ისტორიიდან. ჩვენ და მალტელები - პოზიტიური მოგონებები

სულ უფრო ნაკლები დრო რჩება სექტემბრამდე - იმ დღემდე, როცა საქართველოს ნაკრები ერთა ლიგის გათამაშებაში უნდა ჩაებას.

მანამდე კი ჩვენს უპირველეს გუნდს ხუთდღიან ინტერვალში ორი ამხანაგური მატჩი (მალტასა და ლუქსემბურგთან) ელოდება. იმედი დავიტოვოთ, რომ ვლადიმირ გუნდი გააგრძელებს 4-მატჩიან წაუგებელ სერიას.

იმის დიდი სურვილიც გვაქვს, რომ სერიოზული საკადრო პრობლემების მიუხედავად, საქართველოს ნაკრები ამჯერადაც ისე გაგვახარებს, როგორც ორი თვის წინათ: როცა, ოთხდღიან ინტერვალში ზედიზედ დაამარცხა ლიტვისა (4:0) და ესტონეთის (2:0) ნაკრებები.

თანაც, ამჟამინდელ ორივე მეტოქესთან (განსაკუთრებით, მალტასთან), ალბანეთისა და მოლდოვის ნაკრებთა დარად ხშირად რომ გვიწევდა დაპირისპირება, დადებითი ბალანსი გვაქვს. უშუალოდ მალტასთან 8 მატჩი ჩავატარეთ, საიდანაც 5 მოვიგეთ, 2 ფრედ დავასრულეთ და ერთხელაც დავმარცხდით, ბურთების სხვაობა: 11-5.

გამარჯვება მონატრებულ სპარინგში

90-იანი წლების ბოლოდან მოყოლებული, საქართველოს ნაკრებს, წელიწადის განმავლობაში, ათამდე ამხანაგური მატჩის ჩატარება უწევდა; არადა, იყო დრო, როცა ჩვენი უპირველესი გუნდი მართლაც რომ მონატრებული იყო სპარინგმატჩებს.

ეგ კი 1993 წელს, საქართველოს ნაკრებმა მხოლოდ 1 მატჩი ჩაატარა და, აქედან გამომდინარე, მართლაც სასიხარულო იყო ის ფაქტი, როცა 1994 წლის თებერვლის დასაწყისში, საქართველოს ნაკრები მალტის საერთაშორისო ტურნირზე მიიწვიეს.

ალექსანდრე ჩივაძის ხელმძღვანელობით მოასპარეზე საქართველოს ნაკრებმა პირველი მატჩი ტურნირის უპირობო ფავორიტთან, სლოვენიის ნაკრებთან (სადაც, ევროპული დონის შემსრულებლები გამოდიოდნენ: კატანეცი, ზახოვიჩი, ფლორიანჩიჩი) მინიმალური ანგარიშით (0:1) წააგო.
მომდევნო მეტოქე კი მალტა იყო, რომელიც თემურ ქეცბაიას ერთადერთი გოლით დავამარცხეთ. აღსანიშნავია, რომ ამ ტურნირზე საქართველოს ნაკრები

თბილისური გუნდების, "დინამოსა" და "შევარდენის" ფეხბურთელებით იყო დაკომპლექტებული, ლეგიონერი კი მხოლოდ ორი გვყავდა: კახა ცხადაძე ("აინტრახტი", გერმანია) და თემურ ქეცბაია ("ანორთოსისი", კვიპროსი).

განსაკუთრებული ტესტი

იმავე, 1994 წლის ივლისში, მალტელებს თბილისში ვუმასპინძლეთ და ეს ნამდვილად არ იყო ჩვეულებრივი მატჩი! იმის გარდა, რომ საქართველოს ნაკრები 4-წლიანი პაუზის შემდეგ პირველ მატჩს ატარებდა თბილისში, თვითონ ამ შეხვედრას ჰქონდა სხვა და მართლაც განსაკუთრებული დატვირთვა.

სწორედ ამ ტესტმატჩს უნდა გაეცა პასუხი კითხვაზე, თუ რამდენად იყო მზად საქართველოს ფეხბურთის ფედერაცია, რომ კარსმომდგარი (და, ჩვენთვის სადებიუტო) შესარჩევი მატჩები თბილისში ჩაგვეტარებინა.

ამიტომაც ოყო, 1994 წლის 19 ივლისის იმ მატჩზე, უეფას საკმაოდ წარმომადგენლობითი დელეგაცია რომ გვესტუმრა. არბიტრადაც ცნობილი და ავტორიტეტული შვეიცარიელი ურს მაიერი გამოგვიგზავნეს და საბოლოოდ ყველაფერი ისე მოხდა, რომ საქართველომ ეს გამოცდა წარმატებით ჩააბარა: ამ მატჩიდან ერთ კვირაში უეფამ ნება დაგვრთო, ოფიციალური საშინაო მატჩები თბილისში ჩაგვეტარებინა...

