბოდაველის ხელმძღვანელობით მოსკოვშია წასული ერთკვირიან ერთობლივ ვარჯიშებზე, სადაც მათთან ერთად უცხოეთის გუნდებიც ემზადებიან.

მოსკოვში ოლიმპიური და ევროპის ჩემპიონი ლაშა შავდათუაშვილი (73), ევროპის ჩემპიონი და მსოფლიოს ბრინჯაოს მედალოსანი ვაჟა მარგველაშვილი (66) და ევროპის მესამე პრიზიორი ბექა ღვინიაშვილი (90) ვარჯიშობენ. ისინი საქართველოში 11 აგვისტოს დაბრუნდებიან.

ამასობაში ქართველ ძიუდოისტთა ის ჯგუფი, რომელიც იაპონიაში იყო წასული შეკრებაზე, აზიიდან ბუდაპეშტში გადავიდა, სადაც უახლოეს უქმეებზე უნგრეთის "დიდ პრიზზე" იჭიდავებს.

9 აგვისტოს ამავე მიზნით თბილისიდან ბუდაპეშტში კიდევ სამი სპორტსმენი: ევროპის ჩემპიონი ამირან პაპინაშვილი (60), თორნიკე ნაგლიაშვილი (66) და გიორგი პაპუნაშვილი (90) გაფრინდება, ბუდაპეშტში კი მათ გარდა, ლუხუმ ჩხვიმიანი, (60), ფრიდონ გიგანი (73), ზებედა რეხვიაშვილი (81), მსოფლიოს პრიზიორი უშანგი მარგიანი (90), ევროპის სამგზის გამარჯვებული, ოლიმპიადის ორგზის და მსოფლიოს ვიცე-ჩემპიონი ვალერი ლიპარტელიანი, ონისე სანებლიძე (ორივე - (100), ევროპის ჩემპიონი, მსოფლიოს მედალოსანი ადამ ოქრუაშვილი და ევროპის მესამე პრიზიორი ლევან მატიაშვილი (ორივე - +100) გამოვლენ.

ყოველდღიური სპორტული გაზეთი "ლელო"
1166
მკითხველის კომენტარები / 0 /
მსგავსი ამბები
რუბრიკის სხვა სიახლეები