მერაბ შარიქაძე La Gazzetta dello Sport-თან: შეგისწავლეთ და მზად ვართ, გამარჯვებისთვის! [VIDEO]

მთელი საქართველო მოუთმენლად ელის იტალიის ნაკრებთან ტესტმატჩს, რომელიც შაბათს, 10 ნოემბერს, ფლორენციის "არტემიო ფრანკიზე" გაიმართება და, შესაძლოა, საეტაპოც იყოს "ბორჯღალოსნებისთვის" "6 ერისკენ" მიმავალ რთულ გზაზე. თავად იტალიელებიც დიდ სამზადისში არიან და კბილებს ილესავენ, რადგან იციან, რომ თუ ვინმეს ადგილი შეეწირება საქართველოს ნაკრების შესვლას "6 ერის" გათამაშებაში, ეს სწორედ იტალიის ნაკრები იქნება.

როგორც ჩვენი ნაკრების მწვრთნელმა მილტონ ჰეიგმა თქვა, ეს არის შესანიშნავი შანსი, ვაჩვენოთ პროგრესი მათ, ვინც "6 ერში" გადაწყვეტილებებს იღებს.

საქართველოს ნაკრების 25 წლის კაპიტანი მერაბ შარიქაძე (57 კეპი), რომელიც ხანგრძლივი ტრავმის შემდეგ ბრუნდება, პოპულარულ გამოცემა "გაძეტა დელო სპორტთან" ამბობს: 

"საქართველო ყოველთვის გამარჯვებისთვის იბრძვის, მაგრამ რომ გავიმარჯვოთ, აუცილებლად კონკურენტუნარიანი ნაკრები უნდა გვყავდეს, მიუხედავად იმისა, რომ გამარჯვება აუცილებელი არ არის შენი სიძლიერის დასამტკიცებლად. საქართველოს ნაკრები მზად არის, დიდი ბრძოლა გაუმართოს იტალიას და საამისოდ, მთელი თავისი შესაძლებლობები გამოიყენოს...

წნეხი? რა თქმა უნდა, წნეხი იქნება, მაგრამ ჩვენ პროფესიონალები ვართ და ვიცით, როგორ უნდა გავუმკლავდეთ ამგვარ სიძნელეებს. კარგად შევისწავლეთ იტალიის ნაკრები, თითოეულმა ჩვენმა მოთამაშემ კარგად იცის, რას წარმოადგენს თითოეული იტალიელი მორაგბე, ვინც შაბათს მოედანზე იქნება. ჩვენ გვაქვს მომზადებული ტაქტიკური დავალებები და ვეცდებით, ეს ყველაფერი უშუალოდ თამაშისას ჩვენს სასარგებლოდ ვამუშაოთ. საქართველო მზად არის გამარჯვებისთვის", - ამბობს შარიქაძე.

1761
მკითხველის კომენტარები / 0 /
მსგავსი ამბები
რუბრიკის სხვა სიახლეები
;