რაც შეეხება უშუალოდ მატჩს, რომელსაც 35 ათასი მაყურებელი დაესწრო, მხოლოდ საქართველოს ჩემპიონატში მოასპარეზე ფეხბურთელებით დაკომპლექტებულმა საქართველოს ნაკრებმა ამჯერად ფრედ ითამაშა მალტელებთან. ანგარიში ჯერ სტუმრებმა გახსნეს, თუმცა, დამოუკიდებელი ქართული ფეხბურთის საუკეთესო ბომბარდირმა შოთა არველაძემ პენალტით მალევე გაათანაბრა.

აღსანიშნავია, რომ ეს იყო საქართველოს ნაკრების პირველი ოფიციალური გოლი! სხვათა შორის, მალტელებთან გამართულ ამ სპარინგში კიდევ ერთი გამორჩეული ფაქტი მოხდა საქართველოს ნაკრების ისტორიაში: ეს იყო პირველი შემთხვევა, როცა ძმები არველაძეებიდან სამივემ (რეზო, შოთა, აჩიკო) ერთად ითამაშა!

ზედიზედ ორჯერ ორბურთიანი სხვაობით...

მალტელებს ამის შემდეგ ზედიზედ ორჯერ მოვუგეთ, ორჯერვე გასვლაზე და ორჯერვე - ორბურთიანი სხვაობით! ჯერ იყო, 1998 წლის დასაწყისში მალტაზე ჩატარებული ოთხთა ტურნირი, რომელიც ვლადიმერ გუცაევის ხელმძღვანელობით მოასპარეზე საქართველოს ნაკრების გამარჯვებით დასრულდა. ჩვენმა ნაკრებმა ლატვიასა და ალბანეთის მერე, მასპინძლებსაც დამაჯერებლად აჯობა მიხეილ ყაველაშვილისა (დუბლი) და გოჩა ჯამარაულის გოლებით.

მალტელებთან მომდევნო ამხანაგურ მატჩში კი საქართველოს ნაკრებს უცხოელი მწვრთნელი მოძღვრავდა: კლაუს ტოპმიოლერმა ექსპერიმენტული შემადგენლობა დაუპირისპირა მასპინძლებს და იმდროისათვის 21 წლის ოთარ მარცვალაძისა და 19 წლის ჯაბა კანკავას გოლებით 2:0 გავიმარჯვეთ. სხვათა შორის, მარცვალაძემაც და კანკავამაც, საქართველოს ნაკრებში სადებიუტო გოლები სწორედ ამ მატჩში გაიტანეს...

ერთადერთი მარცხი

საქართველოსა და მალტის ნაკრებების ურთიერთდაპირისპირებებში, მხოლოდ და მხოლოდ ერთადერთხელ მოხდა, როცა მეტოქემ მოგვიგო! თანაც, როგორც ხშირად მომხდარა, მალტელებმაც სწორედ საქართველოს ნაკრებთან გამარჯვებით შეწყვიტეს 12-მატჩიანი მოუგებელი სერია!..

იმ მატჩამდე ჩვენს ნაკრებსაც არანაკლებ წარუმატებელი სერია ჰქონდა: ცნობილი არგენტინელი სპეციალისტის, ექტორ კუპერის ხელმძღვანელობით მოასპარეზე საქართველოს ნაკრები მალტას ათმატჩიანი მოუგებელი სერიით ეწვია, მაგრამ მალტელთა ყველა დროის საუკეთესო ფეხბურთელმა მაიკლ მიფსუდმა ორი უპასუხო გოლი გაიტანა იმ დროისთვის მართლაც უცნაური შემადგენლობით მოასპარეზე საქართველოს ნაკრების კარში.

"უცნაური" იმიტომ, რომ აშკარად "ზემოდან" წამოსული დირექტივით ჩვენს უპირველეს გუნდში არ იძახებდნენ რუსეთში წარმატებით მოთამაშე ნუკრი რევიშვილს, ალექსანდრე ამისულაშვილს, ლაშა სალუქვაძეს, დავით კვირკველიას, გოგიტა გოგუას... რომ აღარაფერი ვთქვათ, დამოუკიდებელი ქართული ფეხბურთის ერთ-ერთ ყველაზე გამორჩეულ მოთამაშე მალხაზ ასათიანზე...

ოფიციალურიც ყოფილა

2012 წლის ევროპის ჩემპიონატის შესარჩევ ციკლში, საქართველოსა და მალტის ნაკრებები ერთ ჯგუფში მოხვდნენ; პირველი მატჩი თბილისში რომ გაიმართა, ბევრისთვის მოულოდნელად, ნამეტნავად "მძიმედ" წარიმართა და კინაღამ შევრცხვით კიდეც: შეხვედრა უგოლო ფრედ სრულდებოდა, როცა მალტელთა ერთ-ერთი ფორვარდი ჩვენს მეკარესთან პირისპირ დარჩა, მაგრამ საქართველოს ნაკრების მეკარემ ნუკრი რევიშვილმა გადაგვარჩინა.

