ისტორია და ფაქტები: პირველად ვაისის დროს და ალექსანდრე ჩივაძის რეკორდი

ისევე, როგორც ყველა ქართველ გულშემატკივარს, საქართველოს ნაკრების ზედიზედ ორმა მოგებამ ჩვენც ისეთი ემოცია დაგვიტოვა, დადებითზე მეტი რომ ჰქვია!

გასაგებია, რომ ეს ორივე მატჩი ამხანაგური იყო, მაგრამ მართლაც დაუნახავი უნდა იყოს კაცი, ამ ოთხდღიან მონაკვეთში მოპოვებული ამ ორივე ლაღი გამარჯვების მნიშვნელობა რომ დააკნინოს.

არც იმაზე უნდა დაგვწყდეს გული, რომ საქართველოს ნაკრებმა ამ ორივე მატჩში მხოლოდ თითო ტაიმი ჩაატარა მაქსიმალური კონცენტრაციით: ლიტვასთანაც და ესტონეთთანაც, თამაშის ბედი ხომ, ფაქტობრივად, პირველ ტაიმში გადაწყდა! თუმცა, ისიც უნდა აღვნიშნოთ, რომ ამ ორივე მატჩის პირველი ტაიმებში, საქართველოს ნაკრებმა მართლაც რომ გააზრებული და, რაც მთავარია, ხარისხიანი ფეხბურთი აჩვენა!

აღარაფერს ვამბობთ, ცალკეული ფეხბურთელების ინდივიდუალურ გაბრწყინებებზეც: გუნდური თამაშიც ხომ მოგვეწონა ყველას, არანაკლებ აღტაცებული დავრჩით ქართული ფეხბურთის იმედის, 18 წლის გიორგი ჩაკვეტაძისა და საქართველოს ნაკრების ერთ-ერთი ლიდერის (და ფაქტობრივად, შეუცვლელი ფეხბურთელის) ვაკო ყაზაიშვილის მიერ გატანილ ერთმანეთზე უკეთეს გოლებზე!

შეტევაშიც ვივარგეთ და
გოლიც არ გაგვიშვია!

ოთხდღიან შუალედში მოპოვებული ზედიზედ 2 გამარჯვებაც გასახარი ფაქტია და ეფექტური გოლებიც; თუმცა, არანაკლები მნიშვნელობა უნდა მივანიჭოთ იმ ფაქტსაც, რომ ოთხდღიან შუალედში ჩატარებულ ამ ორ მატჩში, საქართველოს ნაკრებმა არც ერთი გოლი არ გაუშვა!

ასეთი რამ კი, საქართველოს ნაკრების ისტორიაში აქამდე მხოლოდ ერთხელ მოხდა: 1994 წლის თებერვალში, ალექსანდრე ჩივაძის დამოძღვრილმა ჩვენმა უპირველესმა გუნდმა, მალტაზე მიმდინარე საერთაშორისო ტურნირზე ჯერ მასპინძლებს მოუგო (1:0), შემდეგ კი - ტუნისს (2:0).

თუმცა, გოლგაუშვებლად ასპარეზობას ვინ ჩივის: დროის ასეთ მოკლე შუალედში, ზედიზედ ორი მატჩის მოგება,უკვე ნახსენები ორი შემთხვევის გარდა, საქართველოს ნაკრებმა მხოლოდ ერთხელ შეძლო: 2001 წლის 1 სექტემბერს თბილისში უნგრეთს 3:1 (გოლები: შ. არველაძე, ჯამარაული, იაშვილი) მოვუგეთ, 4 დღის შემდეგ კი, ალექსანდრე იაშვილის დუბლის წყალობით ლიტვა დავამარცხეთ (2:0). თანაც, ისიც უნდა აღვნიშნოთ, რომ ეს ორივე მატჩი ოფიციალური იყო, საქართველოს ნაკრების მთავარი მწვრთნელი კი, ალექსანდრე ჩივაძე გახლდათ...

აბსოლუტური რეკორდსმენი ქართული ფეხბურთის კიდევ ერთი ლეგენდა გახლავთ: 1998 წლის თებერვლის დასაწყისში, ვლადიმერ გუცაევის ხელმძღვანელობით მოასპარეზე საქართველოს ნაკრებმა ხუთდღიან შუალედში (6-10 თებერვალი) მალტის საერთაშორისო ტურნირზე 3 მატჩი ჩაატარა და სამივე მოიგო: ლატვიასთან (2:1), ალბანეთთან (3:0), მალტასთან (3:1).

