იტალია. სერია A. XVII ტური. რომა შინაურებმა დაღუპეს

სერია A-ს მორიგი ტურის მთავარი მატჩი ტურინში შედგა, სადაც მასპინძელმა "იუვენტუსმა" მინიმალური ანგარიშით დაამარცხა "რომა" და "ნაპოლისთან" საჩემპიონო დევნას აგრძელებს.

შეხვედრის ერთადერთი გოლი მაროკოს ნაკრების კაპიტანმა მეჰდი ბენატიამ მიითვალა. თავის დროზე, ბენატია "რომაში" თამაშობდა. ისევე, როგორც "იუვეს" კიდევ ორი ფეხბურთელი - მეკარე ვოიცეხ შჩესნი და ნახევარმცველი მირალემ პიანიჩი.

გოლი ჩახვეულ საფეხბურთო სიუჟეტს მოჰყვა - "იუვემ" კუთხური ჩააწოდა. ჯორჯო კიელინის მიერ დარტყმული ბურთის მოგერიება მეკარე ალისონმა მოახერხა, დამატებაზე კი ბენატიამ იმარჯვა - მის დარტყმულს ხარიხა გადაეღობა, თუმცა გადამწყვეტ წამს ბურთთან ისევ მაროკოელი აღმოჩნდა.

ზოგადად, ეს იტალიის ჩემპიონატის ერთ-ერთი ყველაზე თვალსასეირო თამაში გახლდათ. არაერთი საგოლე მომენტი შეიქმნა. იყო ეპიზოდები, როცა გოლი თითქოს გარდაუვალი ჩანდა, მაგრამ უკანასკნელ წამს ხან მეკარეები თამაშობდნენ კარგად, ხან კიდევ ძელი თუ ხარიხა ერთვებოდა საქმეში.

მთავარი მოვლენები მატჩის მიწურულს განვითარდა. პატრიკ შიკი მეკარე შჩესნისთან პირისპირ გავიდა. ზაფხულში ჩეხი შემტევი კინაღამ "იუვენტუსში" გადავიდა. მისი ტრანსფერი უკანასკნელ წამს ჩაიშალა.

შიკს დიდებული საგოლე შანსი ჰქონდა, მაგრამ პოლონელმა მეკარემ მატჩის გმირის მანტია არავის დაუთმო. ისე ჩანს, ჯანლუიჯი ბუფონს საიმედო შემცვლელი ჰყავს.

კომენტარები

მასიმილიანო ალეგრი ("იუვენტუსის" მთავარი მწვრთნელი): "ჩვენ ძალიან მაგარი თამაში ვნახეთ. ეს იყო მატჩი, რომლითაც უნდა გესიამოვნა. ბედნიერი ვარ გამარჯვებით, თუმცა ჩვენ კიდევ უფრო უნდა მოვუმატოთ.

რაც შეეხება დიბალას უთამაშებლობას, მიმაჩნია, რომ ის შესანიშნავი ფეხბურთელია და კიდევ არაერთ გოლს გაიტანს. მან სიმშვიდე უნდა შეინარჩუნოს".

ეუსებიო დი ფრანჩესკო ("რომას" მთავარი მწვრთნელი): "კარგი ფეხბურთი იყო. საკუთარ თავზე ვიღებ პასუხისმგებლობას. კი, შიკმა ვერ გაიტანა ბოლო წამზე და წავაგეთ, მაგრამ ამით ცხოვრება არ მთავრდება. ჩვენ ვაგრძელებთ ბრძოლას უმაღლესი მიზნებისთვის".

* * *

პირველ ტაიმში ლამაზი სპექტაკლი დადგეს "ნაპოლიმ" და "სამპდორიამ". საბოლოოდ, უხვგოლიან თრილერში ფავორიტმა მოიგო, შეინარჩუნა ლიდერის პოზიცია და გაახარა საკუთარი გულშემატკივარი.

რაც შეეხება მარეკ ჰამშიკს, მან ნეაპოლურ კლუბში გატანილი გოლების რაოდენობით (116) თვით დიეგო მარადონას გადაუსწრო და "ნაპოლის" ყველა დროის საუკეთესო ბომბარდირი გახდა.

მაურიციო სარის გუნდმა დაამტკიცა, რომ ბოლომდე აპირებს სკუდეტოსთვის ბრძოლას. რაც შეეხება თავად სარის, მან ასეთი კომენტარი გააკეთა თამაშის დასრულების შემდეგ:

"ჩვენ ნამდვილი თრილერი ვიხილეთ. გამარჯვება ძალიან სასიამოვნოა. უნდა გითხრათ, რომ ეს იყო, ფსიქოლოგიური თვალსაზრისით, ძალიან მნიშვნელოვანი 3 ქულა. ახლა წავალ და დედას მოვინახულებ", - თქვა სარიმ.

როგორც ჩანს, მართლდება მოლოდინი და "ინტერი" სკუდეტოსთვის ვერ იბრძოლებს. "სასუოლოსთან" მარცხი სწორედ ამის დასტური იყო. ეს მატჩი დიდ იმედგაცრუებად იქცა მაურო იკარდისთვის, ვინც თერთმეტმეტრიანის გატანა ვერ მოახერხა.