უკვე არბიტრის მიერ დამატებულ დროში კი, საქართველოს ნაკრების კაპიტნის, კახა კალაძის ზუსტი ფლანგური პასის შემდეგ, დავით სირაძემ არანაკლებ ზუსტი და ეფექტური თავური დარტყმით გამარჯვების მომტანი გოლი გაიტანა.

სხვათა შორის, ეს იყო საქართველოს ნაკრების მთავარი მწვრთნელის რანგში თემურ ქეცბაიას პირველი გამარჯვება ოფიციალურ მატჩში. ისიც უნდა ვთქვათ, რომ ეს იყო საქართველოს ნაკრების პირველი მოგება ოფიციალურ მატჩებში... 3-წლიანი პაუზის შემდეგ!

ის შესარჩევი ციკლი ჩვენთვის თავდაპირველად წარმატებულად წარიმართა, თუმცა მერე სიტუაცია შეიცვალა; მაგრამ, პლეი ოფში გასვლის შანსი მაინც გვრჩებოდა: ამისათვის კი აუცილებელი იყო ბოლო ორი მატჩის (სტუმრად მალტასთან და თბილისში საბერძნეთთან) მოგება, მაგრამ ვერ მოვახერხეთ:

მალტასთან მატჩში ჯაბა კანკავას გოლით კი დავწინაურდით, თუმცა მასპინძელთა ლიდერმა მაიკლ მიფსუდმა მართლაც ეფექტური დარტყმით ანგარიში მალევე გაათანაბრა და ეს შეხვედრაც საბოლოოდ ფრედ (1:1) დასრულდა...

დებიუტები, დაბრუნებები...

მალტელებთან ბოლო დაპირისპირება სამი წლის წინათ გვქონდა, როცა საქართველოს ნაკრების მთავარი მწვრთნელის პოსტზე სადებიუტო მატჩს ატარებდა კახა ცხადაძე. ახალმა მწვრთნელმა ტაქტიკაც ახალი (სამი ცენტრალური მცველი) შემოგვთავაზა და, რაც მთავარია, ნაკრებში დააბრუნა რამდენიმე მართლაც საკვანძო ფეხბურთელი - ალექსანდრე ამისულაშვილი წელიწადნახევრიანი, გიორგი ნავალოვსკი 7, ხოლო კახა მახარაძე - 9-წლიანი პაუზის შემდეგ.

...ნერვიული მატჩი გამოდგა, სადაც მეტოქე მხოლოდ ათ წუთში გავტეხეთ. ისე როგორ იქნებოდა, მალტელებთან მატჩში ჯაბა კანკავას რომ გოლი არ გაეტანა:

საქართველოს ნაკრების კაპიტანს თავის 14-წლიან სანაკრებო კარიერაში ჩვენი უპირველესი გუნდის მაისურით სულ 7 გოლი აქვს გატანილი და აქედან - 3 მალტის ნაკრების კარში! არბიტრის მიერ დამატებულ დროში კი, ჯაბა კანკავას პასით საბოლოო წერტილი ვაკო ყაზაიშვილმა (მისი პირველი სანაკრებო გოლი) დასვა მართლაც ეფექტური გოლით.


ყველა მატჩი
საერთაშორისო ტურნირი

მალტა-საქართველო 0:1
10.02.1994. ლა ვალეტა. ტა ქალი
0:1 ქეცბაია (15-პენ)

საქართველო: ზოიძე - ზ. რევიშვილი, კ. ცხადაძე, შელია (75. ბერაძე), კუდინოვი (55. სიდამონიძე) - ყაველაშვილი, ნემსაძე, ჯამარაული, ქეცბაია - ქინქლაძე - ყიზილაშვილი

მწვრთნელი: ალექსანდრე ჩივაძე
კაპიტანი: კახა ცხადაძე
არბიტრი: დ. იამსეკი (სლოვენია)

ამხანაგური მატჩი

საქართველო-მალტა 1:1
19.07.1994. თბილისი.
ეროვნული სტადიონი
0:1 სპიტერი (33), 1:1 შ. არველაძე (37-პენ)

საქართველო: ზოიძე - ზ. რევიშვილი, ნემსაძე, შელია, გ. ჯიშკარიანი - რ. არველაძე, ინალიშვილი (46. ყაველაშვილი), ჯამარაული, ტუღუში (46. ა. არველაძე) - ქინქლაძე - შ. არველაძე

მწვრთნელი: ალექსანდრე ჩივაძე
კაპიტანი: გოჩა ჯამარაული
არბიტრი: უ. მაიერი (შვეიცარია)

