ის გაყიდის წარსულს, მაგრამ შევა ისტორიაში. ბაიერნი, როგორც იდეალური კლუბი იურგენ კლოპისთვის

კარლ-ჰაინც რუმენიგე
...კლოპი დიდებული მწვრთნელია. ის დორტმუნდთან ერთად შევიდა ფეხბურთის ისტორიაში. ძალიან მინდა, ბაიერნი სწორედ მან ჩაიბაროს მას შემდეგ, რაც გუნდიდან კარლო ანჩელოტი წავა...

2019 წელი “ბაიერნის” ისტორიაში ერთ-ერთი ყველაზე თავისებური იყო. ნიკო კოვაჩი მთელი სეზონის განმავლობაში ებრძოდა გუნდის ლიდერებისა და გულშემატკივრების კაპრიზებს, მაგრამ საბოლოო ჯამში მაინც ვერ დაარწმუნა კლუბის ხელმძღვანელობა, რომ რევოლუციისთვის შესაფერისი მწვრთნელია.

ბოსებმა ხორვატი ერთადერთი მიზეზით დატოვეს - მათ შეიგნეს, რომ ამ დროისთვის იდეალური მწვრთნელის მოძებნა, უბრალოდ, შეუძლებელია. ყველა დაკავებულია...

როგორც წესი, “ბაიერნს” გერმანიაში ყოველთვის საუკეთესო ერგება ხოლმე, მაგრამ მიუნხენური გრანდისთვის ნამდვილ პრობლემად იქცა იურგენ კლოპის გადაბირება. შესაძლოა, კლუბის მმართველებმა, ული ჰიონესმა და კარლ-ჰაინც რუმენიგემ, შეცდომა დაუშვეს (რომელიც ცოტა ხნის წინ აღიარეს) ჯერ კიდევ 2008 წელს, როცა მოლაპარაკებულები იყვნენ კლოპთან, მაგრამ უკანასკნელ მომენტში მაინც იურგენ კლინსმანის დანიშვნა გადაწყდა. კლოპი კი წავიდა “დორტმუნდში”, სადაც თანაბრად ებრძოდა “ბაიერნს” და ორჯერ მოიგო ბუნდესლიგა.

კლოპის დიდი წარმატებების მიუხედავად, “ბაიერნში” ის დროებით დაივიწყეს. მთავარი მწვრთნელის პოსტზე ერთმანეთს ცვლიდნენ ლუის ვან გაალი, იუპ ჰაინკესი, პეპ გვარდიოლა... 2013 წელს “ბაიერნმა” მოიგო ჩემპიონთა ლიგა, დაამარცხა რა ფინალში კლოპის “დორტმუნდი”.

თანდათან დაბერდა ის თაობა, რომელმაც “ბაიერნის” ჩემპიონობა ტრადიციულ ამბად, ხოლო ბუნდესლიგა სრულ ფორმალობად აქცია. ჯერ კიდევ 2016 წელს რუმენიგემ განაცხადა: 

“კლოპი დიდებული მწვრთნელია. ის “დორტმუნდთან” ერთად შევიდა ფეხბურთის ისტორიაში. ძალიან მინდა, “ბაიერნი” სწორედ მან ჩაიბაროს მას შემდეგ, რაც გუნდიდან კარლო ანჩელოტი წავა”, - განაცხადა მან 2016 წელს.

მას შემდეგ, რაც “ლივერპულმა” ჩემპიონთა ლიგა მოიგო, “ბაიერნისა” და მსოფლიო ფეხბურთის ცოცხალმა ლეგენდამ, ფრანც ბეკენბაუერმა, შემდეგი თქვა: “ის დიდი მწვრთნელია. მან განაგრძო გზა, რომელიც ჯერ კიდევ “დორტმუნდში” დაიწყო და “ლივერპული” სულ სხვა დონეზე გაიყვანა”.

სხვათა შორის, ბეკენბაუერის ამ სიტყვებს კლოპი ძალიან თბილად გამოეხმაურა და სულაც არ გამორიცხა “ბაიერნში” გადასვლა: “თუ მან ეს თქვა, უკვე ძალიან სასიამოვნოა. უარესი იქნებოდა, ეთქვა, რომ მე საერთოდ არ გამოვდგები ამ სამუშაოსთვის”.

