ისტორია. მსოფლიო თასი: ორი ისტორიული გამარჯვება ავსტრიასთან

პარასკევს, 23 თებერვალს საქართველოს ნაკრებს წლის პირველი მატჩი ელის ავსტრიასთან. ეს გუნდი ჩვენთვის უცხო სულაც არ არის, ჩვენს ეროვნულ ნაკრებს თავის ისტორიაში (ოფიციალური+ამხანაგური) ყველაზე მეტი თამაში სწორედ ავსტრიელებთან აქვს ჩატარებული - 10.

აქედან მხოლოდ სამჯერ შევხვდით ოფიციალურ შეჯიბრებაში და სამჯერვე გავიმარჯვეთ. საკონტროლო მატჩებში კი მეტოქეს დიდი უპირატესობა აქვს - 6-დან 5 თამაშში გვაჯობა.

რა იქნება 23-ში. ამ შეკითხვის პასუხს უშუალოდ თამაში მოგვცემს ჩვენ კი ორ მართლაც ისტორიულ შეხვედრას გაგახსენებთ. პირველი 90-იანი წლებისაა, მეორე - 2000-იანებისა.

1997 - დაქოქეთ ტაქსი,
ქართველები მორბიან...

ევრო-1999-ის საკვალიფიკაციო ეტაპზე საქართველო კვიპროსს ესტუმრა, ჩეხებთან 71:79 დათმო, კვიპროსელებს 72:69 მოუგო. შესარჩევ ეტაპზე გასვლა ავსტრიასთან მატჩის შედეგზე იყო დამოკიდებული.

ძირითადი დროის დასრულებას რამდენიმე წამი უკლდა, ავსტრია 56:54-ს იგებდა. ბოლო იერიშის უფლება ქართველებს დარჩათ, ბურთი მეტოქის ნახევარზე სწრაფად გადაიტანეს, გამთამაშებელმა მამუკა ტურაშვილმა მარცხენა ფლანგიდან სამქულიანი რკალი გადალახა და დაახლოებით 5 მეტრიდან ისროლა - 56:56 და საფინალო სირენაც გაისმა.

- კვიპროსში ჩვენთან ერთად იყო ვლადიმერ სტეფანია, რომელსაც მუხლის ოპერაცია ჰქონდა გაკეთებული და ვერ გვეხმარებოდა, ტრავმას გავიმიზეზებო. მისი მოედანზე ყოფნა ბევრს გადაწყვეტდა...

ავსტრიელებს ყველაზე მეტად სტეფანიას მდგომარეობა აღელვებდათ, აინტერესებდათ, ითამაშებდა, თუ - არა, რადგან იცოდნენ, რომ ევროლიგური "ოლიმპიას" ღირსებას იცავდა.

ამიტომ დამატებითი დროის დაწყებამდე ვოვას მოედანზე გამოსვლა ვთხოვეთ, გვესმოდა, რომ ტრავმირებული იყო, მაგრამ მისგან მხოლოდ მოედანზე ჩვენს გვერდით დგომას ვითხოვდით, - იხსენებს ირაკლი ხოშტარია.

- დამატებით დროში სტეფანია მოედანზე გამოვიდა, ფარქვეშ დადგა, ხელები გაშალა და ავსტრიელებიც დაითრგუნნენ. ოვერტაიმში მეტოქეს დამაჯერებლად ვაჯობეთ (67:60) და შესარჩევ ტურნირში თამაშის უფლება მოვიპოვეთ, - ეს უკვე მწვრთნელის, ბესიკ ლიპარტელიანის სიტყვებია.

არ უნდა დაგვავიწყდეს ვახტანგ ნაცვლიშვილისა და ვაკო ბეჟანიშვილის წვლილი. ვატომ 45 წუთი შეუცვლელად ითამაშა, 22 ქულა და 15 მოხსნა მიითვალა, ხოლო ვაკომ მაშინ, როცა ქართველები 8 ქულის სხვაობით ჩამორჩნენ, ერთმანეთის მიყოლებით სამი სამქულიანი ჩააგდო, რაც თამაშის შემოტრიალების საწინდარი გახდა.


კიდევ უფრო საინტერესოა მატჩის შემდგომი ამბავი...

ქართული დელეგაციის ნახევარი დამატებითი დროის დაწყებისთანავე გავიდა დარბაზიდან...

- კვიპროსიდან გასამგზავრებელი თვითმფრინავის ბილეთები წინასწარ გვქონდა აღებული. თუმცა, ავსტრიასთან მატჩი ისეთ დროს დანიშნეს, რომ აეროპორტში მისვლას ვერ ვასწრებდით. არადა, იმ დღეს რომ არ გავფრენილიყავით, ერთი კვირა კვიპროსში უნდა გვეცხოვრა, რისი შესაძლებლობაც არ გვქონდა.

ბევრი ხვეწნის შემდეგ მატჩი 45 წუთით ადრე გადაიტანეს, თუმცა ჩვენი გათვლებით 40 წუთის ამოწურვის შემდეგ თვითმფრინავს იმ შემთხვევაში მივასწრებდით, თუ ტაქსებით ვიფრენდით.