ისე, საქართველოს ნაკრების ამჟამინდელ თავკაცს ვლადიმირ ვაისსაც შეუძლია, იამაყოს სხვა მიღწევ(ებ)ით: ოთხდღიან შუალედში გოლგაუშვებლად ზედიზედ ორი მოგების გარდა, ჩვენმა ნაკრებმა ხომ სწორედ სლოვაკი სპეციალისტის ხელმძღვანელობით მოახერხა ზედიზედ ორ მატჩში სარეკორდო რაოდენობის (8) გოლის გატანა!

შეგახსენებთ, რომ შარშან, 28 მარტს, ლატვიას 5:0 მოვუგეთ, 7 ივნისს კი სენტ-კიტსისა და ნევისის ნაკრებს - 3:0! თუმცა, ვაისი სხვა მაჩვენებლითაც გახდა რეკორდსმენი საქართველოს ნაკრების ისტორიაში...

ვაისი და რეკორდები

საქართველო-ესტონეთის მატჩში, ჩვენს ნაკრებს, სულ მცირე, 3-4 ისეთი მომენტი ჰქონდა, 100-პროცენტიანს რომ ვუწოდებთ ხოლმე. ჰოდა, ამ უაღრესად ხელსაყრელი მომენტებისგან, თუნდაც ერთი რომ გამოეყენებინათ ჩვენს ფეხბურთელებს, ეს იქნებოდა ვლადიმირ ვაისის ხელმძღვანელობით მოგებული მეოთხე მატჩი დიდი ანგარიშით!

ვლადიმირ ვაისმა გაიმეორა ალექსანდრე ჩივაძის რეკორდი: მისი ხელმძღვანელობით საქართველოს ნაკრებმა 3 მატჩი მოიგო დიდი ანგარიშით

ასეთი შედეგი კი, საქართველოს ნაკრების 29-წლიან ისტორიაში არავის ჰქონია - ამ "ნომინაციაში" საუკეთესო შედეგი, ისევ და ისევ ალექსანდრე ჩივაძეს (საქართველოს ნაკრების ისტორიაში ყველაზე წარმატებულ მწვრთნელს) ჰქონდა, რომლის ხელმძღვანელობითაც ჩვენმა უპირველესმა გუნდმა 3 მატჩი მოიგო დიდი ანგარიშით.

და აი, ეს მაჩვენებელი გაიმეორა ვაისმა, რომელმაც, სამაგიეროდ, სხვა რეკორდი დაამყარა: 24 მარტს, როცა საქართველოს ნაკრებმა ლიტვას 4:0 მოუგო, ოთხივე გოლი პირველ ტაიმში გავიდა, ასეთი რამ კი, საქართველოს ნაკრების ისტორიაში არასდროს მომხდარა!..

დიდი ანგარიშით მოგებები

ვლადიმირ ვაისი, 3

საქართველო-ლატვია 5:0
ჯანო ანანიძე 2, გიორგი ქვილითაია 2, გიორგი არაბიძე

საქართველო-სტ. კიტსი 3:0
გიორგი არაბიძე 2, ლადო დვალიშვილი

საქართველო-ლიტვა 4:0
გიორგი პაპუნაშვილი, გიორგი ქვილითაია, ვაკო ყაზაიშვილი, გიორგი ჩაკვეტაძე

ალექსანდრე ჩივაძე, 3

საქართველო-უელსი 5:0*
თემურ ქეცბაია 2, გიორგი ქინქლაძე, შოთა არველაძე, გოჩა გოგრიჭიანი

ლუქსემბურგი-საქართველო 0:3
გიორგი დემეტრაძე 2, რატი ალექსიძე

საქართველო-სამხ. აფრიკა 4:1
გიორგი დემეტრაძე 2, ლევან კობიაშვილი, რატი ალექსიძე

დავით ყიფიანი, 2

საქართველო-სომხეთი 7:0
შოთა არველაძე 3, არჩილ არველაძე 2, გიორგი ქინქლაძე, მიხეილ ყაველაშვილი

საქართველო-პოლონეთი 3:0*
არჩილ არველაძე, კახა ცხადაძე, თემურ ქეცბაია

დავით ყიფიანი/რევაზ ძოძუაშვილი, 1

ლიტვა-საქართველო 0:4*
თემურ ქეცბაია 2, გიორგი ქინქლაძე, არჩილ არველაძე

გიგა ნორაკიძე, 1

საქართველო-აზერბაიჯანი 6:3
დავით ყიზილაშვილი 2, გიორგი დარასელია, შოთა არველაძე, გია ჯიშკარიანი, კახა გოგიჩაიშვილი

ვლადიმერ გუცაევი, 1

საქართველო-ალბანეთი 3:0
თემურ ქეცბაია, მიხეილ ყაველაშვილი, ალექსანდრე იაშვილი

მერაბ ჟორდანია, 1

საქართველო-ალბანეთი 3:0*
შოთა არველაძე 2, მიხეილ აშვეთია

კლაუს ტოპმიოლერი, 1

ფარერები-საქართველო 0:6*
შოთა არველაძე 3, დავით მუჯირი, ალექსანდრე იაშვილი, ლევან კობიაშვილი

