ის ურჩევნია დედასა... საქართველომ მშვილდოსნობაში ევროპის გრან პრი მოიგო

სოფიაში დასრულებულ მშვილდოსანთა ევროპის გრან პრიზე წარმატებით გამოვიდა საქართველოს ქალთა ნაკრები, რომელიც გუნდური პირველობის გამარჯვებული გახდა.

საინტერესოა, რომ გუნდს საამისოდ პირველ ორ წრეში გადასროლა დასჭირდა, გზად კი ისეთი ძლიერი კონკურენტები დაამარცხა, როგორიც უკრაინა და იაპონიაა.

ჩვენი ნაკრების შემადგენლობაში ამჯერად მსოფლიოს ვიცე-ჩემპიონი პირადში და ევროპისა - გუნდურში ქრისტინე ესებუა და დედა-შვილი, ევროპის ორგზის ფინალისტი გუნდურში ხათუნა ნარიმანიძე და ციკო ფუტკარაძე შედიოდნენ.

ამ სამეულმა საკვალიფიკაციო ეტაპი 1828 ქულით დაასრულა და პლეი ოფი მე-9 ადგილით დაიწყო. პირველ წრეში მათ ესტონეთს მოუგეს გადასროლაში - 5:4, რადგან ძირითადი დრო ფრედ, 2:2 დასრულდა.

ესტონეთის ნაკრები ნამდვილად არ მიეკუთვნება გრანდებს და ვერც ჩვენნაირი მიღწევებით დაიკვეხნიან - ვერც პირადში და ვერც - გუნდურში, თუმცა სოფიაში საკმაოდ კარგად ისროლეს და ჩვენზე უკეთ გამოვიდნენ, მე-8 ადგილით გავიდნენ პლეი ოფში.

პირველი სეტიც მათ მოგვიგეს - 54:46, მაგრამ ჩვენებმა შეძლეს მობილიზება და მომდევნო ორში 54:49, 52:49 იმარჯვეს. საერთო ანგარიშშიც 4:2 დაწინაურდნენ, თუმცა ესტონელებმა მეოთხე სეტში ერთი ქულით, 53:52 იმარჯვეს და ეს შედეგიც გააყაიმეს. საბედნიეროდ, ჩვენებმა გადასროლაში, სადაც სამივე სპორტსმენი თითო ისარს ისვრის, შეძლეს კონცენტრაცია და 26:24 იმარჯვეს.

ათიანთან უფო ახლოს

კიდევ უფრო დაძაბული და დრამატული გამოდგა მეოთხედფინალური პაექრობა უკრაინასთან, რადგან აქ ძირითადი სერიებიც და გადასროლაც ფრედ დასრულდა, თუმცა ჩვენებს დამატებითი მაჩვენებლებით ჰქონდათ უპირატესობა.

ესტონეთისგან განსხვავებით, უკრაინა ნებისმიერ შეჯიბრებაზე ანგარიშგასაწევი ძალაა და პლეი ოფშიც პირველ ნომრად იყო შესული - საკვალიფიკაციო ეტაპი 1951 ქულით მოიგეს. ამასთან, პირადშიც გამარჯვებული მათი ნაკრების წევრი ანასტასია პავლოვა გახდა 663-ით.

შეხვედრაც მათი უპირატესობით დაიწყო და პირველი სეტიც მოიგეს - 56:53. თუმცა მოსვენებას და წინ გაჭრის საშუალებას არც თამაზ ფუტკარაძის შეგირდები აძლევდნენ.

შეხვედრაც გარდამავალი უპირატესობით მიდიოდა და ჩვენებმა ბოლო სეტის მოგებით შეძლეს საერთო ანგარიშის გათანაბრება: 2:2 (55:53; 52:54; 53:49). წესისამებრ, დაინიშნა გადასროლა, თუმცა ისიც ფრედ, 27:27 დამთავრდა. საბოლოოდ გამარჯვებული დამატებითი მაჩვენებლებით გამოვლინდა - რადგან 10-იანთან უფრო ჩვენებურთა ისრები იყო, მოგებაც და ნახევარფინალის საგზურიც მათ დარჩათ.

მოულოდნელად იოლად

ქართველებს იოლი მეტოქე არც იქ ელოდათ - ბელარუსი. ისინი არ არიან არც უკრაინასავით ფავორიტები და ბოლო წლებში არც ჩვენნაირი მიღწევები ჰქონიათ;

დღეისათვის მათ ვაჟთა ნაკრები უფრო ძლიერი ჰყავთ, მაგრამ ნებისმიერ შეჯიბრებაზე ისინიც ანგარიშგასაწევი ძალა არიან, მათი ცალკეული მსროლელები მუდამ ახერხებენ მედლის ზონაში შეღწევას, ხოლო სოფიაში საკვალიფიკაციოში მეოთხე იყვნენ, მეოთხედფინალიდან კი მსოფლიოს ჩემპიონი რუსეთი დაიფრინეს (6:2).

