ისრაელი-საქართველოს წინ. განწყობა საბრძოლოა [VIDEO]

საქართველოს ეროვნული ნაკრები მსოფლიოს თასი-2019-ის მეორე საკვალიფიკაციო ეტაპის პირველ მატჩს თელ ავივში გამართავს. შეხვედრა თბილისის დროით 21 საათზე დაიწყება.

ჩვენი გუნდი ისრაელში თბილისი-თელ ავივის რეისით, 12 სექტემბერს, დილის 7 საათზე გაფრინდა და ადგილობრივი დროით 11:00 საათისთვის სასტუმრო "ხფარ მაკაბიაში" დაბინავდა.

იმავე დღეს, საღამოს 19:30 საათზე საქართველოს ნაკრებმა თელ ავივის "მენორა მივტახიმის", იგივე "ნოკია არენაზე" ივარჯიშა. სწორედ ამ დარბაზში ჩატარდა 2017 წლის სექტემბერში ევროპის ჩემპიონატის D ჯგუფის მატჩები, რომელშიც საქართველოს ნაკრებმა დამატებით დროში - 104:91 დაამარცხა ისრაელის ეროვნული გუნდი.

თორნიკე შენგელია: ნაკრების ყველა მატჩს დადებითი ემოციით, ბრძოლის ჟინით ვხვდებით [VIDEO ექსკლუზივი]

სატურნირო თვალსაზრისით 13 სექტემბრის მატჩს დიდი მნიშვნელობა აქვს. მიუხედავად იმისა, რომ წინ კიდევ 5 თამაშია, დამარცხებული გუნდი ფაქტობრივად ეთიშება მსოფლიოს ჩემპიონატზე გასასვლელ ბრძოლას. ამავდროულად, არ უნდა დაგვავიწყდეს, რომ საქართველოს ნაკრებისთვის მეორე საკვალიფიკაციო ეტაპს უფრო მეტად სამომავლოდ გუნდის შეთამაშებისა და თაობათა უმტკივნეულოდ ცვლის მნიშვნელობა აქვს.

საქართველოს ნაკრებში საბრძოლო განწყობაა. გუნდში ახალი სახეა - ისრაელში ესპანურ "ბასკონიაში" შენგელიას თანაგუნდელი, სნაიპერი მეტ ჯენინგი ითამაშებს.

თამაშის დღეს, ნაკრები დილის ვარჯიშზე მოახლოებული მატჩისთვის "ნოკია არენაზე" მოითელება, ხოლო ისრაელისა და საქართველოს დაპირისპირება თბილისის დროით 21:00 საათზე დაიწყება და მის პირდაპირ ტელეტრანსლაციას "საზოგადოებრივი მაუწყებელი" გადმოსცემს.

1005
მკითხველის კომენტარები / 0 /
მსგავსი ამბები
რუბრიკის სხვა სიახლეები
;