ისიც უნდა გვესმოდეს, ვისთან ვთამაშობდით!.. ქართველები ჩემპიონთა ლიგას ბრძოლით გამოეთიშნენ

ტირასპოლის "შერიფის" 19-წლამდელთა გუნდი ახალგაზრდულ ჩემპიონთა ლიგას დაემშვიდობა. შოთა მახარაძის გაწვრთნილები პლეი ოფში ბელგრადის (სერბეთი) "ცრვენა ზვეზდას" თანატოლებს ერთრაუნდიან მატჩში ტირასპოლის მცირე არენაზე შეხვდნენ და ფრედ (0:0) დასრულებული ძირითადი დროის შემდეგ, პენალტების სერიაში დამარცხდნენ - 2:4.

"შერიფმა" პირველ ეტაპზე ალბანურ "შკენდიას" (2:1, 1:0) მოუგო, ხოლო შემდეგ ნორვეგიული "სოგნდალიც" გამოთიშა ასპარეზობას (შინ 2:0, გასვლაზე 1:3).

აქამდე "შერიფის" 19-წლამდელთა გუნდმა ორჯერ ითამაშა ახალგაზრდულ ჩემპიონთა ლიგაზე და ორივეჯერ გათამაშებას პირველივე ეტაპზე გამოეთიშა, ახლა კი შოთა მახარაძის ხელმძღვანელობით პირველად გააღწია პლეი ოფში.

"ძალიან ძლიერი მეტოქე გვყავდა, თან ასეთ თამაშებში დიდი გამოცდილება არ გვაქვს. დავუმატოთ ამას ისიც, რომ პენალტების სერია ლატარეაა... ისიც უნდა გვესმოდეს, ვისთან ვთამაშობდით - დონე განსხვავებულია! ეს გუნდი ემირატებსა და იტალიაში შეკრებაზე სერიოზულ მეტოქეებთან თამაშობდა. არ ვეძებ თავის გასამართლებელ საბუთს, მაგრამ ეს მართლაც სულ სხვა დონეა. თქვენ თამაშობთ ისე, რის საშუალებასაც მოწინააღმდეგე გაძლევთ, და - პირიქით. დღეს მეტოქემ არ მოგვცა თამაშის საშუალება. სტატისტიკას თუ გადავხედავთ, ამ გუნდმა იუნიორების ლიგის ყველა თამაშში გაიტანა გოლი. ჩვენთან კი ეს ვერ შეძლო. დღეს მათ პენალტებით მოიგეს, რადგან უკეთესები არიან. მაგრამ მიხარია, რომ ჩემი გუნდით ამ ეტაპამდე გავაღწიე, რაც აქამდე ვერავინ მოახერხა", - თქვა შოთა მახარაძემ.

გათამაშებას ასევე პენალტების სერიით გამოეთიშა კიევის "დინამოს" 19-წლამდელთა გუნდიც, რომელშიც გიორგი წიტაიშვილი თამაშობს. უკრაინელებმა ზაგრების "დინამოსთან" კიევში 0:0 ითამაშეს, პენალტების სერიაში კი დამარცხდნენ - 3:4. ერთ-ერთი ზუსტი დარტყმა წიტაიშვილის ანგარიშზეა.

1515
მკითხველის კომენტარები / 0 /
მსგავსი ამბები
რუბრიკის სხვა სიახლეები
;