ჩვენმა ნაკრებმა ამ დონის მეტოქეს ყველაზე იოლად, 6:2 აჯობა. მათ მხოლოდ მეორე სეტი დაუთმეს - 53:55, დანარჩენებში კი 56:52, 53:48; 56:51 მოუგეს და ფინალში გავიდნენ.

ევროპული ტურნირის გადამწყვეტ შეხვედრაში ჩვენებურთა მეტოქე აზიური გუნდი - იაპონია აღმოჩნდა. "საკურები" პლეი ოფში მეორე შედეგით გავიდნენ და შედარებით უფრო იოლი ბადე ერგოთ: ძლიერთაგან მხოლოდ თურქებს გადაეყარნენ ნახევარფინალში და 6:2 აჯობეს.

იაპონიის ნაკრების სიძლიერეზე ლაპარაკი, ვგონებ, უადგილოა, რადგან ისინი ტოპ-კლასს მიეკუთვნებიან და 2012 წელს სწორედ მათ მოგვიგეს ლონდონის საოლიმპიადო შესარჩევი ტურნირი. თანაც, სოფიაში ძირითადი გუნდით იყვნენ ჩასულები და მათი ლიდერი რენ ჰაიაკავა საკვალიფიკაციოშიც მეორე იყო 658 ქულით, მხოლოდ პავლოვას ჩამორჩა. მესამეზეც იაპონელი იყო - 656-იანი ტომოკა ოჰაში ანუ სამი სპორტსმენიდან ორი სამეულში ჰყავდათ.

გამარჯვება გრანდთან

როგორც გითხარით, ფინალში იაპონელები უფრო დასვენებული გავიდნენ, ჩვენებმა კი სამივე შეხვედრაში ბოლომდე იომეს. საბედნიეროდ, შემართება ფინალშიც შეინარჩუნეს და საკმაოდ ძლიერ მეტოქეს 5:3 მოუგეს.

შეხვედრა აზიელების უპირატესობით დაიწყო - თავიდან 56:49 იმძლავრეს და გაჩნდა შიში, თითქოს წინასწარ ეტაპებზე დახარჯული ენერგიის მოკრება შეუძლებელი გახდებოდა, მაგრამ ჩვენმა ქალებმა კიდევ ერთხელ მოიკრიბეს ძალა და ჯერ ფრედ დაასრულეს სეტი - 53:53, დანარჩენ ორში კი 56:51; 52:51 იმძლავრეს და ჩემპიონის ტიტულიც დაისაკუთრეს.

რიოს ოლიმპიადაზე განცდილი მარცხის შემდეგ (რაც მთლიანად ფსიქოლოგიური ფაქტორის ბრალია) გუნდი ვერა და ვერ შევიდა ფორმაში, ვერ შეძლეს მობილიზება.

ამას ფედერაციის ბიუჯეტის შემცირებაც დაემატა და წლეულს შეკრებებიც შედარებით მოაკლდათ, რაც შედეგზეც უარყოფითად აისახა - ოლიმპიადამდე ყველა შეჯიბრების წინ ჰქონდათ შეკრება და იმ სეზონში სულ ორიოდე ტურნირი ჩააგდეს; სწორედ მაშინ გავიდნენ ევროპის გუნდური პირველობის ფინალშიც. ვფიქრობთ, სოფიაში მოპოვებული წარმატება ნაკრებს ისევ დაუბრუნებს ადრინდელ სიძლიერეს.

ვაჟების ორი წრე

სოფიაში ჩვენგან ქალებთან ერთად ვაჟთა სრულად დაკომპლექტებული გუნდიც გამოდიოდა: ლაშა ფხაკაძე, ზურაბ მესტვირიშვილი და ჯაბა მოსეშვილი.
ქალებიდან შესარჩევში ყველაზე უკეთ ესებუა გამოვიდა - 623 ქულით 26-ე ადგილზე გავიდა. თუმცა ამ პოზიციაზე სამი მოცილე ჰყავდა, მაგრამ უკრაინელ ირინა კოჩინას და პოლონელებს - კამილა ნაპლოჟეკს და მალგორზატა გორალს დამატებითი მაჩვენებლებით აჯობა. ფუტკარაძე 616 ქულით ზუსტად მე-40 ადგილზე აღმოჩნდა, ნარიმანიძე კი 589-ით 55-ე იყო.