“ბაიერნს” კლოპის გადაბირების შანსი იმ შემთხვევაში გაეზრდებოდა, თუ “ლივერპული” ჩემპიონთა ლიგის ფინალს წააგებდა. მაგრამ მოხდა პირიქით და დღეს გერმანელს, უბრალოდ, აღმერთებენ “ლივერპულის” გულშემატკივრები. მათ განწყობაზე არც ის მოქმედებს, რომ კლოპის გუნდმა პრემიერლიგაში საჩემპიონო რბოლა წააგო “მანჩესტერ სიტისთან”.

...კოვაჩი კი ჯერჯერობით გუნდში რჩება. რა მოხდება იმ შემთხვევაში, თუ “ბაიერნის” გაახალგაზრდავების პროცესი ჩავარდება? უნდა ვივარაუდოთ, რომ “რეკორდმაისტერი” ჟოზე მოურინიოზე გავა, ან პენსიიდან გამოიხმობს იუპ ჰაინკესს.

და მაინც, ყველაზე მეტად “ბაიერნს” ამ ეტაპზე კლოპი გამოადგება. გუნდი თანდათან იკრებს ახალგაზრდა, ნიჭიერ გერმანელ ფეხბურთელებს. ისეთ მოთამაშეებს, რომლებიც წარმოადგენენ ეროვნული გუნდის ხერხემალს. 

მიუხედავად იმისა, რომ კოვაჩმა “ბაიერნთან” ერთად დუბლი მოიგო, მან გულშემატკივრები მაინც ვერ დაარწმუნა მის შეუცვლელობაში. კლოპის კიდევ ერთი თვისებაა ის, რომ მას გუნდის ერთ ოჯახად გადაქცევა შეუძლია. ეს კი “ბაიერნს” ძალიან სჭირდება.

ბრიტანეთში გატარებული 3,5 წლის განმავლობაში ჰერ იურგენმა დაამტკიცა, რომ შემტევი ფეხბურთის აპოლოგეტია. შეტევა არის ის, რაც ძალიან სჭირდება “ბაიერნს”. მისი გადაბირება ამადაც მიაჩნიათ საშურ საქმედ.

კლოპის კიდევ ერთი მთავარი პლუსი ახლახან მოგებული ჩემპიონთა ლიგაა. გერმანელმა “ბაიერნში” გამარჯვებულის მენტალიტეტი უნდა მიიტანოს. კლოპს აქამდე შეფარვით “უიღბლო რომანტიკოსს” ეძახდნენ, მაგრამ ახლა ეს კლიშე აღარ მოქმედებს. პირიქით, ჩემპიონთა ლიგის მოგება უდიდესი ბონუსია.

არის კიდევ ერთი, ძალიან მნიშვნელოვანი მომენტი - “ბაიერნი” აქცენტს აკეთებს ახალგაზრდა ფეხბურთელებზე, ისეთ მოთამაშეებზე, რომელთაც პროგრესი უნდათ და სჭირდებათ იმისთვის, რომ უმაღლეს დონეს მიაღწიონ.

კლოპს ზუსტად ეს შეუძლია. აგერ, თვალსაჩინო მაგალითი - ვირჯილ ვან დეიკი ძალიან კარგი მცველი იყო, გერმანელი მწვრთნელის ხელში კი “ოქროს ბურთის” მოგების ერთ-ერთ მთავარ პრეტენდენტად იქცა.

თავად ჰოლანდიელი მცველიც არ უარყოფს, რომ მის პროგრესში კლოპის წვლილი უდიდესია. იურგენმა მასში რაღაც ახალი აღმოაჩინა. ისეთი, რაც აქამდე დაფარული იყო ყველასთვის.

“ახალი სისხლი” არის ის, რაც “რეკორდმაისტერს” ყველაზე მეტად სჭირდება. მით უმეტეს, მომავალ სეზონში “ბაიერნის” შემადგენლობაში აღარ ითამაშებენ ფრენკ რიბერი და არიენ რობენი, აღარ იქნება რაფინია, გასარკვევია ხამეს როდრიგესისა და თომას მიულერის საკითხი...

