ისევ ტრავმები. რეხვიაშვილი და ჭრიკიშვილი გამორიცხულია, ლიპარტელიანი?

ბოლო დროს საქართველოს ნაკრების წამყვან ძიუდოისტებს ტრავმებმა დარია ხელი. გამო ვერ ახერხებენ ტურნირებზე ასპარეზობას და საკუთარი შესაძლებლობების სრულად წარმოჩენას. ჰააგის გრან პრიზე სამი ძიუდოისტი - ზებედა რეხვიაშვილი, ავთანდილ ჭრიკიშვილი და ვარლამ ლიპარტელიანი დაშავდა. ისინი ჰოლანდიიდან პირდაპირ იაპონიაში, ოსაკის გრან პრიზე საასპარეზოდ უნდა გამგზავრებულიყვნენ, მაგრამ... ძიუდოს ფედერაციის ინფორმაციით, ჭრიკიშვილს საქართველოში დაბრუნებამ მოუწია. მას ფეხი აწუხებს და დაახლოებით ერთი თვე მაინც მოუწევს რეაბილიტაცია.

შედარებით მსუბუქი ჩანდა რეხვიაშვილისა და ლიპარტელიანის ტრავმები (რეხვიაშვილს ფეხი აწუხებდა, ლიპარტელიანს - ნეკნი), ამიტომ ისინი იაპონიაში გაემგზავრნენ, თუმცა რეხვიაშვილს ტრავმა გაურთულდა და ის ოსაკის ტურნირზე ვეღარ იასპარეზებს. უკვე იაპონიაში ვარჯიშზე მიღებული ტრავმის გამო გრან პრიზე ვეღარ გამოვიდა ლუხუმ ჩხვიმიანი, ასევე ტრავმა მიიღო ლაშა შავდათუაშვილმა და გართულებების თავიდან ასაცილებლად იაპონიაში ისიც ვერ გავა ტატამზე.

ძიუდოს ფედარციის ცნობით, საქართველოს ნაკრების ექიმები ყველაფერს აკეთებენ იმისთვის, რომ ჩვენი ძიუდოისტები წლის ბოლო შემაჯამებელ შეჯიბრს (ჩინეთის მასტერსი) მაქსიმალურად ჯანმრთელები შეხვდნენ. შესაძლოა, ჩინეთში იასპარეზოს ტრავმამოშუშებულმა ბექა ღვინიშვილმა, რომლის რეაბილიტაცია საკმაოდ სწრაფი ტემპით მიდის. უკვე ჯანმრთელია და მასტერსისთვის ემზადება ამირან პაპინაშვილი.

897
მკითხველის კომენტარები / 0 /
მსგავსი ამბები
რუბრიკის სხვა სიახლეები
;