"მილანი" კი მართლაც რომ ჯოჯოხეთშია. "ატალანტასთან" მორიგი საშინაო მარცხი კიდევ ერთი საფუძველი იყო ქომაგისთვის, რომ პროტესტი გამოეხატა. "მილანი" ისევ ძალიან უკბილო იყო.

"მე დღეს "მილანის" მთავარი მწვრთნელი ვარ, მაგრამ ეს ყველაზე პატარა პრობლემაა ჩვენი გუნდისთვის. მხოლოდ გატუზო რომ იყოს პრობლემა, წავიდოდი, მაგრამ ასე არ არის. ჩვენ რამდენიმე რამ არ გვყოფნის და, მათ შორის, მთავარი არის გუნდურობა, ვაჟკაცობა, რთულ მომენტში მობილიზება", - თქვა ჯენარო გატუზომ.

ფაქტია, შექმნილი მდგომარეობიდან რაღაც გამოსავალი უნდა მოინახოს, თორემ "მილანი" მართლაც სამარცხვინო ფურცელს ჩაწერს თავის უმდიდრეს იტორიაში.

ფაქტები

* "იუვენტუსს", ყველა ტურნირის გათვალისწინებით, უკვე 8 მატჩია გოლი არ გაუშვია. ეს ამ გუნდის უგრძესი "მშრალი" სერიაა 2016 წლის თებერვლის შემდეგ.

* 2017 წლის მაისის შემდეგ "ინტერმა" პირველად წააგო ზედიზედ 2 მატჩი, ხოლო უკანასკნელ 3 მატჩში მხოლოდ 1 გოლი გაიტანა.

* ბოლო 70 წლის განმავლობაში პირველად მოხდა, რომ მილანური კლუბები ერთად დამარცხდნენ ზედიზედ ორ ტურში.

* "სასუოლოს" მეკარე ანდრეა კონსილიმ სერია A-ში დებიუტის (2008/09 წლების სეზონი) 13 პენალტი მოიგერია. მხოლოდ სამირ ჰანდანოვიჩმა ("ინტერი") შეძლო უფრო მეტი (21) თერთმეტმეტრიანის მოგერიება.

* დიეგო ფალჩინელიმ ("სასუოლო") "ინტერის" წინააღმდეგ ჩატარებულ სერია A-ს 2 მატჩში 3 გოლი გაიტანა.

* ფაბიო კვალიარელამ ("სამპდორია") 2010 წლის შემდეგ პირველად შეძლო ზედიზედ ორ მატჩში დუბლის შესრულება.

კიევო-ბოლონია 2:3

გოლები: 0:1 დესტრო (4), 1:1 ინგლეზე (32), 1:2 ვერდი (50), 2:2 კაჩატორე (85), 2:3 დესტრო (90)
გაძევება: პოლი (81. ბოლონია)

კალიარი-ფიორენტინა 0:1
გოლი: 0:1 ბაბაკარი (82)
გაძევება: ჟოაო პედრო (90+3. კალიარი)

ლაციო-კროტონე 4:0
გოლები: 1:0 ლუკაკუ (56), 2:0 იმობილე (78), 3:0 ლულიჩი (86), 4:0 ანდერსონი (89)

ჯენოა-ბენევენტო 1:0
გოლი: 1:0 ლაპადულა (90+2-პენ)

ნაპოლი-სამპდორია 3:2
გოლები: 0:1 რამირესი (2), 1:1 ალანი (16), 1:2 კვარიარელა (27-პენ), 2:2 ინსინიე (33), 3:2 ჰამშიკი (39)
გაძევება: მარიო რუი (77)

სასუოლო-ინტერი 1:0
გოლი: 1:0 ფალჩინელი (34)
გამოუყენებელი პენალტი: იკარდი (49. ინტერი)

სპალ-ტორინო 2:2
გოლები: 0:1 ფალკე (1), 0:2 ფალკე (10), 1:2 ვივიანი (42), 2:2 ანტონიჩი (69-პენ)

უდინეზე-ვერონა 4:0
გოლები: 1:0 ბარაკი (27), 2:0 ვიდმერი (44), 3:0 ბარაკი (68), 4:0 ლასანია (80)

მილანი-ატალანტა 0:2
გოლები: 0:1 კრისტანტე (32), 0:2 ილიჩიჩი (71)

იუვენტუსი-რომა 1:0
გოლი: 1:0 ბენატია (18)

ბომბარდირები: 17 - მაურო იკარდი (ინტერი); 16 - ჩირო იმობილე (ლაციო); 12 - პაულო დიბალა (იუვენტუსი); 10 - დრის მერტენსი (ნაპოლი), ფაბიო კვალიარელა (სამპდორია); 9 - გონსალო იგუაინი (იუვენტუსი).

მომდევნო ტური

29 დეკემბერი: კროტონე-ნაპოლი

30 დეკემბერი: ფიორენტინა-მილანი, რომა-სასუოლო,

ატალანტა-კალიარი, ბენევენტო-კიევო, ბოლონია-უდინეზე,

სამპდორია-სპალ, ტორინო-ჯენოა,

ინტერი-ლაციო, ვერონა-იუვენტუსი

ყოველდღიური სპორტული გაზეთი "ლელო"
841
მკითხველის კომენტარები / 0 /
მსგავსი ამბები
რუბრიკის სხვა სიახლეები
;