ვაჟებში ფხაკაძემ მეორე სერია საკმაოდ ძლიერად ჩაატარა - პირველში თუ 47-ე იყო, აქ 26-ე აღმოჩნდა. საბოლოოდ ის 649 ქულით 38-ზე გავიდა. მესტვირიშვილი 635-ით 65-ე იყო, მოსეშვილი კი 631-ით 69-ზე დარჩა. ამ ტრიოს 1915 ქულა დაუგროვდა, რაც გუნდურში მე-14 შედეგი აღმოჩნდა. პლეი ოფში მათი პირველი მეტოქე ისრაელი აღმოჩნდა, რომელსაც იოლად მოუგეს - 6:0 (47:39; 54:46; 48:45), შემდეგ კი ასეთივე "მშრალი" ანგარიშით წააგეს ჰოლანდიასთან (51:57; 52:55; 53:56).

მარცხი რუსებთან მიქსში

შერეული წყვილი ესებუამ და ფხაკაძემ შეადგინეს. მათ 1272 ქულა დაუგროვდათ და პლეი ოფში მე-13 შედეგით შევიდნენ. იქ ჯერ 5:1 აჯობეს ბერძნულ დუეტს, მერე კი ასეთივე ანგარიშით თვითონ წააგეს რუსების წყვილთან.

პირად პირველობაში უფრო უკეთ ქალები გამოვიდნენ, რომლებმაც ორ-ორი წრე გაიარეს და 1/16-ფინალამდე მივიდნენ, ვაჟებში კი ეს მხოლოდ მოსეშვილმა შეძლო.

ესებუა თავდაპირველად თავისუფალი იყო, მეორეში კი 6:4 მოუგო იტალიელთა მსოფლიოს ჩემპიონს გუნდურში გუანდალინა სარტორის. ამის შემდეგ რუს სვეტლანა გომბოევასთან 2:6 წააგო.

დედა-შვილს მოგებისთვის გადასროლა დასჭირდათ. ფუტკარაძემ პირველ რაუნდში ბულგარელ თეოდორა ივანოვას არ დაუტოვა შანსი - 6:0, ჰოლანდიელ ესტერ დედენთან კი დამატებით სროლამდე მივიდა საქმე, რომელიც ჩვენებურმა 9:7 მოიგო და შეხვედრაში 6:5 იმარჯვა.

ის უკრაინელთა ლიდერ ვერონიკა მარჩენკოსთან 4:6 დამარცხდა ძალიან დრამატულ პაექრობაში: 0:2 ამოუქაჩა და დამატებით სერიაში წააგო. ნარიმანიძემ თავდაპირველად ბრიტანელ რებეკა ტიპინგს გადასროლაში 6:5 აჯობა, რადგან დამატებითი ისარი პირდაპირ შუა ცენტრში დაუსვა, მერე კი ესტონელ ლაურა ნურმსალუს 6:4 მოუგო. საბოლოოდ მან პოლონელ კაროლინა ფარასივიჟთანაც ასეთივე ანგარიშით წააგო და მანაც მეხუთე, დამატებითი სეტი დათმო ერთი ქულით: 27:28.

მოსეშვილმა პირველ რაუნდში სლოვაკი ვლადიმირ ჰურბანი ჩამოიშორა, თუმცა საამისოდ მასაც დამატებითი სროლა დასჭირდა. ეს ისარი პირდაპირ 10-იანში გაარტყა, მეტოქეს კი 7-იანი ჰქონდა და ჩვენებურმა შეხვედრა 6:5 მოიგო. მეორე წრეში უფრო იოლად გაუმკლავდა ჩეხ ერიკ ებერმანს - 6:2, მესამეში კი 1:7 წააგო იტალიელ ამადეო ტონელისთან.

პირველი წრე მესტვირიშვილმაც გაიარა - რუმინელ რაზვან მარკუს 6:2 მოუგო, მაგრამ მერე რუს ალდარ ციბიკჟაპოვთან 4:6 წააგო. ფხაკაძე პირველივე წრეში დამარცხდა სლოვაკ ანდრეი ფრანკუსთან, თუმცა - გადასროლაში: 5:6. საინტერესოა, რომ დამატებითი ისარი ორივემ 10-იანში მოარტყა, მაგრამ უფრო ცენტრისკენ სლოვაკისა იყო და ასპარეზობაც იმან გააგრძელა.

ყოველდღიური სპორტული გაზეთი "ლელო"
781
მკითხველის კომენტარები / 0 /
მსგავსი ამბები
რუბრიკის სხვა სიახლეები
;