ვეტერანები კოვაჩის იგნორირებით ცდილობენ, ბოლომდე წაიყვანონ აღლუმი. აშკარაა, ხორვატს დიდი დისკომფორტი ექმნება ამის გამო. კლოპი სხვა შემთხვევაა. მას ისეთი ხასიათი აქვს, რომ მსგავსს, უბრალოდ, ვერავინ გაუბედავს.

ამის მაგალითები უკვე არსებობს. მაგალითად, “ლივერპულში” მუშაობისას გერმანელი მწვრთნელი ბოლომდე ახერხებს გასახდელის კონტროლს. ეს მაშინ, როცა მერსისაიდულ კლუბში არაერთი გამორჩეული ვარსკვლავია. ცხადია, ამ ვარსკვლავებს გამორჩეული ხასიათიც აქვთ. კლოპი კი ამ ყველაფრის დიდებული მმართველია.

ის თავისი მუშაობით ყოველთვის არწმუნებს გულშემატკივარს პერსპექტივაში. ყველას კარგად გვახსოვს, როგორი პირველი სეზონი ჰქონდა მას “ლივერპულში”. მაშინ მისი ხელმძღვანელობით გუნდი მე-8 ადგილზე გავიდა. სხვა მწვრთნელს ასეთ შედეგს ნამდვილად არ აპატიებდნენ, მაგრამ კლოპის მიმართ ერთი კინკილა საყვედურიც კი არ ყოფილა.

საქმე ისაა, რომ ქომაგებს ძალიან მოსწონდათ ის შემტევი სტილი, რომელსაც ის ქადაგებს. შემტევი ფეხბურთის ხათრით ბევრი რამ შეიძლება მოითმინო. მით უმეტეს მაშინ, როცა ნათლად ჩანს - შედეგის მიღწევა უმოკლესი დროის საქმეა...

თავის მხრივ, “ბაიერნში” გადასვლა კლოპისთვისაც ძალიან კარგი ვარიანტი უნდა იყოს. ის ამით ახალ ფურცელს გადაშლის თავის კარიერაში. ზოგადად, ცნობილია, რომ ჩემპიონთა ლიგის მოგების შემდეგ გარკვეულწილად ჭირს ფეხბურთელების მოტივირება. კლოპი აუცილებლად შეეჯახება ამ პრობლემასაც. პრემიერლიგის მოგებისთვის ბრძოლაც ისევ ურთულესი საქმე იქნება, რადგან “მანჩესტერ სიტის” ვარსკვლავური შემადგენლობა არსად წასულა...

რა თქმა უნდა, იმ შემთხვევაში, თუ კლოპი მივა “ბაიერნში”, მას ძალიან გაუბრაზდებიან “დორტმუნდის” გულშემატკივრები. დღემდე ის მათი ნამდვილი კერპია. თუმცა ეს მას ყველაზე ნაკლებად უნდა ადარდებდეს - მან “დორტმუნდისთვის” ყველაფერი გააკეთა, მისი მოგებული ტიტულები ამ კლუბისთვის ძალიან ბევრ რამეზე მეტყველებს.

ნებისმიერი მწვრთნელის კარიერაში დგება მომენტი, როცა ის ვალდებულია, გადადგას მკვეთრი ნაბიჯი. ამ დროისთვის საქმე ასეა - კლოპი სჭირდება “ბაიერნს” და პირიქით. ეს ის შემთხვევაა, როცა ორივეს ინტერესები ერთმანეთს ემთხვევა.

ვირჯილ ვან დეიკი ძალიან კარგი მცველი იყო, გერმანელი მწვრთნელის ხელში კი ოქროს ბურთის მოგების ერთ-ერთ მთავარ პრეტენდენტად იქცა...

ყოველდღიური სპორტული გაზეთი "ლელო"
2253
მკითხველის კომენტარები / 0 /
მსგავსი ამბები
რუბრიკის სხვა სიახლეები
;