საერთაშორისო ტურნირი

მალტა-საქართველო 1:3
10.02.1998. ლა ვალეტა. ტა ქალი
0:1 ყაველაშვილი (13), 1:1 ოვერენდი (58-პენ), 1:2 ჯამარაული (71), 1:3 ყაველაშვილი (74)

საქართველო: გვარამაძე - კალაძე (79. ხვადაგიანი), შელია, სილაგაძე, ჩიხრაძე (46. ა. იაშვილი) - ქეცბაია, შეყილაძე, ნემსაძე, ჯამარაული (77. გახოკიძე) - ქინქლაძე - ყაველაშვილი

მწვრთნელი: ვლადიმერ გუცაევი
კაპიტანი: გიორგი ნემსაძე
არბიტრი: ბ. პრეგა (ალბანეთი)

ამხანაგური მატჩი

მალტა-საქართველო 0:2
01.03.2006. ლა ვალეტა. ტა ქალი
0:1 მარცვალაძე (9), 0:2 კანკავა (16)

საქართველო: ნ. რევიშვილი - დ. მჭედლიშვილი (55. ბჟალავა), ღვინიანიძე, გ. ფოფხაძე, კობიაშვილი - ცქიტიშვილი, კანკავა, განუგრავა, დ. მუჯირი (61. მახარაძე) - რ. გოცირიძე (82. გ. ნუგზარის ძე ჭელიძე), მარცვალაძე

მწვრთნელი: კლაუს ტოპმიოლერი
კაპიტანი: ლევან კობიაშვილი
არბიტრი: ვ. ბანარი (მოლდოვა)

ამხანაგური მატჩი
მალტა-საქართველო 2:0

12.08.2009. ლა ვალეტა. ტა ქალი
1:0 მიფსუდი (64), 2:0 მიფსუდი (74)

საქართველო: ლომაია - კაშია, ღვინიანიძე (82. თ. ღონღაძე), ხიზანიშვილი, გ. ფოფხაძე (64. სანაია) - ცქიტიშვილი (64. დევდარიანი), ხმალაძე, კობიაშვილი - სეთურიძე (68. მერებაშვილი), ყენია - დვალიშვილი

მწვრთნელი: ექტორ კუპერი
კაპიტანი: ლევან კობიაშვილი
არბიტრი: პ. კაილისი (მალტა)

ევროპის ჩემპიონატი

საქართველო-მალტა 1:0
08.10.2010. თბილისი. ბორის პაიჭაძე
1:0 სირაძე (90)

საქართველო: ნ. რევიშვილი - სალუქვაძე, ასათიანი, ამისულაშვილი, კალაძე - ხიზანიშვილი, გოგუა - მერებაშვილი (46. ა. იაშვილი), ანანიძე (73. დაუშვილი), კობიაშვილი - დვალიშვილი (46. სირაძე)

მწვრთნელი: თემურ ქეცბაია
კაპიტანი: კახა კალაძე
არბიტრი: ა. ბლეკი (ჩრ. ირლანდია)

ევროპის ჩემპიონატი

მალტა-საქართველო 1:1
06.09.2011. ლა ვალეტა. ტა ქალი
0:1 კანკავა (15), 1:1 მიფსუდი (25)

საქართველო: ნ. რევიშვილი - კაშია, ხიზანიშვილი, გრიგალავა, კალაძე - კანკავა, კობიაშვილი - თარგამაძე, ანანიძე (77. ს. კობახიძე), ა. იაშვილი (61. დვალიშვილი) - მარცვალაძე (66. შ. გრიგალაშვილი)

მწვრთნელი: თემურ ქეცბაია
კაპიტანი: კახა კალაძე
არბიტრი: პ. ვან ბუკელი (ჰოლანდია)

ამხანაგური მატჩი

საქართველო-მალტა 2:0
25.03.2015. თბილისი. მიხეილ მესხი
1:0 კანკავა (83), 2:0 ყაზაიშვილი (90)

საქართველო: ლორია (46. რევიშვილი) - ს. კობახიძე (84. ძალამიძე), კაშია, ს. კვირკველია (46. ყენია), ამისულაშვილი, ნავალოვსკი - კანკავა, მახარაძე - გ. ჭანტურია (64. ყაზაიშვილი), ოქრიაშვილი (71. ვაწაძე) - მჭედლიძე (71. ბ. ცხადაძე)

მწვრთნელი: კახა ცხადაძე
კაპიტანი: ჯაბა კანკავა
გაფრთხილება: ა. ანუფრიევსი (ლატვია)

ყოველდღიური სპორტული გაზეთი "ლელო"
2056
მკითხველის კომენტარები / 1 /
vadvav
0
jvarosnebi ara kvaxi.
მსგავსი ამბები
რუბრიკის სხვა სიახლეები
;