ის, რაზეც ვერც კი ვოცნებობდით - შოტლანდია თბილისში ითამაშებს!

* 2019 წლის 24 აგვისტოს: საქართველო-შოტლანდია თბილისში!
* 2019 წლის 6 ან 7 სექტემბერს: შოტლანდია-საქართველო.
* თბილისში პირველად ჩამოდის ექვსი ერის გუნდი.
* დღეისათვის: საქართველო-შოტლანდია 0:2.

საქართველოს ნაკრები 2019 წლის მსოფლიოს თასის გათამაშებისთვის მზადებას დიდი ხანია შეუდგა. ახლახან, ცნობილი გახდა, რომ მომავალ წელს, ტურნირის დაწყების წინ "ბორჯღალოსნები" ორ ტესტს გამართავენ შოტლანდიის ეროვნულ გუნდთან.

ამის შესახებ სიტყვიერი შეთანხმება ჯერ კიდევ 2016 წლის ნოემბრის ტესტებზე საქართველოსა და შოტლანდიის ნაკრებების შეხვედრის შემდეგ შედგა.

ამჯერად კი ცნობილია, რომ "სკოტებს" თბილისში, ეროვნულ სტადიონზე 24 აგვისტოს ვუმასპინძლებთ, საპასუხო მატჩი კი ედინბურგში, "მარიფილდზე" 7 სექტემბერს შედგება. აღსანიშნავია, რომ ეს იქნება პირველი შემთხვევა, როცა საქართველოს პირველი დონის სარაგბო ქვეყნების ნაკრები ეწვევა.

"2019 წლის მსოფლიოს თასამდე სულ უფრო ცოტა დრო რჩება და საქართველოს ნაკრები უკვე დიდი ხანია ემზადება. მოსამზადებელი ეტაპის ბოლოს "ბორჯღალოსნები" ორ მატჩს გამართავენ შოტლანდიის ნაკრებთან, რაც ჩვენს სამზადისს სრულყოფს.

შოტლანდიასთან მატჩს მნიშვნელოვანი დატვირთვა აქვს - ეს პირველი შემთხვევაა, როდესაც პირველი დონის სარაგბო ქვეყანა საქართველოში ჩამოვა, რისთვისაც დიდი მადლობა მინდა გადავუხადო შოტლანდიის რაგბის კავშირს, რადგანაც 2016 წელს მათთან გამართული ტესტის შემდეგ დადებული პირობა შეასრულეს და მსოფლიოს თასის წინ საქართველოში ჩამოვლენ" - თქვა რაგბის კავშირის ვებგვერდთან საუბრისას საქართველოს რაგბის კავშირის პრეზიდენტმა გოჩა სვანიძემ.

ცხადია, მიღწეული შეთანხმებით კმაყოფილია "ბორჯღალოსნების" ახალზელანდიელი თავკაცი მილტონ ჰეიგი:

"საქართველოს ნაკრებს წილად ხვდა პრივილეგია, ეთამაშოს მაღალი დონის ნაკრებს საკუთარი ოჯახის, მეგობრებისა და გულშემატკივრების წინაშე.

ჩვენ მიზნად დავისახეთ, რომ მომავალი მსოფლიოს თასისთვის კიდევ უფრო უკეთ მოვემზადოთ, ვიდრე 2015 წელს. ეს მატჩები ამ მზადების უდიდესი ნაწილია.

ეს სწორედ ის ფაქტია, რაზეც წარსულში ვერც კი ვიოცნებებდით, ახლა კი მთელი გუნდი, მოთამაშეები და ქართულ რაგბიში ჩართული თითოეული ადამიანი, ამ შესაძლებლობით აღფრთოვანებულია".

აღსანიშნავია, რომ შოტლანდიის ნაკრები ორ შეხვედრას გამართავს ჩვენს ნაკრებთან მსოფლიოს თასის წინ, ჯერ საქართველოში გვეწვევა, 6 ან 7 სექტემბერს კი "მარიფილდზე" აქეთ გვიმასპინძლებს.

საქართველოს ნაკრებმა შოტლანდიის ეროვნულ გუნდთან პირველად 2011 წელს, ახალ ზელანდიაში გამართულ მსოფლიოს თასზე ითამაშა და 6:15 დამარცხდა. ორი წლის წინათ კი "ნარშავებს" მათსავე ქვეყანაში, კილმარნოკში შევერკინეთ და 16:43 წავაგეთ.

შეგახსენებთ, რომ შოტლანდია ამჟამად მსოფლიო რაგბის რეიტინგში მე-5 ადგილზეა 83.83 ქულით. საქართველოს ნაკრები 73.96 ქულით მე-12 ადგილზეა.

ყოველდღიური სპორტული გაზეთი "ლელო"
1646
მკითხველის კომენტარები / 0 /
მსგავსი ამბები
რუბრიკის სხვა სიახლეები
;