ოვერტაიმზე წინასწარ არ გვიფიქრია, მატჩი დამატებით დროში რომ გადავიდა, ტრიბუნებისკენ მივბრუნდით და ჩვენი დელეგაციის ძირითად ნაწილს აეროპორტში გაქცევა ვთხოვეთ.

წარმოიდგინეთ, როგორ აინტერესებდათ მატჩის ბოლო 5 წუთის ხილვა, მაგრამ სხვა გზა არ იყო - დელეგაციის ნახევარი აეროპორტში ოვერტაიმის დაწყებამდე წავიდა.

ევროპაში თვითმფრინავის შეყოვნება თითქმის წარმოუდგენელია, მაგრამ გულის სიღრმეში მაინც იმედი გვქონდა, რომ ქართველები სიტუაციას აუხსნიდნენ და ჩვენც გაფრენამდე მივუსწრებდით.

დამატებითი დროის დასრულების შემდეგ დამშვიდობება ვერ მოვასწარით, ისე გავიქეცით ტაქსებისკენ. წინასწარ დაბარებული გვქონდა, მანქანები დაქოქილები დაგვახვედრეთო...

მოთამაშეებმა ტაქსებში გამოიცვალეს და მიასწრეს თვითმფრინავს, რომელიც ქართველებს მართლაც დაელოდა.

2006- კინაღამ ავ(ს)ტრიალდით

საქართველოს ნაკრებს 2000-იან წლებში ყველაზე "გემრიელად" სწორედ ავსტრიაში აქვს მოგებული, თუმცა ტელევიზორებთან მსხდარი გულშემატკივრები გვარიანად ანერვიულა.

...მე-19 წუთისთვის მასპინძლები 19 ქულის სხვაობით იგებდნენ (22:41).

პირველ ტაიმში ქართველთა სტატისტიკას შეფასება თავად მოუძებნეთ: ჩვენებმა 20 წუთში მხოლოდ 6 ორქულიანი ისროლეს და 2(!) ჩააგდეს.

რადგან ნაკრებმა "ხუთ ხმაში" ვერ იმღერა (გუნდურ თამაშს ვერ უჩვენებდა), ფაჩულია გაბრაზდა და "სოლოს" შესრულებას შეუდგა. იგი ბურთის მიღებისთანავე ავსტრიელთა კალათისკენ მიიწევდა, გზად მასპინძლებს ერთმანეთის მიყოლებით აჯარიმებდა.

შედეგად ორტნერმა და ჰუტერმა 5-5 ფოლი მიიღეს, ხოლო ვოლჩიჩმა და ჰელმიგკმა - 4-4. ბოლო 20 წუთში ზაზას საჯარიმო არ აუცილებია (12 ჩააგდო), მას სამქულიანებით ელისიც შეეშველა და 19-ქულიანი ჩამორჩენა 29 წუთისთვის 3 ქულამდე დავიდა (50:53). სირენამდე 8 წუთით ადრე ფაჩულიას ზუსტი ტყორცნის შედეგად მეორე ტაიმში პირველად დავწინაურდით - 57:56.

საბოლოოდ კი, ქართული ფილმის გმირივით გაშტერებულ ავსტრიას 68:63 ვაჯობეთ.

კალათბურთელების მსგავსად ოფლში გაწურულმა მწვრთნელმა გორდონ ჰერბერტმა საქართველოში ასეთი კომენტარი გამოგვიგზავნა:

- პირველ ტაიმში მეტოქეს ყველაფრის უფლება მივეცით, მაგრამ ბიჭები 19-ქულიანმა ჩამორჩენამ არ დააბნია, პირიქით - ენერგია შემატა და მეორე ტაიმში თავისი თამაში უჩვენეს.

გარდატეხა მთელმა გუნდმა მოახდინა, მაგრამ ფაჩულია და ელისი რომ არ გამოვყო, არ შეიძლება. მათ ლიდერის ფუნქციები იტვირთეს და მატჩიც მოგვაგებინეს.
ზაზა ფაჩულია:

- ავსტრიიდან დაბრუნებულს ხშირად მეუბნებიან - ეს როგორ გვანერვიულეთო. ჩემი აზრით, სწორედ ასეთ მოგებას აქვს გემო. ავსტრიამ 19 ქულით რომ გაგვასწრო, მაშინაც მჯეროდა, რომ მოგება შეგვეძლო. გუნდში სწორედ იმიტომაა საჭირო ლიდერი, რომ კრიტიკულ მომენტში სიტუაცია შეცვალოს.

გუშინ თამაში რომ არ წამსვლოდა, ლიდერობა სხვას უნდა ეკისრა. ჩვენს ნაკრებში ხომ არაერთი კალათბურთელია, ეს რომ შეუძლია.

ყოველდღიური სპორტული გაზეთი "ლელო"
987
მკითხველის კომენტარები / 0 /
მსგავსი ამბები
რუბრიკის სხვა სიახლეები
;