[ფრაგმენტები ისტორიიდან] იცით თუ არა, სად და როდის დამყარდა დასწრების მსოფლიო რეკორდი?

26 მარტს გვქონდა ერთი გამორჩეული დღე, როცა 2011 წელს თბილისში ხორვატია დავამარცხეთ და კიდევ ერთ ასეთ დღეს ველოდით 2020 წლის 26 მარტს, როცა ბელარუსთან ერთა ლიგის პლეი ოფის მატჩი უნდა გაგვემართა "დინამო არენაზე"...

თამაშამდე კარგა ხნით ადრე ვიცოდით (ან რა დიდი ცოდნა უნდოდა ამას), რომ ქვეყნის მთავარი სპორტული არენაზე ნემსის ჩასავარდნი ადგილი არ იქნებოდა, მაგრამ...

ვერაგმა კორონავირუსმა ყველაფერი აურ-დაურია და როდის დალაგდება, კაცმა არ იცის. შესაბამისად, გადავდეთ ევროპის ჩემპიონატზე გასვლის ოცნებაც...

დაცარიელდა ქალაქები, ქუჩები... მათ შორის სტადიონებიც... მოგვენატრა დიდი საფეხბურთო ბატალიები, რომ აღარაფერი ვთქვათ ადამიანურ ცხოვრებაზე...

იმედია, ყველაფერი მაინც თავის კალაპოტში ჩადგება და, ავად თუ კარგად, გაგრძელდება ცხოვრება კორონავირუსის დამარცხების შემდეგ...

სწორედ ამ სიცარიელის და საყოველთაო იზოლაციის დროს წავაწყდით წერილს და გვინდა, ის თქვენს წინაშეც გამოვიტანოთ.

დიდი არაფერი, პატარა ისტორიული ექსკურსი არ გვაწყენდა - იცით თუ არა სად და როდის დამყარდა სტადიონის გავსების, უფრო სწორად დასწრების რეკორდი?

თითქმის 70 წლის შინ, 1950 წლის 16 ივლისს, რიო დე ჟანეიროს გიგანტურ "მარაკანაზე" 173 850 მაყურებელი შეიკრიბა 1950 წლის მუნდიალის ფინალური ოთხეულის ბოლო მატჩზე, რომელსაც მსოფლიოს ჩემპიონის ვინაობა უნდა გაერკვია...

მთელი ბრაზილია ზეიმის მოლოდინში იყო, მაგრამ... ურუგვაიმ მასპინძელი 2:1 დაამარცხა და ცხარე ცრემლით ატირა. მაგრამ მარტო ცრემლი როდი იყო ამ მარცხი შედეგი - ბრაზილიური მედიის მტკიცებით, უშუალოდ თამაშის დროს 169 გულშემატკივარმა მოითხოვა სამედიცინო დახმარება, ხოლო 6 მათგანი გულის შეტევით გადაიყვანეს სავაადმყოფოში.

ამბობენ, რომ იყო სიკვდილის შემთხვევაც, პლუს ორმა გულშემატკივარმა სიცოცხლე თვითმკვლელობით დაასრულა. მოკლედ, ურუგვაისთან მარცხი ბრაზილიელებისთვის ეროვნულ ტრაგედიად იქცა...

თუმცა ისტორიაში შევიდა ის ფაქტი, რომ დამყარდა დასწრების (173 850) მსოფლიო რეკორდი და თანაც, მეორედ - იმ ჩემპიონატის მსვლელობისას. 

ურუგვაისთან გადამწყვეტ მატჩამდე 3 დღით ადრე "მარაკანაზე" 152 722 ქომაგი შეიკრიბა ბრაზილია-ესპანეთის მატჩზე და საყვარელი გუნდის შთამბეჭდავი გამარჯვებით (6:1) დატკბა.

მანამდე, დასწრების მსოფლიო რეკორდი 1937 წელს დამყარდა, როცა გლაზგოს "ჰემპდენ პარკზე" 149 415 გულშემატკივარი (დღეს ეს არენა დაახლოებით 51 ათას მაყურებელს იტევს) შეიკრიბა შოტლანდია-ინგლისის მატჩზე.

ცნობისთვის, "მარაკანა", რომელიც დღეს 73 531 მაყურებელს იტევს, 17 წლის განმავლობაში შენდებოდა. დიახ, სტადიონი, რომელსაც საძირკველი 1948 წელს ჩაეყარა, მსოფლიოს ჩემპიონატისთვის ბოლომდე აშენებული არ იყო და მხოლოდ 1965 წელს მიიღო იმ დროინდელი პროექტით გათვალისწინებული საბოლოო სახე...

1417
მკითხველის კომენტარები / 0 /
მსგავსი ამბები
რუბრიკის სხვა სიახლეები
;