თემურ ქეცბაია, 1

გიბრალტარი-საქართველო 0:3*
ნიკა გელაშვილი, თორნიკე ოქრიაშვილი, ჯაბა კანკავა

კახა ცხადაძე, 1

საქართველო-გიბრალტარი 4:0*
მათე ვაწაძე 2, თორნიკე ოქრიაშვილი, ვაკო ყაზაიშვილი

შენიშვნა: * - აღნიშნულია ოფიციალური მატჩები

ჩაკვეტაძის განსაკუთრებული დებიუტი

24 მარტს, საქართველო-ლიტვის მატჩში, როგორც დაანონსებული იყო, ჩვენს უპირველეს გუნდში დებიუტი ჰქონდა ბოლო წლების ერთ-ერთ ყველაზე ნიჭიერ ქართველ ფეხბურთელს, 18 წლის გიორგი ჩაკვეტაძეს.

ჰოდა, ამ მართლაც გამორჩეული მონაცემების მქონე ტალანტმა, თავის პირველსავე სანაკრებო მატჩში ისეთი გოლი გაიტანა, მხოლოდ და მხოლოდ, განსაკუთრებული ნიჭის მქონე ფეხბურთელებს რომ შეუძლიათ!

ჩაკვეტაძე მაშინაც გამორჩეული იყო, საქართველოს 17-წლამდელთა ნაკრებში რომ გამოდიოდა (2015 წელს); მერე იყო, საქართველოს 19-წლამდელთა ნაკრები, შარშან კი, 17-წლისას, უკვე ახალგაზრდულ ნაკრებშიც ჰქონდა დებიუტი.

თუმცა, ამ ნიჭიერი ბიჭის შესაძლებლობები ყველაზე პირველად თბილისის "დინამოში" წარმოჩნდა: ჯერ - ამავე კლუბის საფეხბურთო აკადემიაში, შემდეგ კი, მთავარ გუნდშიც, სადაც 2016 წლის გარდამავალი ჩემპიონატის მსვლელობის დროს დააწინაურეს; აი, შარშან კი, ვიდრე ბელგიურ "გენტში" გაემგზავრებოდა, "დინამოს" მთავარი მწვრთნელისგან, კახა კაჭარავასგან უდიდესი ნდობით სარგებლობდა და ეროვნული ლიგის, ფაქტობრივად, ყველა მატჩშიც გვაოცებდა ასაკთან შეუფერებელი საფეხბურთო ოსტატობით!

არამხოლოდ ჩვენი აზრია: ჩაკვეტაძეს შარშანდელი სეზონი სრულად რომ ჩაემთავრებინა თბილისის "დინამოში", ქვეყნის ყველაზე ტიტულოვანი კლუბი არც ჩემპიონობას დაუთმობდა ვინმეს და ეროვნული ლიგის საუკეთესო ფეხბურთელიც სწორედ ჩაკვეტაძე გახდებოდა.

საქართველოს ნაკრების 29-წლიან ისტორიაში არცთუ ბევრი ყოფილა ისეთი შემთხვევა, როცა ამა თუ იმ ფეხბურთელს, ნაკრებში თავის სადებიუტო მატჩში რომ გაუტანია გოლი. და აი, მათ რიცხვს, გიორგი ჩაკვეტაძეც შეემატა - 18 წლის უნიჭიერესი შემტევი, რომელთანაც ასოცირდება კიდეც ქართული ფეხბურთის მომავალი...

სადებიუტო მატჩებში გატანილი გოლები

1990 წლის 27 მაისი. საქართველო-ლიტვა (გია გურული, კახა კაჭარავა)
1991 წლის 2 ივლისი. მოლდოვა-საქართველო (გიორგი დარასელია, მიხეილ ჯიშკარიანი, მიხეილ ყაველაშვილი)
1996 წლის 5 დეკემბერი. ლიბანი-საქართველო (გიორგი კიკნაძე, ალექსანდრე იაშვილი)
2010 წლის 17 ნოემბერი. სლოვენია-საქართველო (სანდრო გურული)
2014 წლის 5 მარტი. საქართველო-ლიხტენშტაინი (გიორგი ჭანტურია)
2017 წლის 23 იანვარი. უზბეკეთი-საქართველო (თეიმურაზ შონია, საბა ლობჟანიძე)
2018 წლის 24 მარტი. საქართველო-ლიტვა (გიორგი ჩაკვეტაძე)

ყოველდღიური სპორტული გაზეთი "ლელო"
2670
მკითხველის კომენტარები / 0 /
მსგავსი ამბები
რუბრიკის სხვა სიახლეები
;